¿Imataq santo espíritu?

QATEQNINKUNA santo espïrituta mañakuyänampaq yachatsirmi Jesus kënö nerqan: “Acasu meqequipis tsuriquicuna [...] pescaduta mañacuyäshuptiqui, ¿culebrancu qoycuyanqui! Jina ruruta [runtuta] mañayäshuptiqui, ¿atoq curuntsuraq qoycuyanquiman?” (Lucas 11:11, 12). Galilea markachö wambrakunaqa pachankunata huntatsiyänanrëkurmi ruruta y pescädota mañakuyaq.

Tsënöllam noqantsikpis santo espïrituta chaskinapaqqa, Jesus yachatsikonqannö kutin kutin mañakunantsik, imëka wambrakuna mallaqar imatapis mañakuyanqannö (Lucas 11:9, 13). Pero santo espïrituta mañakunantsik imanir precisanqanta musyanapaqqa, santo espíritu ima kanqantaraqmi puntata yachakunantsik. Rikärishun Biblia ima nenqantapis.

‘Diospa podernin’

Dios munëninta ruranan kallpa kanqantam Bibliaqa clärom willamantsik santo espïritupaq. Manaraqpis ollquta reqikar Maria qeshyaq tikranampaq kaqta ángel Gabriel willanqanta yarpärishun, kënömi nerqan: “Santu Espiritu qamman shamurninmi, camanqa juc wamrata, sielucho quecaq Diospa poderninwan qeshyaq tucurinequipaq. Santu wawequinam Diospa tsurin canqa” (Lucas 1:35). Këchömi rikantsik santo espïritupaq Biblia parlarqa, Diospa podernimpaq o kallpampaqpis parlanqanta.

Hina tsëtam rikätsikun wakin textokunapis. Profeta Miquëasmi kënö nerqan: “Jehoväpa espïritunmi kallpata qomashqa” (Miqueas 3:8). Jesusnam qateqninkunata kënö nerqan: “Qamcunaqa Santu Espirituta chasquirirmi, poderyoq ticrariyanqui” (Hechos 1:8). Apóstol Pablupis ‘Santu Espiritupa podernimpaq’ parlarqanmi (Romanos 15:13, 19).

Tsëpenqa, ¿imatataq kë textokuna rikätsimantsik? Dios imëkapaq utilizanqan kallpan santo espíritu kanqantam. Y tsë kallpannöqa manam ni imapis kantsu: ¡Imaläya kallpataraq wanëkorqan ciëlotawan Patsata ruranampaq! Ichikllapis musyarinapaqmi Bibliachö kënö nimantsik: “Witsëpa ñukïkur rikäyë. ¿Pitaq llapanta kamashqa? Tsëchö llapan këkaqkunata yupar horqamoqmi, pëqa llapantapis shutimpam reqin. Alläpa kallpayoqmi, imëkata ruraq kallpan kaptinmi, mëqampis pishintsu” (Isaías 40:26).

 Kë textom rikätsimantsik ciëlochö y Patsachö shumaq patsätsishqa këkaqkunataqa, ‘imëkata ruraq kallpanwan’ Dios kamanqanta. ¡Tsënö kallpanwanmi nunakunatapis rurashqa! (Rikäri, “¿Imakunatataq santo espïritunwan Dios rurashqa?” neq recuadrota.)

Rikärenqantsiknömi Jehoväqa santo espïritunwan imëkakunata ruran, tsëwanmi ciëlochö y Patsachö llapan këkaqkunata rurashqa. Hina nunakunatapis santo espïritunwan yanapanmanmi. Kikin Bibliachömi tarintsik sirveqninkunata imanö yanapanqantapis.

“Diospa Espiritunmi noqacho”

Jesus ruranqankunam rikätsikun nunankunata Dios santo espïritunwan imanö yanapanqantapis. Huk kutim Nazaretchö täraq nunakunata “Diospa Espiritunmi  noqacho” këkan nerqan (Lucas 4:18). ¿Imakunatataq rurarqan “Santu Espiritupa poderninwan”? (Lucas 4:14.) Qeshyëkaqkunatam kachakätserqan, lamarchö shukukï vientotam päratserqan, huk ishkë tantawan y pescädokunallawanmi atskaq nunakunapa pachanta huntatserqan, hina wanushqakunatapis kawaritserqanmi. Tsëchi apóstol Pablupis kënö nerqan: “Teyta Dios poderninwan yanapaptinmi, espantaquipaq tuqui señacunata y milagrucunata Jesus rurarqan” (Hechos 2:22).

Kanan witsanqa, nunakuna milagrokunata rurayänampaq mananam Dios santo espïritunwan yanapannatsu, pero hukkunachöqa allim yanapëkämantsik. Jesus nenqannömi Jehoväqa sirveqninkunata espïritunwan yanapan (Lucas 11:13). Apóstol Pablupis tsëtam rikätsikorqan kënö nir: “Imecapaqpis listum quecä, puedeq [...] callpanwan yanapamaptin” (Filipenses 4:13). ¿Santo espíritu tsënö yanapashunëkita munankiku? Qateqnin kaqchömi yachakushun santo espíritu imanö yanapakonqanta.

[5 kaq päginachö dibüju y recuadru]

Santo espíritu, ¿imanirtaq Diostsu kanman?

Markanta bendecinampaq Dios parlarmi, santo espïritupaq imëka yakupaqnö parlarqan. Kënömi nerqan: “Yakunëkaqmanmi yakun hichashaq, y tsaki patsamanmi yakuta chätsishaq, tsurikimanmi espïritüta hichamushaq, y tsurikikunamannam bendicionnëta chätsishaq” (Isaías 44:3).

Sirveqninkunaman Dios santo espïritunta hichanqampaqmi “juntashqa” o “Espiritu Santuwan junta” nin Bibliaqa. Tsënömi Jesus, bautizakoq Juan, Pedru, Pablu, Bernabe y 33 wata Pentecostés fiestachö ëllukashqa discïpulokunapis santo espïrituwan “juntashqa” kayarqan (Lucas 1:15, QKW; 4:1, QKW; Hechos 4:8, QKW; 9:17, QKW; 11:22, 24, QKW; 13:9, QKW).

Pensarishun, ¿huk nuna atskaq nunakunaman hichakanmantsuraq? O, ¿huk nuna atskaq nunakunaman ‘juntanmantsuraq’? Manachi tsënöqa kanmantsu. Käyikïwan, yachëwan o musyaq këwanqa huk nuna ‘juntashqa’ kanmanmi, pero huk nunawan ‘juntashqa’ kanqantaqa manam imëpis Biblia yachatsikushqatsu (Éxodo 28:3; 1 Reyes 7:14; Lucas 2:40, QKW; Colosenses 1:9, QKW).

Espíritu palabraqa pnéuma nishqan griego palabrapitam shamun, y mana rikakoq kallpa ninanmi. Kë palabraqa “viento ninan [...] hamani ninan; hina espíritu ninanmi, y espïrituqa vientonöpis manam rikakuntsu y manam yatanatsu, pero kallpayoqmi” nirmi huk diccionario willakun (Diccionario expositivo de palabras del Antiguo y del Nuevo Testamento exhaustivo, de W. E. Vine).

Rikärenqantsiknöpis, santo espïrituqa manam Diostsu. *

[Päginapa ura kuchunchö willakï]

[Pikunapa kanqan]

Photodisc/SuperStock