Kuyakïnintsik ama imëpis ushakätsuntsu

‘Kuyakiyqa llapantam awantan. Kuyakiyqa manam imeypis ushakantsu.’ (1 COR. 13: 7, 8, QKW.)

1. a) ¿Ima niyantaq nunakuna kuyakïpaq? b) ¿Imatataq kanan witsan nunakunaqa más kuyayan?

LLAPAN nunakunam kuyashqa këta munayan, y kuyakïpaqqa wakta këtam parlayampis. Tsëmi tukï cancionkunachö, novëlakunachö y pelïculakunachöpis kuyakïta somätsiyan. Pero Diosta y nuna mayinta rasumpa kuyaqkunaqa mananam kayannatsu. Biblia willakonqannöpis casi llapan nunakunam “codisiosu” y “qellellapaq locuyäcoq” kayan, hina “Diosnintsic munashqanta mana cäsushpa[m] quiquincunapa munenincunallata rura[r]” kawakuyan (2 Tim. 3:1-5).

2. ¿Imakunata kuyë mana alli kanqantataq Biblia willamantsik?

² Llapantsikmi kuyakïtaqa yachantsik, pero Diospa Palabranqa mana alliman ishkitsikoq kaqkunata mana kuyanapaqmi nimantsik, hina yachatsimantsikmi tsëkunata kuyarqa imaman chänapaq kaqtapis (1 Tim. 6:9, 10). Yarpärishun,  Pablupis willakorqanmi yanaqin Demas Patsachö cösaskunata kuyar haqirinqanta (2 Tim. 4:10). Tsëkunaman mana ishkinapaqmi apóstol Juanpis alli willamantsik (lei 1 Juan 2:15, 16). Clärom këkan, Diosta y llapan qomanqantsikta kuyëkarqa, mananam kë mundota ni ushakaqpaq cösasninkunata kuyanantsiknatsu.

3. ¿Ima mana allikunataraq yachakurishwan, y imakunatataq tapukunantsik?

³ Noqantsikqa kë Patsachö mana allita ruraq nunakunanötsu manam kantsik, tsënö karpis pëkunawan juntom këkantsik, tsëqa itsa kuyakïpaq mana allita y lluta pensayanqankunata noqantsikpis yachakurishwan. Tsëmi kënö tapukunantsik: ¿Pikunatataq kuyashwan? ¿Imatataq rurashwan llapanta aguantar imëpis kuyakunapaq? ¿Kuyakoq karnenqa ima bendicionkunatataq chaskishun kanan y shamoq tiempochö? Kawënintsikchö ruranapaq Diosnintsik imata yachatsimanqantsiktapis rikärishun.

Jehoväta más kuyëta yachakushun

4. ¿Imatataq rurashwan Diosnintsikta cada hunaq más kuyanapaq?

⁴ Cristiänokunaqa Jehoväta cada hunaq más kuyëtam tïranantsik. ¿Imanötaq tsëta rurashwan? Imëka huk murukoq ruranqannömi. Këman yarpärishun, ¿imatataq huk nuna ruran murukonqan más winanampaq? Chakrata parqurir-ran yapyan murunampaq (Heb. 6:7). Y noqantsikqa, ¿imatataq rurashwan Diosta más kuyanapaq? Murukoq nuna chakrata alistaqnömi shonquntsikta alistanantsik. Tsëpaqqa Bibliatam alli estudianantsik, tsënöpa Jehoväta más reqinapaq (Col. 1:10). Hina reunionkunaman imëpis ëwanqantsik y tsëchö shumaq comentanqantsikpis yanapamäshunmi. Tapukuri, “¿Bibliapita más yachakïta tïrëkäku?” (Pro. 2:1-7).

5. a) ¿Imanötaq musyashun Jehová imanö kanqantapis? b) ¿Ima ninkitaq Jehová alli kaqta ruraq kanqanta, yachaq kanqanta y alläpa kallpayoq kanqanta musyarir?

