¡Allim ëwakayämurqonki alli kaq näniman!

“Cawarninpis y wanucurpis Diosllapaqna[m] quecantsic.” (ROM. 14:8)

1. ¿Imatataq más alli kaq nänipita Jesus yachatsikurqan?

KAWËCHÖQA atska nänikunam kan, pero hukllëllam alliqa y tsë alli kaqta akranatam Jehoväqa munan. Awmi, Biblia nenqanta wiyakïnö y Jesucristu ruranqampita yachakïnöqa manam imapis kantsu. Pëqa qateqninkunata yachatsirqan Teytata espïrituchö y rasumpa kaqchö adorayänampaq y wakin nunakunata yachatsiyänampaqmi (Mat. 28:19, 20; Juan 4:24). Yachatsimanqantsiknölla rurashqaqa Jehová alläpam kushikunqa y bendecimäshunmi.

2. a) ¿Punta siglochö Diospita yachatsikuyanqanta imanötaq nunakuna chaskiyarqan? b) ¿Imanirtaq punta cristiänokunataqa ‘näni’ nishpa reqiyaq?

² ‘Wiñe caweta munaq caqcunaqa’ Diospitam yachakuyan y bautizakuyan. Tsë höram shonqupita patsë pëkunata kënö nita puëdentsik, “¡allim ëwakayamurqonki kawëchö alli kaq näniman!” (Hech. 13:48). Punta siglochöqa më tsë nacionkunapita atska waranqa nunakunam rasun kaqta yachakurir cristiano këta munayarqan, y Diosta kuyayanqanta rikätsikurninmi bautizakuyarqan (Hech. 2:41). Y pëkunatam ‘näni’ nishpa reqiyarqan (Hech. 9:2; 19:23, NM). Y tsë shutipa reqiyanqanqa alläpa allim karqan, Diospita yachakushqana karmi pëkunaqa Jesucristuman markäkur y pë ruranqanta qatirna kawakuyänan karqan (1 Ped. 2:21).

3. a) ¿Imanirtaq bautizakushqantsik? b) ¿Kë qepa chunka watakunachö ëkaqta bautizakuyashqa?

³ Kë ushanan tiempokunachöqa, Jesuspa qateqnin kayänampaq yachatsikïqa mirashqa 235 nacionkunachö y markakunachömi. Kë qepa chunka watakunachömi, 2.700.000 nunakuna, Jehoväta serviyänampaq bautizakuyashqa; tsëqa semänachö 5.000 bautizakïkaqnömi kashqa. Tsëtaqa rurayashqa alläpa kuyarnin, servita munarnin, Biblia nenqanta musyarnin, y yachakuyanqanta rurëta munarninmi. Bautizakunqantsik hunaqqa alläpa kushikïpaq y mana qonqëpaq hunaqmi, y tsëpita witsëpam Jehoväwan amigo këta qallarintsik. Y tsë ruranqantsikqa rikätsikun unë tiempochö sirveqninkunata yanapanqannölla noqantsiktapis yanapamänaman markäkunqantsiktam o yärakungantsiktam (Isa. 30:21).

 ¿Imanirtaq bautizakushwan?

4, 5. Bautizakoqkuna bendicionkunata chaskiyanqampita wakinllatapis willakarami.

⁴ Y qampis itsa pï Dios kanqanta yachakushqana kanki, mana allikunata rurar kawankinatsu y manaraq bautizakushqa këkarpis Diospita yachatsikoq yarqïkankina. Tsëta rurëkaptikiqa, alläpam kushikuyä. ¿Jehoväman mañakurqonkinaku pëllatana servinëkipaq y munankiku bautizakïta? Bibliapita yachakur musyanqëkinöpis, kikikipa kushikïnikitatsu ashinëki, y manam kapoqyoq këtsu puntachö kanan, sinöqa Jehoväta alabëmi (lei Salmo 148:11-13 * y Lucas 12:15). Hina bautizakorqa atska bendicionkunatam chaskinki. Y, ¿mëqantaq tsëkuna kayan?

