¿Diosman mañakonqëki imanö kanqëkitataq rikätsikun?
¿Diosman mañakonqëki imanö kanqëkitataq rikätsikun?
“Mañakïkuna Wiyaq, qammanmi shayämonqa tukï rikoq nunakuna.” (SAL. 65:2.)
1, 2. ¿Imanirtaq Diospa sirveqninkunaqa mañakuyanman alli markäkïwan o yärakuywan?
KAMAKOQ Yayantsikqa sirveqninkuna mañakuyaptin imëpis wiyanllam. Tsëmi pasëpa markäkuntsik o yärakuntsik mañakïnintsikta wiyananta. Y sirveqninkuna atska millón tsë höralla mañakuyaptimpis wiyëta puëdenllam, y manam ocupädotatsu këkan.
2 Tsëmi mañakïninta Dios wiyanqanman markäkur o yärakur salmista David kënö cantarqan: “Mañakïkuna Wiyaq, qammanmi shayämonqa tukï rikoq nunakuna” (Sal. 65:2). Awmi, David mañakonqantaqa Jehová rurarqanmi, pero tsëtaqa rurarqan mana haqishpa shonqupita kushishqa sirvenqampitam. Tsëmi noqantsikpis wiyëkämanqantsikta seguro kanapaqqa kënö tapukunantsik: “¿Mañakonqa, Diosman markäkunqätaku o yärakungätaku rikätsikun, y noqapaqqa Pëta servinä alläpaku precisan? ¿Imanö kanqätataq mañakonqä rikätsikun?”.
Humildadwan mañakushun Jehoväman
3, 4. a) ¿Imanö shonquwantaq Diosman mañakushwan? b) ¿Imatataq ruranantsik grave hutsata ruranqantsikpita ‘pasëpa yarpakachënintsik’ vencimashqaqa?
3 Mañakonqantsikta Jehová contestamunanta munarqa mañakunantsik humildadwanmi (Sal. 138:6). Shonquntsikta y yarpënintsikta rikämunampaqmi mañakunantsik, tsëtam David mañakorqan kënö nishpa: “Diosnï, pasëpa rikëkallämë, y shonqütapis reqïkullë. Alleq rikëkamë, y pasëpa yarpakachënïtapis reqïkullë, y rikëkullë mä noqacho kankush mana alli rurëkuna, y pushamë mana ushakaq alli kaq nänipa” (Sal. 139:23, 24). Pero tsënö mañakurnimpis, nimanqantsiktam ruranantsik y Palabran Bibliachö këkaq consëjokunatam wiyakunantsik. Tsënö rurashqallam “mana ushakaq alli kaq nänipa” o mana wanushpa kawëta chaskinapaq kanampitana shumaq kawëta yanapamäshun.
4 Pero ¿huk grave hutsata ruranqantsikpita ‘pasëpa yarpakachënintsik’ vencimashqaqa imatataq rurashwan? (Lei Salmo 32:1-5.) Concienciantsikta mana cäsushpaqa manam kakïta puëdeshwantsu, culpayoq kanqantsikta yarparëqa pasëpam ushakäratsimashwan, huk plantapa yakunta usya tiempochö achachë chipyëpa tsakiratseqnö. Davidqa pasëpam llakikorqan y yarpachakorqan hutsa ruranqampita, itsa hasta qeshyarqampis. Pero Jehová Diosta willariptinqa shonqun pasëpam ankashyarirqan. Yarpäri ¡imaraq kushikorqan Jehová perdonanqanta musyar! Noqantsikpapis tsënömi shonquntsik ankashyärinqa hutsa ruranqantsikta Diosnintsikta willarishqaqa, hina anciänokuna yanapamänantsiktapis wanantsikmi Jehoväwan alli kënintsikta yapë tarinapaq (Pro. 28:13; Sant. 5:13-16).
Diosman chätsishun mañakïnintsikta y gracias nikushun
5. ¿Rogakurqa imanötaq ruranantsik?
