Rikätsikushun espiritual kaqchö poqu tikrëkanqantsikta

“Que yachatsenqaqcunata shonqiquicho yarparar rurë. Tsenopam llapancuna cuentata qocuyanqa waran waran mas cabal alli nuna ticraquicanqequita.” (1 TIM. 4:15.)

1, 2. ¿Cristiano tikranqan witsan më markachötaq Timoteu sirverqan y tsëpita ishkë chunka watayoq këkaptin imataq pasarerqan?

TIMOTEUPA markanqa karqan Roma nacionpa Galacia shutiyoq provinciam, y kananqa tsë marka këkan Turquia nishqan nacionchömi. Y tsë markachömi Jesus wanushqampita atska watakuna pasarishqancho atska congregacionkuna patsakärirqan. Tsë tiempokunachömi Timoteu, mamänin y awilan cristiano tikrariyarqan y servir qallëkuyarqan (2 Tim. 1:5; 3:14, 15). Awmi, Timoteuqa alläpa kushishqam Jehová Diosta servir qallëkorqan llapan cristiano mayinkunawan, pero tsëpitaqa kawënin hukläyanam kanan karqan.

² Tsëqa qallëkorqan Timoteu ishkë chunka watayoq këkaptin apóstol Pablu tsë markata yapë visitanqanchömi. Listra markachö këkarchi Pabluqa wiyarqan patsan cristiänokuna Timoteupaq ‘allapa alli ruraq nuna’ kanqampita parlayaqta (Hech. 16:2). Timoteuqa alleqchi rikätsikorqan jövenllaraq këkarpis poqu cristiano kanqanta. Tsëmi, santo espíritu yanapaptin Pablu y tsë congregacionpita llapan anciänokuna Timoteuta akrayarqan congregacionchö huk preciso rurëta ruranampaq (1 Tim. 4:14; 2 Tim. 1:6).

3. ¿Ima shumaq rurëta ruranampaqtaq Timoteuta invitayarqan?

³ Timoteutaqa huk precisaq rurëta ruranampaqmi niyarqan: apóstol Pablupa yanaqin kanampaq (Hech. 16:3). ¡Pasëpachi Timoteu kushikïkorqan! Tsëpita shamoq watakunachöqa, Pabluwanmi viajanan karqan y höraqa wakin misionërokunawan, apostolkuna y anciänokuna mandayanqanta aparnin. Pabluwan Timoteu congregacionkunata watukayanqanqa allipam yanaparqan cristiänokunata Jehoväta servirnin más sinchikuyänampaq (lei Hechos 16:4, 5). Tsëmi atskaq cristiänokuna rikäyarqan Timoteu poqu cristiano tikrëkanqanta. Chunka watana yanaqin këkaptinmi Pablu kënö qellqarqan Filipenseskunanam: “Porqui manam ni pipis cantsu penoqa. Pellam noqano qamcunapaq yarpacachar quecan. [...] Peru qamcunaqa reqiyanquinam Timoteu allita rurar cawacushqanta. Pëqa tsurï cuentam yanapamashqa Teyta Diospa alli willaquininta willacur” (Fili. 2:20-22).

4. a) ¿Ima sasa o aja rurëta ruranampaqtaq niyarqan Timoteuta? b) 1 Timoteu 4:15 textochö Pablu consejakonqampita, ¿ima tapukïkunatataq rurashwan?

⁴ Filipenseskunaman qellqanqan tiempom, Pabluqa Timoteuta churarqan anciano y siervo ministerial kayänampaq cristiänokunata akranampaq y kë rurëqa manam fäciltsu karqan (1 Tim. 3:1; 5:22). Clärom këkan, Timoteuqa pasëpa markäkïpaq anciänom karqan. Tsënö  këkaptimpis apóstol Pabluqa consejarqan, “waran waran mas cabal alli nuna” tikrëkanqanta rikätsikunampaqmi (1 Tim. 4:15). ¿Manatsuraq rikätsikushqana karqan poqu cristiano kanqanta? Tsëpenqa, ¿ima nitataq munarqan Pablu y imanötaq noqantsikpis tsë consëjopita yachakushwan?

