Joven, llapan shonqïkiwan Jehoväta servinëkipaq sinchikï

“Kanan joven kënikichö yarpë Kamashoqnikipaq.” (ECL. 12:1.)

1. ¿Imapaqtaq Jehová Israelchö wambrakunata qayatsirqan?

KIMA waranqa pitsqa pachak (3.500) watanam pasarishqa Jehoväpa profëtan Moises sacerdötekunata y anciänokunata kënö ninqampita: “Markachö këkaqkunata ëlli [qori], ollqukunata, warmikunata y wambrakunatapis [...] wiyakuyänampaq y yachakuyänampaq, tsënöpa Jehová Diosnikikunata mantsayänampaq y kë ley ninqankunata rurayänampaq” (Deu. 31:12). Këchö rikanqantsiknöpis, manam yashqakunallatsu Jehoväta adorayänampaq ëllukäyänan karqan. Wambrakunapis, yashqakunapis Jehová ninqantam wiyakuyänan y yachakuyänan karqan.

2. ¿Imanötaq Jehová rikätsikurqan jövenkunata kuyanqanta?

² Apostolkunapa tiemponchöpis Jehoväqa jövenkunapaq yarparëkarqanllam. Tsëtaqa musyantsik jövenkunapaq apóstol Pablutawan qellqatsishqa kaptinmi (lei Efesios 6:1 y Colosenses 3:20). Y kë consëjokunata wiyakoq jövenkunaqa, shonqupita patsëchi ciëlochö këkaq Teytankunata kuyayarqan y bendicionnintapis chaskiyarqan.

3. ¿Imanötaq atska jövenkuna rikätsikuyan Diosta servïta munayanqanta?

³ Y kanan witsanqa, ¿jövenkunata Jehová congregacionninchö adorayänampaq qayëkanku? ¡Awmi! Alläpa kushikïpaqmi, atska jövenkuna y mözakunapis yachakuna wayiman shamoqta rikëqa. Tsëqa rikätsikun Pablu ninqanta wiyakuyanqantam: “Jucnintsic jucnintsic yanapanacur cuyanacur alli rureta tïrashun. Diosta alabanantsic wayicho imepis ellucashun ama waquincunanoqa mana ewashpa quecashuntsu. Antis jucnintsic jucnintsic callpata qonacur quecashun” Diospa piñakïnin hunaq këllachöna kaptin (Heb. 10:24, 25). Hinamampis, wakinkunaqa teytankunawan y mamankunawan Diospita yachatsikoq ëwëkäyannam (Mat. 24:14). Y wata watam hinantin Patsapita atska waranqa jövenkuna bautizakurnin Jehoväta kuyayanqanta rikätsikuyan, y tsëta rurayanqampitam atska bendicionkunata chaskiyan (Mat. 16:24; Mar. 10:29).

Jehová invitashunqëkita wiyakï

4. ¿Ëka watayoqtaq kanëki Jehoväta servinëkipaq y adoranëkipaq?

⁴ ¿Musyankiku ëka watayoqraq kanëki Jehoväta servinëkipaq y adoranëkipaq? Bibliaqa ëka watayoq kanëkitapis manam nintsu, pero kënömi nin: “Kanan joven kënikichö yarpë Kamashoqnikipaq” (Ecl. 12:1). Tsëmi, Jehoväta servinëkipaq wambrallaraq kanqëkita ama pensëtsu. Ëka watayoq kaptikipis, niriyaqmi Jehová invitashunqëkita wiyakunëkipaq.

5. ¿Imatataq teytakuna y mamakuna rurayashqa wambrankuna Jehoväta serviyänampaq?

⁵ Atskaq jövenkunatam Jehoväta serviyänampaq teytankuna y mamankuna yanapayashqa. Tsëmi unë tiempochö Timoteunömi kayan nintsik. Timoteutaqa wambra kanqampita patsëmi maman Eunice y abuëlan Loida Diospa Palabrampita yachatsiyarqan (2 Tim. 3:14, 15). Itsa teytëki mamëkipis Timoteutanö yachëkätsiyäshunki Diospa Palabranta leirnin, qamwan junto Diosman mañakurnin, reunionkunaman  y asambleakunaman pushashurniki y wayin wayin yachatsikoq ëwarnimpis. Jehoväqa teytëkikunatam pë munanqanta yachatsiyäshunëkipaq churashqa, tsëtam pëkunaqa rurëkäyan. ¿Cuentata qokunkiku alläpa kuyayäshunqëkita y alli kanëkita munayanqanta? (Pro. 23:22.)

6. a) Salmo 110:3 ninqannö, ¿imanö servinatataq Jehová munan? b) ¿Imapitataq parlashun qateqnin pärrafokunachö?