5 Imëka problëmakunapita pasëpa llakishqa karpis, Pablu kënö nenqan consëjotam wiyakunantsik: “Ama ni imapagpis yarpachacurnin llaquicuyaytsu. Tsaypa rantinga imayca sufrimientucunata päsarpis Dios Yayata agradëcicurnin yanapayäshunayquipag rugacurnin mañacuyay” (Fili. 4:6, NTCN). ‘Rugacur’ nerqa, alläpa humildadwan mañakuna kanqantam rikätsikun. Y tsëtaqa ruranantsik peligrochö këkar o mana allikunata ruramänapaq chikimaqnintsikkuna qatikachämashqam, tsë hörachö imata ruranapaqpis Jehová yanapëkamänapaq.
6, 7. ¿Imanirtaq Diosnintsikta gracias nishwan mañakurnin?
6 Pero ¿imanö kanqantsiktaraq rikätsikunman imatapis wananqantsik höralla mañakushqaqa? Pabluqa nerqan, rogakonqantsikchöqa “agradëcicurnin” mañakunatam. Rasumpëpaqa, Jehoväqa imëkatam ruramushqa y tsëpitaqa agradecikunantsikmi, Davidpis tsëpitam agradecikorqan kënö nir: “Qampam Jehová, hatun kë y puëdeq kë y shumaq kë y alli kë y tsuya kë, ciëlochö y patsachö imëka kaqkunapis qamllapa kaptin. [...] Y kananqa Dioslläkuna, gracias niyaqmi y shumaq shutikitam alabayä” (1 Cró. 29:11-13).
7 Jesusqa, mikïpitapis gracias nikoqmi Teytanta. Këtaqa rikantsik wanukïninta celebranqanchö tantapaqwan vïnopaq agradecikonqanchömi (Mat. 15:36; Mar. 14:22, 23). Tsënöllam noqantsikpis gracias nikunantsik mikonqantsikpita, pero manam tsëllapitatsu, sinöqa nunakunapaq “llapanta shumaq ruranqampita”, “juiciota alli ruranqampita” y Palabranchö willamanqantsikkunapitapis agradecikunantsikmi (Sal. 107:15; 119:62, 105).
Wakinkunapaqpis mañakushun
8, 9. ¿Imanirtaq mañakushwan cristiano mayintsikpaq?
8 Hina manam kikintsikllapaqqa mañakunantsik, sinöqa wakinkunapaqpis mañakunantsikmi, hasta mana reqinqantsik kaqkunapaqpis. Pablupis manachi reqerqantsu llapantaqa Colosas cristiänokunata, pero kënömi nerqan: “Teyta Jesucristupa Papänin Dios Yayata cada mañacurmi, qamcunapaq siempri “Grasias” nicayä. Porqui Teyta Jesucristuman marcäcuyanqequitam y Diosman creyicoq mayiquicunatapis cuyecayanqequitam musyariyarqö” (Col. 1:3, 4). Tesalönicachö cristiänokunapaqpis Pabluqa mañakorqanmi (2 Tes. 1:11, 12). Tsënö mañakïkunam rikätsikun imanö kanqantsikta y cristiano mayintsikta imanö rikanqantsiktapis.
9 Cristiano mayintsikpaq, ciëlopa ewaqpaq kaqkunapaq y wakin kaq ‘üshacunapaq’ o patsachö quedaqpaq kaqkunapaq mañakonqantsikmi rikätsikun Diospa markanqa alläpa preciso noqantsikpaq kanqanta (Juan 10:16). Pablum Efeso cristiänokunata nerqan pëpaq mañakuyänampaq, Diospita parlanqan hora yachëta qoykunampaq “tsenopa Jesucristu Salbadornintsic cashqanta mana mantsacushpa” yachatsikunampaq (Efe. 6:17-20). ¿Qamqa cristiano mayikikunapaq mana qonqëllataku mañakunki?
10. ¿Imanötaq yanapamashwan wakinkunapaq mañakonqantsik?