Waran waran poqu cristiano tikrëqa rikakurinmi

5, 6. ¿Efeso congregacionchö imataq pasakïkarqan y imanötaq Timoteu yanapanan karqan?

⁵ 1 Timoteu 4:15 texto nenqanta maslla musyarinapaq rikärishun qepancho y puntanchö versïculokunapita (lei 1 Timoteu 4:11-16). Manaraq këkunata qellqarmi, Pabluqa Macedoniata viajashqa karqan, Pero Timoteutaqa Ëfesochö quedakunampaqmi nirqan. ¿Imanir? Congregacionchömi mana allita yachatsikoq cristiänokuna, cristiano mayinkunata rakikëkätsiyarqan, y tsë yachatsikïpitam Timoteuqa congregacionta täpanan karqan. ¿Imanöraq ruranan karqan? Kawëninchö allikunata ruranqampitam wakinkuna yachakuyänan karqan.

⁶ Pablum nirqan Timoteuta: “Diosnintsicman creyicoqcuna qampita yachacuyätsun shumaq parlaquiniquipita, alli portaquiniquipita, cuyacoq queniquipita, Diosnintsicman alli marcäcoq canqequipita y juclaya shonqu queniquipita, [“limpiu shongoyquiwan”, NTCN]”. Tsëpitam hina kënö nirerqan: “Que yachatsenqaqcunata shonqiquicho yarparar rurë. Tsenopam llapancuna cuentata qocuyanqa waran waran mas cabal alli nuna ticraquicanqequita” (1 Tim. 4:12, 15). Más poqu cristiano kanqanqa rikakunan karqan imanöpis portakonqanwan, y imanöpis Diosta sirvenqanwanmi y manam cargokuna chaskenqanwantsu. Tsënö poqu këtam llapan cristiänokuna sinchikuyänan.

7. ¿Imanö këtataq llapan cristiänokuna sinchikuyanman?

⁷ Punta cristiänokunapa tiemponchonöllam kanampis congregacionchö dirigeq cristiänokunapa rurëninkuna kan. Këman yarpärishun, atskaq cristiänokunam siervo ministerial kayan, y wakinnam anciano, y pëkunaqa yanapakuyan yachatsikïchömi, asambleakunachöpis tsëtaqa rikantsikmi. Wakinkunaqa llapan tiemponkunawan Jehoväta serviyänampaqmi churapakäyashqa, wakinmi kayan congregacionkunata watukaq, betelita o misionëropis. Pero llapan cristiänokunam ollqupis warmipis, jovenpis y yashqapis rikätsikïta puëdentsik waran waran poqu cristiano tikrëkanqantsikta (Mat. 5:16). Awmi, Timoteunöllam congregacionta dirigeqkunapis rikätsikuyanman waran waran poqu cristiano tikrëkäyanqanta, wakinkunapis rikäyänampaq.

Alli parlakïnintsikpita wakinkunapis yachakuyätsun

8. ¿Alläpa precïsoku shimintsik sujetanan?

⁸ Timoteuqa hina rikätsikunan karqan poqu cristiano kanqanta shumaq parlakïninwanmi. ¿Imanötaq noqantsikpis rikätsikushwan parlakïnintsikcho poqu cristiano kanqantsikta? Parlakïnintsikmi rikätsikun imanö kanqantsiktapis. Tsëchi Jesuspis nirqan, “nunaqa parlan shonquncho imatapis yarpanqantam” (Mat. 12:34). Jesuspa wawqin Santiagupis alleqmi musyarqan, Jehoväta adoranapaq shimintsik parlanqanqa allipaq o mana allipaqpis kanqanta, kënömi nirqan: “Sitsun meqan nunapis relijiosu tuconqa, peru llutata parlar shiminta mana sujetaconqatsu, quiquinllam engañaquican. Y tse relijiosu quenin manam imapaqpis balintsu” (Sant. 1:26, 27).

