Alli manejashun “espiritupa espadanta”

“Tsariyey [...] espiritupa espadanta, keymi Dyospa palabran.” (EFE. 6:17, QKW.)

1, 2. ¿Imatataq rurashwan Diospita yachatsikoqkuna más kanampaq?

DIOSPITA yachakïta munaq nunakunata rikarmi Jesus nirqan qateqninkunata: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq”. Pero manam tsënöllatsu nirirqan, sinöqa ‘chunca ishcaq (12) disipuluncunata qayarirninmi’ llapan Israelpa “cacharqan” yachatsikuyanampaq (Mat. 9:35-38; 10:1, 5). Y tsëpitanam, ‘ganchis chunca runacunata acrasquir, ishcay ishcay mandargan’ yachatsikuyänampaq (Luc. 10:1, 2, NTCN).

² Kanampis Diospita yachatsikoqkunataqa mastam wanantsik. Pasaq 2009 watachömi Jesuspa wanïnin yarpëman ëllukäyarqan o gorikäyargan 18.168.323 nunakuna, këqa rikätsimantsik llapan Patsachö Jehoväpa Testigonkunapitapis chunka millón más kashqantam. Tsëwanmi rikantsik, chakrakunachö mikïkunaqa chosechëllapaqna kanqanta (Juan 4:34, 35). Tsëmi Diosnintsikman mañakunantsik yanapakoqkunata masta kachamunampaq. Y shonqupita patsë mañakurqa, masmi sinchikushun alli yachatsikoq kanapaq y nunakunatapis shumaqmi yanapashun Diospa sirveqnin tikrayänampaq (Mat. 28:19, 20; Mar. 13:10).

3. ¿Imanötaq yanapamantsik santo espíritu Diospa Palabranta yachatsikushqa?

³ Punta kaq artïculochö rikanqantsiknöpis, santo espïritum yanapamantsik ‘mana mantsacushpana Diospa willaquininta willacunapaq’ (Hech. 4:31). Hina yanapamantsikmi alli yachatsikoq kanapaqpis. ¿Imatataq rurashwan alli yachatsikoq kanapaq? Jehová qomanqantsik Palabran Bibliatam alli manejanantsik (2 Tim. 3:16). Bibliata qellqayänampaq santo espíritu yanapakushqa kaptinmi, Bibliapita yachatsikushqapis santo espíritu yanapamantsik. Pero imanöpis alli yachatsikoq kanapaq manaraq parlarnin, puntata rikärishun Diospa Palabran alläpa poderyoq kanqanta.

“Diospa palabranqa [...] allapa poderyoq[mi]”

4. ¿Imatataq rurëta puëden Diospa Palabran?

⁴ Diospa Palabranqa alläpa poderyoqmi (Heb. 4:12). Nuna ruranqan espädakunapitapis más afilashqam. Alläpa filo karmi yëkurin hasta urusyaq o toqshoyaq. Bibliapa yachatsikïninkunaqa nunapa entero cuerponyaqmi chärin, yarpëninman, imanö këkanqanman y imata munanqantapis musyaratsinmi. Y kawënintapis alliman tikraratsita puëdenmi (lei Colosenses 3:10). ¡Imanö poderyoqmi Diospa Palabranqa!

5. ¿Imakunachötaq Biblia yanapamantsik?

⁵ Hinamampis, Bibliaqa yanapamantsik kë mana alli mundochö kawanapaqmi, tsënö yachatsikïkunataqa manam mëchöpis tarita puëdeshwantsu. Imëka lamparin cuentam purinqantsik nänita aktsimun, kanan witsan y shamoq tiempochöpis alli kawanapaq yanapamarnintsik (Sal. 119:105). Rasumpëpam, cada hunaq kawënintsikchö yanapamantsik, mana allikunata pasasqa, alli amïgokunata akranapaq, kushikunapaq imatapis ruranapaq, trabäjopaq, röpata rantir  shumaq akranapaq y vestikunapaqpis (Sal. 37:25; Pro. 13:20; Juan 15:14; 1 Tim. 2:9). Y wakinkunawan alli pasakïchö kawakunapaqpis yanapamantsikmi (Mat. 7:12; Fili. 2:3, 4). Hina Diospa Palabraqa karuman aktseq cuentam yanapamantsik, ruranqantsikkunawan y decidenqantsikkunawan kushishqa kanata o mana kanatapis musyatsimarnintsik (1 Tim. 6:9). Y shamoq tiempochö Diosnintsik ruramunantapis willamantsikmi, tsëmi yanapamantsik Diosnintsik munanqannö kawanapaq (Mat. 6:33; 1 Juan 2:17, 18). Awmi, kawakïqa alläpa shumaqmi, Diosnintsikpa Palabran ninqanta rurashqaqa.