10 Cristiano mayintsikpaq mañakurnenqa hukläyanam pëkunata rikäshun. Si huk cristiänowan mana alli apanakushqaqa, pëpaq Diosman mañakushqa karqa manam mana alli tratëtaqa puëdentsiknatsu (1 Juan 4:20, 21). Rikanqantsiknömi hukkunapaq mañakushqaqa alläpa yanapamantsik y hasta más unido kanapaqpis yanapamantsikmi. Hinamampis Cristupanö kuyakïnintsik kanqantam rikätsikun (Juan 13:34, 35). Tsënö kuyakïtaqa rikätsikuntsik santo espíritu yanapamashqallam. ¿Mañakuntsikku Diosnintsik santo espirïtunta qomänapaq? ¿Mañakuntsikku kuyakoq këta, kushishqa këta, yamë këta, pacienciayoq këta, alli këta, hukläya shonquyoq këta, markäkïyoq o yärakuq këta, alli pacienciakoq këta, alli tanteakoq këta yanapamänapaq? (Luc. 11:13; Gál. 5:22, 23.) Tsënö kaptenqa, parlanqantsik y ruranqantsikmi rikätsikonqa santu espíritu yanapamashqantsikno kawëkanqantsikta (lei Gálatas 5:16, 25).
11. ¿Imanirtaq wakinkunata noqantsikpaq mañakayämunampaq nenqantsikqa allilla?
11 Hina alläpa precïsom teytakuna wambrankunapaq mañakuyänan. Këman yarpärishun, huk teyta cuentata qokurinman wambran huk exämenchö huk rurëkanqampita copiëta munëkaqta, tsëpaqmi mañakunan y Bibliawanmi yanapanan honrado këqa alläpa preciso kanqanta. Pablum Corintochö cristiänokunata nerqan: “Diostam mañaquicayä jutsata mana rurayänequipaq” nishpa (2 Cor. 13:7). Humildadwan wakinkunapaq mañakonqantsikqa Jehovätam kushitsin y alli nuna kanqantsiktam rikätsikun (lei Proverbios 15:8). Y Pablu ruranqannömi wakinkunatapis mañakushwan noqantsikpaq mañakayämunampaq. Pëmi kënö qellqarqan: “Noqacunapaq Diosnintsicman mañacayämunqui yanapecayämänanpaq. Musyecayämi consensiacunacho allillata rurecayanqäta, y munayä ime equepis alli portacur cawaquitam” (Heb. 13:18).
Imanöpis kanqantsiktaqa rikätsikushun mañakïnintsikchömi
12. ¿Diosman mañakurnenqa imakunatataq yarpänantsik?
12 ¿Mañakïnintsikchö rikätsikïkantsikku Jehoväpa sirveqninkunaqa kushishqa kanqantsikta? ¿Mañakuntsikku Diospa yachatsikïnin más miranampaq, munënin rurakänampaq, Gobiernon alabashqa kanampaq y shutin santificashqa kanampaq? Manam tsëkunata qonqanantsiktsu Diosnintsikman mañakurnenqa. Tsëmi mañakunapaq Jesus yachatsimanqantsik mañakïpis kënö qallan: “Sielucho quecaq Dios Yayalläcuna, jutillequi allapa respetuwan alabashqa catsun. Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mat. 6:9, 10).
13, 14. ¿Imanö kanqantsiktataq rikätsikun Diosman mañakonqantsik?
13 Mañakïnintsikchömi musyatsikuntsik noqantsikpaq ima más preciso kanqanta, shonquntsik munanqankunata, y imarëkur ruranqantsikkunatapis. Jehoväqa musyanmi imanö nuna kanqantsiktapis. Proverbios 17:3 nishqanmi kënö nin: “Tsullütsikuyänan väsoqa plätapaqmi y hornonam öropaq, y Jehovänam shonqukuna rikaq”. Tsënömi, Jehoväqa rikanmi shonquntsikta y yarpënintsiktapis (1 Sam. 16:7). Musyanmi cristiano mayintsikpaq, reunionkunapaq y yachatsikoq ëwëpaq ima nenqantsiktapis. Y alleqmi musyan ciëlota ewaqpaq kaq cristiänokunapaq imata pensanqantsiktapis (Mat. 25:40). Pëqa musyanmi, rasumpëpa chaskita munar o tsënö mañakïta yachakäkushqa karlla kutin kutin mañakïkanqantsiktapis. Jesusmi nerqan: “Jina Diosman mañacorqa, ama mañacuyanquitsu Diosta mana cäsucoq nunacunanoqa. Pecunaqa mañacurnin, juc parlayashqanllatam cutïcuryan ushepa ushar parlacuyan. Tsenoqa rurayan ‘Atsca cuti parlaptïqa, masllam Dios wiyamanqa’ nirmi” (Mat. 6:7).