9. ¿Imanötaq parlakïnintsikwan wakinkunata yachatsishwan?

⁹ Parlakïnintsikta wiyarninmi congregacionchö cristiano mayintsikkuna cuentata qokuriyanqa espiritual kaqchö imanö këkanqantsikta. Tsëmi, lluta parlakuq, despreciakoq, wasa rimaq kayänampa rantin poqu cristiänokunaqa sinchikuyan shumaq parlapäkoq këta, llakipäkoq këta, y nuna mayinta yanapëta (Pro. 12:18; Efe. 4:29; 1 Tim. 6:3-5, 20). Hinamampis Diosta kuyanqantsiktaqa rikätsikuntsik Jehová mandamanqantsikkunata defendirnin y nenqankunata imëpis rurëta munanqantsikta willakurninmi (Rom. 1:15, 16). Tsënö rurashqaqa, alli shonquyoq nunakunapis rikämarnintsik rurëtam munariyanqa (Fili. 4:8).

 Alli portakoq y limpio shonquyoq kanqantsikpita wakinkunapis yachakuyätsun

10. Poqu cristiano kanantsikpaq, ¿imanirtaq imatapis hanan shonqullaqa ruranantsiktsu?

¹⁰ Wakinkuna poqu cristiänotanö rikämänantsikpaqqa, manam alli parlapäkoq kanqantsikllapitatsu. Y tsëtam ruranantsik nirir mana rurëqa tikraratsimashwan farisëokunatanömi. Pabluqa reqirqanmi tsë religiösokunaqa allitukoq hanan shonqu kayanqanta, y tsënö kayanqanqa mana alliman apakonqanta. Tsëmi, Timoteuta nirqan tsënö këman mana ishkinampaq y imëpis parlanqanta cumplinampaq (1 Tim. 1:5; 4:1, 2). Awmi, yanaqin Timoteuqa manam allitukoq hanan shonqu nunatsu karqan, tsëmi ishkë kaq cartanchö pëpaq kënö qellqarqan: “Yarparëcämi Diosman qam rasonpa marcäqonqequita” (2 Tim. 1:5). Tsënö kaptimpis, Timoteuqa sinchikunanmi karqan rasun kaqllata parlaq kanqanta wakinkunapis rikäyänampaq. Y imëkachömi alli ruraq kanan karqan.

11. ¿Qellëta imanö rikänampaqtaq Pablu qellqarqan Timoteuman?

¹¹ Ishkan carta qellqanqanchömi Pablu consejarqan Timoteu kawëninchö imanö portakunampaqpis. Nirqanmi, ama atska qellëyoq këpaq locuyäkïtsu “porqui allapa qelle cuyepitam llapan mana alli rurecuna yurin”, y tsëpitapis yarpäratserqanmi, “waquin nunacunam qellepaq codisiosu car, marcäquinincunapita waqtsacäcuriyashqa. Tsenopam quiquincunatä llutepa sufrimientuncuna ashiyashqa” (1 Tim. 6:10). Qellë kuyëqa espiritual kaqchö huk cristiano mana poqu kanqantam rikätsikun, pero ‘micuyanampaq y yacacuyanampaq’ tinkullawan kawaq cristiänokunaqa rikätsikuyan waran waran poqu cristiano tikrëkäyanqantam (1 Tim. 6:6-8; Fili. 4:11-13).

12. ¿Imanötaq rikakun poqu cristiano kanqantsik ima ruranqantsikchöpis?

¹² Hinamampis Timoteutam Pablu nirqan, cristiänakuna “shumaq besticuyätsun, sensillullata y normalllata” (1 Tim. 2:9). Warmikuna sencïllollata, alli juiciowan vestikur, y shumaq altsapäkushqa  puriyaptenqa o imëkachöpis allillata rurayaptenqa, wakinkunam yachakuyanqa pëkunapita (1 Tim. 3:11). Hina kë consëjoqa allillam ollqukunapaqpis, Pablum kënö nirqan congregacionta dirigeq cristiänokunata: “Cabal nuna, alli yarpëninwan shumaq portacoq y nunacunapita respetashqa” kayë nishpa (1 Tim. 3:2). Awmi, llapan hunaq kawënintsikchö këkunata rurashqaqa, llapanmi rikäyanqa cabal y poqu cristiano kanqantsikta.

