¡Jehoväpa gobiernonlla alli kanqan musyakärin!
¡Jehoväpa gobiernonlla alli kanqan musyakärin!
“Llapampa hanampa këkaqqa, llapan gobernaqpa gobernantenmi” (DAN. 4:17.)
1, 2. ¿Imanirtaq imatapis altsashqatsu nunakunapa gobiernon?
MUSYANQANTSIKNÖPIS, nunapa gobiernonqa manam imatapis altsëta puëdeshqatsu. ¿Imanirtaq puëdeshqatsu? Gobernëta mana yacharmi. Hina kanan gobiernokunanäqa kënö kayanqantam rikätsikuyan: “Codisiosu, qellellapaq locuyäcoq, orgullosu, musyaq tucoq, Teyta Diospa contran parlaq”, “Teyta Diospa yachatsiquininta mana cäsoq”, “perdonaqui mana yachaqcuna, cuentusteru, llutan rurecunata mana teqñaq, allapa mana baleq, alli rurecuna mana gustaq, amiguncunata lebantar ranticoq” y “yachaq tucoq” (2 Tim. 3:2-4).
2 Adanwan Ëvam Diospa Gobiernompa contran churakäyarqan. Itsa libre këtachi pensayarqan, pero rasumpachöqa Satanaspa makinmanmi ishkiyarqan, tsënöpanam Diabluqa “que patsacho [...] mandacoq” këman charqan. 6.000 watakunanöna Diablupa makinchö nunakuna kashqa karmi, pasëpa mana alli kawakïkäyan (Juan 12:31). Tsëmi kanan witsan pasakïkanqampaq parlar, Historia Oxford del siglo XX nishqan libro, rikätsikun “mundochö alli kawakïta” ashiqa ni imapaqpis mana välenqanta. ¿Imanir? Kë librom nin: “[Alli kawakï] tarinanqa alläpa sasam, tarïta tïrarqa más mana allimanmi chäkuriyan, hina mana allipaq dominakoq gobiernokunaman y guërrakunamampis”. ¡Rasun kaqllam tsëqa!
3. ¿Imanötaq Diosnintsik gobernamunman karqan Adanwan Eva hutsata mana rurayaptinqa?
3 Llakinëpaqqa Adanwan Eva Jehoväpa gobiernompa contran churakäyanqanmi. Hutsata mana rurayaptinqa, ¿imanöraq Jehová kë Patsata gobernamunman karqan? Manam musyantsiktsu. Pero llapan nunakunata kuyarninchi gobernanman karqan (Hech. 10:34; 1 Juan 4:8). Pëqa alläpa yachaqmi, y kë Patsachö gobernaqkuna lluta rurayanqannöqa manam ruranmantsu karqan. Diospa Gobiernonqa ‘llapan kawaqpa munënintam’ ruranman karqan (Sal. 145:16). Huk parlakïchöqa, tsëllam llapampitapis más alli kaq Gobierno kanman karqan (Deu. 32:4). ¡Tsënö gobiernota oqranqantsikqa alläpa llakinëpaqmi!
4. Satanás Patsata gobernarpis, ¿llapan munanqantatsuraq rurashqa?
4 Kikinkuna munayanqannö nunakuna Patsachö gobernanakuyänampaq Diosnintsik haqishqa karpis, pëllam autoridadyoqqa llapan kamanqanta gobernanampaq. ¿Imanir? Biblia ninqannöpis: “Llapampa hanampa këkaqqa, llapan gobernaqpa gobernantenmi”, tsëtaqa Babiloniapa reynimpis mayarirqanmi o käyirirqanmi (Dan. 4:17). Tsëpitanam Diosnintsik Gobiernonwan llapan munanqanta rurarinqa (Mat. 6:10). Diablu “que patsacho mandacoq” kanampaqqa Jehová haqishqa, pï alli gobernaq kanqampis musyakänampaqmi (2 Cor. 4:4; 1 Juan 5:19). Munëninta Diablu rurarpis, Jehová haqinqampita mastaqa manam rurashqatsu (2 Cró. 20:6; këtawan rikäri Job 1:11, 12 y 2:3-6). Hina Diablu Patsata gobernaptimpis, Jehoväta kuyaq nunakunaqa imëpis kashqallam.