⁵ Bautizakurninqa kawënikichö más alli kaqtam rurëkanki y Dios munanqanta rurarqa alläpam kushikunki (Rom. 12:1, 2). Santo espïritum yanapashunki Diosman más markäkur o yärakur kawanëkipaq y pï mëwampis yamë kawanëkipaq (Gal. 5:22, 23). Biblia ninqannö rurëta tïraptikiqa mañakonqëkitam Dios wiyanqa, y bendecishunkim. Tsëqa más kushishqam Diospita yachatsikunki y shumaq kawëta shuyaranqëkipis masmi miranqa. Tsëpitapis masqa, Jehoväta servinëkipaq ninqëki y bautizakunqëkim rikätsikunqa, Jehoväpa testïgon këta munanqëkita (Isa. 43:10-12).

6. ¿Imatataq bautizakur rikätsikuntsik?

⁶ Yakuchö llapan cuerpontsikta tullpïpa Bautizakurmi rikätsikuntsik Jehoväta servinapaq ninqantsikta y pëllapaqna kanqantsikta. Apóstol Pablum kënö nirqan: “Manam pipis cawan quiquinpa muneninllapitatsu, ni wanurpis wanucun quiquinpa muneninpitatsu. Porqui cawarpis cawantsic Diospaqmi, y wanurpis wanucuntsic Diosllapaqmi. Tsemi cawarninpis y wanucurpis Diosllapaqna quecantsic” (Rom. 14:7, 8). Diosqa kamamashqantsik alli kaqta o mana alli kaqtapis kikintsik akrakunantsikpaqmi. Näninchö purinapaq churakarmi rikätsikuntsik kuyanqantsikta y tsënöpam kushitsintsik (Pro. 27:11). Bautizakurirqa pëllata servinapaq kaqllatatsu manam rikätsikuntsik, sinöqa pëlla Gobernamaqnintsik kanqantawanmi, y Jehoväpa autoridadnimpaq Satanás mana alli parlashqa këkaptimpis Diosman qaqanqantsiktam rikätsikuntsik (Hech. 5:29, 32). Y Jehovänam noqantsikta yanapamantsik (lei Salmo 118:6). Pero bautizakurninqa atska bendicionkunatam chaskishun kanan tiempochö y shamoq tiempochöpis.

Bautizakushqakunaqa bendiciontam chaskikäyan

7-9. a) ¿Imatataq Jesus awnirqan llapanninkunata haqirïkur qateqkunata? b) ¿Imanötaq kanan witsan cumplikan Marcos 10:29, 30 textokunachö Jesus awnikonqanta leinqantsik?

⁷ Huk kutim Pedru kënö taporqan Maestronta: “Teyta, noqalläcunaqa llapantam jaqiriyarqö, qamta qatiyänaqpaq. Tsepita ¿Imatataq chasquillayäshaq?”  (Mat. 19:27). Pë y Jesuspa wakin qateqninkuna shamoq tiempochö imata chaskiyänampaq kaqtam Pëdruqa musyëta munarqan. Y tsëpitapis masqa imëkankunatam haqishqa kayarqan Diospa Gobiernonllapitana yachatsikur puriyänampaq (Mat. 4:18-22). ¿Ima nirqantaq Jesus?

⁸ Marcos libro ninqannöpis atskaq cristiänokuna këkäyanqanchö pëkunapis kayänampaq kaqtam kënö rikätserqan: “Pipis wayinta, wauqincunata, panincunata, tëtanta, mamanta, wamrancunata y chacrancunatapis jaqirerqa, tse llapanta jaqirenqanpitam pachaq (100) cuti masta wayinta, wauqincunata, panincunata, tëtanta, mamanta, wamrancunata y chacrancunatapis que tiempucho chasquenqa y que patsacho nacar jiparninpis, wac bidachoqa [“shamoq tiempochö”, NM] wiñepanam cawanqa” (Mar. 10:29, 30). Jesucristu ninqannömi punta siglochöqa, Jesuspa atskaq discïpulonkunam shumaq kuyakurnin cristiano mayinkunata chaskiyarqan, Lidia, Aquila, Priscila y Gayupis tsëtam rurayarqan, paninkuna, teytankuna y mamankunam kayarqan cristiano mayinkunapaq kayarqan (Hech. 16:14, 15; 18:2-4; 3 Juan 1, 5-8).