13. Timoteunöpis, ¿imanötaq warmiwampis ollquwampis limpio shonquyoq kanqantsikta rikätsikushwan?

¹³ Hina Timoteu limpio shonquyoq kanqampitapis wakinkunaqa yachakuyänanmi karqan. Limpio shonquyoq kanki nirqa Pablu parlapëkarqan, warmikunawan punukï yarparëpita cuidakunampaqmi. Timoteuqa shumaqmi portakunan karqan warmikunawan junto këkarnin. Tsëmi nirqan: “Chacwan warmicunatapis imayca mamayquitanö ricanqui. Y jipash warmi wamracunata imayca paniquitanö respetar limpiu shongoyquiwan ricanqui” (1 Tim. 4:12; 5:2, NTCN). Warmitapis ollqutapis rakcha kawakoqtaqa Jehová rikëkanllam y imë hora karpis tsënö kakuyanqantaqa wakin nunakunapis musyariyanqam. Y tsënöllam huk cristiänopa alli rurëninwampis pasan, manam pakarantsu llapanmi musyariyan (1 Tim. 5:24, 25). Tsënömi, llapan cristiänokunam congregacionchö rikätsikïta puëdeyan espiritual kaqchö poqu cristiano kayanqanta, alli parlakuq kayanqanta y warmiwampis ollquwampis shumaq portakoq kayanqanta.

Alläpam precisan kuyakoq y markäkoq kënintsik

14. ¿Imanötaq Biblia rikätsimantsik kuyanakï alläpa preciso kanqanta?

¹⁴ Rasumpëpa cristiänokunapaqqa kuyakïqa alläpam precisan. Jesusmi qateqninkunata nirqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:35). ¿Imanötaq tsë kuyakïta rikätsikushwan? Diospa Palabranmi yachatsimantsik aguantanakurnin huknintsik huknintsik paciencianakur mana chikinakushpa kawakunapaq y ‘juctapis juctapis cuyanapaq, ancupänapaq’, perdonanapaq y posadatsikoq kanapaq (Efe. 4:2, 32; Heb. 13:1, 2). “Jucniquipis jucniquipis juc castanolla cayanqequirecur, shumaq cuyanacuyë” nishpam qellqarqan apóstol Pablu (Rom. 12:10).

15. ¿Imanirtaq kuyakïqa alläpa precisan llapantsikpaq y congregacionta pushaq cristiänokunapaqnäqa?

¹⁵ Sitsun Timoteu cristiano mayinkunata lluta o sinchipa tratanman karqan, manam imapaqpis välinmantsu karqan alli yachatsikoq kanqan, y congregacionkunata watukanampaq sinchikonqan y llapan ruranqampis (lei 1 Corintios 13:1-3). Pero wawqinkunata y paninkunata kuyëpa shumaq tratanqan, posadatsinqan y llapan ruranqanmi rikätsikorqan poqu cristiano kanqanta. Tsëmi alläpa preciso kuyakï kanqanta musyar Pablu yarpätserqan Timoteuta imëpis kuyakoq kanampaq.

16. ¿Imanirtaq Timoteu wanarqan alli markäkïta o yärakuyta?

