Dios yayapa kuyakïninchö imëpis kawakuyë
Dios yayapa kuyakïninchö imëpis kawakuyë
“Dios cuyecamashqaqa imepis pe munanqanno cawacuyë [...] Pëmi ancupamarnintsic wiñe kawënintsik qoycamäshun.” (JUD. 21.)
1, 2. a) ¿Imanötaq Jehová rikätsimantsik kuyakïninta? b) ¿Munënintsikllata rurakushqaqa Jehová permitimashwantsuraq kuyakïninchö kawakunata? Willakaramï imanir tsënö contestanqëkitapis.
JEHOVÄQA kuyakïninta tukïnöpam rikätsimashqantsik. Pero más hatun kuyakïnintaqa rikätsimarqontsik, tsurin Jesucristuta kë Patsaman hutsapita y wanïpita salvamänapaq kachamurninmi. Hina Jehová Dios nunakunata alläpa kuyanqantaqa rikätsimarqontsik tsurin Jesucristu wanunampaq permitenqanwanmi (Juan 3:16). Tsëtaqa rurarqan mana wanushpa kawakïta tarinantsikta munarmi, tsënöpa kushishqa imëyaqpis pë munanqannö kawakunapaq.
2 Pero ¿munënintsikllata rurakushqaqa Jehová permitimashwantsuraq kuyakïninchö kawakunata? Manam, Judas versículo 21 nishqanmi nimantsik: “Dios cuyecamashqaqa imepis pe munanqanno cawacuyë [...] Pëmi ancupamarnintsic wiñe kawënintsik qoycamäshun”. Këchöqa nimantsik “imepis pe munanqanno cawacuyë” nishpam. Këqa rikätsimantsik alleq sinchikunantsiktam. Tsëpenqa, ¿imatataq rurashwan Teyta Diospa kuyakïninchö Imëpis kawakunapaq?
¿Imatataq rurashwan Teyta Diospa kuyakïninchö imëpis kawakunapaq?
3. ¿Imatatan ruranan karqan Jesus Teytampa kuyakïninchö imëpis kawakunampaq?
3 Kë tapukïpa respuestanta rikärishun wanunampaq huk paqas pishikaptin Jesus nenqanchö. Kënömi nerqan: “Noqaqa Papänïta cuyarmi, mandacushqancunata cäsucü. Tsenollam noqata cuyamarqa, qamcunapis mandacushqäcunata cäsucuyanqui” (Juan 15:10). Këchömi rikantsik Teytanwan alli kanampaqqa, Teytan nenqanta wiyakur ruranan alläpa preciso kanqanta. Y hutsannaq nuna këkarpis Teytanta llapanchö wiyakïkaptenqa, ¿manatsuraq noqantsikqa masraq Diosnintsikta wiyakushwan?
4, 5. a) ¿Imanötaq Jehoväta rikätsishwan kuyanqantsikta? b) ¿Imanirtaq qelanashwantsu Diosnintsikpa mandamientonkuna wiyakïta?
4 Jehová Diosnintsikta kuyanqantsiktaqa rikätsikushun, llapan mandamanqantsikta wiyakurninmi. Apóstol Juanmi kënö qellqarqan: “Tsemi mandacushqancunata cäsucurnenqa, Diosta cuyantsic. Y mandacushqancunaqa manam allapa sasatsu” (1 Juan 5:3). Rasunmi, casi llapan nunakunatam mandayanqanta wiyakïqa gustayantsu. Tsënö kaptimpis kë textochöqa Diospa “mandacushqancunaqa manam allapa sasatsu” o ajatsu nimantsikmi. Awmi, Jehoväqa manam mandamantsiktsu mana rurëta puëdenqantsiktaqa.
5 Tantearinapaq, huk kuyashqa amïguïkita, ¿mana apëta puëdenqan lasaq qepita apanampaq ninkimantsuraq? ¡Manachi tsëtaqa rurankimantsu! Tsënö kuyakoqllam Jehová Diospis, mana cumplïta puëdenqantsiktaqa manam mañamantsiktsu, y alleqmi reqimantsik imanö kanqantsiktapis. Bibliam nimantsik, Diosqa “yarpanmi allpapita rurashqa kanqantsikta” (Sal. 103:14). Pëqa, rurëta mana puëdenqantsiktaqa manam ni imëpis mañamäshuntsu. Tsëmi qelanashwantsu mandamientonkuna wiyakïtaqa. Tsëpa rantenqa kushikunantsikmi, mandamientonkunata wiyakurnenqa rikätsikushun Diosnintsikta kuyanqantsikta y kuyakïninchö imëpis kawakïta munanqantsiktam.