⁹ Kanan tiempoqa imëpitapis masmi cumplikëkan Jesus awnikonqan. Atskaq cristiänokuna, hina misionërokuna, betelïtakuna, siervos internacionales nishqankunam ‘chacrancunata’ o imëkankunata haqiriyashqa, më tsë nacionkunachö Diospa markanchö yanapakuyänanrëkur. Wakinkunanam wayinkunata haqiyashqa y sencillollana kawakuyan. Jehová imanö cuidëkanqanta y pëta servirnin kushishqa kayanqantam wiyantsik (Hech. 20:35). Llapan bautizakushqa cristiänokuna y hinantin Patsachö cristiano mayintsikkunawan “Diospa mandaquinincho cawaquillatana, y pe munashqanno allicunata rurellatana” kushishqa ashita puëdeyan (Mat. 6:33).

“Diospa Pakashqa sitionchö” këqa huk bendicionmi

10, 11. ¿Imataq ‘Diospa pakashqa sition’ y imanötaq tsëman yëkushwan?

¹⁰ Pëllata servinapaq awninqantsik, y bautizakïqa huk bendiciontam apamun: y tsëqa alläpa kushikïpaq “Diospa pakashqa sitionchö” kawanqantsikmi (lei Salmo 91:1). Këqa imëka ratakuna o tsinkakuna sitio cuentam, tsapämantsik Diosnintsikwan kuyanakïnintsikta mana oqranapaq. Diosta mana reqeqkuna y pëman mana markäkoqkunaqa o yärakogkunaga manam tariyantsu, tsënöpam pakarëkaq cuenta. Jehovällata servinapaq awninqantsikta cumplirnin y pëllaman markäkurninqa kënö nikaq cuentam kashun: “qammi kanki machënï, seguro pakämaqnï, y Diosnï, qamllamanmi imëpis markäkamushaq” (Sal. 91:2). Tsënöpam Jehoväqa tsapämaqnintsik tikrarin (Sal. 91:9). ¿Imatanaraq más mañakushwan?

¹¹ Jehoväpa amïgon karmi ‘pakashqa sitionman’ yëkïta puëdentsik. Amigo këqa qallarin pëllatana servinapaq kawënintsikta entregarishqa y bautizakurishqam, y masqa sinchiyanqa Bibliata leishqa, imëpis pëman shonqupita patsë mañakushqa y ninqanta wiyakunapaq sinchikushqam (Sant. 4:8). Jesuspitam alli yachakïta puëdentsik, pënöqa manam pipis Jehoväpa lädonchö këkantsu. Pëqa imëpis shonqupita patsëmi Teytanman markäkun o yärakun (Juan 8:29). Awmi, Diosnintsikmanmi imëpis markäkunantsik o yärakunantsik, peqa puëdenmi y munanmi yanapamënintsikta pëllata servinapaq awninqantsikwan cumplinapaq (Ecl. 5:4). Pëllata servinapaq yanapamanqantsikmi rikätsikun kuyamanqantsikta, y pëllapaq kawanata munanqanta.

Diospa markan espiritual kaq paraïsochö këkanqanqa huk bendicionmi

12, 13. a) ¿Imataq espiritual kaq paraïsoqa? b) ¿Imanötaq tsëraq bautizakushqakunata yanapashwan?

¹² Pëllatana servinapaq awninqantsik y bautizakunqantsikmi yanapamantsik espiritual kaq paraïsochö kawanapaq. ¿Imataq tsë paraïsoqa? Tsëqa, Jehová Dioswan y cristiano mayintsikkunawan alli pasakïchö kawakunqantsikmi (Sal. 29:11; Isa. 54:13). Kë mundochöqa manam imapis igualantsu kënö kawakïwanqa. Këtaqa rikärintsik tukï nacionkunapita asambleapaq,  imëka idioma parlaq, tukïläya cristiänokuna ëllukäyanqanchö o gorikäyanqanchömi, y tsëchöqa llapanmi yamë kakuyan, huk kastanöllam kayan y kuyanakuyanmi.

