¿Hukta hukta parlaqku Dios?

DIOSQA manam hukta hukta parlaq nunakunanötsu. Tsëmi kikin kënö nin: “Noqam Jehová kä, imëpis kanqänöllam këkä”. “Y pepa shonqunqa manam tumacantsu” nirpis Biblia willakunmi (Malaquías 3:6; Santiagu 1:17). Tsënö kaptinmi, kuyamänantsikrëkur imata ruranapaq kaqtapis musyantsikllana. Tsëmi llapan awnimanqantsikman markäkunantsik o yärakunantsik.

Tsënö karpis, itsa wakinkunaqa Dios unë ruranqankunata o nunakuna rurayänampaq haqenqankunata Bibliachö leishqa karnin, Diosqa nenqankunata cambiashqam niyanman. Tsëta rikärishun, milagrokunata rurayänampaqmi punta cristiänokunata espïritunwan yanaparqan, Israel nacionpa tiemponchönam nunakuna atska warmiyoq kayänanta haqerqan y Moisesta Ley qonqanchönam sábado hunaq nunakuna ni imata mana rurayänampaq nerqan. Pero kanan witsan rasumpa kaq cristiänokunaqa manam tsëkunata rurayannatsu. ¿Kë kimanchöqa Dios cambianqantaku rikantsik? Mä yachakurishun.

Justo y kuyakoq këninchö alli kawakunapaq Dios yachatsikonqanqa, manam imëpis cambiashqatsu. Hina Gobiernonwan nunakunata bendecinampaq “unepita patsa pensashqanta[pis]” manam cambiashqatsu (Efesios 3:11). Pero disponenqankuna rurakänanta imapis tsapaptenqa, huknöpapis ruranmanmi cumplikänanrëkorqa. Kikintsikpis tsëtaqa rurantsikmi. ¿Manaku pipis kutin kutin ulipämashqa o llullapämashqaqa, huknöpana rikantsik?

Hina wanayanqanmannömi Diosqa nunakunata huknöpa huknöpapis yachatsishqa. Tsëta más musyarinapaq këman pensarishun, turistakunata puritseq nuna musyarinman ewëkäyanqan nänichö peligro kanqanta. Tsëqa, ¿imataraq ruranman? Huk nänipana ëwashun ninmanchi. ¿Tsëtaqa ninman apëkanqanman mana chätsita munartsuraq? Manam. Hina tsë cuentallam  Diospis rurashqa kiman kaq punta parlëkanqantsikkunachö. Tsëkunata hukllëllapayan yachakurishun.

¿Imanirtaq ushakarqan milagro rurëkuna?

Puntataqa, këmanraq pensarishun: ¿imanirtaq milagrokunata rurayänampaq punta cristiänokunata Jehová yanaparqan? Sirveqnin kayanqanta nunakuna musyayänampaqmi. Tsënöllam unë tiempochö israelïtakuna akrashqa markan kayanqanta rikätsikunampaqpis rurarqan. Diosqa puëdeq këninwanmi Moisesta yanaparqan israelïtakunata Egipto nacionpita horqamunampaq, tsunyaq sitiokunapa pushanampaq y Awnenqan Shumaq Patsaman chätsinampaq. Tsënö rurëkaptimpis, israelïtakunaqa manam Diosman markäkuyarqantsu, tsëmi akrashqa markan kaptimpis Jehová chaskerqannatsu y mushoq congregaciontana patsätserqan. Y apostolkunata y wakin discïpulokunata yanaparqan milagrota rurayänampaq. Tsëmi apóstol Pëdruwan apóstol Juanpis weqru o wishtu yurishqa nunata kachakätsiyarqan, y Pablunäqa huk wanushqatam kawaritserqan (Hechos 3:2-8; 20:9-11). Milagrokunata rurayanqanmi atska nunakunata yanaparqan cristiano këman chäyänampaq. Tsënö këkaptenqa, ¿imanirtaq milagro rurëkuna ushakarqan?

Apóstol Pablum milagro rurë imanöpa ushakanqanta kë igualatsikïwan rikätsikorqan: “Noqam wamra car parlaq cä, yarpaq cä, y cäyeq cä wamranolla; peru cananqa manam wamrapanonatsu yarpenïcuna” (1 Corintios 13:11). Imanömi huk teyta tsurin winanqanmannö imatapis nipan, tsaq tsënöllam Jehoväpis patsätsenqan congregacionta winanqanmannö yanapan. Tsëmi, imëka milagrokuna rurë ushakänampaq kaqta Pablu parlar kënö nerqan: “Dios rebelashqanta willacoqcunapis mananam cayanqanatsu, y mana cäyipaq idiomacunatapis mananam parlayanqanatsu” (1 Corintios 13:8).