Jehová Diospa huk shumaq qarënin
6, 7. a) ¿Imataq conciencia? b) Willakaramï huk ejemplowan imanö concienciantsik yanapamanqantsiktapis.
6 kanan tiempo sasa o aja kawanqantsik mundochöqa cada hunaqmi imata ruranapaqpis decidintsik. ¿Imanötaq musyashwan decidenqantsikkuna Diosnintsikpa shonqunta kushikätsenqanta? Tsëpaqqa Jehovämi qaramashqantsik huk shumaq qarëta, tsë qarëqa concienciantsikmi. ¿Imataq concienciaqa? Concienciaqa yanapamantsik imanö kanqantsiktapis reqikunapaqmi, huk juez cuentam ruranqantsikta y ima munanqantsikkunatapis rikëkämun. Huk lädopaqa allikunata ruranapaqmi yanapamantsik, hina tanteatsimantsikmi puntata ruranqantsikkuna alli o mana alli kanqantapis (lei Romanos 2:14, 15).
7 ¿Imanötaq concienciantsik yanapamantsik? Más tantearinapaq, ¿Imataraq huk nuna wanan o ministin mana reqishqan karu markaman chänampaq? Huk mäpatam wanan, mana tsëwanqa manachi musyanmantsu mëpa ëwanan kanqantapis. Tsënömi, concienciannaqqa pasëpa oqrakashqa këkashwan y manam Diosnintsik munanqannö imatapis ruranapaq decidita puëdeshwantsu.
8, 9. a) ¿Imëpis allillatatsuraq concienciantsik ruratsimäshun? b) ¿Imatataq ruranantsik concienciantsik shumaq yanapamänapaq?
8 Pero tsënö karpis, manam imëpis allillapatsu apakun. Këta más tanteanapaq mäpaman yarpärishun. ¿Imataq pasamashwan llutampa mäpata rikashqaqa? Oqrakashqam purikushwan. Tsënöllam shonquntsikpa mana alli munënin concienciantsikta venciptenqa, alli kaq rurëta tanteatsimäshuntsu. Tsëmi yarpänantsikmi Biblia kënö nenqanta: “Shonquqa imëkapitapis más traicionërom, y imatapis rasllam munan. ¿Pitaq reqinman?” (Jer. 17:9; Pro. 4:23). Tsëmi alli kaqta ruranapaqqa Diospa Palabran Biblia yanapamänantsikta wanantsik, manaqa concienciayoq kanqantsikpis manam imapaq servinmantsu (Sal. 119:105). Pero llakikïpaqqa, wakin nunakuna shonqunkuna munanqanta rurakuyanqanmi, y Biblia nenqanta mana wiyakuyanqanmi (lei Efesios 4:17-19). Tsëmi nunakunataqa rikantsik, concienciayoq këkarnimpis imëka mana allikunata rurakïkäyanqanta (1 Tim. 4:2).
9 Pero noqantsikqa manam tsënö këta munantsiktsu. Tsëpa rantenqa Diosnintsikpa Palabranwan concienciantsik alli yachatsishqa kanantam munantsik, shumaq yanapamänapaq. Shonquntsikpa mana alli munëninta wiyakunantsikpa rantinmi concienciantsik nimanqantsikta cäsokuntsik. Hinamampis, kuyashqa cristiano mayintsikpa concienciantapis respetantsikmi. Tsëmi rurënintsikkunawan mana allikunaman ishkitsita munantsiktsu, y yarpantsikmi llapantsikpapis concienciantsikqa hukläya hukläya kanqanta (1 Cor. 8:12; 2 Cor. 4:2; 1 Ped. 3:16).
10. ¿Imakunatataq yachakushun qateqnin pärrafokunachö?
10 Y Jehová Diosta shonquntsikpita patsë kuyanqantsiktaqa rikätsishun kë kimanchö wiyakurninmi: 1) Dios kuyanqan nunakunata kuyarnin 2) autoridadkunata respetarnin, y 3) llapanchö limpio kanapaq sinchikurnin. Kë kimanchomi rikäshun concienciantsik yanapamänapaqqa Biblia nenqanwan alleq yachatsishqa kananta.
Dios kuyanqan nunakunata kuyashun
11. ¿Imanirtaq Diosnintsik kuyanqan nunakunata kuyashwan?
