Jehová yachatsimanqantsikqa imëka estudiopitapis más alli kaqmi

“Tsëkunataqa mana väleqpaqnam churarerqö Señornï Cristu Jesuspita alläpa valoryoq yachatsikïta yachakonqarëkur.” (FILI. 3:8, NM.)

1, 2. ¿Imata rurayänampaqtaq wakin cristiänokunaqa churapakäyashqa, y imanir?

WAMBRA kanqampita patsëmi Robert shutiyoq jövenqa alläpa estudioso karqan. Puwaq watayoqllaraq këkaptinmi, huk profesöran wayinman ëwëkurnin, qamqa llapan munanqëkitam estudiarnenqa tarinki y noqaqa doctor kanëkitam munä nerqan. Alli yachaq alumnom karqan y wambrallaraq këkarpis markanchö más alli kaq universidadkunaman estudiaq ëwëtapis puëderqannam. Pero tsë ruranampaq kaq wakinkunapaq alläpa valoryoq kaptimpis, Robertqa manam tsëtatsu rurarqan, sinöqa precursor regular kananrëkurmi tsë llapanta haqirerqan.

² Robertno kaqmi atskaq cristiänokuna jövempis, mayorpis kë mundochö reqishqa y kapoqyoq këman chëta puedeyanman karqan, pero tsë llapantam haqiriyashqa Jehoväpa kaqchö más trabajayänanrëkur (1 Cor. 7:29-31). ¿Imanirtaq llapan tiemponkunawan kë cristiänokunaqa Jehoväta servita akrayashqa? Tsëtaqa rurayashqa Jehoväta kuyarninmi, hina alleqmi musyayan Diospa yachatsikïnenqa imëka estudiokunapitapis más valoryoq kanqanta. Imëllaqa qam tapukushqaku kanki, ¿imanöraq kawakïkäman karqan Jehoväta mana reqishqa karqa nishpa? Jehová yachatsimanqantsikrëkur imëka bendicionkunata chaskikanqantsikman yarpäshun. Tsënöpam más kuyashun Jehoväpita yachakonqantsikta, y yachatsikoq ëwanqantsiktapis.

Jehová yachatsimanqantsikqa alläpa kushikïpaqmi

3. ¿Imanötaq musyantsik Jehoväqa hutsasapa nunakunata yachatsinampaq listo këkanqanta?

³ Alläpa kuyakoq karninmi Jehoväqa listo këkan hutsasapa nunakunata yachatsinampaq. Ciëlota ëwaqpaq kaq cristiänokunapaq parlarninmi Isaías 54:13 kënö nin: “Llapan tsurikikunam Jehová yachatsishqan kayanqa, y wambrëkikunapa alli kawakïnenqa mëtsikam kanqa”. Kë bendicionqa Cristupa wakin ‘üshäcunapaqwanmi’ (Juan 10:16). ¿Imanötaq tsëtaqa musyantsik? Këtaqa musyantsik kanan tiempontsikchö cumplikëkaq profecïachömi. Profeta Isaiasmi huk visionchö rikarqan llapan nacionpita atska nunakuna Diosta adorayänampaq shamïkaqta. Tsë profecía nenqannömi huknimpis huknimpis kënö ninakuyarqan: “Witsäshun Jehoväpa hirkanman, Jacobpa Diosnimpa wayinman, pëmi näninta reqitsimäshun y rasumpëpam imëpis nänimpa purishun” (Isa. 2:1-3). Awmi, Jehová yachatsishqanmi kayänan karqan. ¡Tsë yachatsikïwanqa manam ni ima igualantsu!

4. ¿Imatataq ruranantsik Jehoväpa yachatsikïninta chaskinantsikpaq?