¿Imanirtaq nunakuna atska majayoq kayänanta Dios haqerqan?

Casädokunapaq Dios imata munanqanta yachatsikurmi, Jesus kënö nerqan: “Tsemi, ollqu jaqirenqa mamanta yayanta warmiwan juntacäyänanpaq. Y ishcancunapis jucnollanam cayanqa” (Mateo 19:5). Rikanqantsiknöpis warmiwan ollquqa casakuyänan karqan ishkallan imëyaqpis kawakuyänampaqmi. Pero israelïtakuna markan kayänampaq Dios patsätsenqan witsanchö y Moiseswan Leyninta qonqan witsankunachöqa, atska majayoq kë, paqwënam mirakurkushqa karqan. Diostsu manam tsë costumbreta patsätserqan, ni allim tsëta rurayë nerqantsu, antis tsëllamannam huk Leykunata qorqan. Pero tsëpita mushoq congregación yurenqan witsanchöqa, paqwëmi nunakunata micharqan atska majayoq kayänanta (1 Timoteu 3:2).

Höraqa Jehová imatapis haqin tiemponchöraq altsanampaqmi, tsëtam Biblia yachatsikun (Romanos 9:22-24). Jesus yachatsikonqannöpis israelïtakuna ‘chucru shonqu cayaptinmi’ Dios atska majayoq kayänanta huk tiempolla haqirerqan (Mateo 19:8; Proverbios 4:18).

¿Imanirtaq säbadochö hamayänan ley ushakarqan?

Israelïtakunata Egiptopita horqaramurmi, Dios nerqan säbadokuna hamayänampaq, y tsëpitanam  Moisesta qonqan Leychöpis tsëta qellqatserqan (Éxodo 16:22-30; 20:8-10). Pero apóstol Pabluqa yachatsikorqan Jesus wanïninwan “Moisespa leynincunata y costumbrincunata mana caqpaq churare[nqamtam]”, hina “tse ordenta rachireq cuenta Jesucristu” tsë Leita ushakäratsenqantapis (Efesios 2:15; Colosenses 2:14). ¿Tsë ushakätsenqan Leykunachöku këkarqan sábado hunaq hamëpis? Awmi, Pabluqa kënö nirpis willakorqanmi: “Tsemi pipis ni ima niyäshiniquita puedinnatsu, miqui asuntu, upuna asuntu, dia warda fiestacuna asuntu, llullu quillacuna asuntu, y jamaqui junaqcuna asuntu” (Colosenses 2:16). Tsëqa, ¿imanirtaq sábado hunaq hamayänampaq Leyta Jehová qorqan ushakätsinanlla këkaptenqa?

Pablu nenqannöpis: “Tse leycunaqa, imeca juc wamrata pipis pushaq cuentam” Jesucristuman pusharqan. Y Jesus chäramuptenqa ‘tse pushacoq ley’ mananam precisarqannatsu (Gálatas 3:24, 25). Hukta hukta parlaq kartsu manam Diosqa sábado hunaq hamayänan Leyta ushakätserqan, antis huk tiempolla markanta yanapanampaq y tsëpita ushakänanllapaq churashqa karmi. Tsë Leytaqa Dios patsätserqan Israelïtakuna Diospa kaqta tsë hunaq yarpäyänampaqmi. Hinamampis, tsëqa rikätsikorqan shamoq tiempochö llapan nunakuna imëka nanapäkïninkunapita hamariyänampaq kaqta y Diosllatana shumaq serviyänampaq kaqtam (Hebreus 4:10; Apocalipsis 21:1-4).

Diosmanqa llapantsikpis markäkushwan o yärakushwanmi

Kë kiman yachatsikïkunaqa Dios hukta hukta parlanqantatsu rikätsimantsik. Tsëpa rantenqa nunakuna shumaq kawakuyänanta munarmi, Jehová tsë höra wanayanqanmannö tukï yachatsikïkunata qorqan. Y kanan witsampis tsënöllam rurëkan.

Hukta hukta parlaq Dios mana karmi, Jehoväqa precisaq yachatsikïninkunata cambiashqatsu, tsëmi imëpis musyantsiklla imata rurar pëta kushitsinapaq kaqta. Hina llapan awnikonqanta cumplimunampaq kaqtapis markäkuntsikmi, kikin kënö nimashqa: “Llapan rurëta munanqätam rurashaq [...]. Parlarqömi y cumplishaqmi” (Isaías 46:10, 11).

[8 kaq päginachö ninqan]

Unëpitanam Pablu willakorqan milagrokuna rurë “mananam cayanqanatsu” nirnin

[9 kaq päginachö ninqan]

Ishkallan imëyaqpis kawakuyänampaqmi warmiwan ollquqa casakuyan