11 Puntataqa, Dios kuyanqan nunakunatam kuyanantsik. Imëkachöpis nunaqa utku millwanömi kantsik, imanömi utkuqa imëkatapis shoqun, tsë cuentam imëkatapis raslla yachakurintsik. Tsëmi Diosnintsikqa musyan nunakunawan más takukarqa, mana munëkarpis, rurayanqanta y hasta portakïninkunata qatir qallëkunantsikta. Tsëmi kikin kënö consejamantsik: “Yachëyoq nunakunawan purikaqqa yachëyoqmi kanqa. Pero upa nunakunawan takukëkaqqa mana allikunapam pasanqa” (Pro. 13:20; 1 Cor. 15:33). Awmi, llapantsikmi yachaq këta munantsik, manam munantsiktsu mana allikunapa pasar llakikïtaqa. Tsëmi qatinantsik kikin Jehová Diosnintsikta, Pëqa alläpa yachaq y poderösom y mana alli rurëkunamanqa manam imëpis ishkinmantsu, tsënö këkarnimpis manam llutallatsu amïgonkunata akrarqan. Tsëpenqa, ¿imanö nunakunataraq akran amïgonkuna kayänampaq?
12. ¿Imanö nunakunatataq Jehová akran amïgonkuna kayänampaq?
12 Itsa yarpantsikchi Diosnintsik “amigö” nishpa Abrahanta qayanqanta (Isa. 41:8). Kë nunaqa shonqumpita patsëmi Jehoväman confiakorqan y llapan mandanqantam wiyakorqan (Sant. 2:21-23). Tsënö nunakunatam Jehová amïgompaq akrarqan. Awmi, Jehová Diosqa hutsannaq këkarnimpis alleq rikëkur-ran amïgonkuna akran, tsëmi noqantsikqa hutsasapa karnin más alli rikëkur-raq amïgontsikkuna akrashwan, alli kaqta ruranapaq yanapamänantsikpaq, tsënöpam purikäshun yachëyoq nunakunawan.
13. ¿Imataq yanapamäshun amïgokunata alleq akranapaq?
13 ¿Imataq yanapamäshun amïgota alleq akranapaq? Tsëpaqqa yanapamäshun, Bibliachö qellqarëkaqkunam. Tsëchömi tarintsik Rutwan suegran Noemí alläpa yanasa kayanqanta, y Davidwan Jonatán, Pabluwan Timoteu alli amigo kayanqanta. (Rut 1:16, 17; 1 Sam. 23:16-18; Fili. 2:19-22). Pëkuna alli amigo kayänampaqqa, ¿imataq yanaparqan? Jehová Diosta shonqunkunapita patsë kuyayanqanmi. Y noqantsikqa, ¿imanö amïgotataq ashintsik? ¿Noqantsiknö shonqunkunapita patsë Jehová Diosta kuyaqkunataku? Kënö amïgokunataqa tarishun Jehoväpa markanllachömi. Pëkunaqa manam, mana allimanqa ishkitsimäshuntsu. Tsëpa rantenqa Jehoväta wiyakunapaq, Palabranta alleq yachakunapaq, y alli kaqllata ruranapaqmi yanapamäshun (lei Gálatas 6:7, 8). Awmi, tsënö amïgontsikkuna alleq akrarmi Dios Yayapa kuyakïninchö imëpis kawakushun.
Autoridadkunata respetashun
14. ¿Imanirtaq hora höraqa fäciltsu autoridadkuna respetanan?
14 Hina Jehoväta kuyanqantsiktaqa rikätsikuntsik autoridadkunata respetarninmi. Pero hora höraqa autoridadkuna respetëqa manam fäciltsu. ¿Imanir? Llapan autoridadkunapis hutsasapa kayaptinmi. Hinamampis kikintsikpis hutsasapam kantsik, tsëmi fäciltsu autoridadkuna wiyakunan.
15, 16. a) ¿Imanirtaq alläpa preciso markanta diriginampaq Jehová churamushqan nunakunata respetëqa? b) ¿Imatataq yachakuntsik Moises pushaqnin kananta mana munarnin israelïtakuna rimar mana casokuyanqampita?