6. ¿Imanötaq Biblia yanapamantsik Diabluta vencinapaq?

⁶ Biblia ninqantaqa apóstol Pablu qayan ‘espiritupa espadan’ nishpam, tsëmi alläpa poderoso Satanasta vencinapaq (lei Efesios 6:12, 17, QKW). Tsëwanmi Diablupa makinchö këkaq nunakunata salvëta puëdentsik. Kë espädanöqa manam imapis kantsu, wanutsinampa rantinmi nunakunata salvan. Tsënö këkaptinqa ¿manatsuraq alli manejëta yachakushwan?

Imëkanöpapis alli manejëta tïrashun

7. ¿Imanirtaq ‘espiritupa espadanta” alli manejëta yachakushwan?

⁷ Soldädokuna guërrachö ganayänampaqqa allim armankunata manejayänan, tsëpaqqa mana haqishpam yachakuyänan. Tsënöllam rurayänan “espiritupa espadanta” manejaq kaqkunapis. Apóstol Pablu ninqantam ruranantsik: “Imecanopapis tirë Diosnintsic munashqanno yachatsiquita. Tseno yachatsicorqa manam pepa nopancho penqacunquitsu; tsemi pepis alli uryaqtano chasquishunqui” (2 Tim. 2:15).

8, 9. ¿Imataq yanapamäshun huk texto ninqanta alli musyanapaq? Willakarami huk ejemplowan.

⁸ ¿Imataq yanapamäshun Diospa Palabranta alli yachatsikunapaq? Tsëpaqqa yanapamäshun kikintsikraq alli yachakunqantsikmi. Tsëmi kikintsiklla yachakurninqa yachakunantsik tsë textopa qepan kaq y puntan kaq versïculokuna ninqankunatapis.

⁹ Rikanqantsiknömi, huk texto ninqanta alli musyanapaqqa leinantsik tsë textopa qepan kaq y puntan kaq versïculokunataraq. Hukllëllata yachakurishun, Galatas 5:13 textom kënö nin: “Wauqicuna, panicuna, librina cayänequipaqmi, Dios qayayäshorqonqui. Peru cuidädu ‘Librinam quecä’ nir, etsequicunapa munenincunata ruraquicayanquiman. Antis yarpacachäyë jucniqui jucniquicuna cuyanacurnin yanapanacuyänequipaq”. ¿Imapitataq librena kayarqan kë cristiänokuna? ¿Hutsapitawan wanïpitaku? ¿Mana alli religionpitaku? Kima y chusku capïtulopa versïculonkunam rikätsimantsik, Cristu wanunqanrëkur “leypa  maldisyonninpita” librakashqa kayanqampaq Pablu parlëkanqanta (Gal. 3:13, 19-24; 4:1-5, QKW). Tsënö libre kayanqampita kushikoqkunaqa wakinkunatam serviyänan karqan, “jaqchinacur pelyar micunacur” kayänampaq rantin (Gal. 5:15).

10. ¿Ima mastataq wanantsik huk versículo ninqanta alli musyanapaq, y mëchötaq tarishwan?

¹⁰ Hinamampis huk texto ima ninqantapis alli musyanapaqqa, manam qepancho y puntanchö kaqkunallatatsu yachakunantsik, sinöqa tsë hora “imakuna pasakunqanta, o imanöpa” niyanqantapis musyanantsikmi (Diccionario Estudio Salamanca-Octaedro). Tsëmi huk texto ninqanta alli musyanapaqqa këkunata rikänantsik: imë y pï qellqanqanta, imanir y imakuna pasakikaptin qellqakanqantapis. Hinamampis allim yanapamashwan, tsë tiempochö costumbrenkunata, imanö portakuyanqankunata y religionninkunata musyanqantsikpis. *

11. ¿Imanötaq Bibliapita yachatsikushwan?

