Diospa sirveqninkunaqa respetakoq y alli tratakuqmi kanantsik

“Teyta Diospa cuyë wamrancuna cayanqequirecur qamcunapis peno queta tïrayë.” (EFE. 5:1.)

1, 2. a) ¿Imanirtaq alläpa preciso respetakoq y alli tratakuq kë? b) ¿Imatatan yachakushun kë tëmachö?

NUNAKUNA imanöpis portakoqta estudiaq warmim kënö nin: “Alli portakoq y alli tratakuq këqa manam hora hörallatsu kanan. Sinöqa imëpis y mëchö këkarpis alli tratakuqmi kanantsik. Tsëqa imëpis allillam kanqa”. Respetakoq nunakunaqa pï mëwampis allim kawakuyan, y piñatsinakurqa rasllam altsariyan. Pero mana respetakoq këqa imëpis piñatsinakïman, pleitoman y chikinakïmanmi apakun.

² Rasumpëpa cristiänokunaqa reqishqa kantsik respetakoq y alli tratakuq kanqantsikpitam. Tsënö kaptimpis, mäkoq mäkoqllam këkänantsik, kë mundopa mana respetakoq kënin mana alli tratakuq kënin mana muyamänantsikpaq. Kë tëmachömi yachakushun Diospa consëjonkunata wiyakïqa kë mundopa mana alli portakïninta mana qatinapaq yanapamänantsikta, y rikämaqnintsik nunakunata Jehoväpa markanman yëkayämunampaq yanapanqantapis. Respetakoq y alli tratakuq kë ima kanqantapis más tantearinapaqqa, puntata rikärishun Jehová y tsurin Jesus imanö kayanqantapis.

Jehoväwan Tsurinqa respetakoq y alli tratakuqmi kayan

3. ¿Imanötaq Diosnintsikqa tratan y respetan nunakunata?

³ Kikin Jehovämi alläpa respetakoq y alli tratakuq tsëmi yachatsimantsik noqantsikpis tsënölla kanantsikpaq. Alläpa poderyoq kamakoq Dios këkarnimpis shumaq kuyëpa y respëtowanmi rikan nunakunata. Tantearinapaq, Abrahanta y Moisesta parlaparninmi shumaq yachëllapa y roguëpa parlaparqan (Gén. 13:14; Éxo. 4:6). Sirveqninkuna hutsata rurariyaptimpis, Pëqa “alläpa llakipäkoq, alläpa alli, mana ras piñakoq, alli këni[n] mana ushakaq, y rasun kaqta kuyaq[mi]” (Sal. 86:15). Wakin nunakunaqa gustayanqanta mana rurëkuyaptin rasllam piñakuriyan. ¡Pero Jehoväqa alläpa hukläyam!

4. ¿Imanötaq Jehová ruranqanta qatishwan wakinkuna parlapämashqa?

⁴ Hina Jehoväqa rikätsikun kuyakoq y respetakoq kanqantaqa nunakunata shumaq wiyanqanchömi. Abrahan Sodoma markachö nunakunapaq tapuptinmi mana piñakushpa alläpa pacienciawan contestarqan (Gén. 18:23-32).  Manam Abrahanpa yarparëninkunata wiyarnin tiemponta perdikanqantanötsu rikarqan. Diosqa wiyanmi alli nunakunapa mañakïninta y arrepentikoqkunapa rogakïninta (lei Salmo 51:11, 17). ¿Manaku noqantsikpis Jehová ruranqanta qatirnin parlapëkämaqnintsikkunata shumaq wiyashwan?

5. ¿Jesus ruranqanta qatenqantsikqa imanötaq yanapamäshun nuna mayintsikta shumaq tratanapaq?

⁵ Shumaq pacienciawan wiyakoq këtaqa Jesuspis Teytampitam yachakorqan. Yachatsikur ocupado këkarpis, Jesusqa pacienciawan y alläpa respëtowanmi nunakunata tratarqan. Imë hörapis listom këkarqan nunakuna melanäyanqan nunakunatapis yanapanampaq, leprösokunata, wiskukunata y limosnërokunatapis. Pasëpa ocupado këkarnimpis tiempota rakirqanmi yanapanampaq. Höra höranäqa rurëkanqantapis haqirïkurmi hipaq nunakunata yanapaq. Y shumaq kuyëpa y respëtowanmi tratarqan pëman markäkoq o yärakuq nunakunata (Mar. 5:30-34; Luc. 18:35-41). Jesus ruranqanta qatirnin pï mëtapis shumaq tratashqa, yanapashqa y respetashqaqa, rikäyanqam kastantsikkuna, vecïnontsikkuna y huk nunakunapis. Hinamampis tsënö portakunqantsikqa Diospa shutintam alaban y kikintsikpis kushishqam kawashun.