⁴ ¿Imatataq ruranantsik Jehoväpa yachatsikïninta chaskinantsikpaq? Tsëpaqqa kanantsik manshum, y yachatsimänantsiktam permitinantsik. Salmista Davidmi kënö qellqarqan: “Jehoväqa alläpa allim, alli rurëta kuyaqmi [...] Pëmi manshukunata musyatsinqa Näninta” (Sal. 25:8, 9). Hinamampis Jesusmi kënö nerqan: “Sieluchopis patsachopis mandacoq Dios Yaya, qamtam alabecoq. Porqui yachaq tucoqcunataqa y musyaq tucoqcunataqa manam boluntaniquita cäyiratserqonquitsu; peru qollmi shonqu nunacunataqa cäyiratserqonquim” (Luc. 10:21). ¿Manaku tsënö ‘qollmi shonquyoqcunata’ yachatsinqampita pasëpa kuyëkuntsik? (1 Ped. 5:5.)

5. ¿Imataq yanapamarqontsik Diosnintsikta reqinantsikpaq?

 ⁵ ¿Noqaqa kikï sinchikurmi y yachaq karmi Diospa Palabranta reqerqö y tsëmi cuentata qokurerqö alli kaq nänita qatinäpaq nishwantsuraq? Manam, noqantsikllapitaqa manachi ni imëpis puëdeshwantsu karqan Diosnintsik reqita. Jesusmi kënö nerqan: “Cachamaq Dios Yaya nunacunata shonquncunacho mana cäyitsiptenqa, manam ni pipis noqaman shamunmantsu” (Juan 6:44). Tsënömi, kikin Jehová hinantin markapita “allin kaqkunata” o üshanö kaq manshu nunakunata kuyakïninwan apamun markanman, y tsëtaqa ruran Palabran Bibliapita yachatsir y santu espirïtunwanmi (Ageo 2:7). ¿Manaku kushikunki wambranta reqinëkipaq Jehová pushamushonqëkita? (Lei Jeremías 9:23, 24.)

Jehoväpa yachatsikïnenqa nunakunapa kawënintam altsan

6. ¿Imataq pasan nunakunawan Jehoväpita yachakuriyaptin?

⁶ Huk shumaq igualatsikïkunawanmi willakun Isaías qellqanqan profecía, kanan tiempochö nunakuna imanö cambiëkäyanqantapis. Atskaq nunakunam puntataqa maqakoq kayarqan y kananqa alläpa manshum tikrayashqa (lei Isaías 11:6-9). Wakinkunaqa chikinakuyaq yulaq, yana, huk costumbreyoq, huk kastapita kar, pero kananqa yamë y mana chikinakushpa kawakïtam yachakuyashqa. Huk parlakïchöqa “espädankunatam yapyakunapa puntanman” tikratsiyashqa (Isa. 2:4). ¿Imanirtaq tsëläyaqa nunakuna cambiëkuyashqa? Jehová Dios munanqanta yachakur kawëninkunata altsashqa karmi. Hutsasapa karnimpis hinantin markakunachö Jehoväta sirveqkunaqa huk kastanöllam kayan. Awmi, tsë alli willakï nunakunata cambiatsenqanmi rikätsimantsik Jehoväpa yachatsikïnenqa imëka estudiopitapis más alli kanqanta (Mat. 11:19).

7, 8. a) ¿Imakunataq kayan tsë tukï ‘puedeqcuna’ Teyta Diosman creikoqkunata pantatseqkunaqa? b) ¿Ima pasakonqantaq rikätsimantsik Bibliapita yachatsikïqa Jehoväpa shutinta alabanqanta?

⁷ Apóstol Pabluqa cristiänokuna Diospita yachatsikur puriyanqantaqa igualatserqan pelyatawanmi. Kënömi qellqarqan: “Antis quiquintsicpa callpantsicpa rantinmi Diosnintsicpa callpanwan areglashun. Tse callpaqa ima puedeqcunatapis usharinmi. Tse callpawanmi tse ulicur acusacuyanqanta usharishun. Tsenolla ushalishun Teyta Diosman creyicuyänanta pantatseq musyaq tuquinincunatapis” (2 Cor. 10:4, 5). ¿Imakunataq kayan tsë tukï ‘puedeqcuna’ Teyta Diosman creikoqkunata pantatseqkunaqa? Tsëkunaqa kayan mana alli religionkunapa yachatsikïninkuna, imëka creenciakuna, Diosman mana creeq nunakunapa yachatsikïninkuna, y hukkunapis (Col. 2:8). Jehová Diospa yachatsikïninkunam yanapan nunakunata mana alli rurëninkunata y portakïninkunata haqiyänampaq, tsënöpa Diosnintsik munanqanllatana rurayänampaq (1 Cor. 6:9-11). Hinamampis familiakunatam yanapan Diosnintsik munanqannö y kushishqa kawakuyänampaq. Kanan tiempoqa tsënö kaq yachatsikïtam wanantsik o ministintsik.

