“Amigücunam cayanqui”
“Amigücunam cayanqui”
“Noqa mandacushqäcunata rurarnenqa, amigücunam cayanqui.” (JUAN 15:14.)
1, 2. a) ¿Imanötaq musyantsik Jesuspa amïgonkunaqa tukïläya nuna kayanqanta? b) ¿Imanirtaq alläpa preciso Jesuspa amïgon këqa?
KANANYAQ yarpanqantsik alläpa preciso paqaschömi, Jesus Jerusalenchö apostolninkunawan Pascuata celebrëkarqan huk wayichö. Apostolninkunaqa tukïläya oficioyoq nunakunam kayarqan. Pedru y wawqin Andresqa pescadormi kayarqan. Mateonam karqan impuesto cobrakoq, y tsë tiempo judïokunaqa pasëpa mana allipam rikäyaq tsënö oficioyoqtaqa. Wakinkunaqa Santiagu y Juannöpis Jesusta reqiyarqan wambra këninkunapitam, pero wakinqa Natanaelnöpis ichik tiempollaran reqiyarqan (Juan 1:43-50). Tsënö karpis llapankunam pasëpa markäkuyarqan o yärakuyarqan Jesus Diospa wambran y Akrashqan Mesías kanqanman (Juan 6:68, 69). Pasëpachi kushikuyarqan Jesus kënö niriptin: “Mananam niyaqnatsu: ‘Sirwimaqnïcunam cayanqui’ nishpa. Sirwicoqcunaqa manam musyayantsu patronnin ruranqanta. Peru qamcunataqa amigücuna cayaptiquim, Papänï yachatsimashqancunata willayarqoq” (Juan 15:15).
2 Jesus kënö nenqanqa manam fiel apostolninkunallapaqtsu, sinöqa kanan tiempochö ciëlopa ewaqpaq kaq cristiänokunapaq y kë Patsachö quedaqpaq kaq cristiänokunapaqwanmi (Juan 10:16). Jehová Diosta sirveqkunaqa tukï rikoq, tukï markapita y tukïläya nunam kantsik, tsënö kaptimpis llapantsikmi Jesuspa amïgon këta puëdentsik. Y këqa alläpa precïsom, porque Jesuspa amïgon karqa Jehoväpa amïgompis kantsikmi. Awmi, manam Jehová Diospa amïgon këman chëta puëdentsiktsu, puntata Tsurimpa amïgon mana karnenqa (lei Juan 14:6, 21). ¿Imatataq wanantsik o ministintsik Jesuspa amïgon këman chänapaq? ¿Y Jesuswan amigo kanqantsik mana ushakänampaq imatataq ruranantsik? Kë tapukïkunata manaraq contestarmi, puntata yachakurishun Jesus imanö amigo kanqampita y alli amigo kanqampita qateqninkuna imanö rikäyanqantapis.
Jesus yachakunapaq huk alli amigo
3. ¿Pikunapa amïgon këtataq Jesus asherqan?
3 Yachaq rey Salomonmi kënö qellqarqan: “Rico nunakunapaqa atskam amïgonkuna” (Pro. 14:20). Tsënömi, kë mundochöqa rikantsik nunakuna piwampis amigo këta ashiyan imatapis chaskita munarlla, y manam yarpäyantsu imanöpapis amïgonkunata yanapëtaqa. Pero Jesusqa manam tsënötsu karqan. Pëqa manam rico o yachaq kayanqampitatsu amïgonkuna akraq. Awmi, huk joven rico gobernantetaqa kuyarqanmi, y qateqnin kanampaqmi invitarqan. Pero tsëpaqqa puntata llapan kaponqanta rantikïkur waktsakunata yanapanampaqmi nerqan (Mar. 10:17-22; Luc. 18:18, 23). Jesusqa manam reqishqa karqan kapoqyoq y yachaq nunakunawan amigo kanqampitatsu, sinöqa humilde y nunakuna mana kaqpaq churayanqan nunakunawan amigo kanqampitam (Mat. 11:19).
4. ¿Imanötaq kayarqan Jesuspa amïgonkuna?
