Diospa palabrampita mana mantsakushpa willakushun

“Tsenam llapancuna Santu Espiritupa poderninwan quedariyarqan. Y mana mantsacushpanam Diospa willaquininta willacuyarqan.” (HECH. 4:31.)

1, 2. ¿Imanirtaq alli yachatsikoq kanapaq sinchikunantsik?

KIMA hunaq wanunampaq pishikaptinmi, Jesus qateqninkunata kënö nirqan: “Llapan nunacunata alli willaquinïta willayänequi[m] presisan; [...] y jinantin nasioncunacho tse alli willaquita musyariyaptinnam, que patsapa ushenin chäramonqa”. Kawarimunqampita semänakuna pasanqanllachömi, ciëlota manaraq kutikurnin qateqninkunata kënö mandarqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq [...]. Y qamcunata llapan yachatsiyashqaqcunata yachatsiyanqui”. Tsëpitanam qateqninkunata kënö awnirqan: “Noqaqa qamcunawanmi quecashaq imecamayaqpis, asta que patsapa usheninyaq” (Mat. 24:14; 26:1, 2, NM; 28:19, 20).

² Kanampis Jehoväpa testïgonkunaqa nunakunata salvaq willakïtam willakïkäyan, kë rurëqa qallarqan apostolkuna kawayanqan witsanchömi. Kë willakïnöqa manam imapis kantsu. Tsëmi alläpa preciso yachatsikiqa. Kë artïculochömi yachakushun mana mantsakushpa yachatsikunantsikpaq santo espíritu yanapamanqantsikta y qateqnin ishkan artïlokunachöman imëpis y alli yachatsikunapaq santo espíritu yanapamanqantsikta yachakushun.

Dios yanapamänatam wanantsik

3. ¿Imanirtaq yachatsikoq ëwarnin Dios yanapamänata wanantsik?

³ Diosnintsikqa Gobiernompita willakunapaqmi mandamarquntsik, kë rurënöqa manam imapis kantsu. Tsënö kaptimpis kë rurëqa sasaraqmi o ajarämi. Wakin nunakuna shumaq wiyakuyaptimpis, wakinkunaqa Noëpa tiemponchönömi kayan, pëkunapaqmi Jesus kënö nirqan: “[Willëkäyaptimpis] manam cuentata qocuriyarqantsu apäqui tamya janancunachona quecanqantaqa, y llapancunam tse tamyawan ushacäyarqan” (Mat. 24:38, 39). Wakinkunanäqa noqantsikpita burlakuyan y piñakuyanmi (2 Ped. 3:3). Itsa autoridadkuna, estudiaq o trabajaq mayintsikkuna, y kastantsikkunapis chikimashwan. Hina manam tsëllatsu, mantsakoq kënintsikta y mana wiyamänata penqakïnintsiktapis vencinantsikmi. ¿Imanötaq kallpata tarishwan, “mana ni imapita mantsacurnin” Diospita yachatsikunapaq? (Efe. 6:19, 20, NTCN).

4. a) ¿Imataq mana mantsakoq kë? b) ¿Pitaq Pabluta yanaparqan Tesalónica nunakunata mana mantsakushpa parlapänampaq?

