Kuyakoq kanqanrëkurmi Jehovällapana kantsik

“Diosllapaqna[m] quecantsic.” (ROM. 14:8.)

1, 2. a) ¿Imataq noqantsikpaq alläpa kushikïpaq? b) ¿Ima tapukïkunapitataq yachakushun?

“LLAPAN markakunapitapis, noqallapanam kuyanqä marka kayanki” nirmi israelïtakunata Jehová awnirqan (Éxo. 19:5). ¡Imanö kushikïpaqraq tsëqa këkurqan! Hina tsënöllam kanan witsampis, Diospa markanchö karnin pëllapaqna kanqantsik alläpa kushikïpaq (1 Ped. 2:9; Apo. 7:9, 14, 15). Tsënöpam chaskishun mana imëpis ushakaq bendicionkunata.

² Pero Diosllapaqna kawarqa llapan nimanqantsiktam ruranantsik. Itsa tsëqa kënö nir wakin tapukuyanman: “¿Puëdëmantsuraq rurëta Jehová llapan nimanqanta? ¿Haqiramanqatsuraq hutsaman ishkiriptï? ¿Jehovällapaqna karninqa libre kënïta oqrarishaqtsuraq?”. Kënö tapukïkunapa respuestanta musyanantsikqa alläpa precïsom. Tsënö kaptimpis, Jehovällapaqna karnin ima bendicionkunata chaskinantsikpaq kaqtaram puntataqa musyanantsik.

 Jehovällapaqna këqa alläpa kushikïpaqmi

3. ¿Ima bendicionkunatataq Rahab chaskirqan Jehoväta sirvenqampita?

³ ¿Rasumpatsuraq Jehovällapaqna karqa kushishqa kashun? ¡Awmi! Yarpärishun Rahab warmipa kawëninta, pëqa Jericó markachö cuerpon rantikoq warmim karqan, hinamampis pëpa markanchöqa tukï dioskunata adorayanqanchömi ollquwan warmiwampis lluta kakuyaq. Tsënö karpis, pëqa cuentata qokurqanmi Jehová yanapaptin israelïtakuna guërrakunata ganayanqanta y Jehovälla rasumpa Dios kanqanta. Tsënöpam Diospa sirveqninkunata chikeqninkunapita pakëkurqan, tsëta musyëkur marka mayinkuna wanutsiyänan këkaptimpis. Bibliam pëpaq kënö nin: “Tsenomi Rahab jutiyoq cuerpun ranticoq warmipis marcanman cacha ewaq ishcaq israel nunacunata wayinman posadacaratsir, chiquiyaqnin nunacunapita safatsirnin, juc ladu nänipa despachecorqan. Tseno ruranqanrecurmi, tse warmita Dios Yaya ricarqan allitano” (Sant. 2:25). Israelïtakunataqa Dios yachatsirqan kuyanakur y alli kaqta rurar kawakuyänampaqmi, tsënö markawan takukanqampitam Rahabqa atska bendicionkunata chaskirqan. ¡Imanöraq kushikurqan mana alli kawëninta haqirirnin! Hinamampis huk israelïtawanmi casakurqan y pëkunapita yureqmi karqan Boaz shutiyoq Diosta sirveq reqishqa nunapis (Jos. 6:25; Rut 2:4-12; Mat. 1:5, 6).

4. ¿Imatataq Rut chaskirqan Jehoväta servir qallanqampita?

