Markanchö ruranapaq Diosnintsik churamanqantsikta valorashun

“Diosnintsicqa cuerpuntsicta camarnin, llapannintsicta churashqa cäbeq sitiunmanmi, tsecho cada cual funsiunayänanpaq.” (1 COR. 12:18.)

1, 2. a) ¿Imanirtaq musyantsik congregacionchö cristiänokuna rurayanqanqa llapampis valoryoqlla kanqanta? b) ¿Ima tapukïkunapa respuestantataq yachakushun kë tëmachö?

UNË Israel tiemponkunapita patsëmi, Jehoväqa markanwan sirveqninkunata espiritual kaq mikïnin qoshqa y dirigishqa. Këman yarpärishun, israelïtakuna Hai markata ushakäratsir yëkuriyanqanchömi, Josué “sinchipa leirqan llapan qellqarëkaq leykunata, bendicionninkunata y mana allikunata chaskiyänampaq kaqtapis, llapanta ley librochö qellqarëkaqtanö. [...], llapan Israel markapa puntanchö” (Jos. 8:34, 35).

² Punta cristiänokunapa tiemponchömi apóstol Pablu nerqan Timoteuta, congregacionqa ‘Dyospa wayin’ y “rasonpa kaq kolumnan i defensan” kanqanta (1 Tim. 3:15, QKW). Kanan tiempopis ‘Dyospa wayinqa’ hinantin patsachö rasumpa kaq cristiänokunam kayan. Primera Corintios chunka ishkë (12) capïtulonchömi Pablu igualatserqan congregacionta huk nunapa cuerpontawan. Diospa santo espïritun yanapaptinmi nerqan, cuerpocho llapan kaqkuna hukläya hukläya funcionarpis llapampis alläpa preciso kanqanta. Tsëmi kënö qellqarqan: “Diosnintsicqa cuerpuntsicta camarnin, llapannintsicta churashqa cäbeq sitiunmanmi tsecho cada cual funsiunayänanpaq”. Hina nerqanmi: “Cuerpuntsiccho mana allapa presisaqpaq churanqantsic caq partintsiccunatam, masqa estimar ropacunawan tsapantsic” (1 Cor. 12:18, 23). Tsënöllam huk cristiano ‘Dyospa wayincho’ ima cargota chaskinqampis, manam más alli kaqtsu ni despreciashqa kaqtsu, sinöqa hukläya cargo kanqanllam. ¿Imanötaq tarishwan markanchö imata ruranapaqpis Diosnintsik churamanqantsikta? ¿Y imanötaq rikätsikushwan alläpa kuyanqantsikta? ¿Imakunataq tsapämashwan Jehoväpaq masllata ruranata? ¿Imatataq rurashwan “waran waran más cabal alli nuna” tikrëkanqantsikta mäkuyänampaq? (1 Tim. 4:15.)

 ¿Imanötaq rikätsikuntsik markanchö ruranapaq Diosnintsik churamanqantsikta valoranqantsikta?

3. ¿Imanötaq tarishwan markanchö imata ruranapaqpis Diosnintsik churamanqantsikta, y imanötaq valoranqantsikta rikätsikuntsik?

³ Markanchö ruranapaq Diosnintsik churamanqantsikta valoranqantsiktaqa rikätsikuntsik ‘mäcoq, mäcoq, cumplidu sirweqta’ y Jehoväpa Testïgonkunata Pushaqkunata wiyakurnin y yanaparninmi (lei Mateo 24:45-47). Tsënömi, kikintsikmi yarpakachänantsik y tapukunantsik mä rasumpakush qatikantsik mäkoq mäkoq cumplido sirveq nimanqantsikta. Këman yarpärishun, atska tiemponam consëjokunata chaskerqontsik imanö vestikunapaq, altsapäkunapaq, kushikunapaq rurëkunata alleq akranapaq y Internetchö peligrokunapita cuidakunapaqpis. ¿Jehoväta mana haqirinapaq yanapamaqnintsik kë alli consëjokunata wiyakuntsikku? Hina semänachö huk kuti familiantsikwan estudianapaqpis animamarqontsikmi. ¿Kë nimanqantsikta wiyakïkantsikku? ¿Tsëpaq semänachö huk paqasta rakikantsikku? Y soltero karnenqa, ¿tsë tiempota rakikankiku Bibliata estudianëkipaq? Mäkoq mäkoq cumplido sirveqta wiyakushqaqa, Jehová bendecimäshunmi noqantsikta y familiantsiktapis.

