Jesus ruranqanta qatir valorwan willakï

“Diosnintsicmi yanapayämashqa mana ichicllapis mantsacurishpa alli willaquininta willayänaqpaq.” (1 TES. 2:2.)

1. ¿Imanirtaq alläpa kushikïpaq Diospa gobiernompita alli willakïkunaqa?

ALLÄPAM kushikuntsik alli willakïkunata wiyarerqa! Awmi, Jesus, Diospa gobiernompita nunakunata willanqan alli willakïnöqa manam kantsu ima willakïpis. Tsë alli willakïkunaqa willamantsik imëka sufrimientokuna, qeshyakuna, nanatsikïkuna, y wanïpis ushakänantam. Hinamampis willamantsik, mana wanushpa kawakïta shuyaränata, y musyatsimantsikmi Jehová ruramunampaq kaqta, hina yachatsimantsikmi Diosnintsik munanqannö kawakunapaqpis. Itsa, llapan nunakunachi kë alli willakïta wiyarqa kushikuyanqa nishwan. Pero llakikïpaqqa llapan mana wiyakuyanqanmi.

2. ¿Ima nitataq munarqan Jesus “ama pensayëtsu que patsaman alli cawaquillata apamonqäta” nerqa?

² Jesusmi qateqninkunata kënö nerqan: “Ama pensayëtsu que patsaman alli cawaquillata apamonqäta. Manam tsenotsu; sinoqa noqarecurmi nunacuna chiquinaquillacho cacuyanqa. Noqaman marcäcuyanqanrecurmi papäninpa contran tsurin canqa, warmi wawanmi mamanpa contran y llumtsininnam suegranpa contran canqa. Tseno chiquishqam cayanqui castequicunapita qallecur” (Mat. 10:34-36). Tsënömi, tsë alli willakïkunata wiyakuyänampa rantinmi, casi llapan nunakuna despreciayan. Wakinnäqa kë willakoqkunatam chikirnin qallëkuyashqa, hasta kastankuna këkaptimpis.

3. ¿Imatataq wanantsik o ministintsik willakïnintsikta mana haqinapaq?

³ Rasumpa kaqta yachatsikonqantsikqa Jesus yachatsikonqannöllam, y kanampis Jesus yachatsikonqan witsannöllam nunakuna wiyakïta munayantsu. Tsënö kanantaqa shuyarantsikmi, Jesusmi kënö nerqan discïpulonkunata: “Niyashqaqta yarpäyë: ‘Patronninpitaqa sirweqnin manam mas puedeqtsu.’ Noqata chiquiyämarneqa, qamcunatapis chiquiyäshunquim” (Juan 15:20).  Rasumpëpam, manam llapan markakunachötsu chikirnin qatikachämantsik, pero Diospita willakoq kanqantsikrëkurmi mana allipa rikämantsik y despreciamantsik. Tsëmi willakïnintsikta imëpis mana haqinapaqqa wanantsik o ministintsik Jehoväman markäkïta y atska valorta (lei 2 Pedru 1:5-8).

4. ¿Imanirtaq Pabluqa valorta wanarqan yachatsikur seguinampaq?

⁴ ¿Imëllapis Diospita yachatsikoq yarqïta mantsapakushqaku kanki? Manam qamllatsu tsënö sientekushqanki, Jehoväta sirveq wakin fiel nunakunapis tsënömi sientekuyarqan. Tantearinapaq, apóstol Pablupis Jehoväpita alli yachatsikoqmi karqan, tsënö këkarpis hora höraqa alläpam mantsapakorqan yachatsikïta. Tsëmi, Tesalónica markachö cristiano mayinkunaman kënö qellqarqan: “Puntatam Filipos marcacho ashayämarqan y allqutsayämarqan. Peru tseno quecaptinpis Diosnintsicmi yanapayämashqa mana ichicllapis mantsacurishpa alli willaquininta willayänaqpaq aunqui marquequicunacho chiquicayämaptinpis. Tsetaqa qamcuna musyecayanquim” (1 Tes. 2:2). Awmi, Filipos markachömi Pablutawan Silasta autoridadkuna garrötewan maqayarqan y carcelmanmi qeykuyarqan chakinkunatapis alleq segurëkur (Hech. 16:16-24). Tsënö rurëkäyaptimpis Pabluwan Silasqa valorwanmi seguiyarqan Diospita yachatsikurnin. ¿Imanötaq noqantsikpis tsënölla rurashwan? Kë tapukïta contestanapaqqa, puntata rikärishun unë tiempochö Diosta sirveq nunakuna rurayanqanta y Jehoväpita yachatsikur seguiyänampaq ima yanapanqantapis.