⁴ Hina tsënöllam pasarqan Moab markapita Rut shutiyoq warmiwampis, pëpis Jehovätam adorar qallëkurqan. Shipash karqa itsa adorarqan Kemós nishqan diosta y Moab nacionchö wakin dioskunatapis. Pero tsëpitaqa rasumpa kaq Diostam reqirirqan, y nacioninman shamushqa israelïtawanmi casakurqan (lei Rut 1:1-6). Tsëpitanam Rut y Orpá nishqampa qowankuna wanuriyarqan, y suegran Noemí Belen markapa kutikuptinnam ishkan lumtsïninkuna yanaqäyarqan. Nänita ëwëkarmi Noemí lumtsïninkunata kutikuyänampaq nirqan, Israelchö sasa kawëpa pasayänanta musyar. Tsënö niptinmi Orpaqa kutikurqan “markanta y diosninkuna kaqta”. Pero Rutqa Jehoväman markäkur o yärakurmi rikätsikurqan pita servita munanqantapis. Tsëmi kënö nirqan Noemïta: “Ama haqirinaqta munar tsënö nimëtsu, qamwanmi ëwakushun. Mëtam ëwanki tsëtam ëwashaq, y täranqëkichömi täräshaq. Markëkipis markämi kanqa y Diosnikipis Diosnïmi kanqa” (Rut 1:15, 16). Tsëta ruranqampitam viudakunata, waktsakunata, chakrannaqkunata imanö yanapayänampaq Jehová Leyninchö qellqatsinqannö rikashqa karqan. Jehoväta servirmi alli y shumaq kawakïta tarirqan.

5. ¿Imatataq rikarquntsik Jehoväta shonqupita patsë sirveqkunachö?

 ⁵ Itsa reqintsik atska watapana Jehoväta sirveq cristiänokunata. ¿Imanirtaq tapupärintsiktsu Diosta servir qallayanqampita ima bendicionkunata chaskiyanqantapis? Tukï pasayanqankunata atskaq cristiänokuna willakuyanqanmi, rikätsikun salmista ninqan rasumpa kanqanta: “¡Nunakuna kushikuyanmi, Jehová Diosninkuna kaptinqa!” (Sal. 144:15).

Jehoväqa mañamantsik rurëta puëdenqantsikllatam

6. ¿Mana rurëta puëdenqantsiktatsuraq Jehoväqa mañamantsik?

⁶ Jehová llapan mañamanqanta puëdeshaqtsuraq rurëta nir itsa tapukushwan. Höraqa Diosta servi, llapan nimanqantsikta rurë, y pëpita yachatsikoq ëwëman yarpë itsa mantsaratsimashwan. Tsëmi pasarqan Moisesta Egiptochö faraonwan y israelïtakunawan parlanampaq Jehová kachaptin, manachi puëdeshaqtsu nir mantsapakurqan. Pero Jehoväqa, rurëta puëdenqanllatam mañarqan. Tsëmi, “noqam yachatsi[shqëki] imata ruranë[kipaqpis]” nirnin, yanapanampaq awnirqan (lei Éxodo 3:11 y 4:1, 10, 13-15). Jehová yanapaptinmi, Moisesqa kushishqa rurarqan llapan mandanqanta. Kanampis Jehoväqa llakipäkoqmi, y musyanmi imata rurëta puëdenqantsiktapis. Hina hutsayoq kanqantsiktapis musyanmi y yanapamënintsiktam munan (Sal. 103:14). Jesuspa qateqnin kar Diosta serviqa manam lasaq qepita apëkaq cuentatsu, antis alläpa kushikïpaqmi, tsëta rurarmi shonqunta kushitsintsik y nuna mayintsikta kuyanapaqpis yanapamantsik. Rikantsikmi Tsurin kënö ninqan rasumpa kanqanta: “Noqaman shayämï [...] noqam jamaratsiyashqequi. Imeca yugucho noqalla arsuta apaq cuentam qamcunawan purishun. Noqam qollmi shonqu car y umildi car, llapan nacaquiniquicunapita jamaratsiyashqequi” (Mat. 11:28, 29).

7. ¿Imanirtaq yärakuntsik Jehová nimanqantsikta ruranapaq kikin yanapamänaman?

⁷ Diosman witirninqa, sinchi këta y kallpatam tarishun. Tsënömi pasarqan Jeremiasta, pëqa parlëta manam alläpa yachaqtsu. Profeta kanampaq Dios akrariptinmi kënö nirqan: “¡Ay, Llapan Puëdeq Señor Jehová! Manam alli parlëta yachätsu, wambrallaran kallä”. Tsëpita unëtapis kënömi nirqan: “Mananam shutinchö parlashaqnatsu” (Jer. 1:6; 20:9). Tsënö karnimpis, chusku chunka watapam willakurqan nunakuna chikiyanqan willakïta. ¿Imataq yanaparqan tsëta ruranampaq? Jehová kallpata qonqanmi. Atska kutim, “noqam qamwan këkä salvanaqpaq y libranaqpaq” nir awnirqan (Jer. 1:8, 19; 15:20).