6. ¿Cristiano mayintsikta y wakinkunatapis imanö tratanapaqtaq yachatsimantsik Jesus?

⁶ Judío pushaq religiösokunaqa Leyta mana reqeq nunakunata “maldisishqa” nunatanömi tratayaq (Juan 7:49). Pero Jesusqa alläpa hukläyam karqan, nunakunata respetarninmi shutinkunapa qayaq, tsëtaqa rikantsik Martata, Marïata, Zaqueota y wakinkunatapis shutimpa qayanqanchömi (Luc. 10:41, 42; 19:5). Awmi, cada markachömi nunakunata respëtowan tratanantsikpaqqa costumbrekuna kan, tsënö kaptimpis Jehoväta sirveqkunaqa alleqmi sinchikuyan kuyakïwan y respëtowan nuna mayinkunata tratayänampaq. * Më markapita, ima rikoq, y imanö kakuyaptimpis respetanantsikmi cristiano mayintsikta, y wakinkunatapis (lei Santiagu 2:1-4).

7. ¿Imanötaq yanapamantsik Diospa consëjonkuna nuna mayintsikta respëtowan tratanapaq?

⁷ Jehoväwan Tsurin Jesusqa, shumaq y respëtowanmi tratayan tukï markapita y tukï kastapita nunakunata. Tsëmi rikätsikun kuyakoq kayanqanta, y tsënöpam Diospa Palabranta yachakïta munaq nunakuna markanman shayämun.  Nunakunata shumaq y respëtowan tratëqa huk markapita huk markamanmi cambian. Tsëmi, tratakïta yachakunqänöllam mëchöpis tratakunä ninantsiktsu, sinöqa Diospa consëjonkunata wiyakurmi shumaq y respëtowan nuna mayintsikta tratanantsik mëchö tärarnimpis. Qateqnin pärrafokunachömi yachakushun respetakoq y alli tratakuq kanqantsik Bibliapita yachatsikoq ëwanqantsikchö yanapamanqantsikta.

Saludakunqantsik y parlakunqantsik

8, 9. a) ¿Imanö këtaq mana respetakoq y mana alli wätashqa kanqantsiktanö rikätsikunman? b) ¿Nuna mayintsikta imanöpis tratanapaq imanötaq yanapamantsik Mateo 5:47 nenqan?

⁸ Kanan tiempo nunakunaqa pasëpa ocupädom kawakuyan, y piwampis toparirqa manam “imanöllataq këkanki” o “buenos días” ninakuriyanllapistsu. Tsënö kaptimpis atskaq nunakuna rurinchö purikarnenqa manam llapantaraqtsu saludanantsik. Pero kanmi ocasión nuna mayintsikta respëtowan saludarinapaq. ¿Y qamqa yachakashqaku kanki saludakïta? ¿O mana parlapashpa ni asinashpaku pasarinki? Respetakoq karnimpis wakinqa mana respetakoq këtam yachakäriyanman, rasumpëpaqa, tsënö këqa mana alli wätashqa y mana respetakoq kanqantam rikätsikun.

⁹ Jesusmi kënö nerqan: “Sitsun Diosman marcäcoq wauqiquicunallata tsaripar saludayanqui, ¿ima allitataq rurariyanqui! ¡Asta Teyta Diosta mana cäsucoqcunallapis tsenollaqa portacuyantaq!” (Mat. 5:47). Saludakï alläpa preciso kanqantam Donald Weiss nishqan nuna kënö qellqarqan: “Manam pitapis gustantsu ichikllapis mana rikärir pasakuyaptenqa. Pitapis tsënö rurarishqaqa pasëpam piñakuyan y manam disculpakuyaptimpis munayantsu. Tsënö mana kanampaqqa, wakinta saludë y parlapë”. Awmi, nuna mayintsikta mana alli tratëpita cuidakushqaqa noqantsikpaq y pëkunapaqpis alläpa allim kanqa.

10. ¿Imanötan yanapamäshun respetakoq y alli tratakuq kanqantsik Diospita yachatsikunapaq? (Rikäri “Kushi kushilla parlapëta qallë” nishqan recuadrota.)