Chikimashqa alleq tsarakunapaqqa valortam wanantsik

5. ¿Imanirtaq Diosnintsikta sirveqkunapaq valoryoq këqa alläpa preciso kashqa?

⁵ Musyanqantsiknöpis alli valorwan yachatsikoqqa kashqa Jesucristum. Pero unëpita patsëmi Jehoväta sirveqkunapaqqa alläpa preciso kashqa valorwan yachatsikïqa. ¿Imanir? Edén huertachö hutsaman ishkiriyaptinmi, kikin Jehová nerqan, Diosta sirveqkunawan Diablupa yanapqninkuna chikinakuyänanta (Gén. 3:15). Tsënö chikinakuyanqanqa cumplikar qallëkorqan Abelta wawqin Caín wanuratsiptinmi. Manaraq Diluvio kaptinmi Enoc nuna kawarqan, pëtapis pasëpam chikiyarqan, Diosqa atska waranqa angelninkunawanmi shamonqa mana alli nunakunata ushakätseq nenqanrëkur (Jud. 14, 15). Kënö willakonqanqa manam reqishqatsu karqan tiemponchö. Tsëmi nunakuna pasëpa chikiyarqan Enoctaqa, y Diosnintsik wanïchö mana punuratsiptenqa wanutsiyanmanmi karqan. ¡Tsënö valoryoq Enoc kanqanqa alläpa allim, noqantsikpis qatinapaq! (Gén. 5:21-24.)

6. ¿Imanirtaq Moisesqa faraonwan parlanampaq alläpa valorta wanarqan?

⁶ Kanan yarpärishun Moisespis alläpa valorwan ruranqankunata, Egipto markapa reynin faraonwan parlaqmi ëwarqan, kë reyqa manam lluta reytsu karqan, sinöqa dioskunapa diosnin y inti o rupay diosa Ra nishqampa wawanmi karqan, huk parlakïchöqa kikinmi dios karqan. Itsa kë reyqa rurarqan wakin faraonkuna rurayanqanta, kikimpa imagenninta adorar. Llapan parlanqanqa cumplikänanmi kaq. Kë poderoso, orgulloso y terco reytaqa manam pipis imata ruranantapis nita puëdeqtsu. Tsënö kaptimpis kë orgulloso reymanqa ëwanan karqan Moisesmi, huk humilde y mitsikoq nuna, tsëpis mana invitëkaptin. ¿Y Moisesqa imataq nerqan faraonta? Atska waranqa esclavon Israel marka ëwakuyänanta haqinampaqmi nerqan y mana haqiptenqa mantsakëpaq plägakunawan Egiptota Diosnintsik castiganantam nerqan. ¿Moisesqa valorta wanarqantsuraq tsëta ruranampaq? ¡Awmi! (Núm. 12:3; Heb. 11:27.)

7, 8. a) ¿Imakunapataq pasayarqan unë tiempochö Diosta sirveqkuna? b) ¿Imataq yanaparqan kë fiel nunakunata rasumpëpa kaq adoracionta defendeyänampaq?

⁷ Tsëpitapis Moisespa puntanman Diosta sirveqkunaqa valorwanmi defendiyarqan rasumpa kaq adoracionta Diablupa makinchö karnin Diospa contran churakashqa nunakunapita. Tsënö fiel nunakunapaq parlarmi apóstol Pablu kënö nerqan: “Waquincunatanam rumiwan tsampir wanutsiyarqan. Waquintanam pullanpita serruchepa wanuratsiyarqan. Waquintanam espadawan tucsipa wanutsiyarqan. Waquincunatanam maltratar, allqutsar qaticachäyarqan. Pecunaqa üshacunapa, chiwacunapa qaratsanllapita ropacushqam  marcan marcan puriculläyarqan, y allapa wactsa mana ni imannaq ancupëpaqmi cawaculläyarqan” (Heb. 11:37). ¿Imataq yanaparqan valorwan Diosta servir seguiyänampaq? Kë versïculopa qepancho qellqarëkaqmi willamantsik Diospa fiel sirveqninkuna Abel, Abrahan y Sarata alleq tsarakuyänampaq ima yanapanqantapis, kënömi nimantsik: “Tse llapan nunacunam Dios änicushqanta manaraq chasquirnin wanucuyarqan. Tse nunacunaqa marcäcoq carninmi, carupita ricayarqan allapa cushicur” (Heb. 11:13). Punta profëtakuna Elias y Jeremïaspis valorwanmi Diosnintsikpa kaqta rurayarqan, y alleqmi tsarakuyarqan Jehová awnikonqankuna cumplikänanman markäkurnin o yärakurnin (Titu 1:2).