¹⁶ Efeso markachö këkaptinmi Timoteupa markäkïnin o yärakuynin pruëbaman churakarqan. Wakinkunaqa yachatsikuyaq Diospa Palabrampa contranmi. Wakinkunanam ‘mana caqta’ o unë kaq cuentokunata yachatsikuyänampaq ashiyaq, y tsëqa manam imapaqpis congregacionta yanapaqtsu (lei 1 Timoteu 1:3, 4). Tsëmi Pablu kënö nirqan: “Tse yachatsicoqqa orgullosu imapis mana musyaqmi. [...] Y tse parlashqancunaqa imeca qeshyanomi apamun, chiquinaquita, liryaquita, ashanaquita, desconfianaquita” (1 Tim. 6:3, 4). ¿Tsë cuentokuna y mana alli yachatsikïkuna congregacionman yëkïkaptin wiyaräkurtsuraq kakunman karqan Timoteu? Manam, Pablum kënö consejarqan: “Imecata sufrirninpis, marcäquiniquicho, y wiñe caweniquicho alli tsaracunqui” y “ama cäsunquitsu waquincuna mana imapaqpis sirweq llutan yachatsicoqcunata. Pecunaqa allapa yachaq tucurpis, manam Diospaqqa ni imata musyayantsu” (1 Tim. 6:12, 20, 21). Awmi, Timoteuqa pasëpam wiyakorqan apóstol Pablu nenqanta (1 Cor. 10:12).

17. ¿Imanötaq kanan tiempo Diosman markäkonqantsik pruëbaman churakanman?

¹⁷ Hinamampis Pabluqa kënömi Timoteuta nirqan: “Shamug tiempucunachömi waquincag runacuna Señor Jesucristoman criyicuynincunata dëjasquir raquicäyanga. Tsay raquicag runacunaga engañacug supaycunapa yachatsicuynincunatam  cäsurnin gatiyanga” (1 Tim. 4:1, NTCN). Llapan cristiänokunapa y congregacionta dirigeqkunapam Timoteupanö markäkïninkuna o yärakuyninkuna sinchi kanan. Tsëmi, Diospa contran tikrashqakunapa yachatsikïnimpita cuidakurnin y allikunata rurarnin rasumpa poqu cristiano kanqantsikta rikätsikuntsik, wakinkunapis tsënölla rurayänampaq.

Sinchikushun poqu cristiano kanqantsik rikakunampaq

18, 19. a) ¿Imanötaq poqu cristiano kanqantsikta rikätsikïta puëdentsik? b) ¿Imatataq qateqnin tëmachö yachakushun?

¹⁸ Poqu cristiano këqa manam hanampa imanöpis rikakonqantsikpitatsu, ni imatapis rurëta yachanqantsikpitatsu, ni ima cargoyoqpis kanqantsikpitatsu. Y manam atska tiempona congregacionchö kanqantsikpitatsu. Tsëpa rantinqa, poqu cristiano kanqantsikqa rikakun imanöpis pensanqantsikchö, parlanqantsikchö, y ima ruranqantsikpis Jehová munanqannö kanqanchömi (Rom. 16:19). Wiyakunantsikmi kuyanakunapaq Diosnintsik mandamanqantsikta y markäkïnintsik más sinchi kanampaqmi sinchikunantsik. Awmi, imëpis Pablu Timoteuta nenqanman yarpararqa y nenqankunata rurashqaqa, poqu cristiano kanqantsikpis rikakurenqam.

¹⁹ Hina poqu cristiano kanqantsikqa rikakonqa kushi kushi kanqantsikchömi y tsëqa espíritu santopa wayïninmi (Gál. 5:22, 23). Qateqnin kaq tëmachömi rikäshun kuyakïnintsik shonquntsikchö winanampaq y tsëta mana oqranapaq imata ruranatapis y mëläya llakikïkunapa pasëkarnimpis kushishqa këkänapaq.

¿Imataq ninkiman?

• ¿Imanö kanqantsiktataq rikätsikun parlakunqantsik?

• Limpio shonquyoq y alli tratakuq kanqantsik, ¿imanötaq rikätsikun poqu cristiano kanqantsikta?

• ¿Imatataq rurayanman cristiänokuna wakinkuna kuyakïninkunata y Diosman markäkïninkunata yachakuyänampaq?

[Yachakunapaq kaqpa tapukïninkuna]

[10 kaq päginachö dibüju]

Jövenllaraq këkarpis Timoteuqa poqu cristiano kanqantam rikätsikorqan

[12 kaq päginachö dibüjukuna]

¿Poqu cristiano kanantsikpaq sinchikïkanqantsikta wakinkuna rikëta puëdeyanku?