8. ¿Imanötaq rikätsikushun Jehoväman markäkunqantsikta?

⁸ Kanampis Jehoväqa Moisestanö y Jeremïastanömi llapan nimanqantsikkunata ruranapaq yanapamantsik. Tsëmi Bibliachö kënö ninqanta wiyakunantsik: “Llapan shonqïkiwan Jehoväman markäkï [yärakuy], y kikikipa yachënikillamanqa ama markäkïtsu. Llapan kawënikichö pë munanqanta rurë, tsëqa llapan rurënikitam altsaramunqa” (Pro. 3:5, 6). ¿Imanötaq Diosman markäkunqantsikta rikätsikuntsik? Palabran Bibliawan y congregacioninwan willamanqantsikta wiyakurninmi. Llapan kawënintsikchö pushamänata haqishqaqa, manam ni imapis tsapämäshuntsu pëllapaqna kanantsikta.

Jehoväqa llapan sirveqninkunatam rikan

9, 10. ¿Jehová imanö tsapämänapaqtaq nin Salmos 91 textochö?

⁹ Wakinkunaqa Jehovällatana serviyänampaq churakëta mantsayanmi, hutsaman ishkïkuptïqa Jehová mananachi chaskimanqanatsu nirnin. Pero tsëqa manam pasanantsu, Jehoväqa tukïtam ruran sirveqninkuna pëta mana haqiyänanrëkur. Tsëta Salmo 91 texto imanö rikätsikunqantapis yachakurishun.

 ¹⁰ “Llapan hanampa këkaq Diospa pakashqa sitionchö pipis täraqqa, Llapan Kallpayoqpa tsapäkïninchömi posadakunqa. Kënömi nishaq Jehoväta: ‘Qammi kanki tsapämaqnï, mana pï chänanchö katsimaqnï, y imëpis markäkunqa Diosnï’. Pëmi pishqu tsareqpa trampampita salvashunki.” (Sal. 91:1-3.) Kë textochö rikanqantsiknöpis, kuyaqninkunata y pëman markäkoqkunata o yärakoqkunata tsapänampaqmi Diosqa awnikun (lei Salmos 91:9, 14). Tsëqa, ¿imëka qeshyapita o desgraciakunapita sirveqninkunata tsapanmantsuraq? Unë tiempochöqa wakin sirveqninkunata imëkapitapis tsaparqanmi, hina tsënöllam tsaparqan Mesias shamunampaq kaq kastatapis. Tsënö karpis, wakin sirveqninkunata carcelman wichqatsiyänanta, maqayänanta, y Satanaspa yanapaqninkuna wanutsiyänantapis haqirqanmi (Heb. 11:34-39). Pero, Jehoväqa yanaparqanmi alli tsarakuyänampaq y llutanta mana rurayänampaq. Tsëmi Salmos 91 capïtuloqa rikätsimantsik alli tsarakunapaq Dios yanapamänata.

11. ¿Imataq ‘llapan hanampa këkaq Diospa pakashqa sition’, y pikunatataq tsëchö tsapan?

¹¹ Tsëqa, ¿imataq ‘llapan hanampa këkaq Diospa pakashqa sition’? Pëman posadakoq cuenta ëwaq sirveqninkunata seguro sitiochö katsinqanmi, tsëchömi tsapan markäkïninta y Diosllapaq këninta imapis mana ushakätsinampaq (Sal. 15:1, 2; 121:5). ¿Imanirtaq “pakashqa” nin? Diosman mana creikoqkuna tsë sitiota mana tariyaptinmi; tsëmanqa, “qammi kanki [...] Diosnï, qamllamanmi imëpis markäkamushaq” neqkunallatam Jehová chaskin. Diospa pakarëkaq sitionchö imëpis karninqa, manam alläpa yarparäshuntsu “pishqu tsareqpa” o Satanaspa trampanman ishkirishqa Jehová haqiramänata.

12. ¿Imaraq Jehová Diosnintsikpita raslla rakiramashwan?