15 Tsëqa itsa tapukuntsik, “autoridadkuna respetë mana fácil këkaptenqa, ¿imanirtaq respetäman?” nishpa. Autoridadkunata respetarqa rikätsikuntsik kikin Jehoväta respetanqantsiktam. Huk nuna Jehoväta gobernaqnintanö akrarqa, pëpa autoridadnintam respetanan. Y mana wiyakurnenqa, ¿gobernamaq Diosnïmi ninmantsuraq? Hina Jehoväqa autoridadninta rikätsimantsik markanta dirigiyämunampaq hutsasapa nunakunata churamurninmi. Y pëkunata mana wiyakushqaqa, ¿imanötaq Jehová rikämashwan? (Lei 1 Tesalonicenses 5:12, 13.)
16 Këman yarpärishun, Moises pushaqninkuna kananta mana munarnin israelïtakuna rimayaptin y mana wiyakuyaptinmi, noqatam rimëkäyäman y manam respetayämantsu nerqan Jehová (Núm. 14:26, 27). Diosnintsikqa kanampis tsënöllam rikan. Markanta pushanampaq churanqan nunakunata mana respetayaptenqa, kikinta mana respetëkäyanqantanömi rikan.
17. ¿Imanötaq rikashwan Diosnintsik markanta dirigiyänampaq churashqa cristiänokunata?
17 Apóstol Pabluqa alleq clärom rikätsimantsik congregacionchö dirigeqkunata imanöpis rikänapaq. Kënömi qellqarqan: “Yachatsir pushayäshoniquicunata cäsucuyanqui. Diosta cuentata qoyänanpaq caqta musyarmi, pecunaqa imepis shumaq ricayäshurniqui yachecatsiyäshunqui. Cäsucuyaptiqueqa pecunapis ganas ganasllam yachatsiyäshunqui; y mana cäsuyaptiqueqa, pecunapaq allapa sasam canqa; y yachatsiyäshunqequipis manam imapaq sirwiyashunquitsu” (Heb. 13:17). Rasumpëpam autoridadkunata wiyakï y respetëqa fäciltsu. Pero tsëqa alläpa precïsom Dios Yayapa kuyakïninchö imëpis kawakunapaq. Tsëmi, sinchikunantsik respetakoq y wiyakoq kanantsikpaq.
Diosnintsikpa rikënimpaq llapanchö limpio kanapaq sinchikushun
18. ¿Imanirtaq Jehová munan llapan kawënintsikchö limpio kanata?
18 Tsëpitapis hina Jehoväta kuyanqantsiktaqa rikätsishun, Diosnintsikpa rikënimpaq llapan kawakïnintsikcho limpio kanapaq sinchikurninmi. Llapan teytakuna y mamakunam wambrankuna limpio kanantam munayan. ¿Imanirtaq tsënö limpio kanantaqa munayan? Limpio karqa sano winananta musyarmi. Y huk lädopanam, wambrakunata limpiota rikarqa teytan y maman cuidanqanta y kuyanqanta nunakuna alli parlayänanta musyar. Tsënöllam, Teytantsik Jehoväpis limpio kanantsikta munan. Y musyanmi llapan kawënintsikchö limpio kashqaqa alli kawanata y nunakuna limpiota rikämarnintsikqa kikin Diosnintsikpaq allita parlayänanta. Limpio këqa alläpa precïsom, tsënöpam rikämaqnintsikkunapis Diosnintsikpa markanman yëkamïta munariyanqa hukläya kanqantsikta rikämarnintsik.
19. ¿Imanirtaq alläpa preciso limpio këqa?
19 Rasumpëpa cristiänokunaqa llapan kawënintsikchömi limpio kanantsik. Limpio këqa alläpa alli kanqantam israelïtakunata Jehová willaparqan (Lev. 15:31). Tsëmi leyninkuna qonqanchö mandakorqan, tsaki ishpëninkunatapis pampayänampaq, imëka cösasninkunatapis limpio katsiyänampaq y makinkunata, chakinkunata y röpankunatapis limpiota katsiyänampaq (Éxo. 30:17-21; Lev. 11:32; Núm. 19:17-20; Deu. 23:13, 14). Kë leykunawanmi israelïtakuna musyayarqan Diosninkuna Jehoväqa santo y limpio kanqanta. Tsëmi limpio y santo Diosta sirveqkunaqa, llapan kawënintsikchö limpio kanantsik (lei Levítico 11:44, 45).
20. ¿Imakunachötaq limpio kashwan?