⁶ Tsënö kaptimpis, winanqëkimannö ‘Dios munashqanta’ kikiki musyanëkitam Jehoväqa munan, tsëtam Timoteupis rurarqan (Rom. 12:2). Tsëmi, congregacionchö imata rurarpis shonqupita patsë ruranki y manam teytëkikunata kushitsinëkillapaqtsu. Kuyakïwan Jehová munanqanta ruraptikiqa alläpam kushikunqa (Sal. 110:3). Itsachi Jehová ninqanta wiyakïta y rurëta munanki. ¿Imatataq rurankiman Diosta servita más munanëkipaq? Bibliapita y publicacionkunapitam yachakunëki, Diosmanmi mañakunëki y allim portakunëki. Kë kimanta hukllëllapayan rikärishun.

Jehoväta reqi y amïgon kë

7. a) ¿Imanöpataq musyantsik Jesus Bibliata alli estudianqanta? b) ¿Pikunataq yachatsiyarqan?

⁷ Diosta shonqupita patsë servita munanëkipaqqa, Bibliatam cada hunaq leinëki, tsëmi yanapashunki Dios kawënikichö kanampaq y Diospa Palabrampitam más yachakunëkipaq (Mat. 5:3, NM). Tsënöpam Jesus ruranqanta rurëkanki. Chunka ishkë (12) watayoqllaraq këkaptinmi, teytanwan maman tarïkuyarqan “ley yachatsicoqcunapa chopincho pecunata wiyar, tapuparnin tëcaqta” (Luc. 2:44-46). Kë textom rikätsimantsik Jesus wambrallaraq këkarpis, Bibliapita yachakïta pasëpa gustanqanta, hina alleq käyinqanta o mayanqanta. ¿Imanöpataq tsënö karqan? Maman Maria Josëwan llullu kanqampita yachatsiyanqampitam, pëkunaqa Jehoväpa kuyë serviqninkunam kayarqan (Mat. 1:18-20; Luc. 2:41, 51).

8. a) ¿Imëpita patsëtaq teytakuna y mamakuna wambrankunata Bibliata kuyanampaq yachatsiyanman? b) Yuriyanqampita patsë wambrakunata yachatsi alläpa alli kanqanta willakarami.

⁸ Kanampis tsënöllam, Diosta kuyaq teytakuna mamakunaqa wambrankunata yurinqampita patsë yachatsiyan (Deu. 6:6-9). Tsëtam rurarqan Rubi shutiyoq cristiana Joseph wawanwan. Llapan hunaqkunam leipaq Bibliapita willakïkuna willakoq librömi nishqan librota. Y más winariptinnam yanaparqan Bibliapa textonkunata imëpis yarparänampaq. Kë ruranqan, ¿Josephta yanaparqantsuraq? Awmi. Parlar yachakurirllanam kë libro ninqankunata willakïta yacharqan. Y pitsqa watayoq këkarnam, Yachatsikunapaq Diospa Escuëlanchö discursar qallarirqan.

9. ¿Imanirtaq alläpa preciso Bibliata leinqëki y leinqëkikunaman yarparänëki?

⁹ Poqu cristiano tikranëkipaqqa, llapan hunaqmi Biblia leita yachakänëki y tsënöllam imëyaqpis ruranëki (Sal. 71:17). ¿Tsë ruranqëki imapaqtaq yanapashunki? Yanapashunki Jehoväta más reqinëkipaqmi, Jesuspis Teytanman mañakur kënömi nirqan: “Keymi key wiñey kaweyqa: Qamta reqiyashuneyki japallan rasonpa kaq Dyosta” (Juan 17:3, QKW). Y más reqinqëkimannömi Diosta rikëkaqnö kawanki y masmi kuyankipis (Heb. 11:27). Tsëmi Bibliata leirninqa, Pëpita maskunata yachakïta tïranëki. Y kënö tapukunëki: ¿Jehová imanö kanqantataq kë leikanqä yachatsiman? ¿Imanötaq rikätsiman kuyamanqanta y noqapaq yarparanqanta? Kë tapukïkunaman yarpakacharqa, musyankim Dios imata pensanqanta, imarëkur kushikunqanta o llakikunqanta y qampita imata shuyaranqantapis (lei Proverbios 2:4, 5 *). Tsëqa Timoteunö kaqmi, ‘yachaconqequicuna rasonpa cashqanta’ creinki y llapan shonqïkiwanmi  Jehoväta servita munanki (2 Tim. 3:14).

Diosman mañakunqëkim yanapashunki pëta más kuyanëkipaq

10, 11. ¿Imanötaq Diosman mañakï yanapashunkiman maslla servinëkipaq?