¹⁰ Rikärishun Tom y warmin Carol pasayanqanta, pëkunaqa täräyan Norteamérica nishqan markachömi, y Diospita yachatsikoq ëwayanqanchö atskaq nunakunawanmi shumaq parlakïta tïrayan. ¿Imanötan tsëtaqa rurayan? Santiagu 3:18 nishqan textoman yarpëkurmi Tom kënö nin: “Llapan nunakunatam parlapëta tïrayä y shumaqmi tratayä. Wayinkunachö mana këkaqkunamampis witiriyämi parlapäriyänapaq y tsënöllam rurayä tsë sitiochö trabajëkaqkunawampis. Kushi kushillam saludariyä y parlapar qallëkuyä gustayanqan o yarpëkäyanqan tëmakunata, wambrankunapita, allqunkunapita, wayinkunapita, trabäjonkunapita... Tiempowanqa amïgonkunatanömi rikäyäman”. Carolnam kënö nin: “Yapë watukayanqächömi shutïkunata willariyä, y tapuriyä pëkunapa shutintapis. Hina willariyämi tsëchö imata rurëkäyanqätapis, pero ras rasllam tsë llapanta niriyä. Tsëpita wakin hunaqkunaqa, masnam Diospita parlapar  qallëkuyä”. Tsënömi Tomtawan warmin Caroltaqa atskaq vecïnonkunana amïgonkunatanö rikäyan. Atskaqmi revistakunata, librokunata chaskiyan, wakinqa rikätsikuyashqa rasumpëpa Bibliapita yachakïta munayanqantam.

Respetakoq y alli tratakuq kë mana fácil këkaptimpis

11, 12. ¿Imanirtaq espantakuntsiktsu Diospita yachatsikoq ëwashqa wakin mana allipa tratamashqa y imanötaq contestashwan tsënö tratamashqa?

¹¹ Höraqa alli willakïkunata willanqantsik nunakunam mana allipa tratamantsik. Tsëqa manam mantsatsimantsiktsu, Jesusmi kënö nerqan qateqninkunata: “Noqata chiquiyämarneqa, qamcunatapis chiquiyäshunquim” (Juan 15:20). Pero tratamanqantsiknölla lluta tratashqaqa más mana allimanmi chäshun. Tsëpenqa, ¿imanötaq contestashwan? Apóstol Pëdrum kënö qellqarqan: “Mas bien llapan shonqiquicunawan Teyta Jesucristuta respetayë. Y peman imarecur creyicuyanqequita pipis tapuyäshuptiqui, shumaq cäyitsiyänequipaq listu quecayë” (1 Ped. 3:15). Awmi, shumaq pacienciawan y respëtowan contestashqaqa qayapämaqnintsikpa piñakïnimpis ushakärenqam (Titu 2:7, 8).

¹² Pipis noqantsikpita mana allita parlaptin Dios munanqannö contestanapaqqa yachakunantsikmi. Apóstol Pablum këta ruranapaq nimantsik: “Alli shimiquicunapa parlapar cäyipäratsiyänequipaq listu quecayë” (Col. 4:6). Familiachö, trabäjochö, congregacionchö y vecïnontsikkunata shumaq respëtowan tratëta yachakarqa listom këkäshun mëchöpis burlakur insultamarnintsik tratamashqa cristiänonö respëtowan contestanapaq (lei Romanos 12:17-21).

13. ¿Ima ejemplotaq rikätsimantsik, respetakoq y alli tratakuq kanqantsikqa mana allipa tratamaqnintsikkunatapis alliyäratsenqanta?

¹³ Rikärishun huk ejemplota, shumaq respëtowan parlapäkïqa mana alli tratamashqapis yanapamanqantsikta. Japón nacionchömi huk vecino y visitëkaqnin nuna pasëpa burlakuyarqan huk Testïgopita wayinman qayakuriptin. Piñakunampa rantinmi kë cristiänoqa respëtowan despedikurirnin ëwakorqan. Y wakin vecïnokunatam yachatsirnin siguerqan, tsëpitanam cuentata qokurerqan, tsë wayichö këkanqan burlakoq visita nunaqa karullapita rikapëkanqanta. Y kë cristiano lädonman chäriptinnam, kë nuna nerqan: “Qampitaqa disculpakunämi, mana allipa tratëkäyaptïpis kushi kushilla këkanqëkitam cuentata qokurqö. ¿Imatataq rurana tsënö kanäpaq?” Kë nunaqa pasëpa yarpakacharmi kakïkarqan, trabäjompita qarquriyashqa kayaptin y mamampis tsëllaraq wanurishqa kaptin. Kë cristiänoqa Bibliapita yachatsinampaqmi nirerqan, kë nunaqa yä nirerqanmi. Tsëpitaqa semänachö ishkë kutinam Bibliapita yachakur qallëkorqan.