⁵ Palabranchömi Jehoväqa imanö kanqantapis willamantsik. Tsëmi Bibliata estudiarnenqa Jehoväta más reqinki, alli kaqta ruraq kanqanta, yachaq kanqanta, alläpa kallpayoq kanqanta, y alläpa kuyakoq kanqanta musyar más kushikushun. Leyninkunata y rurëninkunata rikarmi musyarintsik Jehová alli kaqllata ruraq kanqanta (Deu. 32:4; Sal. 19:7). Llapan kamanqankunata rikarnam musyarintsik alläpa yachaq kanqanta (Sal. 104:24). Hina ciëlochö këkaqkunata rikarnam musyarintsik imëkata ruraq y mana ushakaq kallpayoq Jehová kanqanta (Isa. 40:26).

6. ¿Imanötaq Diosnintsik alläpa kuyakoq kanqanta rikätsikushqa? Y, ¿imanötaq agradecido kanqantsikta rikätsikushwan?

⁶ Pero ¿ima nishwantaq Jehová rasumpa kuyakoq kanqampaqqa? Pëqa munan kuyakoq kanqanta llapan nunakuna musyayänantam. Llapantsiktam yanapamantsik kuyakïninqa. Kuyakoq karmi noqantsikrëkur hapallan tsurin wanunantapis haqirqan (lei Romanos 5:8). Tsëmi llapantsik hutsantsikkunapita perdonta chaskita puëdentsik, pero tsëpaqqa Diostam kuyanantsik y Tsurinmanmi markäkunantsik o yärakunantsï (Juan 3:16, 36). Rasun kaqchöqa, hutsantsikrëkur Tsurin wanunanta haqishqa këkaptenqa noqantsikpis pëta kuyanantsikmi.

7, 8. a) ¿Imanötaq rikätsikushwan Diosta kuyanqantsikta? b) ¿Yachatsikonqantsikta nunakuna imanötaq rikäyan?

⁷ Tsëqa, ¿imanötaq rikätsikushwan Jehoväta kuyanqantsikta y llapan ruranqampita agradecikonqantsikta? Rikärishun Biblia kënö ninqanta: “Tsemi mandacushqancunata cäsucurnenqa,  Diosta cuyantsic. Y mandacushqancunaqa manam allapa sasatsu” (1 Juan 5:3). Këchö rikanqantsiknöpis, Teytantsik Jehoväta kuyarnenqa llapan nimanqantsiktam rurashun. Tsënö kaptinmi shutimpita y Gobiernompita willakuntsik, y tsë ruranqantsikqa wiyamaqnintsikkunatapis alläpam yanapan. Shonqupita patsë yachatsikoq ëwarqa, Diosnintsikta rasumpa kuyanqantsiktam rikätsikuntsik (Mat. 12:34).

⁸ Wakin nunakunaqa Diospa Gobiernompita yachatsishqa manam chaskimantsiktsu ni wiyakïtapis munayantsu. Tsënö kaptimpis, hinantin patsachö cristiano mayintsikkuna rurëkäyanqannöllam Jehoväpa kaqta yachatsikunapaq kallpachakïkantsik y más shumaq yachatsikïta tïrëkantsik, hina Diosnintsik wakin mandamanqantsikkunachöpis tsënö wiyakïtam tïrëkantsik (2 Tim. 4:5).

Señornintsik Jesucristutam kuyantsik

9. ¿Imakunatataq Cristu aguantarqan, y pikunarëkurtaq tsëta rurarqan?

⁹ Diosnintsikta kuyarmi Tsurintapis kuyantsik. Pero manam tsërëkurllatsu. Jesusta mana rikashqa karpis, imanö kawanqanta yachakurqa cada hunaq masmi pëta kuyashun (1 Ped. 1:8). ¿Ima mana allikunapataq Jesus pasarqan? Teytampa munëninta rurëkaptimpis pëtaqa alläpam chikiyarqan, qatikachäyarqan, ardë tumpayarqan, qayapäyarqan, y imëkatam rurayarqan (lei Juan 15:25). Teytanta kuyarmi tsë llapankunata pasëkarpis aguantarqan. Hina kuyakoq karninmi nunakunapaqrëkurpis wanurqan (Mat. 20:28).

10, 11. ¿Imata ruranapaqtaq yanapamantsik Cristu kuyamarnintsik ruranqan?