4 Jesuspa amïgonkunaqa hutsayoq nunakunam kayarqan. Más tantearinapaq, huk kutim Pedru kikimpa yarpëninllaman yarpar Jesusta piñapärerqan (Mat. 16:21-23). Huk lädopanam, Santiäguwan Juan ambicioso kayanqanta rikätsikuriyarqan Jesuspa lädonchö hamakuyänampaq permitïkunanta mañakurnin, tsëta wiyarmi wakin pasëpa piñakuyarqan. Hinamampis mëqan precisaq kanqanta musyëta munarmi imë hörapis plëtukïkäyaq. Pero tsënö këkäyaptimpis manam Jesusqa piñakorqantsu, sinöqa kuyakïwanmi willaparqan mana alli munëninkunata y pensëninkunata altsayänampaq (Mat. 20:20-28).
5, 6. a) ¿Imanirtaq Jesusqa apostolninkunawan alli amigo këta haqerqantsu? b) ¿Imanirtaq Jesusqa Judaspita pasëpa rakikäkurerqan?
5 ¿Imanirtaq Jesusqa haqirqantsu apostolninkunapa amïgon këta? Pëqa manam imatapis pantayanqankunallatatsu rikaraq, sinöqa alli kayanqankunatam y imatapis alli shonquwan rurayanqankunatam más precisaqpaq rikaq, tsëmi amïgonkuna këtaqa haqireqtsu. Más tantearinapaq, wanutsiyänampaq huk paqas pishikaptinmi Pedru, Santiagu y Juan yanaqäyänampa rantin pasëpa punukäriyarqan. Jesusqa llakikorqanmi, pero musyarqanmi ardëpa mana rurëkäyanqanta. Tsëmi kënö nerqan: “Boluntaniquicuna alli captinpis, sasam rurarcuyänequipaq” (Mat. 26:41).
6 Pero Judas Iscariötepitaqa pasëpam rakikäkurerqan. ¿Imanir? Alli amïgon tukuptimpis Jesusqa mäkurerqanmi pasëpa mana alli munëkunawan shonqunta tumakätsishqana kanqanta. Diosta mana adoraq nunakunapa amïgon tikrarirmi, Judasqa Diospa chikeqnin tikrarerqan (Sant. 4:4). Tsëmi chunka huk apostolninkunata amigo ninampaqqa, puntataqa Judastaraq ëwakunampaq nerqan (Juan 13:21-35).
7, 8. ¿Imanötaq Jesus rikätsikorqan amïgonkunata pasëpa kuyanqanta?
7 Jesusqa manam amïgonkuna mana allita rurayanqanllamantsu yarparäkïkaq, más bien alli rurëninkunatam rikaq, y imatapis ruraq amïgonkunapa biennimpaqmi. Tsëtaqa rikantsik, pruëbakuna shamuptin Teytan Jehová qateqninkunata yanapëkunampaq mañakonqanchömi (lei Juan 17:11). Manam tsëllatsu, pishipashqa o utishqa këkäyanqantapis musyaqmi (Mar. 6:30-32). Y manam imëpis parlaq kikin munanqanllatatsu, sinöqa qateqninkunatapis wiyaqmi imanö sientikuyanqantapis musyanampaq (Mat. 16:13-16; 17:24-26).
8 Jesusqa kawarqan y wanorqampis amïgonkunarëkurmi. Pëqa musyarqanmi Teytan munanqannö alli kaq rurakänampaqqa wanunanraq kanqanta (Mat. 26:27,28; Heb. 9:22, 28). Pero tsëta ruranampaqqa yanaparqan kuyakïninmi. Kikinmi kënö nerqan: “Que cuyaquimi cuyaqueqa manam pipis wanurinmantsu amiguncunapaqrecur” (Juan 15:13).
Imanötaq qateqninkuna Jesusta rikätsiyarqan alli amigo kanqanta
9, 10. ¿Imanötaq nunakuna rikäyarqan Jesus kuyakoq y yanapakoq kanqanta?
9 Jesusqa alläpa kuyakoqmi karqan nunakunawan, tiemponta rakïkur y imëka kaponqanwampis yanaparqanmi, tsëmi Jesustaqa pasëpa yachanäyarqan y kuyakonqanmannöllam kutitsita munayarqan (Luc. 8:1-3). Kikinta pasashqa kaptinmi Jesus kënö nerqan: “Nuna mayiquita qarecuyaptiqueqa, Diosmi qamcunatapis mas atscata qoycuyäshunqui, tupuman junta junta tapsïcur, rame rame qaracoq cuenta. Imanollam qamcunapis nuna mayiquicunata tratayanqui, tsenollam qamcunatapis Dios tratayäshunqui” (Luc. 6:38).
