Ciëloman ëwëtam shuyaräyan

CIËLOMAN ëwëta... ¿piraq shumaqtanötsu rikanman? Mëtsika nunakunam tsëta shuyaräyan; musulmankuna, hindükuna, budistakuna, Jesusman creeqkuna y hasta mana religionyoq kaqkunapis. Pero ¿imataq ciëloqa? Ñakay o hipakï mana kanqan shumaq sitio kanqanta y wanushqa kastankunawan nunakuna tsëchö tinkuyanqantam pï më pensayan. Imam sïqa, mëtsika nunakuna ciëloman ëwëta munarpis, wanïtaqa manam mëqampis munayantsu. ¿Imanir-raq munayantsu?

Wanurir ciëlopa ëwakunapaq kamashqa këkarqa, ¿manatsuraq tsëman ëwëta shuyarashwan imëka huk wambra hatunyëta munaqnö o huk novia casakunan hunaq chämunanta shuyaraqnö? Manam tsënötsu, antis llapantsikpis wanïtaqa manam munantsiktsu.

Tsënö kaptimpis, pï më religiösokunam niyan kë Patsachö huk tiempolla yacharir ciëlopa ëwakunapaq rurashqa kanqantsikta. Washington (Estados Unidos) markachö arzobispo Theodore Edgar Cardinal McCarrickmi kënö nirqan: “Ciëlochö yachanapaqmi kamakashqa kantsik, manam kë Patsachö yachanapaqtsu”. Hina Estados Unïdoschö, Asociación Nacional de Evangélicos nishqampa unë presidentenmi kënö nirqan: “Këchöqa këkantsik Diosta alabanapaq y nïkur ciëlopa ëwakunapaqmi. Tsëmi yachanantsik sitioqa”.

Tsënö karpis, ciëloman ëwakïta creiyanqanqa manam musyëtsu mëpita yarqamunqampis. Religiösokunata encuestaq compañïapa presidenten George Barnam kënö nin: “Kawëpaq y wak vïdapaq creenciakunaqa shamun tukïpitam; cïnekunapita, cancionkunapita o novëlakunapitam”. Florïdachönam (Estados Unidos), Iglesia Episcopal nishqan religionchö pastor kënö nin: “Dios yachanan sitio kanqanllatam ciëlopaqqa musyantsik”.

Rikanqantsiknöpis, ciëlopaq parlashqaqa mëtsika tapukïkunam yurin. ¿Imanötaq cielo? ¿Tsëchö kawanapaqtsuraq kamashqa kantsik? ¿Pikunataq ëwayan, y imatataq tsëchö rurayan? Bibliam tsë llapanta willakun, y tsëtam qateqninchö rikärishun.

[3 kaq päginachö ninqan]

¿Imanirtaq tsëtsika nuna ciëloman ëwëta munëkar, wanïtaqa wallkaqlla munayan?