¹² ¿Imaraq Jehoväpita raslla rakiramashwan? ‘Paqaschö pureq qeshya’ y ‘pullan hunaq illaqpita suwakoq ushakëmi’ (Sal. 91:5, 6). Tsëmi ‘pishqu tsareq’ cuenta Satanasqa pï mëta ishkitsin kikinkunapa munëninkunallata rurakuyänampaq, y mana pita wiyakur kawakuyänampaq (2 Cor. 11:3). Hinamampis atskaqtam nuna mayimpa imantapis munëman, allishtukoq këman y imëkayoq këta munëman ishkitsin. Hinamampis atskaq nunakunatam pantatsin nacionnimpita kaqkunallata kuyayänampaq, nuna mönopita shamunqanta creiyänampaq, y mana alli religionkunachö kayänampaq (Col. 2:8). Hina warmipis ollqupis mana casakushqa këkar lluta pununakur y rakchakunata rurar kakïmanmi atskaq nunakunata ishkitsin. Kë mana alli rurëkunaman Satanás ishkitsiptinmi nunakuna Diosta kuyayannatsu (lei Salmos 91:7-10; Mat. 24:12).

 ¿Imaraq yanapamashwan Diosnintsikta imëpis kuyanapaq?

13. ¿Imanötaq Jehová tsapämantsik Satanaspa trampampita?

¹³ ¿Imanötaq Jehová yanapamantsik tsë mana alli rurëkunapita? Salmista ninqannöpis: “Angelninkunatam ninqa më tsëpa ëwaptikipis tsapäshunëkipaq” (Sal. 91:11). Tsëqa rasunmi, angelkunaqa pushamantsik y tsapämantsik Diospita yachatsikunantsikpaqmi (Apo. 14:6). Hinamampis Diosqa tsapämantsik congregacionkunata dirigeqkunawanmi, pëkunaqa Bibliallapitam yachatsikuyan, tsënöpam yanapamantsik mana alli yachatsikïkunata mana wiyakunapaq. Y huk cristiano mana allikunata haqinanrëkur sinchikuptimpis yanapayanmi (Titu 1:9; 1 Ped. 5:2). Hina Jehoväqa yanapamantsik “mäcoq, mäcoq, cumplidu sirweqnin[wan]” yachatsimarnintsikmi, tsëmi tsapämantsik rakcha kawakïpita, imëkayoq këta ashïpita, reqishqa këta munëpita, tukï mana alli rurëkunapita y imëkapis kikinllam kamakäkurqan nir tukïnöpa yachatsikïkunapitapis (Mat. 24:45). Kënö tapukuri: “¿Imataq yanapamashqa kë trampakunaman mana ishkinäpaq?”.

14. ¿Imata rurashqataq Diosnintsik tsapämäshun?

¹⁴ ¿Imataraq rurashwan “llapan hanampa këkaq Diospa pakashqa sitionchö” imëpis kanapaq? Imanömi cuidakuntsik imëka desgraciakunapita, suwakoqkunapita o qeshyakunapitapis, tsënömi cuidakunantsik Satanaspa trampankunapitapis. Tsëpaqqa publicacionkunachö, reunionkunachö y asambleakunachö Jehová yachatsimanqantsiktam imëpis wiyakunantsik. Hina congregacionta dirigeqkunapa consëjontam ashishwan y cristiano mayintsikkunapa alli rurëninkunapitam yachakushwan. ¡Diospa markan yachatsimantsik imatapis yachëwan ruranantsikpaqmi! (Pro. 13:20; lei 1 Pedru 4:10.)

15. ¿Imanötaq musyantsik Jehová imapitapis tsapämänata?

¹⁵ Jehoväpaqa kanmi podernin imëkapitapis tsapämänapaq y tsënöpa pëpita mana rakikänapaq (Rom. 8:38, 39). Pensarishun mana alli religionkunapa pushaqninkuna y gobiernokuna Diospa markanta ushakätsita munar tukïta rurayanqanman. Casi llapanchöpis wanutsimënintsikta munartsu manam tsëtaqa rurayaq, antis Diosnintsikta haqinata munarmi. Pero Jehoväqa tsapämantsikmi, kënö awnikunqanta cumplirnin: “Imëka armapis contrëki churakaqqa manam imanäshunkitsu” (Isaías 54:17).