10 Pero wakin nunakunaqa Jesusman witipäyarqan imatapis tariyänan o chaskiyänanrëkurllam. Huk kutim Jesuspa amïgontukoqkuna yachatsikïkanqanta mana allipa käyirir contran churakar pëpita witikuriyarqan. Pero apostolninkunaqa manam rakikäyarqantsu. Jesuswan amigo kayanqanqa tukïnöpam pruëbaman churakarqan, tsënö këkaptimpis apostolninkunaqa alli tiempochö y mana alli tiempochöpis yanapayänampaqmi listo këkäyarqan (lei Juan 6:26, 56, 60, 66-68). Wanukunampaq huk paqas pishikaptinmi, Jesus rikätsikorqan amïgonkuna fiel kayanqanta, kënö nir: “Qamcuna noqawanmi ima nacaquinïcunachopis cayarqonqui” (Luc. 22:28).
11, 12. a) ¿Imatataq rurarqan Jesus qateqninkuna haqiriyaptin? b) ¿Y tsënö tratanqampita imatataq Jesuspaq rurayarqan qateqninkuna?
11 Tsënö këkarpis apostolninkunaqa haqiriyarqanmi, fiel kayanqampita Jesus tsëllaraq animarishqa këkaptin. Nunata mantsayanqanmi pasëpa pantakäratserqan Jesusta kuyayanqanta, tsënö karpis ichik tiempollapam karqan. Pero Jesusqa yapëmi perdonarerqan. Wanonqampita kawariramurnimpis apostolninkunatam yuriporqan y pasëpa kuyanqantam rikätserqan. Hina manam tsëllatsu, alläpa precisaq rurëta rurayänampaqmi mandarqan, “jinantin nasioncunapa ewar [...] creyicuyänanpaq nunacunata” willapäyänampaq y tsë willakïta ‘jinantin munduyaq’ chätsiyänampaq (Mat. 28:19; Hech. 1:8). ¿Wiyakuyarqantsuraq qateqninkuna?
12 Llapan tiemponkunawanmi hinantin markapa ëwarnin tsë alli willakïkunata willakuyarqan. Ichik tiempollachömi santo espïritupa yanapakïninwan hinantin Jerusalenchö alli willakïkunata miraratsiyarqan (Hech. 5:27-29). Chikeqninkuna wanutsita munar qatikachëkäyaptimpis Jesus mandanqantaqa manam haqiriyarqantsu. Tsëpita huk tiempo pasariptinllam apóstol Pablu nerqan: “keytam jinantin kamashqachow willakuyan syelupa uraninchow” (Col. 1:23 QKW). Këchömi rikantsik Jesuspa qateqninkunaqa llapan shonqunkunawan Jesuswan amigo kayanqanta pasëpa valorayanqanta.
13. ¿Imanötaq punta cristiänokuna rikätsikuyarqan Jesuspa yachatsikïninta valorayanqanta?
13 Tsëpitaraq cristiano tikraqkunapis alläpam valorayarqan y Jesuspa yachatsikïnintam qatiyarqan. Casi llapankunam portakïninkunata y kawëninkunata altsayarqan. Wakinqa kayarqan ollqupura kakoq, majayoq këkar hukwan punukoq o manaraq casakur hukwan hukwan punukoq, pasëpa machakoq, y suwakoqmi (1 Cor. 6:9-11). Y wakinkunanam huk kasta o huk rikoq nunakunata kuyëta yachakuyarqan (Hech. 10:25-28). Pero kë llapankunam Jesuspa yachatsikïninta wiyarnin mana alli rurëninkunata haqirïkur, kawëninkunata altsëkur alli kaqta rurar qallëkuyarqan (Efe. 4:20-24). Tsënömi, llapanmi “Jesucristupa yarpeninyoq” këta yachakuyarqan y pë ruranqanta qatir qallëkuyarqan (1 Cor. 2:16).