⁴ ¿Imataq mana mantsakïqa? Griego idiömachöqa “markäkoq”, “churapakaq” y “mana mantsakoq” ninanmi, hinamampis “imatapis mana mantsakushpa llapanta parlaq”, “claro parlakoq” y “kaqllata parlaq” ninanmi. Pero mana mantsakushpa parlëqa, manam lluta parlakoq ninantsu (Col. 4:6). Mana mantsakushpam parlanantsik, pero manam pleitonantsiktsu (Rom. 12:18). Diospita yachatsikunqantsik höraqa mana mantsakushpam y yachëpam yachatsikunantsik, ardëpaqa manam pitapis piñatsita munantsiktsu.  Rikanqantsiknömi, mana mantsakurpis alli parlakïta tïranantsik aja o sasa këkaptimpis. Manam kikintsikllapitatsu, ni imanöpis kanqantsikpitatsu këqa. Yarpärishun apóstol Pabluwan wakin cristiänokuna Tesalónica nunakunata yachatseq ëwayanqanman. Pablum kënö nin: “Diosnintsicmi yanapayämashqa mana ichicllapis mantsacurishpa alli willaquininta willayänaqpaq”. ‘Filipos marcacho ashayäshqa y allqutsayashqa’ kayaptinmi yanapakïta wanayarqan. ¿Pitaq yanaparqan mana mantsakuyänampaq? “Diosnintsicmi yanapayämashqa” nirqanmi Pablu (lei 1 Tesalonicenses 2:2). Awmi, Jehoväqa shonquntsikpita mantsakïnintsikta ushakätsinmanmi, y mana mantsakoq kanapaqpis yanapamashwanmi.

5. ¿Imanötaq Jehová yanaparqan Pëdruta, Juanta y wakin cristiänokunata?

⁵ Huk kutim, “Jerusalencho judio nunacunapa mandacoqnincuna, autoridacuna y ley yachatsicoqcunapis” churakäriyarqan Pablupawan Juanpa contran. Tsënam ishkan apostolkuna kënö contestayarqan: “Mä, qamcuna yarpäcurcuyë. ¿Acasu Diospaq allicu canman, peta mana cäsushpa, qamcuna mandayämanqequita cäsuyapteq! Noqacuna manam upälläcuriyäshaqtsu, ricayanqäta y wiyayanqäta willacurnin”. Chikiyanqan ushakänampaq Diosman mañakuyänampa rantinmi, wakin cristiänokunawan kënö mañakuyarqan: “Canan wiyequi, tëtalläcuna, autoridacuna mantsacätsipa niyämanqanta. Y callpäcuna sirwishoqniquicunata qoycäyämë, willaquiniquita mana mantsacushpa willacur siguiyänäpaq” (Hech. 4:5, 19, 20, 29). ¿Imanötaq Jehová contestarqan mañakïninkunata? (Lei Hechos 4:31.) Mana mantsakuyänampaqmi santo espïritunwan yanaparqan. Noqantsiktapis qoykamënintsikta puëdenmi. Pero ¿imatataq rurashwan santo espirïtuta chaskinapaq, y yachatsikïchö yanapamänapaq?

¿Imatataq rurashwan mana mantsakushpa yachatsikunapaq?

6, 7. ¿Imatataq rurashwan Diospa santo espirïtunta raslla chaskirinapaq? Wakinkuna rurayanqanta willakarami.

⁶ Santo espïrituta chaskinapaqqa, Diostam mañakunantsik. Jesusmi wiyaqninkunata kënö nirqan: “Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa” (Luc. 11:13). Këqa yanapamantsik Jehoväta imëpis santo espirïtunta qoykamänapaq mañakunapaqmi. Cällekunachö, rantikuyanqanchö, nänikunachö o mëchö këkarpis Diospita yachatsikïta mantsakurninqa mañakunantsikmi (1 Tes. 5:17).

⁷ Tsëtam Rosa shutiyoq cristiana rurarqan. * Huk hunaqmi trabajanqan escuëlachö këkar huk profesörata leikaqta rikärerqan, kë profesöraqa leikarqan tukï mana allita wambrakunata rurayanqampita huk escuëlachö qellqayanqantam. Leirirnam profesora pasëpa piñakur kënö nirqan: “¡Imakunamanraq chäshumpis!”. Tsë höram Rösaqa Bibliapita yachatsir qallëkurqan. ¿Imanöpataq mana mantsakushpa parlaparqan? “Jehovätam mañakurqä santo espïritunwan yanapëkamänampaq”, ninmi. Y shumaqmi yacharatserqan y huk hunaq parlayänampaqmi willanakuyarqan. Hina këtaqa rikantsikmi, Nueva York markachö täraq pitsqa watayoq Milane nishqan wambra ruranqanchöpis. Kënömi willamantsik: “Manaraq escuëlata ëwarninmi mamänïwan Jehoväman mañakuyä”. ¿Imatataq Jehoväman mañakuyan? Milane alli tsarakunampaq y mana mantsakushpa Diospita parlanampaqmi. Mamäninmi kënö nimantsik: “Këta rurayanqäpitam Melaneqa mana mantsakushpa escuëlachö yachatsikushqa imarëkur  cumpleañokunata o ima fiestakunatapis mana celebranqanta.” Këkunam yachatsimantsik Diosnintsik yanapamänapaq mañakï alläpa preciso kanqanta.

