Rasumpa cristiano kanqantsikta rikätsikushun

“Alli caq monteqa alli frutallatam wayun; peru mana alli caq monteqa mana alli frutatam wayun.” (MAT. 7:17.)

1, 2. ¿Imanötaq Jesuspa qateqninkunata reqishwan kë witsanchö?

JESUS ninqannömi rasumpa cristiänokunaqa alli wayoq montenöpis, yachatsikuyanqampita y rurayanqampita reqishqa kayan (Mat. 7:15-17, 20). Rasumpëpaqa, pensanqantsikpita o shonquntsikchö kanqampitam imantapis rurantsik (Mat. 15:18, 19). Mana allita yachakoqkunaqa “mana alli frutatam wayu[ya]n”, y rasumpa kaqta yachakoqkunaqa “alli frutallatam wayu[ya]n”.

² Kë witsanchöqa, imëpitapis masmi këta rikantsik (lei Daniel 12:3, 10). Cristiänotukoqkunaqa Kamakoq Yayapita mana allitam yachatsikuyan y Diosta ardëlla adoraqtukuyan. Pero Diosta reqeqkunaqa ‘adorayan espirituchow i rasonkaqchow’ (Juan 4:24, QKW; 2 Tim. 3:1-5). Noqantsikqa,  ¿imanötaq adoranantsik? Kë tëmachömi, yachakushun rasumpa cristiänokunata imanö reqinapaqpis pitsqa yachatsikïkunata. Yachakunqantsikmannö tapukushun: “¿Dios munanqannöku portakü y Biblia ninqannöku yachatsikü? ¿Alliku kawakü wakinkunapis Diospita yachakïta munayänampaq?”

Biblia ninqannö kawashun

3. ¿Imataq Jehoväta kushitsin, y imatataq cristiänokuna rurayänan?

³ Jesusmi nirqan: “Manam llapan: Señor, Señor, nimaqtsu, yeykonqa syelukunapa reynunman, sinowqa syelukunachow Teytäpa muneynin ruraqmi” (Mat. 7:21, QKW). Awmi, Jehoväqa kushikun manam Cristupa qateqninmi kä ninqantsikllapitatsu, sinöqa rurënintsikkunawan rikätsikunqantsikpitam. Rasumpa cristiänoqa qellë ashichö, uryachö o aruychö, pukllachö, tushuchö, casakïchö, amigo ashichö y fiestata rurayaptimpis Diospa Palabran ninqannömi rurëta munan, tsëmi imata ruranampaqpis alliraq tïran. Pero cristiänotukoqkunaqa, kë mundochö nunakunanömi pensayan y rurayampis (Sal. 92:7).

4, 5. Malaquías 3:18 texto ninqan, ¿imanötaq yanapamashwan?

⁴ Këpaq parlarmi Malaquías qellqarqan: “Yapëmi rikäyanki huk alli ruraq nuna y mana alli ruraq nuna hukläya kanqanta, y Diosta sirveq y mana sirveq nuna hukläya kanqantapis” (Mal. 3:18). Kë texto ninqanman pensëkur kënö tapukushun: “¿Diosta mana reqeq nunakunanöku kä, o hukläya kanäpaqku kallpachakü? ¿Trabajayanqä o estudiayanqä yanaqëkuna kuyayämänantaku munä? ¿O Diosnintsik ninqantaku cumplïta tïrä, y precisanqan höraku Bibliapita alleq parlari?” (lei 1 Pedru 3:16). Yachatsikurpis manam santotukushwantsu, pero Jehoväta mana adoraqkunapita y mana kuyaqkunapitaqa hukläya kanqantsiktam rikätsikunantsik.

⁵ Portakïnikicho más alliyänëkipaq kaqta mäkurerqa, Jehoväta mañakï y sinchi kanëkipaq reunionkunaman ëwë, Diosman mañakï y Bibliapita más yachakï. Y Biblia ninqannö kawarqa, ‘jutimpita willakurmi’ ‘wayïnikita’ rikätsikunki (Heb. 13:15, QKW).

Diospa Gobiernompita yachatsikushun

6, 7. ¿Imachötaq hukläya kayan alli cristiänokuna y mana alli cristiänokuna?