¹³ ¡Kanan witsan Diosta mana reqeq nunakuna kawayanqampitaqa alläpa hukläyam! (Lei Isaías 65:13, 14.) Diospita yachatsirninmi espiritual kaq paraïsoman yëkayämunampaq invitanantsik nunakunata. Tsëraq bautizakushqakunatapis yanapanantsikmi, tsënöpa más alli yachatsikoq kayänampaq. Imanömi Apolusta, Aquilawan Priscila “Dyospa näninta mas alleqlla yachatsiyarqan”, tsënöllam noqantsikpis yanapanantsik anciänokuna cristiano mayintsikta yanapanapaq nimashqaqa (Hech. 18:24-26, QKW).

Jesuspita imëpis yachakïkäshun

14, 15. ¿Imakunataq yanapamantsik Jesuspita más yachakunapaq?

¹⁴ Bautizakurirninqa, siguinantsikmi Jesuspita yachakurnin. ¿Imanir? Patsaman shamunampaqqa atska waranqa waranqa watakunanam Teytanwan trabajarnin kashqa karqan (Pro. 8:22, 30). Pëqa musyarqanmi Diosta servi y rasumpa kaqta yachatsikï más alli kaq näni kanqanta (Juan 18:37). Hina tsë nänichö kar tukïnöpa hipar wanunanta musyarqanmi (Mat. 20:18, 19; Heb. 4:15). Hina alleqmi musyarqan kikimpa munëninta rurëqa mana alliman apananta. Tsëmi alli kaqllata rurar kawanqan rikätsimarqontsik noqantsikpis pënölla Jehoväta wiyakunapaq.

¹⁵ Jesus bautizakurishqanllachömi, Satanás ishkitsita munarqan Diospa nänita haqirinampaq, pero manam puëderqantsu (Mat. 4:1-11). Këmi yachatsimantsik Diablu imëkata rurar ishkitsimënintsikta munaptimpis alli tsarakunapaq kaqta. Peqa mana alliman ishkitsinampaqmi ashin bautizakuyänampaq listo këkaqkunata, o tsëraq bautizakurishqakunata (1 Ped. 5:8). ¿Imanötaq ishkitsita tïran? Pëqa chikitsimantsik, imanir yachatsikur purenqantsikta mana musyaq kastantsikwan. Tsënö kaptimpis kë pasakonqankunam yanapamantsik pëkunapa tapukïninkunata shumaq contestanapaq, respëtowan parlapänapaq, shumaq tratanapaq, y más alli cristiano tikranapaq (1 Ped. 3:15).  Tsënöpam wiyamaqnintsikkunaqa alli yachakuriyanqa y bendicionkunatam chaskiyanqa (1 Tim. 4:16).

Ama imëpis haqishuntsu alli kaq nänita

16, 17. a) ¿Kawëpaq ima kima yachatsikïtataq tarintsik Deuteronomio 30:19, 20 textokunachö? b) ¿Jesus, Juan y Pablu imanötaq rikätsikuyarqan tsë yachatsikïkunapaq?

¹⁶ Diospa Tsurin Patsaman shamunampaq 1500 watakunano pishikaptinmi, tsë tiempochö alli kaq nänita akrayänampaq israelïtakunata Moises atikarqan o anyarqan. Kënömi nirqan: “Ciëlotawan patsatam testigo churä [...] kawëtawan wanïta, y bendiciontawan maldiciontam puntëkiman churashqa kä; y kawëtam akranëki qam y kastëkikuna kawayänëkipaq, Jehová Diosnikita kuyarnin, nenqanta wiyakurnin, y pëta mana haqirnin” (Deu. 30:19, 20). Rasumpam tsë nacionqa Diosta wiyakurqantsu, pero tsënö kaptimpis tsë kiman mandamientokunata Moises ninqanqa manam cambiashqatsu. Hina Jesus y qateqninkunapis tsë mandamientopaq parlayarqanmi.