8. ¿Imatataq rikätsimantsik Jeremiasta pasanqan?

⁸ Jeremias mana mantsakoq kanampaq yanapakïta chaskinqanmampis pensarishun. Profeta kanampaq Jehová akrariptinmi kënö nirqan: “Manam alli parlëta yachallätsu, wambrallaran kallä” (Jer. 1:4-6). Pero tsëpitaqa mana mantsakushpam, mana wiyakoq markakunata Jehová ushakätsinampaq kaqta willakur qallëkurqan, tsëmi wakin nunaqa rikäyarqan malagüero pishqutanö (Jer. 38:4). Hoqta chunka pitsqa (65) watapitapis masmi mana mantsakushpa willakurqan. Tsënö willakunqampitam reqishqa karqan, tsëmi hoqta pachak watakuna pasarishqancho Jesus yachatsikunqanta rikar, Jeremiasmi kawarimushqa niyarqan (Mat. 16:13, 14). ¿Imataq yanaparqan Jeremiasta mantsakoq këninta haqinampaq? Kikinmi kënö willamantsik: “Shonqüchömi [Diospa palabran] nina rupaqno karqan, tullükunachö këkaqnö, y manam tsarëta puëderqänatsu” (Jer. 20:9). Awmi, Diosnintsikpa palabran alläpa poderoso kanqanmi yanaparqan yachatsikunampaq.

9. ¿Imanötaq noqantsiktapis Jeremïastanö yanapamashwan Diospa Palabran?

⁹ Hebreukunaman qellqarmi Pablu kënö nirqan: “Diospa palabranqa cawatsicoq palabra carmi, allapa poderyoq. Y ishcan ladupa cösa afilashqa espadanoran yarpenintsicmanpis, shonquntsicmanpis charcun imano canqantsictapis musyatsimänantsicpaq” (Heb. 4:12). Noqantsiktapis Jeremïastanömi Diospa palabran yanapamantsik yachatsikunapaq. Yarpänantsikmi, Bibliachö qellqarëkaqqa manam nunapa yachënintsu. Nunakuna qellqashqa kayaptimpis, Diosmi santo espïritunwan imata qellqayänampaqpis yanaparqan. Këtam 2 Pedru 1:21 texto nimantsik: “Diosnintsicpa une profetancuna escribiyashqanqa manam quiquincunapa yarpeninllatsu carqan; sinoqa Diosnintsicpaq willacurmi, escribiyarqan Santu Espiritu cäyitsishqannolla”. Tsëmi Bibliata alli estudiarninqa, yarpënintsikchö katsishun Dios Palabranta (lei 1 Corintios 2:10). Y tsë yachakunqantsikqa “rupëkaq nina cuentam” tikrarin shonquntsikchö, tsëmi upälla këtaqa puëdentsiknatsu.

10, 11. a) ¿Bibliata imanö estudianqantsiktaq yanapamäshun mana mantsakushpa yachatsikunapaq? b) ¿Imatataq rurankiman wayikichö maslla estudianëkipaq?