4. ¿Imakunamantaq puntata yarpashwan imata ruranapaqpis o akranapaqpis?

⁴ Itsa pipis ninman, kikï munanqänömi vistikunä, altsapäkunä y kushikunäpaq rurëkunatapis akrakunä. Tsënö kaptimpis, huk cristiänoqa congregacionchö ruranampaq Diosnintsik churashqanta kuyarqa manam kikimpa munëninllapitatsu imatapis ruranan. Tsëpa rantenqa yarpakachanman Jehová munanqanmanmi y tsëtaqa willakun Palabran Bibliam. Y tsëchö nimanqantsikqa kanan chakintsikta “aktsimoq chiwchinömi” y ‘purinqantsik nänitapis aktsimoq’ (Sal. 119:105). Hina alleqmi pensanantsik tsë ruranqantsikkunapita yachatsikur purishqa nunakuna o cristiano mayintsik ima niyänantapis (lei 2 Corintios 6:3, 4)

5. ¿Imanirtaq haqishwantsu kikintsikpa munënintsiklla shonquntsikchö mirananta?

⁵ ‘Diosta mana cäsucur, supëpa mandacoqnin diablu munashqanta ruracur’ këqa, hinantin patsachömi këkan shütanqantsik viento cuenta (Efe. 2:2). Diablupa munëninqa, creiratsimashwanmi Jehoväpa markan nimanqantsikta mana cäsokunapaq y dirigimänata mana wananqantsikta. Pero manachi Diotrefesnöqa këta munashwantsu, pëqa manam respëtowantsu apóstol Juan ‘mandanqanta chaskeq’ (3 Juan 9, 10). Manam haqinantsiktsu kikintsikpa munënintsik shonquntsikchö mirananta. Jehová churamonqan nunakunata ama imëpis despreciashuntsu, ni lluta parlashuntsu, ni rimashuntsu, porque pëkunawanmi parlapëkämantsik kanan tiempochö (Núm. 16:1-3). Tsëpa rantenqa, kushikushun mäkoq mäkoq cumplido sirveqta yanaparnin, wiyakoq y cäsokoq këta sinchikushun congregacionnintsikchö cargoyoq nunakunata (lei Hebreus 13:7, 17).

6. ¿Imatataq más rurashwan markanchö ruranapaq Diosnintsik churamanqantsikta valoranqantsikta rikätsinapaq?

⁶ ¿Imatataq más rurashwan markanchö ruranapaq Diosnintsik churamanqantsikta valoranqantsikta  rikätsinapaq? Alleqmi rikäkunantsik yachatsikïta y Jehová munanqannö kawëta sinchikïkanqantsikta o mana sinchikïkanqantsiktapis, ¿imataq tsaparëkämantsik Jehoväpaq masllata rurarkunata? (Rom. 11:13). Atskaqmi precursor regular këta puëdeyan. Hina atskaqmi precursor especialnö, misioneronö, betelïtanö serviyan, hasta congregacionkunata watukaqpis kayan. Wakinqa yanapakuyan Jehoväpa Testïgonkuna Yachatsikuyänan Wayikunata rurëchömi. Pero Jehoväta kënö mana servita puëderpis, wakin kaqpis tukïnöpam sinchikuyan familiankunata Jehoväpita yachatsirnin y cada semana yachatsikoq yarqurnin (lei Colosenses 3:23, 24). Awmi, mana qelanashpa llapan shonquntsikwan Diosnintsikta servishqaqa imëpis kapamäshunmi markanchö ruranapaq.

¿Imakunataq tsapämashwan Jehoväpaq maslla ruranata?

7. ¿Imakunataq tsapämashwan Jehoväpaq maslla ruranata?