¹⁰ Ishkë kaqta rikärishun. Jehoväman mañakïmi yanapashunki pë munanqanta ruranëkipaq. Salmo 65:2 textochömi leintsik kënö: “Mañakïkuna Wiyaq, qammanmi shayämunqa tukï rikoq nunakuna”. Israel Diospa markan kanqan witsampitanam, mana Israel kaq nunakunapis Jehoväpa temploman ëwëkur pëman mañakïta puëdeyaq (1 Rey. 8:41, 42). Jehoväqa llapan nunakunatam kuyan, y pë ninqanta wiyakoqkunapa mañakïninta wiyanampaqmi awnikun (Pro. 15:8). Tsëmi “tukï rikoq nunakuna” nirqa, qampaqwan parlëkanqanta markäkunëki.

¹¹ Llapantsikmi musyantsik alli amïgokuna imëkatapis willanakurëkäyanqanta. ¿Manaku alläpa kushikïpaq imanö këkanqantsikta, pensanqantsikta y yarparanqantsikkunata pillawampis parlarinqantsik? Tsënö amigo këtam Jehová awnikäshunki, y pëwanqa mañakurninmi parlantsik (Fili. 4:6, 7). Teytëkiwan mamëkiwan o kuyanqëki amïguïkiwan parlanqëkinö Jehoväta llapanta willë. Hina, mañakunqëkim rikätsikunqa Jehoväta imanöpis kuyanqëkita. Pëta más kuyarmi mana mantsakushpa llapanta willanki.

12. a) Shonqupita patsë mañakurqa, ¿imanötaq mañakunëki? b) ¿Imanötaq Jehová qamwan këkanqanta musyanki?

¹² Yarpë, manam lluta mañakunanllatsu. Imanöpis këkanqëkita Diosta willë. Kuyanqëkita, respetanqëkita y markäkunqëkita willë. Mañakunqëkikunata qoshuptikim musyanki, “Palabranta respetarnin llapan qayakoqninkunapa” lädonchö këkanqanta (Sal. 145:18). Y Satanaspa makinman mana ishkinëkipaq y allikunata ruranëkipaqmi yanapashunki y kuyashunkim (lei Santiagu 4:7, 8).

13. a) ¿Imachötaq huk shipashta yanaparqan Diospa amïgon kanqan? b) ¿Imanötaq qamta yanapashunki Jehoväwan amigo këniki estudiaq mayikikuna imatapis niyäshuptiki?

¹³ Cherie shutiyoq shipashta Jehoväwan amigo kënin imanöpis yanapanqanta rikärishun. Pëqa escuëlachö alli yachaq kanqampitam y alli cörrenqampitam premiokunata chaskirqan, y huk universidadman grätislla estudiaq yëkunampaqmi bëcata qoyta munayarqan. Cheriem nin: “Pasëpam chaskikurkïta munarirqä, yachatsimaqnïkuna y estudiaq mayïkunapis chaskikunäpaqmi niyämaq”. Tsënö kaptimpis cuentata qokurqanmi, estudianampaq y cörrenampaq atska tiempota wananqanta, y Jehoväta servinampaq ichik tiempollana sobrapunqanta. ¿Imatataq rurarqan? Kënömi nimantsik: “Jehoväta mañakurirmi munarqätsu tsë beca chaskikïta, y precursora regularnömi servir qallëkurqä”. Pitsqa watana precursora karirmi kënö nin: “Tsëta ruranqäpitaqa manam pësakütsu. Ruranqäpita Jehová kushikunqanta  musyämi, y tsëmi kushishqa kä. Rasunmi, Diospa kaqta kawënintsikchö puntaman churashqaqa, wananqantsikkunata Diosnintsik qomantsikmi” (Mat. 6:33).

Shumaq portakunqëkim “limpio shonquyoq” kanqëkita rikätsikun

14. ¿Imatataq Jehoväta rikätsinki shumaq portakïnikiwan?

¹⁴ Kanan kima kaqta rikärishun. Jehoväta shonqupita patsë servita munanqëkitaqa rikätsikunki, alli portakurninmi. Yarpë, warmiwampis ollquwampis rakchata mana rurar kawakoq jövenkunataqa Jehoväqa bendecinmi (lei Salmo 24:3-5 *). Kënö limpio kawaq jövenmi karqan Samuel, pëqa manam qatirqantsu sacerdote Elïpa wambrankunapa rakcha rurëninkunata. Bibliam willakun, pëkuna warmikunawan lluta kakïkäyaptimpis “Samuel wambraqa, winanqanmannömi yachanëpaq tikraq Jehoväpa y nunakunapa rikënimpaq” (1 Sam. 2:26). Rikanqantsiknöpis alli portakïnintaqa nunakuna y Jehoväpis rikëkäyarqanmi.