¿Imanötaq yachakushwan respetakoq y alli tratakuq këta?

14, 15. ¿Imatataq wambrankunata yachatsiyaq unë tiempochö Diosta sirveq nunakuna?

¹⁴ Unë tiempochö Diospa sirveqkunaqa alleqmi wambrankunata yachatsiyaq wayinkunachö respetakoq y alli tratakuq kayänampaq. Génesis 22:7 textochömi tarintsik Abrahanwan wambran Isaac shumaq respëtowan parlapänakuyanqanta. Hina Josëchöpis rikantsikmi respetakoq kanampaq teytankuna yachatsiyanqanta, carcelchö këkarninmi shumaq respëtowan tratarqan carcelchö këkaq mayinkunatapis (Gén. 40:8, 14). Y faraonta imanöpis parlapanqanmi rikätsikorqan autoridadyoq nunakunata respëtowan tratëta yachakushqa kanqanta (Gén. 41:16, 33, 34).

¹⁵ Jehová, chunka mandamientokunata israelïtakunata qonqanchömi, kënö nin: “Taytëkita y  mamëkita respetar alli rikanki, Jehová qoshonqëki patsachö atska watapa kawanëkipaq” (Éxo. 20:12). Teytakunata alli rikëtaqa tukïnöpam rikätsikïta puëdentsik, y hukqa kanman respetakoq këmi. Tantearinapaq, Jeftepa wambranqa alläpa respetakoq kanqantam rikätsikorqan, teytan Jefté Jehoväta awnenqanta cumplirnin, tsë ruranan alläpa sasa o aja këkaptimpis (Jue. 11:35-40).

16-18. a) ¿Imanötaq teytawan mama respetakoq y alli tratakuq këta yachatsiyanman wambrankunata? b) Willakaramï, ¿imachötaq wambrakunata yanapanqa respetakoq y alli tratakuq këta yachatsiyanqan?

¹⁶ Alläpa precïsom respetakoq y alli tratakuq këta wambrakunata yachatsiqa. Yashqayärirnin pï mëwampis alli kanampaqqa, wambrakunaqa yachakuyänanmi visitakunata imanö tratëta, telëfonota imanö contestëta, y imanö mikï höra portakïtapis. Shumaqmi yachatsinantsik wakinkuna pasanampaq punkuta kichapunampaq, mayorkunata respetanampaq y shumaq tratanampaq, y lasaq cösaskunata apëkaqkunata yanaparinampaq. Hina yachakuyänanmi imatapis shumaq rogakïpa mañakïta, agradecikïta, disculpata mañakïta y maskunatapis.

¹⁷ Respetakoq y alli tratakuq këta wambrakunata yachatsiqa manam sasatsu o ajatsu kanman. Tsëtaqa lograshun kikintsik respetakoq y alli tratakuq kanqantsikwanmi. Ishkë chunka pitsqa (25) watayoq Kurt shutiyoq cristiänom kiman wawqinkunawan imanöpis respetakoq këta yachakuyanqanta willamantsik: “Rikäyaqmi kayä papänïwan mamänï shumaq kuyëpa tratanakuyanqanta y shumaq pacienciawan y kuyakïpa wakintapis rikäyanqanta. Y papänïqa reunión manaraq qallaptin y ushariptimpis mayorkunawanmi parlaq, y noqatapis pushamaqmi. Tsëchömi rikaq kä imanö saludanqanta y alläpa respëtowan tratanqanta”. Kurtmi kënö yapë nin: “Tiempowanqa noqapis tsënö respëtowan tratakïtam yachakurerqä. Awmi, respëtowan y kuyakïwan nuna mayintsikta tratëtaqa pasëpam yachakärintsik. Manam ruranëki kaptinllatsu ruranki, sinöqa rurëta munarninmi”.

¹⁸ ¿Imataq pasanqa respëtowan tratakuq kayänampaq wambrakunata alleq yachatsiyaptenqa? Tsënö karqa rasllam amïgotapis rurariyanqa, y pï mëwampis allim tratanakuyanqa. Hinamampis listom këkäyanqa, yashqayärirnin patronninkunata, trabajaq mayinkunata imanö tratayänampaqpis. Y manam tsëllatsu, teytankuna y mamankunapis pëkunapita alläpa kushishqam sientekuyanqa (lei Proverbios 23:24, 25).