⁶ Jesusmi nirqan: “Jinantin marcacunachomi alli willaquita yachatsicunä presisan. Que patsamanmi Dios cachamashqa, pepa mandaquinincho nunacuna imano cayänanpaq canqanta willacunäpaq” (Luc. 4:43). ¿Imanirtaq yachatsikïninchö Diospa Mandakïnimpita parlarqan? Tsë Mandakïchö pë Rey kananta musyar, y ciëlota ëwaqkunapa yanapakïninwan Satanasta y hutsata ushakätsinampaq kaqta musyarmi (Rom. 5:12; Apo. 20:10). Tsëmi, qateqninkunata mandarqan ushakë chämunqanyaq Gobiernompita yachatsikuyänampaq (Mat. 24:14). Mana alli religionkunaqa manam yachatsikoq ëwayantsu, ni yachatsikïtapis yachayantsu.  ¿Imanir? Huk kaqqa, imapita parlayänampaq kaqta mana musyar. Ishkë kaqqa, yachaqtukoq kar, y yachatsikuyaptin mana chaskiyänanta y penqapäyänanta mantsakur (Mat. 24:9; 1 Ped. 2:23). Kima kaqnam, Jehová mana bendeciptin (Juan 14:16, 17).

⁷ Pero Jesuspa qateqninkunaqa musyayanmi Diospa Gobiernon ima kanqanta y imata ruranantapis. Tsëmi kawëninkunachö puntaman churayan y santo espíritu yanapaptin hinantin Patsapa yachatsikur puriyan (Zac. 4:6). Y noqantsikqa, ¿imëpis yachatsikïkantsikku? ¿Más alli yachatsikïta tïrëkantsikku? Bibliaqa kënömi nin: “Diospa palabranqa cawatsicoq palabra carmi, allapa poderyoq”. Tsëmi Pabluqa imëpis Diospa Palabrampita yachatsikoq, ¿noqantsikpis tsënöku rurëkantsik? (Heb. 4:12; Hech. 17:2, 3.)

8, 9. a) ¿Ima pasakonqantaq rikätsimantsik Bibliawan yachatsikunantsik alläpa precisanqanta? b) ¿Imatataq rurashwan Bibliapita más alli yachatsikunapaq?

⁸ Wayin wayin yachatsikïkarmi, huk Testigo leiraporqan Daniel 2:44 textota huk católico nunapaq, y tsëpitanam Diospa Gobiernon alli y shumaq kawakïta apamunampaq kaqta yacharatsirqan. Tsënam nunaqa nirqan: “Shimillapa mana yachatsimar kikin Bibliapita leipamanqantam alläpa agradecikü”. Huk testïgonam warminwan yachatsikunqanchö, Iglesia Ortodoxa Griega religionyoq warmita Bibliapita leirapurqan. Kë warmiqa tapukurqan atskatam, y pëkunapis Bibliawanmi contestayarqan tapukïninta. Tsëpitanam warmiqa nirqan: “¿Imanir wiyakunqätapis musyayankiku? Bibliata apayämuptiki, y kikimpita leiyämuptikim”.

⁹ Publicacionnitsikkunawan yachatsikunantsik alläpa precisaptimpis, kikin Bibliapitam yachatsikuntsik. ¿Bibliawanku imëpis yachatsikunki? Tsënö mana rurarqa, ¿imanirtaq Bibliawan yachatsikunëkipaq churapakankitsu? Itsa Diospa Gobiernompita y hipakïta imanö altsamunampaq kaq textokunata akrarir wayin wayin ëwanqëkichö leirapunkiman.

Diospa shutimpita kushishqa yachatsikushun

10, 11. ¿Imanötaq Jesusqa rikaq Diospa shutinta, y imanötaq cristiänotukoqkuna rikäyan?

¹⁰ “Qamkunam testïgökuna kayanki —ninmi Jehová—, y noqam Dios kä.” (Isa. 43:12.) ¿Pitaq más precisaq kaq Jehoväpa testïgon? Jesucristum. Pëpaqqa, Teytampa shutinta yachatsikur purïnöqa manam imapis kaqtsu (lei Éxodo 3:15, Juan 17:6 y Hebreus 2:12). Tsëmi Bibliachö “Jesukristupita fyel testigu” nin (Apo. 1:5, QKW; Mat. 6:9).

¹¹ Pero cristiänotukur Jesusta y Jehovätam serviyä neqkunaqa, manam shutinta respetayantsu, hina Bibliankunapitapis shutinta hipiyashqam. Hinamampis, qepallataraqmi católico obispokunata kënö niyashqa: “[Adoranqantsikchöqa] manam imanöpapis parlanantsiktsu YHWH tetragrammaton * nishqanchö qellqarëkaq Diospa shutinta”. * ¡Kënö rurayanqampitaqa manachi Diosnintsik upälla kakunqatsu!

12. ¿Imatataq 1931 watachö cristiänokuna rurayashqa Diospa shutimpa reqishqa kayänampaq?

¹² Unë tiempochö “atsca nunacuna [“testïgokuna”, NM]” y Jesus ruranqanta qatirmi, kanan cristiänokunaqa Diospa shutinta kushi kushi yachatsikuyan (Heb. 12:1). Tsëmi, 1931 watapita patsë “Jehoväpa testïgonkuna” nishpa shutinkuna churayarqan (lei Isaías 43:10-12). Tsënöpam Diosnintsik chaskirqan, “quiquinpa servignin criyicugnincuna cayänanpag” (Hech. 15:14, 17, NTCN).