Ashishun Jesuspa amïgon këta
14. ¿Kë ushanan tiempokunachö imata ruranampaqtaq Jesus awnikorqan?
14 Apostolkunapa tiemponchö wakin cristiänokunaqa reqiyarqanmi Jesusta yachatsikur puriptin y wanonqampita kawariramuptimpis. Pero kananqa manam noqantsikqa kikinta reqita puëdentsiktsu. Tsëpenqa, ¿imanötaq amïgon këman chashwan? Amïgon këmanqa chäshun mäkoq mäkoq cumplido sirveq nimanqantsik wiyakurninmi, pëkunaqa kë patsachö Jesuspa wawqinkunam o ciëlopa ëwaqpaq kaqkunam. Kikin Jesusmi nerqa ushanan tiempokunachö mäkoq mäkoq cumplido sirveqninta kë patsachö “imecancunamanpis” churanampaq (Mat. 24:3, 45-47). Kanan tiempochö Jesuspa amïgon këta tïrëkaqkunaqa manam ciëlopa ëwaqpaq kaqkunallatsu kayan. ¿Mäkoq mäkoq cumplido sirveq mandamanqantsikta wiyakonqantsik imanötaq rikätsikun Jesuspa amïgon këta ashïkanqantsikta?
15. ¿Imata ruranqampitataq Jesus rikanqa huk nunata üshatanö o cabratanö?
15 (Lei Mateo 25:31-40.) ‘Jesusqa wawqïkuna’ nerqanmi mäkoq mäkoq cumplido sirveqninkunata. Nunakunata cabratawan üshata igualatsinqanchömi Jesus claro rikätsikun kë wawqinkunata imatapis rurëkanqantsikqa kikinta rurëkanqantsiknö kanqanta. Üshanö o cabranö kayanqanqa claro rikakurinan karqan Jesuspa wawqinkunata imanöpis tratayanqachömi. Awmi, patsachö kawaqpaq kaq cristiänokunapis Jesuspa amïgon këta munarqa wiyakuyänan mäkoq mäkoq cumplido sirveqta.
16, 17. ¿Imanötaq rikätsikushwan Cristupa amïgon kanqantsikta?
16 Kë patsachö Diospa Gobiernon gobernamuptin kawëta shuyarëkarqa, ¿imanötaq rikätsikushwan Jesuspa wawqinkunapa amïgon kanqantsikta? Rikärishun kimata. Punta kaqqa: shonquntsikpita patsëmi Jehová Diospita nuna mayintsikta yachatsita sinchikunantsik. Jesusmi wawqinkunata mandarqan hinantin patsapa alli willakïta willakuyänampaq (Mat. 24:14). Ciëlopa ëwaqpaq kaq cristiänokunaqa wallkaqllanam kayan kë patsachö, manachi hinantin markakunapa alli willakïta chätsita puëdeyanmantsu wakin kaq üshakuna mana yanapayaptenqa. Rasumpëpaqa, kë patsachö quedaqpaq kaq cristiano Diospita yachatsikoq yarqurnenqa, ciëlopa ewaqpaq kaq cristianakuna rurayänanta cumplichömi yanapëkäyan. Kë rurëqa alläpa valoryoqmi mäkoq mäkoq cumplido sirveqpaq y Jesucristupaqpis.
17 Ishkë kaqnam: yanapakïta puëdentsik qellënintsikwan. Jesusmi qateqninkunata kënö nerqan: “Que patsacho ushacäreqlla qelleniquicunawan allita rurar, amishtata ashiyë” (Luc. 16:9). Këqa manam Jehoväwan o Jesuswanqa amigo këtaqa tarintsik qellëwanmi ninantsu. Sinöqa, qellënintsikwan y ima kapamanqantsikwampis yanapakorqa Jehoväpa Gobiernompita hinantin patsaman willakï chänampaqmi yanapakïkantsik, y tsëwanmi Jesusta kuyanqantsikta y amïgon kanqantsikta rikätsintsik y manam shimillapatsu “cuyaqmi, ancupaqmi” nintsik, ‘sinoqa rasonpa rurenintsicwanmi imachopis’ yanapakuntsik (1 Juan 3:16-18). Awmi, Diosnintsikpita willakurmi yanapakuntsik, hina yanapakuntsikmi qellënintsikwan o imëka kapamanqantsikwampis hinantin Patsapa alli willakïkuna chänampaq, Diosta adoranantsik wayikunata rurayänampaq y altsayänampaq. Ichiklla o atska qellënintsikwan kushishqa yanapakonqantsiktaqa Jehoväwan tsurin Jesusqa alläpam agradecikuyan (2 Cor. 9:7).