14 Hina mañakïnintsikmi rikätsikun Diosman mëyaq markäkonqantsikta o yärakungantsikta. Davidmi nerqan Jehoväta: “Imëkapitapis tsapämaqnïmi tikrarerqonki, y chikimaqnïkunapa puntanchö torre cuentam kanki. Awmi, wayillëkichömi visita cuenta imëyaqpis kalläshaq, y älëkikuna rurinchömi ulluräkamushaq” (Sal. 61:3, 4). Bibliaqa ninmi “carpapita wayinman” llapantsikta chaskimanqantsikta, këqa cuidamantsik y tsapämantsik ninanmi (Apo. 7:15). Imëka problëmakuna pasamashqapis noqantsikwan Jehová këkanqanta musyar parlapëqa alläpa kushikïpaqmi (lei Salmo 118:5-9).
15, 16. Congregacionchö más cargoyoq këta munashqaqa, ¿imanötaq mañakïnintsik yanapamäshun imanir imatapis munanqantsikta tanteanapaq?
15 Shonqupita patsë mañakonqantsikqa yanapamantsik imanir imatapis munanqantsikta musyanapaqmi. Këman yarpärishun, Diospa markanchö cargoyoq këta munarqa ¿imanirtaq munantsik? ¿Rasumpëpa humildadwan Diosnintsikpa, markanchö o yachatsikïninchö yanapakïta munarku? ¿O tsëtaqa ashintsik imachöpis puntachö këta munar, yachaqtukunapaq o wakinkunata mandarlla kanäpaqku? Diosqa markanman manam permitintsu tsënö nunakunata (lei 3 Juan 9, 10 y Lucas 22:24-27). Rasumpa shonquntsikpita patsë Diosnintsikman mañakushqaqa, yanapëkamäshunmi, imanöpis kanqantsikta y imanirpis ruranqantsikta rikäkurinapaq y mana allikuna kaptenqa raslla haqirinapaq.
16 Itsachi casakushqa panikunaqa qowankuna siervo ministerial o tiempowanqa anciano kayänanta munayan. Tsënö kanampaq mañakurnimpis, kë panikunaqa alli portakïninkunawanmi yanapayänan qowankuna tsënö këman chäyänampaq. Tsëqa alläpa precïsom, huk cristiänopa familian imanöpis portakonqampitam congregacionchö kaqkuna imanöpis rikäyanqa.
Atskaq wiyëkämashqa mañakushqa
17. ¿Imanirtaq alläpa preciso hapallantsiklla këkar mañakunapaq tiempota rakinqantsik?
17 Jesusqa tiempotam rakirqan nunakunapita rakikëkur hapallanlla mañakunampaq (Mat. 14:13; Luc. 5:16; 6:12). Noqantsikpis hapallantsiklla këtam wanantsik Diosnintsikman mañakunantsikpaq. Hapallantsiklla këkar tranquilo sitiochö mañakonqantsikmi yanapamäshun Diosnintsikta kushitsenqan rurëkunata akranapaq y Jehoväwan kuyanakïnintsik más sinchiyänampaq. Pero atska nunapa nöpanchöpis Jesusqa mañakorqanmi. ¿Imanötaq mañakushwan llapankunapa shutinchö mañakunapaq niramashqaqa?
18. ¿Imamantaq yarpäyanan congregacionpa shutinchö mañakamoq cristianokuna?
18 Reunionnintsikkunachöqa kanmi cristiänokuna congregacionpa shutinchö mañakoqkuna (1 Tim. 2:8). Mañakur ushariptinmi tsë reunionchö këkaqkunaqa llapampis ushariyänan “amén” nishpa, këqa “tsënö katsun” ninanmi. Tsënö katsun niyänampaqqa llapantam wiyayänan y acuerdom kayänan mañakïchö llapan nikanqanwan. Tsë yachatsikonqan mañakïchöqa Jesusqa manam pitapis llakitseq o ofendeq palabrakunataqa nerqantsu (Luc. 11:2-4). Y manam mañakïninchöqa cada nunapa problëmanta o wanayanqankunatatsu willakorqan. Imatapis kikintsikpaq o hukpa asuntunkunapaq mañakïtaqa hapallantsik mañakonqantsik hörapaqmi haqirishwan y manam wakin hananchöqa mañakushwantsu. Y mana willakunantsikpaq kaqtaqa manam willakurishwantsu mañakonqantsik höraqa.
