Alli kaq religionqa Nuna mayinwan kuyanakuyänampaqmi yachatsikun

“PIPIS nuna mayinta mana cuyaqqa, manam reqintsu Diosta, porqui Diosqa allapa cuyacoqmi” ninmi Bibliaqa (1 Juan 4:8). Tsëmi rasumpa kaq Diospita yachatsikoq religionqa, kikinkunapura y wakinkunawampis kuyanakuyänampaq yachatsikun.

Atska religionkunam qeshyëkaqkunata, awkinkunata y chakwankunata, y waktsakunata yanapayan. Apóstol Juan kënö nenqantam rurëkäyan: “Si pipis capugyog rïcu caycar, creyicug runamajin faltapacur caycagta ricaycar mana llaquiparnin imallatapis mana garaycuptinga, ¿imanörag tsay runapa shongonchö Dios Yayapa cuyacuynin canman? Cuyashga creyicug wamralläcuna, ama shimintsic parlanganllawanga cuyanacushuntsu. Sinöga rasumpa ruraynintsicwan imaycachöpis cuyanacurnin shumag yanapanacushun” (1 Juan 3:17, 18, NTCN).

Nunakuna yamë kawakuyanqan witsanqa, manam alläpa sasatsu “kuyankim nuna mayikita kikikitanow” neq textota wiyakunan (Mateo 22:39, QKW). Pero ¿imataq pasan huk nación, huk nacionwan guërraman yëkuyaptenqa? ¿“Kuyankim nuna mayikita kikikitanow” neq mandamientota yarpäyantsuraq?

Jesusqa clärom kënö nerqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:35).  Mëqan religionpis alli kanqanta musyanëkipaqmi qateqninchö tapukïkuna kan. ¿Religionnikichöqa shimillapaku o rasumpaku kuyanakuyan?, tsëtam llapan tapukïchö rikänëki.

TEMA: Guerra.

¿IMA NINTAQ BIBLIA? “Chiquiyäshogniquicunataga cuyayanqui. Chiquishur contrashogniquicunapäpis Tayta Diosman mañacuyay cawayninchö yanapanampä.” (Mateo 5:44, MTCS.)

Huk kuti soldädokuna Jesusta tsariyänampaq ëwayaptinmi, apóstol Pedru washëta munar espädanta horqarerqan. Tsënam Jesus kënö nerqan: “Kutitsi espadeykita kanqanman; espadata llapan tsareqqa, espadawanmi wanuyanqa” (Mateo 26:52, QKW).

Tsëpita unëllatanam apóstol Juan kënö qellqarqan: “Rurenincunachomi Diospa tsurincuna cayanqanta, y diablupa tsurincuna cayanqantapis reqitucuyan. Mana allicunata ruraqcunaqa, y nuna mayinta mana cuyaqcunaqa manam Diospa tsurincunatsu cayan. Quemi qallanqanpita willaqui wiyayanqequi: jucnintsic jucnintsic cuyanacunantsicpaq. Adanpa tsurin Cainnoqa ama cashuntsu. Cainqa diablupa carmi, wauqin Abelta wanutserqan” (1 Juan 3:10-12).

TAPUKÏ: ¿Religionnikichö kaqkuna guërraman ëwayanku?

TEMA: Nunakunapa gobiernon.

¿IMA NINTAQ BIBLIA? Jesus milagrokuna ruraqta rikarmi, gobernanampaq nunakuna churëta munayarqan. “Runacuna amälas reynincuna cananpag churayta munayargan” ninmi Bibliachö. ¿Imataraq Jesus rurarqan? “Tsaynö churayänanta mana munarmi, Señor Jesuscristoga juc jircapa japallan aywacurgan.” (Juan 6:15, NTCN.)

Gobiernokunapa contranmi yachatsikun nirnin tsariyaptinmi, Jesus kënö nerqan: “Noqapa mandaquinïqa manam que patsacho nunacunapa mandaquininnotsu. Que patsacho mandacoq captïqa, sirwimaqnïcunam pelyarnin, mana dejayämanmantsu israel autoridacunaman presu apayämänanta. Mandacoq quenïqa manam quechotsu” (Juan 18:36).

Teytanman Jesus mañakonqanchöpis këtam nerqan: “Noqam [discïpulökunata] qorqö palabreykita, i mundunam chikerqan, mundupa mana kayaptin, noqapis mana[m] mundupatsu kä” (Juan 17:14, QKW).

TAPUKÏ: Autoridadkuna chikiyänan këkaptimpis, ¿Jesusnöllaku religionnikichö nunakunapa gobiernonkunaman mëtikuyantsu?

TEMA: Mana alli rikänakïkuna.

¿IMA NINTAQ BIBLIA? Mana judío nunakuna cristiano këman chäriyanqanllachömi apóstol Pedru kënö nerqan: “Tayta Diosga musyatsimashgam maytsaychö imaycaläya runacunatapis cuyanganta. Payga cuyapanmi imayca  ricog runatapis munangannö cawag cagtaga” (Hechos 10:34, 35, MTCS).

Jesuspa qateqnin Santiägum cristiänokunaman cartakurnin kënö nerqan: “Cuyashqa wauqicuna y panicuna, puedeq Teytantsic Jesucristuman creyicoq quecarnin, nuna mayintsiccunata jucninta presisaqpaq churar y jucnintana despresyarnin ama cashuntsu. Sitsun ellucayanqequiman chämonqa juc nuna oru sortijashqa, alli mushoq ropashqa; y qepantana yecaramutsun juc wactsa nuna raccha püru ratas roparishqa. Y si tse alli ropan yacacushqa nunata allapa presisaqpaq churarnin, queno niyanqui: ‘Wiraqtsa, que alli caqllaman täcaramï’ nishpa; y wactsa nunatana queno niyanqui: ‘Qamqa, taqellacho shäcamï, o que patsallacho täcamï’ nishpa. Tseno nirninmi, jues tucur mana alli penseniquicunawan allitatsu rurecayanqui” (Santiagu 2:1-4).

TAPUKÏ: Tukï color nunakuna y waktsakunapis Diospaqqa igual-llam kayan, tsënö këkaptenqa, ¿mana chikinakuyänëkipaqku religionnikichö yachatsikuyan?

[7 kaq päginachö ninqan]

¿Mëqan religiontaq tukï color nunakunata, waktsakunata o pï nunakunatapis mana chikiyänampaq yachatsikun?