Bibliapita más yachakunapaqqa

1. Qellqatseqtam yanapamänapaq mañakunantsik

Italia nacionpita Ninfa shutiyoq warmim kënö nir willakun: “Dios qellqatsenqan libro kanqanta musyar y imata qellqatsenqantapis yachakïta munarmi, manaraq patsäkur Bibliata leeq kä. Y leïta mana gustarpis, qallanampita ushananyaq leinäpaqmi churakarqä. Shumaqmi qallarerqäqa, pero sasa yachakunanman chärerqa, qelanarmi tsëllachö haqirerqä”.

MANAM pëllatatsu tsënö pasashqa, pï më nunakunam Ninfanöpis Biblia leïta haqiriyan. Pero, Bibliapita shumaq yachakunantsiktam Jehová Diosqa munan. ¿Imaraq yanapamashwan shumaq yachakunapaq? Puntataqa, kikin Diosmanmi yanapamänapaq mañakunantsik.

Jesuspa apostolninkunapaq yarpärishun. Tsë witsan yachaq maestrokunapa escuëlankunachö mana yachakushqa kayaptinmi, wakinkunaqa “mana educadu [...] ni mana presisaq” nunakuna niyaq (Hechos 4:13). Tsënö escuëlakunachö mana estudiashqa karpis, pëkunaqa Diospa Palabrampita allim yachakuyarqan. ¿Imaraq yanaparqan? Kikin Jesusmi pëkunata kënö nerqan: “Dios Yaya[m] cachamonqa yanapayäshoqniqui Santu Espiritunta. Pemi llapanta yachatsiyäshunqui” (Juan 14:26). Santo espïrituqa Diospa kallpanmi, tsëwanmi rurarqan Patsata y llapan kawaqtapis (Génesis 1:2). Hina tsë kallpanllawanmi chusku chunka (40) nunakunatanö yanaparqan Bibliata qellqayänampaq (2 Pedru 1:20, 21). Tsëmi Bibliapita pipis shumaq yachakïta munaptenqa, tsë espïritunwan Dios yanapan.

Y santo espïritunwan yanapamänapaqqa Diosman markäkur o yärakurmi mañakunantsik. Höraqa, itsa kutin kutin mañakushun. “¡Imatapis mañacuyaptiqueqa, Dios qoyäshunquim!” nerqanmi Jesuspis. Tsëpitanam kënö nerqan: “Si qamcuna [...] tsuriquicunata allicunata qoyanqui, sielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa.” (Lucas 11:9, 13). Rikanqantsiknöpis, llapan shonqunwan mañakoqtaqa Jehová santu espïritunta qonmi. ¿Y imanöraq yanapamäshun santo espïritunqa? Bibliachö unëna qellqayanqampita shumaq yachakunapaqmi yanapamäshun. Y Bibliapita yachakonqantsiknölla kawanapaqpis yanapamäshunmi (Hebreus 4:12; Santiagu 1:5, 6).

Tsëmi, Bibliata leir yachakunëkipaqqa santu espïritunwan yanapashunëkipaq Diosta mañakunëki.