18. ¿Imanirtaq wiyakushwan anciänokunana Bibliawan consejamashqa?
18 Kima kaqnam: Jesuspa amïgon kanqantsiktaqa rikätsikuntsik congregacionnintsikchö dirigeq cristiänokuna nimanqantsikta shonqupita patsë wiyakurnin. Kë nunakunaqa Jehoväpa santo espïritumpa yanapëninwanmi akrashqa kayan y tsëtaqa Cristum rikëkan (Efe. 5:23). Apóstol Pablum kënö qellqarqan: “Yachatsir pushayäshoniquicunata cäsucuyanqui” (Heb. 13:17). Itsa höra höraqa fäciltsu kanman anciänokuna Bibliawan willamanqantsikta wiyakunan. Pëkuna imallatapis pantayanqan itsa mana alli kanqa noqantsikpaq, tsënöpa wiyakïta munashuntsu consejamanqantsikta. Tsënö kaptimpis Cristuqa kushikunmi kë nunakunata congregacionta dirigiyänampaq churarnin. Tsëmi kë cristiänokuna consejamanqantsikta imanöpis wiyakonqantsik rikätsikonqa Jesuswan amigo kanqantsikta. Anciänokuna pantayanqanta mana yarparashpa consejamanqantsikta shonqupita patsë wiyakorqa, rikätsikushun Jesuspa amïgon kanqantsiktam.
Mëchötaq alli amïgokunata tarishwan
19, 20. a) ¿Imatataq tarishun congregacionchö? b) ¿Imatataq yachakushun qateqnin kaq tëmacho?
19 Jesusqa manam cuidamantsik congregacionchö pushamänapaq anciänokunata churamurllatsu, sinöqa teytantsik, mamantsik, wawqintsik y panintsikpis qomantsikmi (lei Marcos 10:29, 30). ¿Yarpankiku kastëkikuna imanöpis tikrariyanqanta Jehoväpa markanman ëwar qallëkuptiki? Itsa kushikuyarqanchi tsëta ruranëkipaq decidenqëkita. Pero hora höraqa “chiquishqam cayanqui castequicunapita qallecur” nerqanmi Jesusqa (Mat. 10:36). Tsëmi alläpa kushikïpaq congregacionchö alli amïgokunata tarinqantsikqa, y pëkunawanqa masran kuyanakïta puëdentsik tsë kastallapita yurishqantsikpitapis (Pro. 18:24).
20 Pabluqa Roma cristiano mayinkunapita despidekonqan cartanchömi atska alli amïgoyoq kanqanta rikätsikorqan (Rom. 16:8-16). Y apóstol Juanpis kima kaq cartanta qellqarnin kënömi usharerqan: “Llapan amïgökunata shutimpa saludëkï” (3 Juan 14, NM). Këchö rikanqantsiknöpis Juanpapis alli amïgonkunam karqan congregacionkunachö. ¿Imanötaq Jesus y punta cristiänokuna rurayanqanta qatishwan? ¿Imanötaq congregacionchö alli amigota rurashwan y imatataq rurashwan amigo kënintsik mana ushakänampaq? Kë tapukïkunapa respuestantam tarishun qateqnin kaq tëmacho.
¿Musyankiku respuestanta?
• ¿Imanirtaq Jesusqa huk alli amigo karqan?
• ¿Imanötaq rikäyarqan o kutitsiyarqan apostolninkuna Jesus alli amigo kanqampita?
• ¿Imanötaq rikätsishwan Jesuspa rasumpa amïgon kanqantsikta?
[Yachakunapaq kaqpa tapukïninkuna]
[25 kaq päginachö dibüju]
Jesusqa musyëta munarqan amïgonkuna pensayanqanta y sienteyanqantam
[27 kaq päginachö dibüjukuna]
¿Imanötaq rikätsikushwan Jesuspa amïgon këta munanqantsikta?