Pëqa mañamantsik rurëta puëdenqantsikllatam
Diosman witi
Pëqa mañamantsik rurëta puëdenqantsikllatam
“LLAPAN puëdenqäta rurëkarpis, Diospaq ichikllata rurëkanqätam pensaq kä.” Tsënömi huk warmi nerqan Diosta kushitsita munar llapan ruranqampita. ¿Puëdiyanqanmannö sirveqninkuna rurayanqanta Jehová chaskintsuraq? ¿Musyantsuraq ima rurëta puëdeyanqanta o mana puëdeyanqanta y yachayanqanta o mana yachayanqantapis? Kë tapukïkunata contestanapaq rikärishun Levítico 5:2-11 textokunata, tsëchömi tarintsik Diosta qarayänampaq Ley ima nenqantapis.
Israelïtakunata Ley qonqanchömi, Dios mandakorqan hutsankunapita perdonashqa kayänanrëkur qarënin apayänampaq. Kë textochöqa parlëkan mana musyar o mana pensar nuna hutsaman ishkeqpaqmi (2 a 4 versïculokuna). Mana alli ruranqanta mäkurerqash hutsa ruranqanta willakoq, y “malta üshata o malta cabrata” Diospaq apaq (5 y 6 versïculokuna). ¿Imataraq ruraq alläpa waktsa karnin malta üshata o malta cabrata mana tarerqa? Haqa tikranan kaptimpis, ¿Ley obligaqtsuraq animalta apanampaq? ¿Hutsampita unëtaraq perdonta chaskinan kaptimpis, rantenqanyaqtsuraq trabajanan karqan?
Jehová alläpa kuyakoq y llakipäkoq kanqanta rikätsikurmi, Leynin kënö neq: “Üshapaq mana tarerqa, ishkë kullkukunata o ishkë llullu palomakunatam hutsampita Jehoväpaq apamunan” (versículo 7). “Mana tarir” neq palabraqa, kikin hebreo idiömachöqa “makimpita karuchö” ninanmi. Huk waktsa israelita üshata qonampaq mana tariptenqa, Diosqa kushishqam chaskeq ishkë kullkukunata o ishkë llullu palomakunallatapis.
¿Y tsëllapaqpis huk israelita mana tariptenqa? Tsëqa Ley kënömi mandakoq: “Hutsa ruranqampitam Diospaq qarënin apamunan huk efäpita decima [huk kïlopaq ichikllana pishikaq] qochqu [más ñuchu] harinata” (versículo 11). Paqwë waktsa kayaptimpis, yawarninnaqlla qarëninta Jehoväqa chaskeqmi, y listom këkaq hutsankunapita perdonanampaq. * Israel markachöqa llapanmi hutsankunapita perdonta chaskiyaq y Dioswan yamë këta tariyaq waktsa karpis.
Hutsankunapita pagakuyänampaq Jehová Ley churanqampita, ¿imatataq yachakuntsik? Llakipäkoq o ankupäkoq kanqantam, y ima rurëta puëdenqantsikta o mana puëdenqantsiktapis musyanqantam rikantsik (Salmo 103:14). Edäna karpis, qeshyapäkoq karpis, familiapaq trabajana kaptimpis o imëka rurëkunayoq kashqapis, Diosqa munan pëman witinata y amïgon kanatam. Puëdenqantsikmannö ruranqantsikpita Jehová kushikonqanta musyëqa alläpam kushiratsimantsik.
[Päginapa ura kuchunchö willakï]
^ par. 7 Diospaq yawar alläpa sagrado kaptinmi, hutsankunapita perdonta chaskiyänampaqqa animalpa yawarninraq precisaq (Levítico 17:11). Tsëpenqa, ¿manatsuraq waktsakuna qoyanqan harina väleq? Väleqmi. Jehoväqa alläpam kushikoq llapan shonqunwan y waktsa këninchö qarënin apayanqanta. Hinamampis, hutsapita wata wata Pagakuyänan Hunaqchö apayanqan animalkunapa yawarninwanqa, llapan israelïtakunam waktsa o tareq karpis perdonta chaskiyaq (Levítico 16:29, 30).