⁷ Diosnintsik, markanchö servinapaq churamashqantsik kaptimpis manam llapantsiktsu igual-lla rurëta puëdentsik. ¿Imanir? Këman yarpärishun, huk cristiano congregacionchö ruranqanqa wakin wakinqa manam igualtsu huk cristiana ruranqanwan. Hinamampis, edänintsik, saludnintsikpis y hukkunapis tsapämashwanmi Jehoväpaq masllata ruranata. Proverbios 20:29 textom kënö nin: “Jövenkunapa shumaq këninqa kallpanmi y edäyashqakunapa shumaq këninqa soqunmi”. Tsënömi, congregacionchö jövenkunaqa kallpankuna kaptinmi masta rurëta puëdeyan y edäyashqakunanam alläpa valoryoq kayan yachëninkunapita y alli consejakoq kayanqampita. Llapantsikmi yarpänantsik congregacionchö ima cargotapis chaskinqantsikqa yachënintsikpita mana kanqanta, sinöqa Jehová kuyakoq karnin qomanqantsikpita kanqanta (Hech. 14:26; Rom. 12:6-8).

8. ¿Imanötaq markanchö imatapis ruranapaq Diosnintsik churamanqantsikqa munënintsikpitaraq kanqa?

⁸ Hina hukpis kanran Jehoväpaq masllata ruranata tsapämaqnintsik. Yarpärishun, ishkë nanapura shipash cristiänakunaman. Ishkampis Jehoväta maslla servïtaqa puëdeyanllam. Teytankunaqa animayashqam estudionkunata usharirnin precursora regular kayänampaq. Pero 18 watayoq këkar estudionkunata usharirnam, huknin kaq precursora tikrarin y huknin kaqnam llapan tiemponwan trabajar qallëkun. ¿Imanöpataq hukläya huklayäta akrariyan? Ishkampapis munëninkuna hukläya kashqa kaptinmi. ¿Manaku tsënölla wakinnintsikqa shonquntsik munanqanta rurarintsik? Tsëmi alleq yarpakachänantsik Jehoväta servir maslla ruranantsikman. ¿Puëdeshwanku Jehoväpaq maslla rurëta, kawënintsikchö imëka cambiokunataraq ruranantsik kaptimpis? (2 Cor. 9:7.)

9, 10. ¿Imatataq rurashwan Jehoväta servinapaq maslla rurëta munënintsik yurinampaq?

⁹ Itsa congregacionchöqa ichikllata rurëkantsik y masllata ruranapaqqa animarkamänata wanëkantsik. Filipenseskunaman cartakurmi Pablu kënö qellqarqan: “Dyosmi yuritsin qamkunachow muneyta i rureyta, alli muneynimpa” nishpa. Awmi, Jehovämi yanapamäshun, y shonquntsiktapis yanaparenqam Pëpaq maslla rurëta munanapaq (Fili. 2:13; 4:13, QKW).

¹⁰ ¿Manaku tsënö yanapamänapaq mañakurishwan? Rey Davidpis tsënömi mañakorqan: “Oh Jehová nänikikunata reqïkatsillämë, yachëkatsimë munashqëkinö kawanäpaq. Pushamë rasumpa kaq nänikipa y yachatsimë, qammi salvamaq Diosnï kanki. Qamllamanmi llapan hunaq shuyararqö” (Sal. 25:4, 5). Noqantsikpis mañakïta puëdentsikmi rurëta munënintsik shonquntsikchö más yurinampaq, tsënöpa kushitsenqanta ruranapaq. Llapan ruranqantsikta Jehoväwan Tsurin alläpa valorayanqanman yarpashqaqa shonquntsik pasëpam agradecikur kushikun (Mat. 26:6-10; Luc. 21:1-4). Y agradecikoq kanqantsikmi yanapamantsik espiritual kaqchö maslla rurëta munanapaq y tsë munënintsik kanampaq Diosman rogakunapaq. Isaiasnö listo këkäshun: “¿Pitaraq kachashaq, y piraq noqantsikpa rantintsik ëwanqa?” nishpa Jehová tapukuptinmi Isaías kënö contestarqan: “¡Këchömi noqa këqa! Noqata kachamë” (Isa. 6:8).