⁸ Jehoväpa yanapakïninwanqa nunakuna honrado këtam yachakuyan, tsëta rikärishun (Heb. 13:18). India markachömi huk warmi Bibliata estudiar qallëkorqan, tsëpitanam Diospita yachatsikoq yarqur qallëkorqan manaraq bautizakur. Huk hunaqmi Jehoväpa Testïgonkuna Yachatsikuyänan Wayi rurëchö yanapakurir wayinta kutirëkarqan, y cärrokunapa paradëronta pasarëkarnam tarikurerqan öropita huk shumaq cadënata. Kë warmiqa waktsa këkarnimpis y kë cadena 800 dólares chaniyoq këkaptimpis, policiakuna kaqtam ëwarqan tarikonqanta haqinampaq, y congregacionnimpita huk anciano yanaqänampaqmi nerqan. Y policïapa mandaqninqa manam creirerqantsu. Tsëpitanam, huk policïana kë publicadörata tapurerqan imanir tarikonqanta tsëman apanqantapis, Tsënam pëqa contestarqan: “Kawënïta Biblia altsamushqa kaptinmi kananqa honrado warmi kä” nishpa. Espantashqam kë policïaqa anciänota kënö nerqan: “Kë markachöqa kima chunka puwaq millón (38.000.000) nunakunam kan. Chunka nunallatapis kë honrada warminö kayänampaq yanapaqtikeqa imëka alliraq këkunman”. Awmi, Bibliapa yachatsikïnenqa hinantin patsachö atska millón nunakunapa  kawënintam altsashqa. ¿Manaku tsëta musyarnenqa masraq Teytantsik Jehoväta alabëkushwan?

9. ¿Imataq nunakunata yanapan kawëninkunata altsayänampaq?

⁹ Diospa Palabran Biblia y Jehoväpa santu espïritunmi yanapan nunakuna kawëninkuna altsarïkur alli kaqllatana rurayänampaq (Rom. 12:2; Gál. 5:22, 23). Colosenses 3:10 textom kënö willamantsik: “Cananqa tse mana alli muneniquicuna rureta jaqiriyarqonquim, juclaya nunana carnin. Y tseno carmi camacoq [...] Dios canqanno cada bes mas alli ticrariyanqui”. Awmi, Bibliaqa nuna imanö kanqantapis musyaratsinmi, y lluta yarpëninta, y mana alli munënintapis pasëpam tumakäratsin (lei Hebreus 4:12). Diospa Palabranta yachakur qallanqampita y kawëninchö yachakonqankunata rurarnenqa, Diosnintsikpa rikënimpaq alli nunanam tikrarin, y mana wanushpa kawakïtapis chaskinqam.

Shamoq tiempopaq listo këkänapaq yachatsikï

10. a) ¿Imanirtaq Jehovälla yachatsimënintsikta pueden shamoq tiempopaq? b) ¿Hinantin Patsachö ima pasanampaqtaq ichik tiempollana pishin?

¹⁰ Jehovällam yachatsimënintsikta pueden shamoq tiempopaq, pëllam musyan ichik tiempollatana ima pasarinantapis. Pëmi patsätsishqa shamoq tiempochö nunakuna imanö kayänampaqpis (Isa. 46:9, 10). Bibliam kënö nimantsik: “Jehoväpa hatun piñakïnin hunaqqa këllachönam” (Sof. 1:14). Tsë hunaqmi cumplikanqa Proverbios 11:4, nenqan: “Imëka väleq cösaskunapis manam imapaq sirvenqatsu Diospa piñakïnin hunaqchöqa. Pero alli rurëninmi sïqa wanïpita libranqa”. Awmi, kë Satanaspa mundonta Diosnintsik ushakätsimuptenqa, más precïsoqa kanqa Jehoväpa rikënimpaq alli kaqta rurëkanqantsikmi. Qellëqa manam imapaqpis välenqatsu, Ezequiel 7:19 kënö nin: “Cällekunamanmi hitayanqa qellëninkunata, y öronkunapis manam imapaq sirvenqatsu”. Kë llapanta musyëmi yanapamantsik kanampita patsëna alli kaqta ruranantsikpaq.