Respetakoq y alli tratakuq kanqantsikmi mundopita hukläya kanqantsikta rikätsikun

19, 20. ¿Imanirtaq Diosnintsiknö y Tsurinnö respetakoq y alli tratakuq kanantsikpaq sinchikunantsik?

¹⁹ Apóstol Pablum kënö qellqarqan: “Teyta Diospa cuyë wamrancuna cayanqequirecur qamcunapis peno queta tïrayë” (Efe. 5:1). Jehová Dios y Tsurinnö respëtowan tratakuq këta munarnenqa, kë tëmachö yachakonqantsik textokunatam kawënintsikchö rurashwan. Tsënöpam qatishuntsu, imatapis chaskita munarlla o alli rikänampaqrëkurlla patronninkunata alli trataq nunakunataqa (Jud. 16).

²⁰ Ichikllanam pishin Satanás chipyëpa ushakänampaq, tsëmi tukïnöpa ushakätsita tïran respetakoq y alli tratakuq kanapaq Jehová yachatsimanqantsikta. Pero manam imëpis ushakätsenqatsu rasumpëpa cristiänokuna respëtowan nuna mayinta tratanqantaqa. Tsëmi kanampitana sinchikushun Jehová y Tsurin Jesus respetakoq y kuyakoq kayanqantaqa qatinapaq. Tsënöpam parlakïnintsik y portakïnintsik pasëpa hukläya kanqa chukru y mana alli tratakuqkunapita. Hinamampis tsënö portakïnintsikqa Diospa shutintam más hatunyätsenqa y rikämaqnintsikkunapis Jehoväpa markanman más witiyämonqa.

[Päginapa ura kuchunchö willakï]

¿Yarpankiku?

• ¿Imanötaq rikantsik Jehoväwan Tsurin Jesus respetakoq y alli tratakuq kayanqanta?

• ¿Huk cristiano imanö kanqantataq rikätsikun wakinkunata shumaq respëtowan saludanqan?

• ¿Respëtowan y alli tratakuq kanqantsik imanötaq yanapamantsik Diospita más yachatsikunapaq?

• ¿Imanötaq teytakuna y mamakuna wambrankunata yachatsiyanman respetakoq y alli tratakuq kayänampaq?

[Yachakunapaq kaqpa tapukïninkuna]

[30 kaq päginachö recuadru]

Kushi kushilla parlapëta qallë

Wakinkunaqa mana reqishqan nunakunataqa manam shumaqtsu parlapäyan. Tsënö kaptimpis Jehoväpa testïgonkunaqa Jehoväta y nuna mayinkunata kuyarninmi shumaq parlapeta tïrayan, tsëtaqa rurayan Bibliapita yachatsita munarninmi. ¿Imataq yanapashunki respetakoq y alli tratakuq këta yachakunëkipaq?

Filipenses 2:4 texto nenqanmi alläpa yanapamantsik: “Ama meqequicunapis quiquiquicunapa bienniquicunallaqa imatapis rurayëtsu. Tsepa rantenqa imatapis rurarqa, rurayë waquincunapapis bienninpaq”. Hina rikänantsikmi wiyëkämaqnintsik imanö sientekunqantapis, itsa mantsamashwan mana reqinakushqan kashqa. ¿Imatataq rurashwan mana mantsamänantsikpaq? Respëtowan y kushi kushillam saludarinantsik, pero mastaran ruranantsik.

Itsa piwampis parlar qallarnenqa pantaratsishwan imamampis yarparëkanqankunata. Imamampis yarparëkanqanman mana interesakurnin munanqantsik tëmallapita parlapämanata munashqaqa, itsa shumaqqa parlapämashuntsu. Tsëmi imamampis pensëkanqanta tantearnenqa, tsë tëmapita parlapar qallanëki. Tsëtam rurarqan Jesus huk pozo lädonchö Samaria markapita warmiwan tinkurirnin (Juan 4:7-26). Tsë warmiqa pensëkarqa yakuta horqëmanmi, tsëmi Jesusqa qallëkorqan yakupita parlaparnin, tsënöllapam Diospita parlapar qallëkorqan.

[29 kaq päginachö dibüjukuna]

Nunakunata shumaq respëtowan tratarqa, itsa Diospita shumaq yacharatsishwan

[31 kaq päginachö dibüju]

Imëpis respetakoq y alli tratakuq kashun