Imataraq rurashwan espiritual kaqchö poqunapaq

11. a) ¿Imanirtaq Jehoväpa markanchö más trabajayänampaq ollqukuna sinchikuyanman? b) ¿Imatataq ruranman huk ollqu congregacionchö más cargota chaskinampaq?

¹¹ Y 2008 watachömi hinantin patsachö bautizakuyarqan 289.678 nunakuna, këmi claro rikätsikun congregacionchö üshakunata rikäyänampaq atskaq wawqikuna pishenqanta. Tsëpenqa,  ¿imatataq rurayanman congregacionchö këkaq bautizakushqa ollqukuna? Congregacionchö anciänokuna y siervo ministerialkuna imanö kayänampaqpis Biblia nenqanta cumplitam sinchikuyänan (1 Tim. 3:1-10, 12, 13; Tito 1:5-9). Huk cristiano Biblia nenqanta cumplinampaqqa, seguidom yachatsikoq yarqunan, congregacionchö llapan mandayanqantam cumplinan, reunionkunachö comentanampaqpis alli estudiarkurmi ëwanan, y cristiano mayinkunata yanapanampaqpis yarparänanmi. Tsënö rurarqa rikatsikonqam Diosnintsik markanchö ruranampaq churanqanta alläpa valoranqanta.

12. ¿Imanötaq jövenkuna rikätsikuyanman rasumpa kaq yachatsikïta kuyayanqanta?

¹² ¿Imatataq jövenkuna cristiänokuna rurayanman congregacionchö más poqu kayänampaq? Diospa Palabrantam más yachakuyänan Dios munanqanta alleq musyayänampaq (Col. 1:9). Tsëpaqqa alläpa precïsom Bibliapita yachakï y reunionkunachö comentëpis. Hinamampis sinchikuyänanmi Diosnintsik “puncu quichaq cuenta” tukïnöpa serviyänampaq invitëkanqanman yëkuyänampaq (1 Cor. 16:9). Kawëninkunachö Jehoväta serviyanqanta puntaman churarnenqa kushikïtam tariyanqa y atska bendicionkunatam chaskiyanqa (lei Eclesiastés 12:1).

13, 14. ¿Imanötaq cristianakuna rikätsikuyan markanchö rurayänampaq Diosnintsik churanqanta alläpa valorayanqanta?

¹³ Cristiänakunapis Diosnintsik markanchö rurayänampaq churanqanta valorayanqantaqa rikätsikuyanman Salmo 68:11 nenqanta cumplirninmi: “Kikin Jehovämi nin: alli noticiakunata willakoq warmikunaqa mëtsika tropam kayan”. Y tsëta kuyayanqantaqa rikätsikïta puëdeyan Jehoväpita yachatsikïchö yanapakurmi, tsënöpa wakinkuna Jehoväta reqiyänampaq (Mat. 28:19, 20). Awmi, imëkankunata haqirir aja o sasa kaptimpis Bibliapita yachatsikur puriyanqanqa rikätsikun Jehová markanman yanapakuyänampaq churashqanta alläpa kuyayanqantam.

¹⁴ Pablum këkunata qellqarqan Titupaq: “Tsenolla chacwan caqcunatapis willapë Teyta Dios munashqanno cawacuyänanpaq, mana wasa rima cayänanpaq, [...] alli rurenincunawan juc ejempluno cayätsun. Y yachatsiyätsun shipashllaraq warmicunata, qowancunata y wawancunata shumaq cuyayänanpaq. Jina yachatsiyätsun alli cäyïcuryan imatapis ruracoq queta, juclaya shonquyoq queta, wayincunacho imapis shumaq ruraquita, ancupäcoq queta, qowancunapa mandaduncho queta. Tsenopam mana ni pipis Teyta Diospa palabranpa contran imatapis parlayanqanatsu” (Tito 2:3-5). Rikanqantsiknöpis, poqu cristianakunaqa congregacionchö kaqkunata allipam yanapayan. Pëkunaqa respetayanmi congregacionchö dirigeq cristiänokunata, hina yachayanmi kushikuyänampaq rurëkunata alleq akrëta, vestikïpaq y altsapäkipaqpis. Tsënöpam huk alli ejemplo kayan y congregacionchö rurayänampaq Diosnintsik churanqanta kuyayanqantapis rikätsikuyan.

