Bibliapita más yachakunapaqqa

2. Alli yachakïta munarmi leinantsik

¿Mana reqenqëki nunapaq pillapis qamchö rimashqaku? ¿Tsë nunata rikärerqa imatataq pëpaq pensarqëki? Mana allita pëpaq parlayashqa kaptin, itsa alli nuna kanqanta rikänëkipaq sasaraq karqan. Hina tsënöllam pasan Bibliapita yachakïta munaqkunawampis.

APÓSTOL Pabluqa musyarqanmi shumaq yachakïta mana munëkar Bibliata lei mana alli kanqanta. Punta cristiänokunapa tiemponchö judïokuna tsënö kayaptinmi, apóstol Pablu kënö nerqan: “Pecunaqa imanomi tïrecuyan Diosta cäsuquita; peru manam rasonpa caqtaqa cäyiyantsu” (Romanos 10:2).

Jesus Diospa Akrashqan kanqanta mana creita munarmi, Diospa Palabran pëpaq claro willakïkaptimpis creiyarqantsu. Profëtakuna willakuyanqan Jesuschö cumplikëkaptimpis, kikinkunapa pensëninkunallamanmi creiyarqan, tsëmi Diospa Palabran pipaq parlëkanqantapis cuentata qokuyarqantsu.

¿Imatataq yachakuntsik Judïokuna tsënö kayanqampita? Bibliataqa leinantsik alli yachakïta munarmi. Mana tsënö rurarqa Bibliapita manam alli yachakushuntsu.

Religionkunachö creiyanqanta yachatsikoq Estados Unïdospita profesormi, Bibliapaq kënö nerqan: “Nunakunalla nuna mayimpaq rurayanqan librom, y hukta huktam yachatsikun, y alli kawakunapaqpis manam shumaqqa consejakuntsu”. “Nunakunalla nuna mayimpaq rurayanqan libro[tanölla]” Bibliata rikarqa, ¿Leyninkunata y yachatsikïninkunata wiyakïta munashuntsuraq?

Pablu kawanqan witsan Berea markachö nunakunanölla noqantsikpis yachakunapaqmi Bibliaqa nimantsik. Pëkunaqa manam “allapa cushicur[llatsu] chasquiyarqan tse alli willaquicunata”,  antis “cada junaqmi estudiayarqan Diospa palabranta Pablu yachatsiconqan rasonpa canqanta musyayänanpaq” (Hechos 17:11). Bibliapita alli yachakunapaqqa pëkunanömi estudianantsik, más yachakïta munarmi leinantsik, y nunakuna Bibliapaq rimayanqantapis manam creinantsiktsu. Tsëmi Bibliataqa leita tïranëki Dios yachatsikonqankunata musyëta munar.