⁸ Pëkunaqa shamoq tiempopaq Dios awnikonqantam alleq claro rikäyarqan. Y mushoq Patsachöqa ichikllapa ichikllapam hutsannaq këman chäyanqa, y këtaqa lograyanqa Jesucristu y 144.000 yanapaqninkuna rurayämonqanrëkurmi (Rom. 8:21). Pero manam tsëllatsu, masran kan Diosnintsik sirveq nunakunata valoratsenqanqa. Diosnintsik imëpis yanapanampaq awnikonqanmi, tsëmi kikin Jeremias qellqan Jehová kënö nenqanta: “Qampa contrëkiqa peleayanqam, pero manam qamtaqa venceyäshunkitsu, noqam qamwan këkä libranaqpaq” (Jer. 1:19). Kanan tiempo noqantsiktapis yanapamäshun, shamoq tiempochö Dios ruramunampaq awnikonqanman y espiritual kaqchö tsapämänapaq awnikonqanman yarpëmi (Pro. 2:7; lei 2 Corintios 4:17, 18).

Kuyakïninmi Jesusta yanaparqan valorwan yachatsikunampaq

9, 10. ¿Imanötaq Jesus rikätsikorqan valoryoq këninta a) pushakoq religiösokunawan këkar, b) soldäkunawan këkar, c) Sacerdotekunapa pushaqninkunawan këkar y d) Pilatowan këkar?

⁹ Jesusqa tukïnöpam rikätsikorqan Teytampa voluntadninta valorwan ruranqanta, y tsënöllam rurashwan. Këman yarpärishun, pushaq religiösokuna pasëpa chikikäyaptimpis, Jesusqa mana mantsakushpam valorwan willakorqan Diospa juicionta. Mana mantsashpam rikätserqan mana alli rurëninkunata y uli o llulla yachatsikïninkunata. Jehoväqa juiciota chaskiyänampaq condenashqanam karqan kë nunakunata y tsëtam Jesusqa claro y sinchipa willarqan. Huk kutim kënö nerqan: “¡Allau, alli tucoq ley yachatsicoqcuna y fariseucuna! Qamcunaqa sepultura janancho shumaq lapidawan adornashqa cuentam cayanqui. Jananllapaqa allapa shumaqmi tse sepultura ricacun, peru rurinchoqa ayapa tulluncunallam, ismucur melanepaq asyacur caquican. Tsenomi qamcunapis janallapaqa nunacuna ricayäshunequillapaq allita ruraq tucoq quecayanqui. Peru shonqiquicunachoqa melanepaq mana alli ruraqmi quecayanqui” (Mat. 23:27, 28).

¹⁰ Huk grupo soldädokuna Getsemaní nishqan jardinman asheq ëwayaptinmi, ashikäyanqëki Jesusqa noqam kä nishpa valorwan entregakorqan (Juan 18:3-8). Tsëpitanam apayarqan corte suprëmaman, tsëchö sacerdotekunapa mandaqnin tapupänampaq. Wanutsita munarnin kë llapan rurëkäyanqanta musyëkarnimpis, valorwanmi Mesias y Diospa Tsurin kanqanta willakorqan. Tsëpitam nerqan: “Diospita Shamushqa Nunata ricariyanqui puedeq Diospa derechu laduncho tëcaqtam, y pucute rurincho sielupita shamicaqtam” (Mar. 14:53, 57-65). Tsëpitanam Jesustaqa Pilato kaqta apayarqan, y pëqa autoridadyoqmi karqan Jesusta libertadman churarinampaq. Mëläya intuyaptimpis upällam wiyaräkorqan  (Mar. 15:1-5). Tsë llapanta ruranampaqqa atska valortaran wanarqan.

11. ¿Imataq yanapamäshun valorwan nuna mayintsikta yachatsinapaq?

¹¹ Pero këtam sïqa Jesusqa nerqan Pilatota: “Tsepaqmi yuricushqa cä. Rason caqta willacoqmi que patsaman shamushqa cä” (Juan 18:37). Ciëlochö Teytanmi kachamushqa karqan alli willakïta nunakunata willanampaq, y Jesusqa Teytanta kuyarmi llapan mandanqanta kushishqa rurarqan (Luc. 4:18, 19). Hina Jesusqa nunakunata kuyaqmi y musyaqmi llapan hipakïninkunata. Tsënöllam noqantsikpis alläpa valorwan yachatsikoq ëwantsik, Diosnintsikta y nuna mayintsikta kuyarnin (Mat. 22:36-40).

