Bibliapita más yachakunapaqqa

3. Yanapamänata haqishun

Australia nacionchö këkaq Nullarbor nishqan mana ni imapis kaq pampapa ëwëkarmi, Edward John Eyre shutiyoq nuna tsë kinrëchö yachaq nunakunapita yachakorqan arënapita y eucalipto montipita yaku horqëta. Tsëkunata yachakonqanmi yanaparqan mana ni ima kaq pampachö mana wanunampaq.

KËCHÖ rikärenqantsiknöpis, mana yachanqantsikta ruranapaqqa, yachaqkuna yanapamänataraqmi wanantsik. Tsënöllam ruranantsik Bibliata leïrpis.

Jesuspis manam shuyararqantsu qateqninkuna kikinkunalla Bibliapita yachakuyänantaqa. Tsëmi huk kutipis pëkunata “Diospa palabranta [...] alli cäyitserqan” o yachatserqan (Lucas 24:45). Rikärenqantsiknöpis, Jesusqa musyarqanmi Bibliapita yachakï munaqkunaqa pipis yanapanantaraq wanayanqanta.

¿Piraq yanapamashwan?

Nunakunata yanapayänampaqqa qateqninkunatam Jesusqa mandarqan. Ciëloman manaraq kutikurmi pëkunata kënö nerqan: “qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq, [...] llapan yachatsiyashqaqcunata yachatsiyanqui pecunapis alli cäsucoq cayänanpaq” (Mateo 28:19, 20). Tsëmi imëka rurëpitapis cristiänokunapaqqa yachatsikï alläpa precisan, tsëtaqa rurayan nunakuna imanö kawayänampaqpis Bibliapita yachatsirmi. Rikärenqantsiknöpis, nunakuna Bibliapita yachakuyänampaqqa cristiänokunam shumaq yanapayänan.

Qateqninkuna yachatsikoq ëwayänampaq Jesus mandarenqanllachö pasanqanta rikäkurishun. Etiopía nación gobiernopaq trabajaq nunam profeta Isaías qellqanqanta leikarqan, tsënam chärerqan mana käyenqanman o tanteanqanman. Tsë mana käyenqan versïculoqa kënömi neq: “Imeca üshata wanutsiyänanpaq, camalman apaqnomi apayarqan  wanutsiyänanpaq. Rutuyaptin üsha mana waqaqnomi, upälla wiyaräcorqan. Allqutsashqam carqan; justisiapis pepaqqa manam carqantsu. Que patsacho caweninpitam wanuratsiyarqan; y mananam mireninpis carqannatsu” (Hechos 8:32, 33; Isaías 53:7, 8).

¿Imatataq kë nuna rurarqan? Bibliapita alli musyaq Felïpitam yanapanampaq nerqan. Kënömi taporqan: “¿Pipaqtaq Diospa une profetan tseno escriberqan? ¿Quiquinpaqcu, o juc nunapaqcu?” (Hechos 8:34). Kë nunaqa Jerusalen templopitam kutikarqan, tsënöpam musyantsik rasumpa kaq Diosta adoranqanta. Tsëqa, itsachi Diosman mañakorqan leikanqanta tanteanampaq. Hinamampis Bibliapita más yachakïta munarchi leikarqan. Tsëpis manam musyarqantsu Isaías qellqanqan imapaq parlëkanqanta. Pero mana yachaqtukoq karmi yanapanampaq Felïpita nerqan, pënam hinan höra yachatserqan. Leikanqan imapaq parlanqantapis musyarirnam alläpa kushikorqan, y hinan höram cristiano këtapis munarerqan (Hechos 8:35-39).

Felipi y punta cristiänokuna rurayanqannöllam kanan witsan Jehoväpa testïgonkunapis rurëkäyan. Kuyakoq karmi doscientos treinta y cinco nacionkunapitapis maschö Bibliapita yachatsikïkäyan. Wayinkunaman ëwarmi tukï tëmakunata Bibliapita nunakunata yachatsiyan. * (Rikäri  “Biblia yachatsikonqankuna” neq recuadrota.)

“Llapan tapukonqätam Biblia contestamarqan”

Steven, Valvanera y Jo-Annem Jehoväpa testïgonkunawan yachakur qallëkuyarqan. ¿Ima niyantaq yachakuyanqampita? Stevenmi kënö nin: “Manam musyarqätsu tapukïnëkunapa respuestanta shumaq yachakunäpaq kaqtaqa. Atska versïculokunallatam igualatsinä karqan Bibliapita más yachakunäpaq. Tsënöqa manam imëpis rurarqätsu. Y mana qayapänakushpa, y lluta mana parlashpa Bibliapita yachakuna kanqanta musyarerqa kushikorqämi.”

 Valvanera shipashtapis tsënöllam pasarqan. Kënömi nin: “Manam iglesia niptinllatsu kananqa Biblia alli kanqanta musyä, antis kikïmi rikarqö yachatsikïnin rasumpa kanqanta y yachakunan mana sasa kanqanta”. Jo-Anne warminam kënö nin: “Llapan tapukonqätam Biblia contestamarqan, tsëmi Diosta más respetar qallarqä. Manam musyarqätsu llapan tapukïkunapa respuestanta Bibliaman Diosnintsik qellqatsenqanta”.

Qamqa, ¿reqinkiku Jehoväpa testïgonkunata? Bibliapita imanö yachatsikuyanqantapis itsa tapurinkiman. Pëkunata mana reqerqa, yachatsiyäshoqniki shayämunampaq revistapa 2 kaq päginanchö këkaq direccionman qellqarinkimanmi. Yarpë, Bibliapita yachakïqa manam sasatsu kanan. Rikanqantsiknöpis, Bibliapita yachakunapaqqa Jehoväpa santu espïrituntam mañakunantsik, alli yachakïta munarmi leinantsik y pillapis yachatsimänantsiktam haqinantsik.

[Päginapa ura kuchunchö willakï]

[6 kaq päginachö dibüjukuna y recuadru]

 Biblia yachatsikonqankuna

Jehoväpa testïgonkunaqa Bibliapita yachatsikur kë tapukïkunatam contestayan:

• ¿Imanö kë Patsa kanantaraq Dios munan?

• ¿Mëchötaq wanushqakuna këkäyan?

• ¿‘Ushanan tiempokunachöku’ kawëkantsik?

• ¿Imanirtaq hipakïkunata Dios rikaran?

• ¿Imatataq familiakuna rurayanman kushishqa kawayänampaq?

[7 kaq päginachö dibüju]

Bibliapita yachakunapaqqa, Diospa santu espïrituntam mañakunantsik, alli yachakïta munarmi leinantsik y pillapis yachatsimänantsiktam haqinantsik.