13. Diospa shutimpa reqishqa këkarqa, ¿imatataq rurashwan?

 ¹³ Shutinta apëkarqa, ¿imanötaq kawashwan? Puntataqa, shutimpitam yachatsikushwan. Tsëmi Pablu qellqarqan: “‘Diosman [“Jehoväman”, NM] clamacoq caqcunaqa salbacuyanqam’ nir. Peru ¿imanopataq ‘Salbecallamë’ niyanqa peman manaraq creyiquicar! ¿Imanopataq creyicuyanqa pepaq manaraq wiyar! ¿Y imataraq wiyayanqa pipis mana willapäcuptin! Y willapäcoqcunata pipis mana cachayaptin ¿imanoparaq ewayanqa willapäcoq!” (Rom. 10:13-15). Kuyakoq Diosnintsikpaqmi, nunakunatam infiernochö kayan nir yachatsikuyan, tsënöpam Diablunö chikikoq kanqanta rikätsikïkäyan, tsëmi noqantsikqa mana mantsakushpa Diosnintsik alli kanqanta willakushwan (Jer. 7:31; 1 Juan 4:8; hina rikäri Marcos 9:17-27).

14. ¿Imanötaq wakinkuna tikrariyarqan Diospa shutinta musyarir?

¹⁴ ¿Alläpaku kushikunki Diospa shutimpa reqishqa kanqëkita, y yachatsikunkiku? París markachömi huk warmi musyarirqan Testïgokuna Diospa shutinta musyayanqanta. Tsëmi pëkunawan toparirlla Bibliachö rikëkatsiyänampaq mañakorqan. Y Salmo 83:18 textota rikäratsiyaptinnam pasëpa kushikurqan, y estudio biblicota chaskinampaqpis awnikurirqan, y cristiänaman tikrarirmi kananqa huk nacionchöna Diosta servikan. Tsënöllam Australia markapita warmipis Bibliachö Diospa shutinta leirir kushikïta waqarirqan. Rasumpa kaqta reqirirmi, kananqa precursora regularnö Diosta servikan. Hina tsëllaraqmi, Jamaica markapita Testïgokuna huk warmita Diospa shutin Jehová kanqanta Biblianchö rikäratsiyarqan, tsëmi kë warmipis kushikïta waqarirqan. Tsë shumaq shutita yachatsikïnöqa manam imapis kantsu, tsëmi më tsëpa ëwarnin Jesusnö yachatsikunantsik.

Ama kë mundota kuyayëtsu

15, 16. a) ¿Imanötaq cristiänokuna kë mundota rikantsik? b) ¿Imatataq llapantsik tapukunantsik?

¹⁵ Bibliam nimantsik: “Ama que munducho imapis mana alli caqcunata cuyayëtsu. Sitsun pipis que munducho caqcunallata cuyanqa, manam Dios Yayataqa cuyantsu” (1 Juan 2:15). Kë mundowan munëninqa Jehoväpa y santo espïritumpa contranmi churakäyashqa. Tsëmi rasumpa cristiänokunaqa mundota kuyayantsu, tsëpa rantinqa melanäyan, y musyayanmi Santiagu kënö nenqanta: “Pipis que munducho quecaqcunallata cuyarnenqa, Dios Yayapa chiqueqninmi ticrarin” (Sant. 4:4).

¹⁶ Kanan witsan imëka mana allikuna rurinchö kawashqam, alläpa sasa o aja Santiagu nenqanta wiyakï (2 Tim. 4:10). Tsëmi Jesus qateqninkunarëkur mañakorqan: “Manam nunacunapita raquicacuriyänanpaqtsu mañacoq, sinoqa llutan rurecunapita wardecunequipaq. Noqaqa manam que patsa nunacunanotsu cä. Y pecunapis manam que patsa nunacunanotsu cayan” (Juan 17:15, 16). Këta tapukushun: “¿Kë mana alli mundopita rakikëtaku tïrä? ¿Reqinakonqäkuna musyayanku fiestakunata, ídolo servïta, o mana alli rurëta imanö rikanqäta?” (2 Cor. 6:17; 1 Ped. 4:3, 4).

17. ¿Imataq yanapanqa alli shonquyoq nunakuna Jehoväta ashiyänampaq?