15. ¿Imataraq soltera cristiänakuna rurayanman hapallankunalla mana sientekuyänampaq?

¹⁵ Hora höraqa, soltera cristiänakunapaqpis alläpa sasa o ajam kanman congregacioninman rurayänampaq Diosnintsik churanqanta cumpliyänan. Huk cristianam kënö nin: “Hora höraqa hapallëki kanqëkipitam llakikunki”. Tsë pasëkanqankuna alläpa mana llakitsinampaq imata ruranqantapis tapuriyaptinmi, kënö nerqan: “Diosman mañakonqa y Bibliata leenqämi yanapaman Diosnintsik churamanqanchö kanäpaq. Y librokunachö y revistakunachömi ashï Jehová kuyamanqanta mana qonqanäpaq yanapamaq tëmakunata, y tsëpitam sinchikü congregacionchö wakinkunata  más yanapanapaq. Tsëmi yanapaman kikïllaman mana yarparäkunäpaq”. Salmo 32:8 textochömi Jehová nerqan Davidta: “Qanmanmi nawïta churamorqö y consejashqëkim”. Awmi, Jehoväqa llapan sirveqninkunatam, cada ünota rikarëkan y soltera cristiänakunatapis. Pëqa yanapamäshunmi markanchö ruranapaq churamanqantsikta cumplinapaq.

Markanchö ruranëkipaq Diosnintsik churashunqëkita ama imëpis haqitsu

16, 17. a) ¿Imanirtaq más alli kaq kashqa kawënintsikchö Jehová markanman yëkunapaq invitamanqantsikta wiyakï? b) ¿Imatataq rurashwan Jehová Diosnintsik markanchö ruranapaq churamanqantsikta mana oqranapaq?

¹⁶ Alläpa kuyakoq këninchömi, Jehová Diosqa markanman apamushqa llapan sirveqninkunata y Pëwan alli këta tariyänampaq permitishqa. Jesusmi nerqan: “Cachamaq Dios Yaya nunacunata shonquncunacho mana cäyitsiptenqa, manam ni pipis noqaman shamunmantsu” (Juan 6:44). Kanan tiempo mëtsika mëtsika nunakuna rurimpitam, noqantsikta Diosnintsik qayamarqontsik markanchö kanapaq. Y más alliqa kashqa qayamanqantsikta wiyakur markanman yëkonqantsikmi, tsëmi yanapamarqontsik rasumpëpa kushikïta kawënintsikchö tarinapaq. ¡Imanö kushikïpaqmi markanchö yanapakunapaq Jehová Dios churamanqantsikqa!

¹⁷ Salmistam nerqan: “Jehová alläpam kuyarqö wayikita”. Y tsëpitam kënö nerqan: “Chakïqa alli sitiochömi imëpis shëkanqa; atska nunakuna ëllukashqachömi Jehoväta bendecishaq” (Sal. 26:8, 12). Jehová Diosqa markanchö llapantsikpaqmi katsin imata ruranapaqpis. Markanwan nimanqantsikta wiyakushun y mandamanqantsikta rurar ocupado kashun, tsënöpam markanchö ruranapaq Diosnintsik churamanqantsikta oqrashuntsu.

¿Yarpankiku?

• ¿Imanirtaq llapan cristiänokunatam congregacionchö rurayänampaq Diosnintsik churashqa nishwan?

• ¿Imanötaq rikätsikushwan markanchö ruranapaq Diosnintsik churamanqantsikta kuyanqantsikta?

• ¿Imakunataq tsapämashwan Jehoväpaq maslla ruranata?

• ¿Imanötaq jövenkunapis y mayorkunapis congregacionchö rurayänampaq Diosnintsik churanqanta alläpa kuyayanqanta rikätsikuyanman?

[Yachakunapaq kaqpa tapukïninkuna]

[20 kaq päginachö dibüjukuna]

¿Imatataq rurayanman ollqu kaq cristiänokuna congregacionchö más rurëninkuna kanampaq?

[22 kaq päginachö dibüju]

¿Imanötaq cristianakuna rikätsikuyanman Diosnintsik markanchö rurayänampaq churanqanta alläpa kuyayanqanta?