20 Y manam hananllapatsu limpio kanantsik, pensënintsikchö y rurënintsikchöpis limpiom kanantsik. Kë mundochö nunakuna mana alli rurëkunallaman yarparäkuyaptimpis, noqantsikqa pensënintsik limpio kanampaqmi sinchikuntsik, y wiyakuntsik Teyta Diospa consëjonkunatam. Y adoracionnintsikpis limpio kanantam munantsik y manam mana alli religionpa yachatsikïninkunawan takuntsiktsu. Cada hunaqmi yarparantsik Isaías 52:11 nenqanta: “Tsëpita yarqukuyë ama ni ima rakchatapis yatayëtsu, imëpis limpio këkäyë”. Awmi, kanan tiempopis Teyta Dios rakcham nimanqantsikpitaqa witikuntsikmi y manam yatantsiktsu ni rurantsiktsu. Tsëmi, mana alli religionkunapa fiestankunata ni costumbrenkunata qatintsiktsu. Awmi, manam fäciltsu Diosnintsikpa rikënimpaq limpio kawakïqa, pero llapan kawënintsikchö limpio kanapaq sinchikurnenqa, imëpis Diosnintsikpa kuyakïninchömi kawakushun.
21. ¿Imatataq ruranantsik imëpis Teyta Diospa kuyakïninchö kawakunapaq?
21 Jehová Diosqa munan imëpis kuyakïninchö kawakunatam. Tsëpaqqa kikintsikmi sinchikunantsik. Jesucristuqa Teytanta kuyanqanta rikätsikorqan mandamientonkunata wiyakurninmi, noqantsikpis tsënölla rurashun. Tsënö rurashqaqa “Jesucristurecur Diosnintsicpa cuyaquininpita manam [ni ima] raquimenintsicta puedenqatsu” (Rom. 8:38, 39).
¿Yarpankiku yachakonqantsikkunata?
• ¿Imanötaq yanapamantsik concienciantsik Teyta Diospa kuyakïninchö imëpis kawakunapaq?
• ¿Imanirtaq kuyanantsik Dios kuyanqan nunakunata?
• ¿Imanirtaq alläpa preciso autoridadkunata respetëqa?
• ¿Imanirtan cristiänokunapaqqa alläpa preciso llapan kawënintsikchö limpio kë?
[Yachakunapaq kaqpa tapukïninkuna]
[29 kaq päginachö dibüjukuna y recuadru]
KAWAKÏNINTSIKCHÖ SHUMAQ PORTAKUNAPAQ YANAPAKOQ LIBRO
Kima hunaq kaq asambleachömi 2008-2009 watachö yarqamorqan 224 päginayoq “Dios Yayapa kuyakïninchö imëpis kawakuyë” nishqan libro. ¿Imapaqtaq kë mushoq libro rurakämorqan? Diospa llapan sirveqninkuna Teyta Dios mandakushqankunata más reqiyänampaq y más kuyayänampaq yanapanampaqmi. Kë libroqa imanöpis portakunapaqmi yanapamantsik, tsëmi alli estudiarnenqa Jehová mandamanqantsikta wiyakïqa kikintsikpaq alläpa alli kanqanta cuentata qokushun, y wiyakonqantsik mana wanushpa kawëman chätsimänapaq kanqantapis alleq musyashun.
Hinamampis kë libroqa rikätsimantsik, Jehová Diospa mandakïninkunaqa fácil cumplinan kanqantam, y cumplirnenqa kuyanqantsikta rikätsina kanqantam. Leirnenqa kënömi tapukunantsik: “¿Imanirtaq Jehoväta servikä?”.
Llakinëpaqqa wakin cristiänokunaqa Diospita y kuyakïnimpita rakikäkuriyanqanmi. ¿Imanirtaq tsënö rakikäkuriyashqa? Manam Biblia yachatsikonqanta alleq mana musyartsu, sinöqa kikinkuna mana allikunata rurayanqampitam. Tsëmi alläpa preciso Teyta Diospa mandamientonkunata shonqupita patsë kuyanantsik, tsëqa cada hunaqmi alli nänipa pushamäshun. Alleqmi musyayä, kë mushoq libro hinantin patsachö cristiänokunata yanapananta, Dios Yayapa mandamientonkunata wiyakurnin Satanás uli o llulla kanqanta rikätsikuyänampaq y tsënöpa Dios Yayapa kuyakïninchö imëpis kawakuyänampaq (Jud. 21).
[27 kaq päginachö dibüju]
“Noqaqa Papänïta cuyarmi, mandacushqancunata cäsucü. Tsenollam noqata cuyamarqa, qamcunapis mandacushqäcunata cäsucuyanqui.”