Diosmi Israelchö gobernarqan
5. ¿Imatataq israelïtakuna Diosta awniyarqan?
5 Abelpita Israel marka patsakanqanyaqmi ollqupis warmipis Jehoväta adorayashqa y mandakonqanta wiyakuyashqa (Heb. 11:4-22). Y Moises kawanqan witsanchönam, Dios huk conträtota rurarqan Jacobpa kastan Israelwan. Tsëmi 1513 watachö israelïtakuna awnikuyarqan pëkuna y mirëninkunapis Jehoväta Gobiernontanö chaskiyänampaq, y niyarqanmi: “Jehová llapan parlanqanta rurayanäpaqmi listo këkäyä” (Éxo. 19:8).
6, 7. ¿Imanötaq Jehová Gobernarqan israelïtakunata?
6 ¿Imanirtaq markan kanampaq israelïtakunata Jehová akrarqan? (lei Deuteronomio 7:7, 8.) Manam pëkunarëkurllatsu tsëtaqa rurarqan. Tsëpa rantinqa shutinrëkur y pëlla Gobernaq kanqanta musyayänampaqmi. Israelïtakunam rikäyänan karqan Jehová rasumpa Dios kanqanta (Isa. 43:10; 44:6-8). Tsëmi pëkunata nirqan: “Jehová Diosnikipa santo markanmi kanki, y markan kanëkipaqmi Jehová akrashurqunki, kë patsachö llapan markakunapita pëllapa kanëkipaqmi” (Deu. 14:2).
7 Israelïtakunata Jehová gobernarnin musyaqmi hutsasapa kayanqanta. Y Moiseswanmi alli rurëta kuyanqanta, santo këninta, ankupäkïninta, mana raslla piñakunqanta rikätsikoq leykunata qorqan. Josué kawanqan witsanchönam, israelïtakuna Diospa Leyninta wiyakur atska bendicionkunata chaskiyarqan (Jos. 24:21, 22, 31). Tsë witsankunachömi cuentata qokuriyarqan Jehoväpa gobiernonlla alli kanqanta.
¡Gobiernonkuna akrayanqampitam hipayarqan!
8, 9. ¿Imatataq israelïtakuna mañakuyarqan, y alliku kawayarqan?
8 Atska kutim israelïtakuna Dios adorëta haqiyarqan, tsëmi höraqa yanaparqantsu. Y huk gobernante kanampaqmi, Jehoväman mañakunampaq Samuelta niyarqan. Mañakuyanqanta rurë nirqanmi Jehová, hina, “manam qamtatsu mana kaqpaq churayäshurqunki, noqa reyninkuna kanqätam mana kaqpaq churayämashqa” nirqanmi (1 Sam. 8:7). Mañakuyanqanta qornimpis, willarqanmi mana allikunapa pasayänanta (lei 1 Samuel 8:9-18).
9 Kananyaq hipanqantsikmi rikätsikun Jehová rasumpa kaqta parlanqanta. Israelchö tukï reykuna gobernaptimpis manam allitsu kawayarqan, tsë reykuna Jehoväpa contran churakäyaptinnäqa. Tsënöllam llapan nacionchöpis kashqa: huk gobernante Diosta mana cäsokuptinqa manam allillaqa imapis yarquntsu. Pero wakin polïticokunaqa, alli kawakïta wakinkunapaq ashiptï noqataqa Dios yanapamanmi niyan. ¿Rasumpatsuraq Jehová yanapan? Manam yanapantsu, mandakunqankunata mana wiyakuyaptin (Sal. 2:10-12).
Jehová Diosta wiyakoq mushoq marka
10. ¿Imanirtaq Jehová huk markata akrarqan?
10 Atska watakuna pasariptinnam israelïtakuna rikätsikuyarqan Diosta mana servïta munayanqanta. Mesïasta mana chaskita munayaptinnam, huk mushoq markata Jehová akrarqan. Tsëmi 33 watachö punta congregación patsakarqan ciëlopaq akrashqakunawan. Kë mushoq markatam apóstol Pablu nin, ‘Diospa rasonpa israel nunancuna’ nishpa (Gal. 6:16).