11. Willakaramï, ¿imanötaq Jehová yachatsimanqantsik yanapamantsik Juicio hunaqpaq listo këkänapaq?

¹¹ Jehová Dios yachatsimanqantsikqa yanapamantsik más precisaq kaqta puntaman churanantsikpaqmi. Apóstol Pablum kënö nerqan Timoteuta: “Que patsacho ricucunata willapëquï, mana orgullosu cayänanpaq, ni imapis cayäpoqnincunallaman mana marcäcuyänanpaq; sinoqa marcäcuyätsun Diosman”. Mana qellëyoq kashqapis kë consëjoqa noqantsiktapis alläpam yanapamashwan. ¿Imanir? Alleq clärom nimantsik imëka cösasnintsik kanampaq sinchikunantsikpa rantenqa “allicunallata rurar”, ‘Diosnintsiccho rasonpa caq fortunata’ ashinantsikpaq. Y Jehoväpa kaqta puntaman churarnenqa, listom këkäshun mana ushakaq kawëta chaskinantsikpaq (1 Tim. 6:17-19). Tsë llapan haqenqantsikchöqa rikätsikuntsik alli juicioyoq kanqantsiktam, Jesus nenqannöpis “¿imapaqraq juc nunata sirwenqa jinantin mundupa dueñun canqanpis, wiñe caweta mana lobraptin!” (Mat. 16:26, 27). Këllachöna Diosnintsikpa hunaqnin këkaptenqa, cada  cristiänom kënö tapukunantsik: “¿Mëmantaq rasumpa tesörokuna churakïkä? ¿Diospa o riquëzaskunapa sirveqninku kä?” (Mat. 6:19, 20, 24).

12. ¿Imanirtaq qelanashwantsu pipis Diospita yachatsikur purenqantsikta mana väleqtanö churaptin?

¹² Biblia mandamanqantsik rurëkunapita más precisaq kaq rurëqa Jehoväpita nunakunata yachatsirnin Jesuspa qateqnin kayänampaq yanapëmi (Mat. 24:14; 28:19, 20). Tsënö kaptimpis punta cristiänokunapa tiemponchonöllam kanampis wakin nunakunaqa mana väleqpaq churayan Diospita yachatsikur purenqantsikta (lei 1 Corintios 1:18-21 NM). Pero tsëqa manam apanqantsik willakïta mana veleqtanöqa churantsu, ni manam qelanätsimantsiktsu, más bien nuna mayintsikta yanapëkänantsikllam pëkunapis Teyta Diospa alli willakïninta chaskiyänampaq (Rom. 10:13, 14). Hinamampis nuna mayintsikta yachakuyänampaq yanaparqa, noqantsikpis atska bendicionkunatam chaskishun.

Jehoväqa bendecinmi imëkatapis haqïkur sirveqkunataqa

13. ¿Imatataq apóstol Pablu rurarqan nunakunata alli willakïta willananrëkur?

¹³ Joven kanqampitam apóstol Pabluqa estudiarqan yachaq, reqishqa y kapoqyoq nuna kanampaq. Chunka kima (13) watayoqllaraq këkarmi yurikonqan Tarsu markapita Jerusalenta ëwarqan y tsëchömi maestron karqan Gamaliel, pëqa Jehová unë markan Israelta qonqan leykunata alli yachaq nunam karqan (Hech. 22:3). Pabluqa alläpa yachaq y reqishqa nunam tikrarerqan, y siguirnenqa religionninchö alläpa reqishqam kanman karqan (Gál. 1:13, 14). Pero Jehoväpita yachakurir y nuna mayinkunata yachatseq ëwar qallëkurmi, tsë llapanta haqirerqan. ¿Lamentakorqanku rurëkanqampita? Manam. Tsëmi pë kënö qellqarqan: “Manam tsëllatsu, tsëkunataqa mana väleqpaqnam churarerqö Señornï Cristu Jesuspita alläpa valoryoq yachatsikïta yachakonqarëkur. Përëkurmi imëkatapis haqerqö y mana väleq poqi cuentatana churarqö, Cristuwan alli këta tarinärëkur” (Fili. 3:8, NM).