19. ¿Imanötaq portakushwan reunionkunachö mañakayämonqan hora?
19 Pipis noqantsikpaqwan mañakëkämuptenqa ‘Diosnintsictam [kuyëpa] mantsashwan’ (1 Ped. 2:17). Kanmi costumbrekuna y allillam conbiënenqan tiemponchö rurashqaqa, pero reunionnintsikkunachöqa manam allitsu rikakunman (Ecl. 3:1). Más tantearinapaq, huk grupo cristiänokuna itsa makipita tsarinakïkur y waqunakurkur o makallanakurkur kayanman mañakayämonqan hora, tsëqa itsa wakin reunionchö këkaqkuna ofendekuyanman o tsëraq shamïkaqkuna mana allikunata pensar qallëkuyanman. Itsa huk cristiano shumaqllapa warmimpa makinta tsaririnman, tsëqa allim, pero mañakï höra warminta waqukurkuptenqa o makallakurkuptenqa, itsa tsëta rikarnin pillapis mana allikunata pensar qallëkuyanman. Tsëqa majanwan kuyanakïninkunata puntaman churëkaqnömi rikakurinman y Jehoväta kuyayanqantaqa qepaman churëkaqnö. Tsëmi, wakintapis respetakoq kashun y imata “rurarpis Dios cushicunanpaq caqta yarpacachar rurashun”, ama rurashuntsu wakinta mana allita pensatsenqan o ofendenqan rurëkunataqa (1 Cor. 10:31, 32; 2 Cor. 6:3).
¿Imatataq mañakushwan?
20. ¿Imanötaq yachatsikunkiman Romanos 8:26, 27 texto nenqanta?
20 Itsa höra höraqa hapallantsiklla këkar Diosman mañakurnin imatapis nita puëdeshuntsu. Apóstol Pablum kënö nerqan: “Mañacurnin manam tantiyantsictsu imata mañaquitapis; peru Santu Espiritum rogacur mañacamun noqantsicpaq, allapa rogashpa. Y nunacunapa imapis yarpenincunata reqeq Diosmi musyan Santu Espiritu imata mañaconqantapis; porqui Dios munanqanmannomi Santu Espiritu rogacun” (Rom. 8:26, 27). Jehoväqa Bibliachö tukïläya nunakunapa mañakïninkuna qellqakänampaqmi disponerqan. Kikin dictashqa karmi alleq musyan Bibliata qellqaqkuna ima nita munayanqantapis. Hinamampis alleqmi reqimantsik. Tsëmi tsë qellqarëkaq mañakïkunatanö mañakushqaqa wiyamantsik. Santu espïritum “rogacur mañacamun” noqantsikpaq, tsëmi contestamun mañakïnintsikta. Bibliata más estudianqantsikmanmi más musyashun Diosman mañakonqantsik hora imata mañakunantsiktapis.
21. ¿Imapitataq yachakushun qateqnin kaq tëmachö?
21 Rikanqantsiknömi mañakïnintsikqa imanöpis kanqantsiktam rikätsikun. Maslla musyarinapaq, rikätsikunmi Jehoväta pasëpa kuyanqantsikta y Palabran Biblia nenqanta alleq reqinqantsiktapis (Sant. 4:8). Qateqnin kaq tëmachömi yachakushun wakin mañakïkunapita y shumaq respëtowan mañakunapaq Bibliachö qellqarëkanqampita, tsëmi yanapamäshun Diosnintsikman imanö mañakunantsikpaqpis.
¿Yachankiku respuestanta?
• ¿Imanö shonquwantaq Diosman mañakushwan?
• ¿Imanirtaq cristiano mayintsikpaq mañakushwan?
• ¿Imanö kanqantsiktataq rikätsikun mañakïnintsikkuna?
• ¿Imanötaq portakushwan reunionchö Jehoväman mañakayämonqan hora?
[Yachakunapaq kaqpa tapukïninkuna]
[11 kaq päginachö dibüju]
¿Imëpis Jehoväta alabankiku y agradecikunkiku?
[13 kaq päginachö dibüju]
Reunionkunachö Jehoväman mañakayämuptenqa respëtowanmi portakunantsik