11, 12. ‘Diospa rasonpa israel nunacuna’, ¿imakunachötaq unë israelïtakunawan igualäyan?
11 “Diospa rasonpa israel nunancunaqa”, unë israelïtakunanömi wakinchöqa kayan. Kanan tiempo congregacionpaqa gobiernonkuna manam nunakunatsu, ni manam hutsankunapita animalkunata wanïkatsir kayayantsu. Pero israelïtakunapanöpis, congregacionta rikäyänampaqqa anciänonkuna kanmi (Éxo. 19:3-8). Pëkunaqa manam lluta piñapëpatsu congregacionta rikäyan. Tsëpa rantinqa, kuyëpa y alli rurëninkunawanmi yachatsiyan. Llapantam respëtowan y kuyëpa rikäyan (2 Cor. 1:24; 1 Ped. 5:2, 3).
12 ‘Diospa rasonpa israel nunancuna’ y wakin ‘üshacunapis’ yachakunantsikmi israelïtakunata Jehová imanö rikanqampita. Tsënöpam más kuyashun Pëta y congregacionchö pushamaqnintsikkunatapis (Juan 10:16). ¿Gobernaqninkuna rurayanqampita unë nunakuna yachakuyaqku? Awmi, höraqa allitam yachakuyaq, höranam mana allita. ¿Imatataq këwan anciänokuna yachakuyan? Mana rey karnimpis, Diosman markäkuyanqampita wakinkuna yachakuyanqantam (Heb. 13:7).
Kanan tiempochö Jehoväpa gobiernon
13. ¿Imataq pasarqan1914 watachö?
13 Hinantin Patsapam cristiänokuna willakuyan gobiernokunapa ushakënin chëkämunqanta. 1914 watachömi Jehová Gobiernonta patsätserqan Jesucristuta trönonman churar. Tsë watam Jehová kallpata qorqan “contrancunata bensirinanpaq”, hina “chik[eqnin]kunapa rurinchö” gobernanampaq (Apo. 6:2; Sal. 110:2). Pero nunakunaqa manam Jehoväpa gobiernonchö këta munayantsu. Rurayanqanwanmi rikätsikuyan “manam Jehová kantsu” niyanqanta (Sal. 14:1).
14, 15. a) ¿Imanötaq Diospa Gobiernon kanan gobernamantsik, y imatataq tapukunantsik? b) ¿Imanötaq musyantsik Diospa Gobiernolla alli kanqanta?
14 Ciëlopaq akrashqakuna wakinqa kë Patsachö kawëkäyanraqmi. ‘Diospa rasonpa israel nunacunaqa’ ‘Señor Jesucristopa rantinmi’ kë Patsachö këkäyan (2 Cor. 5:20, NTCN). Pëkunam kayan mäkoq mäkoq cumplido sirveqkuna. Pëkunam ciëloman ëwaq mayinkunata y Patsachö mana wanushqa kawakïta shuyaraqkunatapis tukïnöpa Diospita yachatsimantsik (Mat. 24:45-47; Apo. 7:9-15). Jehoväta sirvenqantsikchö más alliyanqantsikmi, rikätsimantsik mäkoq mäkoq serviqta Jehová bendicëkanqanta.
15 Llapantsikmi këta tapukunantsik: “¿Congregacionchö ruranäpaq kaqkunata ruräku? ¿Diospa Gobiernompa kanqäta kushikökü? y ¿imatapis mana shuyarashpaku yanapakü? ¿Imëpis Diospa Gobiernompita yachatsikïta tïräku?”. Jehoväpa Testïgonkunata Pushaqkuna nimanqantsiktam llapan cristiänokuna wiyakunantsik, y anciänokunatam yanapanantsik. Tsënöpam rikätsikuntsik Jehová gobiernontsik kananta munanqantsikta (lei Hebreus 13:17). Nimanqantsikkunata wiyakurqa, mana alli mundochö tärëkarpis, kushishqa y allim kawakuntsik. Tsënö kawakunqantsikmi, Jehoväta alaban y pëlla alli gobierno kanqanta rikätsikun.
