Tsë ‘shamoq tiempoqa’ këllachönam

KICHË

Tsë ‘shamoq tiempoqa’ këllachönam

JESUSPA qateqninkunapis, Habacucnöllam imëka mana allikuna ushakärinanta munayarqan. Tsëmi, nunakunapaq Diospa Gobiernon imata ruramunanta Jesus yachatsikuptin discïpulonkuna kënö tapuyarqan: “¿Imetaq tsecuna pasaconqa? ¿Ima señata ricarnintaq musyariyäshaq cutimunequipaq [ciëlochö Gobernar qallëkuptin] y juisiu junaqpaq?” (Mateo 24:3). Gobiernon kë Patsachö imë qallamunampaq kaqtaqa Jehovällam musyan nirmi Jesus contestarqan (Mateo 24:36; Marcos 13:32). Pero tsënö karpis, Jesus y wakin Bibliata qellqaqkunaqa unëpitanam willakuyarqan tsë ‘shamoq tiempo’ chämunampaq ichikllata pishikaptin, imakuna puntata pasanantapis. Kë derecha kaq lado recuadrochömi rikärinki tsëkunata alli musyarinëkipaq.

¿Manaku kanan witsan tsëkuna pasëkanqanta rikëkantsik? Hinamampis ‘shamoq tiempo’ chämunampaq ichikllana pishikaptin hinantin Patsachö Bibliapita yachatsikuyänampaq kaqtam, Jesusqa kënö willakurqan: “llapan nunacunata[m] alli willaquinïta willayänequi presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” (Mateo 24:14).

Tsaq tsëtam Jehoväpa testïgonkuna kanan witsankunachö rurëkäyan. Qanchis Millonpitapis más Testïgokunam, 236 nacionkunachö Diospa Gobiernon ruramunampaq kaqta nunakunata willëkäyan y Palabran Biblia ninqannö rurayänampaqmi yachëkätsiyan. Qampis Diospa Gobiernompita más yachakurnenqa, kushishqa imëyaqpis kawakunkimanmi manana hipakïkuna kaq Patsachö.

[8 kaq päginachö recuadru]

Kë textokunam rikätsikun ‘shamoq tiempo’ këllachöna kanqanta

MATEO 24:6, 7; APOCALIPSIS 6:4

• Imëpis mana kanqannö guërrakuna

MATEO 24:7; MARCOS 13:8

• Mantsakëpaq temblorwan Patsa kuyïkuna

• Mallaqëkuna

LUCAS 21:11; APOCALIPSIS 6:8

• Tukïläya qeshyakuna

MATEO 24:12

• Mana allita ruraqkunam mirayanqa

• Nuna mayinkunata mana kuyaqkuna