¹¹ Diospa Palabranta alli manejarqa manam Biblia ninqanllatatsu willarinantsik, sinöqa yachëpa y respëtowanmi yachatsinantsik. Bibliawan defendikurnimpis, manam nunakunata qayapänapaqtsu ni mantsakätsinantsikpaqtsu inshishwan o manejashwan (Deu. 6:16; 8:3; 10:20; Mat. 4:4, 7, 10). Tsëpa rantinqa apóstol Pedru ninqantam wiyakuntsik: “Mas bien llapan shonqiquicunawan Teyta Jesucristuta respetayë. Y peman imarecur creyicuyanqequita pipis tapuyäshuptiqui, shumaq cäyitsiyänequipaq listu quecayë” (1 Ped. 3:15).

12, 13. ¿‘Ima puedeqcunatataq’ ushakätsishwan Diospa Palabranwan? Willakarami pasakunqanta.

¹² ¿Imachötaq yanapamantsik Diospa Palabranta yachëwan manejanqantsik? (Lei 2 Corintios 10:4, 5.) Yanapamantsik “ima puedeqcunatapis” ushakätsinampaqmi, kë ninanqa uli religionkunapa yachatsikïninkuna mana alli kanqanta claro rikätsikunapaq, mana alli rurëkunata y nunapa mana alli yachatsikïninkunata rikätsikunapaqpis. Bibliallam yanapamantsik ‘Teyta Diosman creyicuyänanta pantatseq’ yachatsikïninkunata ushakätsinantsikpaq. Tsëmi Bibliawanqa nunakunata yanapëta puëdentsik, rasumpa kaq yachatsikï alli kanqanta rikäyänampaq.

¹³ Rikärishun India nacionchö 93 watayoq warmi pasanqanta. Pëtaqa huk nacionchö këkaq wambranmi cartallapa Bibliapita yachatsir qallëkurqan, Jehoväpita y ruramunampaq kaqpita yachakurirmi alläpa kushikurqan. Pero wambra kënimpitam pasëpa creeq, huk nuna wanuriptin alman yarqurir huk nunachö o huk animalchö  yurinqanta. Tsëmi, wanushqakuna imanöpis këkayanqampaq Biblia parlanqanta wambran qellqaramuptin creirqantsu y piñakurqan, kënö nir: “Tsë sagrado textïkikuna yachatsikunqanqa manam peqäman yëkuntsu. Llapan religionkunam niyan cuerpontsikcho ima karpis mana wanoq kanqanta. Y imëpis creirqö, cuerpo wanuriptinqa, tsë cuerpontsikchö mana rikanqantsik [almaqa] 8.400.000 kuti rakikärinqantam. ¿Imanir-raq këqa rasumpatsu kanman? ¿Wakin religionkunapis pantakashqa kayanqantaku nimëta munëkanki?”. Kë warmiqa alläpam creeq tsë creenciaman. ¿Espïritupa espädan yanapanmantsuraq karqan tsë creencianta haqinampaq? Atska semana pasariptin y Bibliata más leinqanchömi cuenta qokur qallëkurqan, tsëmi kënö nir wambranman qellqarqan: “Wanï imanö kanqantapis tsëram käyir [entiender] qallëkä. Manam musyankitsu, wanushqa familiantsikkuna kawamunan hunaq chäramuptin, rikëkunantsikman yarpar pasëpa kushikunqäta. Diospa Gobiernon chäramunantanam munä”.

Diospa Palabranwan imanöpapis käyitsita tïrashun

14. ¿Imanötaq ‘willapar imanöpapis’ käyitsishwan?

¹⁴ Bibliapita alli yachatsikoq këta munarqa, manam textollatatsu leirapunantsik. Sinöqa apóstol Pablunömi “willapar imanopapis cäyitsita” tïranantsik (lei Hechos 19:8, 9 y 28:23). ¿Imanötaq “willapar imanopapis cäyitsita” tïrashwan? Shonqunmanmi chätsinantsik yachëkätsinqantsikta, tsënöpam yanapashun nikanqantsik rasumpa kanqanman markäkunampaq o yärakunampag. ¿Tsënö yachatsikoq kanëkipaq imatataq rurankiman?

15. ¿Imatataq rurashwan Bibliata respetayänampaq?

¹⁵ Biblia ninqanta respetanampaq yanapë. Huk versïculota manaraq leirnin, willari parlëkayanqëki Jehoväpaq alläpa preciso kanqanta. Tsëpita huk tapukïta rurarï y respëtowan ninqanta wiyari, y parlar ushariptinna, kënö ni: “Mä rikärishun imatash nin Diosnintsik parlëkanqantsikpita”. Tsënö nirir Bibliata leirapunqantsikmi, yanapanqa Diospa palabran kanqanta rikänampaq, y ninqantapis respetanampaq. Kënö nïqa alläpa precïsom, Bibliapita mana alläpa yachaq creente nunawan parlëkashqanäqa (Sal. 19:7-10).