¹⁷ Punta kaqtaqa cumplintsik ‘Jehová Diosta kuyarninmi’ y tsëpaqqa ninqankunatam wiyakunantsik (Mat. 22:37). Y ishkë kaqtaqa cumplintsik ‘nenqanta wiyakurninmi’. Tsëtaqa rurantsik Bibliata estudiarnin y mandakonqanta wiyakurninmi (1 Juan 5:3). Tsëmi llapan reunionkunaman ëwanantsik alläpa precisan, tsëchömi Diospa Palabrampita yachatsikayämun (Heb. 10:23-25). Y imëpis ‘manam haqinantsiktsu’ o Jehoväpitam alli tsarapakunantsik. Tsëmi imëka kaptimpis pëman markäkushun y Tsurinta qatikäshun (2 Cor. 4:16-18).

18. a) ¿Ima nirqantaq 1914 watachö kë revista rasun kaqpaq? b) ¿Imanötaq sientekuntsik atsikyaqchö purikanqantsikpita?

¹⁸ ¡Imanö shumaqmi rasun kaqta yachakur kawëqa! 1914 watapaq ingleschö yarqamoq revistam kënö nirqan: “¿Manaku alläpa kushikoq y atska bendicionta chaskeq marka kantsik? Manam Diosnintsikqa imëpis haqimarqontsiktsu. Pipis kë nänipita huk más allita reqirqa, tsëpa ëwatsun. Mëqëkipis këpita más alli kaqta tarirqa willëkayämë. Diospa Palabrampita rasun kaqta yachakunqantsiktanöqa manam hukchöqa ni pullanllatapis alli yachatsikïta tarishqatsu kantsik. [...] Diospeq rasun kaqta yachakur kushikonqantsiktaqa manam parlëpa ni escribipa musyatsikïta puëdentsiktsu. Allita ruraq kanqan, kallpayoq kanqan, y kuyakoq kanqanmi paqwë kushiratsin peqantsikta y shonquntsiktapis. Kananqa tarirerqontsiknam. Diosnintsikpita más yachakïta munanqantsiknöqa manam ni imapis kanmantsu” (The Watch Tower del 15 de diciembre de 1914, páginas 377 y 378). Diosnintsikpa rasun kaq aktsimpita agradesikïkanqantsikqa manam ni imëpis wallkashqatsu. Antis kananqa alläpam kushikuntsik “Jehoväpa aktsimpa” ëwëkanqantsikta (Isa. 2:5; Sal. 43:3; Pro. 4:18).

19. ¿Imanirtaq bautizakuyanman Biblia ninqannö listo këkaqkunaqa?

¹⁹ “Jehoväpa aktsincho” purita itsa munanki, pero Jehoväta servinëkipaq itsa awninkiraqtsu ni bautizakunkiraqtsu, tsëqa ama atska tiempo pasananta shuyarënatsu. Bautismoman chänëkipaq Biblia imata ruranapaqpis ninqanta rurëta tïrë, tsënömi Jehová y Jesus llapan rurayämunqampita agradecikonqëkita rikätsikunki. Alläpa väleq kapushonqëki kawënikita Diospa makinmanna churëki. Pë munanqanta rurëta tïranqëkita y tsurin ruranqanta qatita munanqëkita rikätsi (2 Cor. 5:14, 15). Kë nänitanöqa manam mëchöpis tarinkitsu.

[Päginapa ura kuchunchö willakï]

¿Imataq ninkiman?

• ¿Imataq bautismoqa?

• ¿Ima bendicionkunatataq chaskiyan Diosta qamllapaqnam kawashaq nir bautizakoqkuna?

• ¿Imanirtaq Jesuspita yachakunantsik alläpa precisan?

• ¿Imataq yanapamäshun alli kaq nänita mana haqinapaq?

[Yachakunapaq kaqpa tapukïninkuna]

[29 kaq päginachö dibüju]

Bautizakurmi rikätsikuntsik alli kaq nänita akranqantsikta

[31 kaq päginachö fötukuna]

¿Ashirqonkinaku tsapäkïta “Diospa pakashqa sitionchö”?