¹⁰ Jesus llapan ruranqankunaman alli yarpakacharqa, masmi pëta kuyashun. Qateqninmi kantsik, tsëmi pënö kuyakoq kanantsik. Tsënö kuyakurmi Gobiernompita willakunapaq, y nunakuna qateqnin kayänanrëkur yanapanapaq nimanqantsikta, imëpis rurëkäshun (Mat. 28:19, 20).

¹¹ Llapan nunakunata Cristu kuyanqanta musyëkarqa, yachatsikïta ushanapaqmi kallpachakunantsik manaraq Jehoväpa hunaqnin chämuptin (lei 2 Corintios 5:14, 15). Ama qonqashuntsu, Jesusqa kuyakoq karmi Diospa munëninta nunakunapaq ruramonqa. Y noqantsikpis pë ruranqanta qatirmi yanapakushun Diospa munënin rurakänampaq. Kë llapanta ruranapaqqa yanapamäshun Jehoväta cada hunaq más kuyanqantsikmi (Mat. 22:37). Jesus yachatsikonqanta y nimanqantsikkunata rurarqa, pëta kuyanqantsikta, y imëkata pasarpis Diosnintsiklla mandakoq kanqanta pënö defendinapaq listo këkanqantsiktam rikätsikushun (Juan 14:23, 24; 15:10).

Más allin kaqta imëpis rurashun

12. ¿Ima ninantataq “mas allin caqta” rurayë nirqan Pablu?

¹² Cristu ruranqantam Apóstol Pabluqa rurarqan, tsëmi Corinto markachö cristiano mayinkunata nirqan pëpita yachakuyänampaq (1 Cor. 11:1). Diospa poderninwan huk idiömakunata parlayänampaq, qeshyëkaqkunata kachakätsiyänampaq y tsënö milagrokunata rurayänanrëkur kallpachakuyänampaq nishqa karpis, huk más precisaq kaqta rurayänampaqmi kënö nirqan: “Cananmi yacharatsiyashqequi rurayänequipaq mas allin caqta” (1 Cor. 12:31). Qateqnin versïculokunata rikarninmi tantearintsik kuyakïpaq parlëkanqanta. Pero ¿imanirtaq kuyakïqa  más alli kaq rurë karqan? Tsëtaqa musyarintsik qateqnin capïtulochö apóstol Pablu ninqanta leirninmi (lei 1 Corintios 13:1-3). Dios yanapaptinmi nirqan, huk nunaqa imëka rurëta yachaq kanmanmi, y mana pï ruranqantapis ruranmanmi, pero mana kuyakoq kaptenqa ruranqampis mana kaq cuentallam. ¡Kuyakï alläpa precisaq kanqantam këchöqa rikätsikorqan!

13. a) ¿Ima nintaq 2010 watapaq texto? b) ¿Ima ninantataq “kuyakiyqa manam imeypis ushakantsu” nirqan Pablu?

¹³ Tsëpitam Pablu yachatsikorqan rasumpa kuyakï imanö kanqanta y mana kuyakï imanö kanqantapis (lei 1 Corintios 13:4-8, QKW *). Llapantsikmi yarpachakunantsik kë textokuna yachatsikonqanta wiyakïkanqantsikta o mana wiyakïkanqantsiktapis. Pero kananqa rikärishun 7 kaq versïculopa ushanantawan 8 kaq versïculopa qallanantam, tsë ishkampitam 2010 watapaq texto yarqamushqa: ‘Kuyakiyqa llapantam awantan. Kuyakiyqa manam imeypis ushakantsu’. 8 kaq versïculoqa parlan punta congregacionkuna patsakanqan witsanchö, tukï idiömata parlayanqanta, shamoq tiempopaq willakuyanqanta y santo espíritu yanapaptin imëkata rurayanqantam. Tsë llapan rurëkunaqa ushakänanmi karqan, pero kuyakïqa mana imëpis ushakänantsu karqan, tsëtam apóstol Pablu willakorqan. Jehoväqa alläpa kuyakoqmi y pëqa manam imëpis ushakantsu, tsëmi kuyakoq këninqa imëpis ushakanqatsu. Imëpis këkanqallam (1 Juan 4:8).