16. ¿Bibliata leipärirqa imatataq ruranantsik?

¹⁶ Ama leipärillatsu, sinöqa yachatsi o käyitsi. Apóstol Pablu ruranqannö rurë, pëqa manam leipareqllatsu, sinöqa allim käyitseq ima ninan kanqantapis (Hech. 17:3). Huk textoqa atska tëmapaqmi parlan, tsëmi parlëkanqantsik tëmata yanapaq palabrakunata alli käyitsinantsik. Tsëtaqa rurashwan texto ninqanta yapë parlarmi o manaqa tapurishwanmi contestamunampaq. Tsëpitanam, imanö yanapamanqantsiktapis shumaq willarishwan.

17. ¿Imatataq rurankiman Bibliapita yachatsinqëkikunata más respetayänampaq?

¹⁷ Llapan yachatsikïnintsik Bibliallapita katsun. Pabluqa nunakunawan parlarqa ‘Diospa palabran’ willakunqanllatam parlaq, tsëmi shonqunkunaman pasëpa chäreq (Hech. 17:2, 4). Qampis nunakunapa shonqunkunaman Diospa Palabrata chätsitam tïranëki. Shumaq tapukïkunata rurarqa shonqunchö imata yarpëkanqantapis musyarinkim (Pro. 20:5). Alläpa sasakunata o ajakunata parlanëkipa rantinqa, sencïllollata, wakinkuna parlakunqankunallata y  Diospa Palabranchö kaqkunata parlë. Ishkë o kima versïculota leirapur haqirinqantsikpitaqa, más alliqa huk versïculollatapis leirir yacharatsïmi. Y yachëkätsinqantsikta más entiendetsinapaqqa, huk yachatsikïkunatapis inshïta puëdentsikmi (Pro. 16:23). Tsëmi, höraqa tsë temapaq parlaqkunata ashinantsik huk librokunachö o revistakunachö. Qepa pärrafochö parlanqantsik warmiqa musyëtam munarqan, imanöpa mëtsika nunakuna mana wanoq almaman creiyanqanta. Y Bibliamanqa creir qallëkurqan, tsë mana alli creenciakuna imanöpis qallanqanta y religionkuna imanöpapis creiyanqanta musyarirmi. *

Yachëwan imëpis manejashun

18, 19. ¿Imanirtaq alli yachëwan espïritupa espädanta manejashwan?

¹⁸ Biblia ninqannöpis “key mundoqa mana kaqnowllam pasarin” y mana alli rurëkunaqa pasëpam mirëkun (1 Cor. 7:31, QKW; 2 Tim. 3:13). Tsëmi kananqa imëpitapis más preciso “ulicur acusacuyanqanta” ‘espiritupa espadanwan’ o Diospa Palabranwan ushakätsinantsik.

¹⁹ Alläpam kushikuntsik Bibliata katsirnin y tsëwan nunakunapa shonqunkunaman char mana alli creenciakunata haqiyänampaq yanapar. Manam ni ima yachatsikïpis Diospa Palabranwanqa igualantsu. Tsëmi Diosnintsikpa Gobiernompita yachatsikurnin tukïnöpa espïritupa espädanta manejashun.

[Päginapa ura kuchunchö willakïkuna]

¿Imatataq yachakurqontsik?

• ¿Diospa Palabran poderösoku?

• ¿Imataq yanapamantsik Diospa Palabranta alli manejanapaq?

• ¿Imanötaq ‘ima puedeqcunatapis’ ushakätsin Diospa Palabran?

• ¿Imanötaq más alli yachatsikoq kashwan?

[Yachakunapaq kaqpa tapukïninkuna]

[18 kaq päginachö dibüju y recuadru]

¿Imanötaq Diospa Palabranwan yachatsikushwan?

▪ Bibliata respetanampaq yanapë

▪ Leipunqëkikunata shumaq käyitsi o yachatsi

▪ Shonqunman chänampaq, parlëkayanqëki temapaq parlaq huk librokuna ninqantapis niri

[17 kaq päginachö dibüju]

‘Espiritupa espadantam’ alli manejëta yachakunantsik