Jehoväpa gobiernonllam alli kanqa
16. ¿Imatataq kanan witsan nunakuna rurayänan?
16 Edén huertachö Diospa Gobiernompa contran churakäyanqan altsakärinampaqqa, ichikllanam pishin. Tsëmi alläpa preciso nunakuna kënö tapukuyänan: “¿Jehoväpa munënintaku rurashaq?, o ¿Patsachö gobiernokunapa munënintaku rurashaq?” Cristiänokunaqa kushishqam yanapanantsik manshu nunakunata, tsënöpa alli kaqta akrayänampaq. Ichik tiempollatanam Diospa Gobiernon llapan gobiernokunata Armagedonchö ushakätsinqa (Dan. 2:44; Apo. 16:16). Satanaspa makinchö gobiernokunaqa, ushakanqam y Diosllanam hinantin Patsata gobernanqa. Tsëmi alleq musyakärinqa Diosnintsikpa Gobiernonlla imëka gobiernokunapitapis más alli kanqanta (lei Apocalipsis 21:3-5).
17. ¿Imataq nunakunata yanapanqa Diospa Gobiernon más alli kanqanta musyayänampaq?
17 Jehová servita manaraq churakaqkunaqa, pëman mañakïkurmi Diospa Gobiernon tukï bendicionkunata apamunanman yarpäyänan. Kë Patsachö gobiernokunaqa manam ushakätsiyashqatsu, wanutsinakïkunata ni terrorismotapis. Pero Diospa Gobiernonqa pasëpam ushakätsinqa mana alli ruraqkunata (Sal. 37:1, 2, 9). Kanan tiempo gobiernokunaqa mëchö tsëchöpis guërrakunata rurakurllam kakïkäyan, pero Diosqa “Patsapa huk kuchumpita hasta huknin kuchunyaqmi ushakätsimunqa guërrakunata” (Sal. 46:9). Y nunakunapis chukaru animalkunawan allillanam kawakuyanqa (Isa. 11:6-9). Hina nunakuna mana altsayanqantam ushakätsinqa: waktsayëta, mallaqëta o muchuyta (Isa. 65:21). Hinamampis, gobiernokuna mana rurayanqantam ruranqa: manam nunakuna qeshyayanqanatsu, awkinyäyanqanatsu, chakwanyäyanqanatsu ni wanuyanqanatsu (Job 33:25; Isa. 35:5, 6). Hasta wanushqakunapis kawariyämunqan shumaq Patsachö kawayänampaq (Luc. 23:43; Hech. 24:15).
18. ¿Imanötaq rikätsikuntsik Diospa Gobiernonlla alli kanqanta creinqantsikta?
18 Këchö yachakunqantsiknöpis, punta teytantsikkunata Satanás ishkitsinqampita patsë tukï mana allikuna pasanqantam Diospa Gobiernon altsamunqa. Diabluqa imëka mana allikunatam rurëkan hoqta waranqa watakunana, pero Jehoväqa waranqa watallachömi Gobiernonwan tsë llapanta altsaramunqa. ¡Këwanmi rikärintsik Diospa Gobiernolla alli kanqanta! Jehoväpa testïgonkuna nirnin reqimanqantsikmi, rikätsikun pï gobernamaqnintsik kanqanta. Tsëmi kushishqa rikätsikunantsik llapan hora, llapan hunaq Diospa nunankuna, adoraqninkuna y Testïgonkuna kanqantsikta. ¡Ama imëpis upällaqa kakushuntsu, wiyë munaq kaqtaqa Diospa Gobiernonlla alli kanqanta willakushun!
¿Imatataq Diospa gobiernompita kë textokuna yachatsimantsik?
[Yachakunapaq kaqpa tapukïninkuna]
[29 kaq päginachö dibüjukuna]
Jehoväqa imëpis llapan hanampa Gobernaqmi kashqa
[31 kaq päginachö dibüju]
Jehoväpa gobiernompa lädonman churakarmi, alli pasakïchö kawakuntsik