¿Pitaq rasumpa libre këta awnimantsik?

16. ¿Imanirtaq mundopa mana alli rurëninkunaqa libre kawakïman apakuntsu?

¹⁶ ¿Mananatsuraq libre kashun Jehovällapaqna karqa? Manam tsënötsu. Antis Jehoväpita rakikashqa mundopa munëninta rurarqa, mana llakipäkoq Satanaspa esclävon tikrarirchi libre kënintsikta oqrarishwan (Juan 14:30). ¿Imakunatataq Satanás ruran nunakuna munëninchö kayänampaq? Tukïtam ruran, hukqa, imëka cösaskunata munapätsimanqantsikmi (igualaratsi Apocalipsis 13:16, 17). Hinamampis hutsamanmi ishkitsimënintsikta tïran (Juan 8:34; Heb. 3:13). Tsëmi kë mundo libre kawakïta awnikunqanqa manam rasumpatsu. Y Jehoväpa yachatsikïnimpa contran karmi, hutsapa esclävon këman y melanëpaq rurëkunaman chätsikun (Rom. 1:24-32).

17. ¿Imapita libramänapaqtaq awnimantsik Jehová?

 ¹⁷ Pero Jehovällapaqna kawashqaqa, pëmi tsapämäshun imëka mana alli rurëkunapita. Imanömi huk alli doctor tukïläya qeshyatapis kachakäratsin, tsënöllam Jehoväpis qeshya cuenta hutsata ushakäratsinqa. Tukï mana allikunata hutsa apamunqampita librakänapaq y imëyaqpis kawakunapaqqa, Jesucristupa wanïninmanmi markäkunantsik, tsëtaqa rurantsik Jehovällapaqna kawakurmi (Juan 3:36). Imanömi huk doctorta alli reqir pëman más markäkuntsik, tsënöllam Jehoväpita más yachakurqa pëman más markäkushun. Tsëmi Bibliataqa yachakunantsik Diosta alli reqir más kuyanapaq, tsëqa mananam mantsakushuntsu pëllapaqna kawakïta (1 Juan 4:18).

18. ¿Imatataq chaskiyanqa Jehovällapaqna kawaqkunaqa?

¹⁸ Jehoväqa kikintsik akranatam munan. Tsëmi Palabranchö llapantsikta kënö nimantsik: “Kawëtam akranëki, qampis y kastëkipis mana wanuyänëkipaq, Diosniki Jehoväta kuyarnin” (Deu. 30:19, 20). Pëqa munan kikintsik akrar servinata y kuyanqantsikta rikätsinatam. Tsëmi, Jehovällapaqna kawarqa libre kënintsikta oqrantsiktsu, tsëpa rantinqa kushishqam imëyaqpis kawakushun.

19. ¿Imanirtaq kikintsikllapita Jehoväpa këta puëdentsiktsu?

¹⁹ Hutsayoq karninmi kikintsikllapitaqa Jehoväpa këta puëdentsiktsu. Pëllapaqna kawanapaqqa, kikinmi yanapamantsik kuyakoq karnin (2 Tim. 1:9). Apóstol Pablum kënö nir qellqarqan: “Porqui cawarpis cawantsic Diospaqmi, y wanurpis wanucuntsic Diosllapaqmi. Tsemi cawarninpis y wanucurpis Diosllapaqna quecantsic” (Rom. 14:8). Diosta pëllapaqna kawakunapaq awninqantsikpitaqa manam ni imëpis pësakushuntsu.

¿Imanöraq contestankiman?

• ¿Imanirtaq Jehovällapaqna kawakï alläpa alli?

• ¿Imanirtaq Dios llapan nimanqantsikta rurëta puëdentsik?

• ¿Imanötaq Jehová tsapan sirveqninkunata?

[Yachakunapaq kaqpa tapukïninkuna]

[15 kaq päginachö dibüjukuna]

Wakin cristiänokunata tapuri, Jehoväpana kayanqampita patsë ima bendicionkunata chaskiyanqanta.

[17 kaq päginachö dibüju]

¿Imanötaq Jehová tsapämantsik Satanaspa trampankunapita?