¹⁰ Bibliapita yachakunqantsik yanapamänata munarninqa, shonquntsikyaq chänampaqmi sinchikunantsik. Ezequiel ruranqanman yarpärishun. Rumi shonqu markata pasanampaq kaq qellqarëkaq willakïta  mikukurkunampaqmi huk visionchö Jehová mandarqan. Ezequielqa kë willakïta llapan cuerponman chätseq cuentam, kawëninman churanan karqan. Tsënö ruraptinmi, willakoq ëwaptin mishkinö kanan karqan (lei Ezequiel 2:8–3:4, 7-9).

¹¹ Kanampis Ezequielpa tiemponchönömi kawëkantsik. Diospita wiyakïta mana munayaptinmi, yachatsikïqa fäciltsu. Tsëmi imëpis yachatsikoq yarqunapaqqa, Bibliata alli estudianantsik y yachakunqantsikman creinantsik. Y manam tiempo kanqan hörallatsu estudianantsik, sinöqa estudianapaq programa ruranqantsiktam mana pantëpa qatinantsik. Salmistanömi kënö ninantsik: “Llapan parlanqäkuna y shonqücho katsinqäkuna rikënikipaq kushikïpaq katsun, oh Jehová, Qammi kanki Qaqä cuenta y Salvamaqnï” (Sal. 19:14). Alläpa precison Bibliata leinqantsikman yarpakachänapaq tiempota rakinantsik, tsënöpam yachakunqantsikkuna shonquntsikman chanqa. Y wayintsikchö Bibliata estudianapaqpis sinchikunantsik. *

12. ¿Imanirtaq alläpa preciso reunionkunaman ëwanantsik santo espïritupa yanapakïninta chaskinapaq?

¹² Huknöpaqa Diospa santo espirïtunta chaskishwan kë consëjota wiyakurmi: “Jucnintsic jucnintsic yanapanacur cuyanacur alli rureta tïrashun. Diosta alabanantsic wayicho imepis ellucashun ama waquincunanoqa mana ewashpa quecashuntsu” (Heb. 10:24, 25). Diospa espïritunqa yanapamantsik congregacionwanmi, tsëmi pushamänata munarninqa, llapan reunionkunaman mana faltashpa ëwanantsik, tsënöpa llapan yachakunqantsikta kawënintsikchö ruranapaq (lei Apocalipsis 3:6).

Imachötaq yanapamantsik mana mantsakoq kanqantsik

13. ¿Imanöpataq mana mantsakushpa punta cristiänokuna yachatsikuyarqan?

¹³ Santo espïrituqa alläpa poderösom y Jehoväpa llapan sirveqninkunatam yanapan, mana mantsakushpa Pë munanqanta rurayänampaq. Tsënömi apostolkuna kawayanqan witsanchöpis, santo espïrituta chaskirir huk hatun trabäjota rurayarqan: Diospa Palabrantam “jinantin” Patsapa willakuyarqan (Col. 1:23, QKW). Y wakinqa, ollqupis, warmipis manam alläpa ‘educadutsu’ kayarqan’, tsëchömi rikantsik santo espíritu yanapaptin yachatsikuyanqanta (Hech. 4:13).

14. ¿Imatataq alli yachatsikoq kanapaq wanantsik?

¹⁴ Dios munashqannö kawashqaqa, santo  espíritu yanapamäshunmi mana mantsakushpa yachatsikunapaq. Tsënö kanampaqqa, estudianapaq, estudianqantsikman yarpakachänapaq, y reunionkunaman ëwanapaqmi Jehoväman mañakunantsik (Rom. 12:11). Këtam rikantsik “juk judyu Apolus jutiyoq [...] parley yachaq” nunachö. ¿Imataq alli parlëta yachanampaq yanaparqan? Bibliam kënö nimantsik: “Keymi Señorpa näninchow yachatsishqa karqan, espirituchow ferbyenti, parlarqan i yachatserqan Señorpaq” (Hech. 18:24, 25, QKW). Noqantsikpis ‘espirituchö rawreykarqa’, mana mantsakushpam wayin wayin y më tsëchöpis yachatsikushun (Rom. 12:11, QKW).