Santo espïritun yanapamantsik valorwan yachatsikunapaq

12. ¿Ima pasakonqankunataq Jesuspa qateqninkunata pasëpa kushitserqan?

¹² Jesus wanurinqampita semänakuna pasarishqanllachömi Jesuspa qateqninkuna rikäyarqan alli shonquyoq nunakunata markanman Jehová pushamoqta. Huk hunaqllachömi kima waranqa (3.000) judiokuna y judïoman tikrashqakunapis, më tsë markapita Pentecostés fiesta celebraq Jerusalenta shayämushqa nunakuna bautizakuyarqan. Tsë tiempochöqa tsëllapaqnachi pï mëpis parlakuyarqan. Tsëmi Bibliaqa kënö nin “apostolcuna Diospa poderninwan milagrocunata y señacunata rurayaptin, llapan nunacuna mantsacäcuyarqan” (Hech. 2:41, 43).

13. ¿Imanirtaq punta cristiänokuna valorta mañakuyarqan mana mantsakushpa willakuyänampaq, y imanötaq Jehová mañakïninkunata contestamorqan?

¹³ Judío religiösokunapa mandaqninkunam pasëpa piñakuyarqan y tsariyarqan Pëdrutawan Juanta y patsa waranqanyaqmi llawirätsiyarqan y Jesuspita mana parlayänampaqmi alleq willayarqan. Kachariyaptinnam, kë ishkan apostolkunaqa willayarqan cristiano mayinkunata ima pasanqantapis. Tsënam, chikikur niyanqampaq alläpa yarpakacharnin Jehoväman kënö mañakuyarqan: “Callpäcuna sirwishoqniquicunata qoycäyämë, willaquiniquita mana mantsacushpa willacur siguiyänäpaq” ¿Tsënö mañakuyanqampita imataq pasarqan? “Tsenam llapancuna Santu Espiritupa poderninwan quedariyarqan. Y mana mantsacushpanam Diospa willaquininta willacuyarqan” (Hech. 4:24-31).

14. ¿Imanötaq santo espíritu yanapamantsik yachatsikoq ëwashqa?

¹⁴ Këchöqa clärom rikakun, Jesuspa qateqninkuna Jehoväpa santo espïritunta chaskirirnin mana mantsapakushpa willakur seguiyanqan. Tsënöllam noqantsikpis Diospa santo espïritun yanapamashqa valorwan willakuntsik Diospa Palabranta, hasta chikimaqnintsikkunatapis, këtaqa rurëta puëdentsik manam kikintsikllapitatsu, sinöqa Diospa santo espïritun yanapamashqallam, tsëmi imëpis mañakïkanantsiklla. Awmi, Jehová Diosnintsikpa yanapakïninwanqa imëpis willakur siguikäshunllam mëläya chikikämashqapis (lei Salmo 138:3).

Cristiänokunaqa valorwanmi yachatsikoq ëwantsik

15. ¿Imanötaq rasumpëpa yachatsikï nunakunata rakikätsin?

¹⁵ Unë tiempochönöllam kanampis rasumpa kaq yachatsikïqa nunakunata rakikätsin. Wakinkunaqa kushishqam chaskikuyan, pero wakinkunaqa manam pasëpa wiyakuyantsu ni respetayantsu Diosta adoranqantsikta. Wakinkunaqa mana allipam rikämantsik hasta chikimantsikmi Jesus willakonqannö (Mat. 10:22). Höraqa mana allitam noqantsikpita parlayan, y noticiakunapapis mana allitam horqayämun noqantsikpaq (Sal. 109:1-3). Tsënö këkaptimpis Diospa markanqa valorwanmi seguiyan willakurnin hinantin patsapa alli willakïkunata.

16. ¿Imanötaq musyantsik valoryoq yachatsikushqaqa nunakuna wiyakuyänanta?