“Llapantam awantan”

14, 15. a) ¿Imanirtaq kuyakï yanapamäshun imëkata pasarpis aguantanapaq? b) ¿Imanirtaq Testigo këta huk joven haqita munarqantsu?

¹⁴ ¿Imataq yanapamäshun imëkata pasarnimpis aguantanapaq? Diosnintsik yachatsimanqantsikno kuyakonqantsikmi. Kë kuyakïqa manam imëkantsiktapis haqirïkur Diosta servillatsu. Cristuta kuyarqa llapan nimanqantsiktam wiyakushun y përëkurqa wanurpis wanurishunmi (Luc. 9:24, 25). Tsënömi rurayarqan wawqintsikkuna y panintsikkuna ishkë kaq hatun guerra witsanchö y qepa kaq guërrakunachöpis chikeqninkuna carcelayaptin, campos de concentracionchö katsiyaptin, y esclävotanö trabajatsiyaptin.

¹⁵ Alemania nacionchö Wilhelm joven Testigo pasanqanta rikärishun. Testigo këta mana haqita munaptinmi, soldädokuna illapar wanutsiyänan karqan. Y wanutsiyänanna këkaptinmi familianman kënö nir cartankurqan: “Pushamaqnintsik Jesucristu mandakonqannömi Diosnintsiktaqa imëkapitapis más kuyanantsik. Përëkur alli tsarakushqaqa bendecimäshunmi”. Kë Testïgota wanutsiyanqampita watakuna pasariptinmi, tukïta pasar imanö aguantayanqantapis huk panin kënö nirqan: “Imapitapis más Diosta kuyayänäpaqmi familiäwan churakäyarqä”. Hina tsënöllam kanan witsan Armenia, Corea del Sur y Eritrea nishqan nacionkunachö carcelarëkaq cristiänokunapis, Jehoväta alläpa kuyayanqanta rikätsikïkäyan.

16. ¿Ima mana allikunapataq pasayarqan Malaui nacionchö cristiänokuna?

¹⁶ Më tsëchömi cristiano mayintsikkuna imëkata pasar Diosman markäkuyanqanta o yärakuyanqanta y alli tsarakuyanqanta rikätsikïkäyan. Malaui nacionchö Testïgokunatam ishkë chunka hoqta (26) watakuna yachatsikuyänanta gobierno  micharqan, paqwë chikishqa y tukïta rurashqam kayarqan. Pero alli tsarakuyanqampitaqa atska bendicionkunatam chaskiyarqan. Gobierno michar qallanqan witsankunaqa 18.000 testïgokunam kayarqan, pero kima chunka watakuna pasariptenqa 38.393 masnam kayarqan. Wakin nacionkunachöpis tsënöllam pasëkan.

17. ¿Ima mana allikunatataq pasayan wakin cristiänokuna, y imanötaq aguantayashqa?

¹⁷ Diosta sirvenqantsikpita chikimashqa aguantananqa sasaraqmi o ajarämi, hina tsënöllam kastantsikkuna o familiantsikkuna chikimashqapis. Pero ¿manaku tsënö chikishqa kanapaq kaqta Jesus willakushqana karqan? Awmi, y atskaq cristiänokunanam kawëninkunachö tsëkunata pasëkäyan (Mat. 10:35, 36). Wakin jövenkunataqa Jehoväta serviyanqanrëkurmi teytankuna chikiyashqa. Tsëmi höraqa wayinkunapita qarquyaptin, ankupäkoq o llakipäkoq Testïgokuna ëllukurkuyashqa wayinkunaman. Wakin cristiänokunatanäqa kastankuna manam rikëtapis munayantsu. ¿Imanötaq aguantayashqa kë llapanta pasëkarnin? Jehoväta, tsurin Jesusta hina cristiano mayinkunatapis kuyarmi (1 Ped. 1:22; 1 Juan 4:21).

18. ¿Llapantapis aguantar kuyanakuyanqan imanötaq casädokunata yanapan?