15. ¿Imakunachötaq yanapamäshun mana mantsakushpa yachatsikunqantsikqa?

¹⁵ Mana mantsakushpa yachatsikunqantsikqa yanapamäshunmi. Puntataqa, yachatsikï alläpa preciso kanqantam rikäshun. Hina más kushishqam yachatsikushun. Tsëpitanam ushanan tiempochöna kawëkanqantsikta musyar mana haqishpa yachatsikoq yarqushun.

16. ¿Imatataq rurashwan puntatanö yachatsikoq yarqïta manana munarqa?

¹⁶ Pero ¿imatataq rurashwan puntatanöna yachatsikoq yarqïta manana munarqa? Puntataqa kikintsikmi alli rikäkunantsik, apóstol Pablu ninqannö: “Quiquiquicuna pruebacugnö shumag tantiyacuyay, shongoyquicunachö rasumpacush o manacush firmi criyicuycäyanqui” (2 Cor. 13:5, NTCN). Kënö tapukushun: ¿Haqikäku Diospa santo espïritun yanapamänanta? ¿Mañaköku Dios santo espïritunwan yanapamänampaq? ¿Mañakunqächö rikätsiköku Dios yanapamänanman yärakungäta o markäkunqäta? ¿Diosta agradeciköku yachatsikunäpaq haqimanqampita? ¿Alliku estudiëka Bibliata y publicacionkunata? ¿Leenqäman y wiyanqäman yarparäku? ¿Reunionkunachö imëpis yanapaköku? Kë tapukïkunata rurakunqantsikmi, imachö más sinchikunapaqpis yanapamäshun.

Santo espíritu yanapamänantsikta haqishun

17, 18. a) ¿Diospita yachatsikï mirashqaku? b) ¿Imatataq rurashwan ‘mana mantsacushpa’ Diospita yachatsikunapaq?

¹⁷ Wanunqampita kawariramurninmi Jesus qateqninkunata kënö nirqan: “Qamcunaqa Santu Espirituta chasquirirmi, poderyoq ticrariyanqui. Tsenam noqa rurashqäcunata willacurnin, puriyanqui Jerusalencho, Judeacho, Samaria marcacunacho; y jinantin munduyaqmi chäratsiyanqui” (Hech. 1:8). Tsë witsanchö yachatsikï qallanqampitaqa kananqa alläpam mirëkushqa. Qanchis millón Testïgokunam ishkë pachak kima chunka (230) nacionkunapitapis maschö Diospita yachatsikïkäyan. Y cada watam Diospita yachatsikuyan casi mil quinientos millón hörakuna. ¡Imëka kushikïpaqmi Diospita yachatsikïchö yanapakïqa, manam tsënöqa yapë kanqanatsu!

¹⁸ Unënöllam kanampis Diospita hinantin markachö yachatsikuntsik Diospa santo espïritun yanapamashqa. Santo espíritu yanapamänantsikta haqirqa “mana mantsacushpam nunacunata yachats[ishun]” (Hech. 28:31). Tsëmi, yachatsikoq ëwarninqa santo espíritu pushamänantsikta haqinantsik.

[Päginapa ura kuchunchö willakï]

¿Imatataq yachakurqonki?

• ¿Imanirtaq yachatsikunapaq Dios yanapamänata wanantsik?

• ¿Pitaq yanaparqan punta cristiänokunata mana mantsakushpa yachatsikuyänampaq?

• ¿Imatataq rurashwan mana mantsapakushpa yachatsikunapaq?

• Mana mantsakushpa yachatsikuyanqan, ¿imachötaq cristiänokunata yanapam?

[Yachakunapaq kaqpa tapukïninkuna]

[13 kaq päginachö dibüju]

¿Imanötaq wambrantsikkunata yanapashun mana mantsakushpa yachatsikuyänampaq?

[14 kaq päginachö dibüjukuna]

Diosnintsikman mañakunqantsikmi yanapamäshun mana mantsakushpa yachatsikunapaq