14, 15. ¿Ima bendicionkunatataq ‘Diospa mincancunaqa’ chaskintsik?

¹⁴ Pablunö kaqmi kanan tiempo cristiänokunapis Jehoväpita nuna mayintsikta yachatseq ëwanantsikrëkur imëkata haqintsik (Mar. 10:29, 30). ¿Tsërëkurtsuraq waktsayashqa purintsik? Rikärishun qallanan pärrafokunachö parlanqantsik Robert shutiyoq joven nenqanta: “Manam lamentakütsu rurëkanqäpita. Jehoväpita yachatsikur precursornö trabajëkanqäqa alläpam kushitsiman. Jehoväqa permitimashqam kuyakoq y alli kanqanta rikänapaq. Pëpaq más trabajanärëkur imëka haqenqäkunapitapis  mastam Jehoväqa qomashqa. Y imatapis mana haqishqa cuentam sientikü, imëpis atska bendiciontam chaskï”. Tsënöllam atskaq cristiänokunapis cientikuyan Jehoväta serviyanqanrëkur (Sal. 34:8; Pro. 10:22).

¹⁵ Itsa qampis atska watana Jehoväpita yachatsikur cuentata qokurqonki Jehová alläpa alli kanqanta. ¿Imëllaqa tantearqonkitan yachatsikuptiki santo espíritu yanapashunqëkita? Rikarqonkiku, ¿wiyëkäshoqniki nunakunapa shonqunta Jehová kichariptin pasëpa kushishqa wiyakoqta? (Hech. 16:14.) ¿Jehová yanapashorqonkiku tiempïkita shumaq patsëkatsir más hörakuna yachatsikoq yarqunëkipaq? ¿Yanapashorqonkiku mana alli tiempopa pasëkaptiki? Y ¿mananam puedïnatsu nikaptiki kallpata qoshorqonkiku? (Fili. 4:13.). Yachatsikoq ëwashqa Jehoväpa yanapakïninta mäkonqantsikqa yanapamantsik pëta rasumpëpa Diostanö rikänapaq y más lädonman witinapaqmi (Isa. 41:10). ¿Manaku alläpa kushikïpaq Bibliapita yachatsikïninkunata puritsir ‘Diospa mincancuna’ këqa? (1 Cor. 3:9.)

16. ¿Imanötaq qam rikanki Jehoväpita yachatsikunëkirëkur llapan haqenqëkita?

¹⁶ Kë mundochö nunakunaqa tukïtam rurayan reqishqa këta munar. Pero alleqmi musyantsik kë mundochöqa alläpa reqishqa y alläpa kapoqyoq këman chäyanqampis ushakärinllam. Pero kanan tiempo Jehová shutinta limpioyätsinampaq llapan rurëkanqankunaqa manam ni imëpis ushakanqatsu, y imëyaqpis yarpashqam kanqa (Pro. 10:7; Heb. 6:10). Tsëmi, alläpa valoranantsik kanan tiempochö Jehová Diospita hinantin patsachö willapäkïcho yanapakïkanqantsikta.

¿Yachankiku respuestanta?

• ¿Imatataq ruranantsik Jehoväpa yachatsikïninta chaskinantsikpaq?

• ¿Imanötaq musyantsik Jehoväpa yachatsikïnenqa nunakunapa kawëninta altsanqanta?

• ¿Ima bendicionkunatataq chaskishun nuna mayintsikta Diospita yachatsirnenqa?

[Yachakunapaq kaqpa tapukïninkuna]

[26 kaq päginachö dibüju]

Jehová Dios yachatsenqa nunakunaqa huk kastanöllam kayan më markapita karpis

[27 kaq päginachö dibüju]

¿Manaku alläpa kushikïpaq ‘Diospa mincancuna’ këqa?