¹⁸ Hina casakushqakunapaqpis alläpam precisan llapanta aguantar kuyanakuyänanqa, pëkunaqa wiyakuyänan Jesus kënö ninqantam: “Dios juntashqantaqa manam pipis raquinmantsu” (Mat. 19:6). “Tucuyläya problëmacuna shamuptin[qa]” Jehoväwan kimaq kayanqantam casädokuna yarpäyänan (1 Cor. 7:28, NTCN). Kuyakïqa llapantam aguantan nimantsikmi Palabranchö. Tsënö kuyanakurqa imëkata pasarpis manam rakikäriyanqatsu, antis casakuyanqan hunaqnöllam imëpis këkäyanqa (Col. 3:14).

19. Desgraciakuna kaptin ¿imatataq Diospa markan ruran?

¹⁹ Hina kuyakoq karmi ima desgraciakuna pasaptimpis yanapanakuntsik. Tsënömi pasakorqan Perüchö sur kaq lado markakunata patsa kuyurnin ushakäratsiptin, y Katrina niyanqan shukukïna, Estados Unïdoschö sureste kaq lado markakunata ushakäratsiptin. Atskaq cristiänokunapam wayinkuna ushakarqan y imëkankunatam paqwë oqrariyarqan, pero hinantin Patsapitam cristiano mayinkuna yanapayarqan wanayanqankunata apatsir, wayinkuna rurapur y Yachatsikuyänan Wayikunata altsarnin. Tsë rurayanqankunam rikätsikun cristiänopura alläpa kuyanakunqantsikta y imëka pasaptimpis yanapanakunqantsikta (Juan 13:34, 35; 1 Ped. 2:17).

“Kuyakiyqa manam imeypis ushakantsu”

20, 21. a) ¿Imanirtaq kuyakïqa llapampitapis más allin kaq rurë? b) ¿Imanirtaq imëpis kuyakoq kanantsik?

²⁰ Jehoväpa markanqa imëpis rikätsikushqam kuyakï más allin kaq rurë kanqanta. Awmi, kuyakïqa imëkapitapis más allim. Tsëchi apóstol Pablupis congregación alli patsakäriptin santo espïritupa yanapakïninwan milagro rurayanqankuna ushakänampaq kaqta willakurir kënö nirqan: “Cananqa marcäcurllam, shuyacurllam y cuyanacurllam quecantsic; peru tse quimanpitapis mas presisaqqa cuyaquimi” (1 Cor. 13:13).

²¹ Awnimanqantsikkunata Diosnintsik cumpliramuptinqa mananam tsëkuna rurakämunanman markäkï o yärakuy kanqanatsu. Hina tsënöllam shuyaranqantsik cösaskuna rurakäramuptenqa, tsëkuna chämunanta shuyaräshunnatsu. Pero ¿kuyakïqa? Rikanqantsiknöpis manam ni imë ushakanqatsu. Imëyaqpis kawakunapaq mushoq patsaman chärirqa, paqwëmi musyarishun Diosnintsik imanö kuyakoq kanqantapis. Tsënö kanan këkaptenqa, Diosnintsikpa munëninta ruranapaq llapantsik kallpachakushun y imëpis alli kaqta rurar kawakushun. Tsëqa kushishqam imëyaqpis kawakushun (1 Juan 2:17).

[Päginapa ura kuchunchö willakï]

¿Ima ninkimanraq?

• ¿Imanirtaq allitsu kanman imatapis lluta kuyanqantsik?

• ¿Imakunatataq aguantashun rasumpa kuyakurqa?

• ¿Ima ninantataq “kuyakiyqa manam imeypis ushakantsu” nerqan Pablu?

[Yachakunapaq kaqpa tapukïninkuna]

[26 kaq päginachö ninqan]

Këmi 2010 watapaq texto: ‘Kuyakiyqa llapantam awantan. Kuyakiyqa manam imeypis ushakantsu’. (1 Cor. 13:7, 8, QKW.)

[24 kaq päginachö dibüju]

Diosta kuyarmi nuna mayintsikta yachatsintsik

[25 kaq päginachö fötu]

Mana imëpis ushakaq kuyakïmi yanaparqan Malaui Testigokuna imëkata pasarpis aguantayänampaq