¹⁷ Wakinkuna mana rurayanqanta mana rurashqam, imanir mana ruranqantsikta musyarita munayan. Bibliaman markäkunqantsikta y yachakunqantsiknö kawanqantsiktam  nunakuna rikäyan, tsëmi pëkunapis ciëlopaq kaqkuna yachatsikuyanqanta wiyakuyan. Y kë textochö ninqannömi niyan: “Qamkunawanmi ëwayäshaq, qamkunawan Dios këkanqanta wiyashqa karnin” (Zac. 8:23).

Rasumpa kuyakushun

18. ¿Imanötaq Jehoväta y nuna mayintsikta kuyanantsik?

¹⁸ Jesusmi nirqan: “Teyta Diosniquita cuyanqui llapan shonqiquiwan, llapan boluntaniquiwan y llapan yacheniquiwan”. Tsëpitanam nirqan: “Nuna mayiquita cuyanqui quiquiquitano” (Mat. 22:37, 39). Kë kuyakïqa (griëgochö agápe ninmi) imanöpis portakunapaqmi yachatsimantsik, Dios munanqannö kuyakunapaq y wanayanqanchö yanapakunapaq y imëpis allita ruranapaqmi. Pero manam hanan shonqulla kuyakïtsu. Antis llapan shonquwan kuyakïmi (1 Ped. 1:22). Kuyakïnintsiktaqa rikätsikuntsik parlakïnintsikwan y rurënintsikwanmi, hina imatapis rurantsik manam kutitsimänata shuyarartsu (lei 1 Corintios 13:4-7).

19, 20. Testïgokuna rurayanqan, ¿imanötaq wakinkunata yanapashqa?

¹⁹ Kuyakï santo espïritupa wayïnin kaptinmi, wakin nunakuna mana rurayanqanta rurantsik, huk kasta, huk costumbreyoq huk nacionpita nunakunata kuyar (lei Juan 13:34, 35; Gal. 5:22). Alli shonquyoq nunakunaqa, tsëta rikarmi Diospa serviqninkuna kayanqanta musyayan. Huk kutim Israel nacionpita huk judío nuna espantakurqan judïokunawan ärabekuna Jehoväta adorëkäyaqta rikar. Tsëmi pëpis Bibliapita yachakur qallëkurqan y reunionkunamampis ëwar qallëkurqan. ¿Tsënöku cristiano mayintsikkunata kuyantsik? Yachakunantsik Wayiman huk markapita, tukï rikoq, rico o waktsa nunakuna chämuptin, ¿alkäbuku këkantsik chaskirinapaq?

²⁰ Rasumpa cristiänokunaqa llapan nunakunatam shumaq rikantsik. Salvador markachömi 87 watayoq católica warmi, Bibliapita yachakïkarqan, pero manam iglesianta haqita churapakaqtsu. Huk kutinam qeshyarirqan, tsënam hospitalchö unë karqan. Hospitalpita yarqaramuptinnam, Testïgokuna huk killanö wayinman watukayarqan y mikïnin apapuyarqan. Pero iglesiampitaqa manam ni pï watukarirqantsu, tsëmi ïdolonkunata ushakäratsir religionnimpita yarqukurirqan y Bibliapita yachakur yapë qallëkurqan. Dios munanqannö kuyakïqa, ¡alläpa allim! Parlanqantsikpitapis masmi shonqunkunaman chärin.

21. ¿Imataraq rurashwan shuyaranqantsikman alli markäkunapaq?

²¹ Ichikllanam pishin cristiänotukoqkunata  Jesus kënö ninampaq: “¡Qamcunataqa manam reqiyaqtsu! ¡Llapequi mana alli ruraqcuna, nopapita witicuyë!” (Mat. 7:23). Noqantsikqa manam tsënö këta munantsiktsu, antis Jehoväta y Jesustam allichö horqëta munantsik. Cristu nenqantam yarpantsik: “Pipis que yachatsiconqäta wiyacur, cäsucoqcunaqa, imeca precabidu nuna wayinta shäritsinanpaq qaqa janancho simientuta patsätseqnomi cayan” (Mat. 7:24). Kawënintsikwan rasumpa cristiano kanqantsikta rikätsikushqaqa, Diospa kuyakïninchömi kashun y shamoq tiempopaq shuyäkïnintsikpis qaqa hananchö rurashqa wayinömi kanqa.

[Päginapa ura kuchunchö willakïkuna]

¿Yarpankiku?

• ¿Imachötaq hukläya kayan rasumpa kaq cristiänokuna mana alli kaq cristiänokunapita?

• Rasumpa cristiänokuna imanö kayanqantapis willakarami

• ¿Ima rurëkunachötaq más alliyëta munantsik?

[Yachakunapaq kaqpa tapukïninkuna]

[20 kaq päginachö dibüju]

¿Imëpis Bibliawanku yachatsikuntsik?

[23 kaq päginachö dibüju]

¿Dios chikenqan fiestakunata imanir mana celebranqäta wakinkuna musyayanku?