15. ¿Imanirtaq alli portakunëki?

¹⁵ Pablu ninqannömi kanan witsan nunakunaqa kikinkunallapaq imatapis munayan, nunatukuyan, teytanta mamanta wiyayantsu, agradecikïta yachayantsu, amïgonkunapa contran yarquyan, mana ankupäkoq kayan y Diosta mana cäsushpam kikinkunapa munëninkunallaman yarparäkuyan (2 Tim. 3:1-5). Musyayämi mana alli portakoqkunapa rurinchö alli portakï sasa kanqanta. Mana alli rurëkunaman mana ishkinqëki höram rikätsikunki, ciëlochö y Patsachö Jehovälla mandakoq kanqanta, y pëlla imëka leykunatapis churaq kanqanta (Job 2:3, 4). Hinamampis, kushishqam kanki kënö invitashunqëkita wiyakurnin: “Yachaq kë wambrallä y shonqüta kushitsimï, qallapämar burlakëkämaqnïta contestanäpaq” (Pro. 27:11). Y manam tsëllatsu, Diospa rikënimpaq kuyëmi kanki, tsëmi yanapashunki shonqupita patsë servinëkipaq.

16. ¿Imata rurartaq huk shipash Jehoväta kushitsirqan?

¹⁶ Cärolqa joven kanqampitam conciencian ninqanta wiyakoq y Biblia ninqanta respetaq. Estudiaq mayinkunaqa cuentata qokuyaqmi, pero wakinqa burlkuyaqmi bandërata mana saludaptin, himno nacionalta mana cantaptin, ni fiestakunatapis mana celebraptin. Tsënö rurëkäyaptimpis höraqa tsëkunata imanir mana ruranqampitam käyitsikoq o willakoq. Atska wata pasariptinnam, huk estudiaq mayin kënö nishpa cartakïkorqan: “Atska watanam agradecinaqpaq qamwan tinkuyta o topëta munarqä. Noqaqa rikarqämi shumaq portakunqëkita, y imarëkur fiestakunata rurëta mana munanqëkita willakunqëkitapis. Testïgokunapitaqa qamllatam puntata reqishqa karqö”. Carol portakunqantanö pitapis mana reqishqa karmi, kë shipash tiempowan Bibliata estudiar qallëkurqan. Y cartata qellqanqan witsanqa chusku chunka watapitapis masnam testigo karqan. Cärolnö mana mantsakushpa creinqëkikunata  käyitsikuptikiqa, itsa alli shonquyoq kaqkuna Jehoväpita yachakïta munariyanqa.

Jehoväta alabaq jövenkuna

17, 18. a) ¿Imataq nintsik congregacionnintsikchö jövenkunapaq? b) ¿Jehoväta sirveq nunakunata imataq shuyaran?

¹⁷ Alläpam kushikuntsik hinantin Patsapita atska jövenkuna shonqunkunapita patsë Jehoväta sirveqta rikar. ¿Imataq yanapan imëpis Jehoväta serviyänampaq? Tsëpaqqa yanapan Bibliata cada hunaq leiyanqan, Diosman mañakuyanqan, y portakuyanqampita Jehová kushikunqanta musyayanqanmi. Kë alli portakoq jövenkunaqa, alläpam kushitsiyan teytankunata y cristiano mayinkunatapis (Pro. 23:24, 25).

¹⁸ Jehoväta shonqupita patsë sirveq jövenkunaqa, mana yupëtapis puëdepaq shuyni nunakunawanmi Teyta Dios awnikunqan mushoq Patsaman yëkuyanqa (Apo. 7:9, 14). Tsëchömi shumaq bendicionkunata chaskinki, y cada hunaq pasanqanmanmi Jehoväta más reqinki y imëyaqpis pëllatanam servïkanki (Sal. 148:12, 13).

[Päginapa ura kuchunchö willakïkuna]

¿Imatataq yachakurqontsik?

• ¿Imakunatataq jövenkuna congregacionchö rurayanman?

• ¿Imanirtaq alläpa preciso Bibliata lei, y leinqantsikman yarparänantsik?

• ¿Imanötaq Jehoväman mañakunqantsik yanapamantsik pëman más witinapaq?

• ¿Imanötaq cristiano jövenkuna shumaq portakïninkunawan wakinkunata yanapayanman?

[Yachakunapaq kaqpa tapukïninkuna]

[11 kaq päginachö dibüju]

¿Cada hunaqku Bibliata leinki?