¹⁶ Tsënö kaptimpis valorwan willapäkïta siguishqam nunakuna hukläyapana rikämäshun. Kirguistán markapita huk cristianam kënö willakun: “Yachatsikur purikaptïmi huk nuna nimarqan: ‘noqapis creïmi Diosman, pero manam cristiänokunapa Diosninmantsu. ¡Wayïman kutimuptikiqa allqütam kachëkamushaq!’. Ruriman rikëkunäpaqnam mantsëpaq hatun allqu cadënawan watarëkänaq. Pero huk hunaqkunanam kutirerqa Noticias del Reino núm. 37, ‘¡Se acerca el fin de la religión falsa!’ nishqan tratädota apakurkur,  itsa huktana tarirïman tsë wayichö nishpa. Pero punkutaqa kicharamorqan tsë nunallam. Tsaq tsë höram Diosman mañakurerqä, y kënömi nirerqä kë nunata: ‘Yamëllaku teytë, yarpämi qanyantin parlanqantsikta y allqïkitapis yarpämi, pero manam wayikita haqirir pasaritaqa puëderqötsu, qamnömi noqapis rasumpa kaq Diosman creï. ¿Musyankiku ichik tiempollana pishenqanta Diosnintsik mana alli religionkunata ushakätsinampaq kaqta? Kë tratädon willashunki kë tëmapita’. Nunaqa chaskiramarqanmi tsë tratädota. Tsëpitanam ëwallä nirir pasarerqa qateqnin wayiman. Pero tsëpita rätonllatanam rikärerqä tratädon tsarakushqa qepäta corrikämoqta. Y këkanqäman chäramurnam, kënö niramarqan: ‘leir usharerqönam. ¿Imatataq ruräman Diospa juiciompita salvakunäpaq?’”. Kë nunaqa Bibliata estudiar y reunionkunamampis ewarmi qallëkorqan.

17. ¿Imanötaq yanaparqan huk cristianapa valornin, pëwan Bibliapita yachakïkaq warmita?

¹⁷ Hina valornintsikqa wakinkunatapis yanaparinmanmi. Rusia markapita huk cristianam cärrochö viajëkarqan, y revistawanmi huk pasajërata yachëkätserqan, tsënam huk nuna sharkur revistanta qechurirnin, rachikacharkur patsaman hitarerqan. Tsëpitanam kë cristianata tukïta qayapar qallëkorqan y mëchö täranqantapis willanampaqmi pasëpa taporqan y tsë markachö Bibliapita mana yachatsikunampaqmi sinchipa willarqan. Kë cristianaqa tsë höram Jehová Diosman mañakorqan y yarpärerqan Jesus kënö nenqanta: “Ama wanutsicoqcunata mantsayëtsu” (Mat. 10:28). Mana mantsapakushpa y mana piñakusllapam täkïkanqan asientompita sharkur kënö nerqan nunata: “Manam willashqëkitsu mëchö täranqanta ni manam haqishaqtsu kë markachö Bibliapita yachatsikïta”, tsënö nirirmi cärropita bajakurerqan. Pero kë cristianaqa manam musyarqantsu ëwëkanqan cärrochö Bibliapita pëwan yachakïkaq warmi ëwëkanqanta, kë warmiqa mantsapakurninmi reunionkunata ëwaqtsu. Pero kë cristianapa valorninta rikarnam reunionkunaman ëwar qallëkorqan.

18. ¿Imataq yanapamäshun Jesusnö valorwan imëpis yachatsikunapaq?

¹⁸ Kanan tiempo nunakunaqa Diospita rakikashqam kawakuyan, tsëmi atska valortaraq wanantsik o ministintsik Jesus ruranqanta qatinantsikpaq y Diospita yachatsikunapaq. ¿Imataq yanapashunki tsëta ruranëkipaq? Shamoq tiempoman alleq markäkï o yärakuymi. Diosta y nuna mayikita cada hunaq más kuyë. Jehoväman alleq mañakï valorniki qoshunëkipaq. Y yarpë hapallëki mana këkanqëkiman, Jesusqa lädikichömi imëpis këkanqa (Mat. 28:20). Jehovämi bendecishunki, yanapashunki y santu espïritunmi sinchiyätsishunki. Awmi, llapantsikmi kënö nita puëdentsik: “Diosmi yanapaman y manam mantsacushaqtsu. Tseno quecaptin ¡manam nuna ni imata ruramanqatsu!” (Heb. 13:6).

¿Yarpankiku yachakonqantsikta?

• ¿Imanirtaq valorta wanayan Diosta sirveqkunaqa?

• ¿Imatataq yachakuntsik . . .

. . . unë tiempochö Diosta sirveqkunapita?

. . . Jesucristupita?

. . . punta cristiänokunapita?

. . . kanan tiempo cristiano mayintsikkunapita?

[Yachakunapaq kaqpa tapukïninkuna]

[30 kaq päginachö dibüju]

Jesusqa mana mantsapakushpam pushaq religiösokunapa mana alli yachatsikïninkunata rikätsikorqan

[32 kaq päginachö dibüju]

Jehovämi valorta qomantsik imëpis Palabrampita yachatsikunapaq