“Jehoväqa shonqutam rikan”
Diosman witi
“Jehoväqa shonqutam rikan”
PÏ MËMI niyan wakin nunakunapaqa rikënin allinö kaptimpis shonqunqa mana alli kanqanta. Tsëqa rasunmi, rikëninllaqa manam nimantsiktsu huk nuna imanö kanqantapis. Nunakunaqa pitapis hanampa rikäyanqanllapitam imanö kanqantapis niyan, pero Jehová Diosqa nunakunapa shonquntam rikan. Tsëtam rikätsikun 1 Samuel 16:1-12 texto.
Kananqa, leirinqëkiman yarpäri. Israel nacionpaq huk mushoq reyta akranampaqmi Dios listo këkan. Tsëmi profeta Samuelta kënö nin: “Betlemita Jesëmanmi kachashqëki, pëpa tsurinkunapitam hukta akrarqö rey kanampaq” (versículo 1). Pero manam akranqampa shutintaqa willantsu, Jesepa tsurinkunapita kanqanllatam willan. Mëraq Belenman ëwëkar, “¿imanöraq musyashaq Jesëpa mëqan tsurintapis Jehová akranqanta?” nir tapukurqan Samuelqa.
Chärirnam, sacrificiota ruranampaq alistakun y Jesëtam nin tsurinkunawan tsëchö kayänampaq. Tsëchönam Jesëpa mayor kaq tsurin Eliabta reypaqnöraq këkaqta rikëkur, pëta Jehová akranqanta pensan (versículo 6).
Pero Jehoväqa manam nuna rikanqannötsu imatapis rikan. Tsëmi Samuelta kënö nirqan: “Ama rikëninllata ni hatun këninllata rikëtsu, porque manam pëtatsu akrarqö” (versículo 7). Jehoväqa manam Eliabpa hananllatatsu rikëkarqan. Huk nunapa rasumpa shumaq kënintaqa manam hananllapatsu pëqa rikan.
¿Imanirtaq tsëta nintsik? Kikinmi Samuelta kënö nirqan: “Diosqa manam nuna rikanqannöllatsu rikan, nunaqa nawin rikanqanllatam rikan, pero Jehoväqa shonqutam rikan” (versículo 7). Tsëqa rasunmi, Diosqa shonquntsiktam rikan, y shonquntsikpitam yarqamun yarpënintsik, imanö kanqantsik y imanö sientikunqantsikpis; shonquntsikmi rikätsikun rasumpa imanö nuna kanqantsikta. Tsëmi Bibliaqa “shonqukuna rikaq” nin pëpaq (Proverbios 17:3). Tsënöpam ni Eliabta ni hoqta wawqikunatapis Jehoväqa akrarqantsu.
Pero Jesëpaqa huk tsurinran kan David shutiyoq, y pëqa “üshakunatam mitsikarqan” (versículo 11). Tsëmi qayatsiyämun, y chäramuptinnam Samuelta, “¡pëmi!, peqanman aceiteta hichë” nin Jehová (versículo 12). “Buen mozo, y shumaq nawiyoqmi” Davidqa karqan, pero Jehoväqa manam tsënö kanqampitatsu akrarqan, sinöqa alli shonquyoq kanqanta rikarmi (1 Samuel 13:14).
Kanan witsanqa hanampa shumaq këllam nunakunapaq precisan. Pero ¡alläpa kushikïpaqmi rikëninllapita nunakunata Jehová mana akranqanqa! Pëqa manam hatun o ichik, shumaq o feo kanqantsiktatsu rikämantsik, sinöqa shonquntsiktam rikan. Tsëqa, ¿manaku kallpachakushwan alli shonquyoq y alli ruraq karnin pëta kushitsinapaq?