Santo espíritu y Jehoväpa munënin

“Noqa parlanqaqa ninqänöllam rurakanqa. [...] y llapan ninqäkunapis allim yarqunqa.” (ISA. 55:11.)

1. Willakarami, ¿imanirtaq hukläya huknöllapa rurëwan tukïnöpa rurë?

PENSAKURKÏ cärronkunawan viajayänampaq ishkaq nunakuna alistakikäyanqanman. Huk kaqqa akran ëwanqan sitioman huk nänillapa chänampaqmi. Huk kaqpis musyanmi më sitioman chänanta, pero musyanmi viäjechö imapis pasaptinqa huk nänikunapapis tsë sitioman chänanta. Këmi rikätsimantsik, munanqanta huknöllapa rurëwan, munanqanta tukïnöpa rurëqa hukläya kanqanta.

2, 3. a) ¿Imatataq qallanampita patsë Diosnintsik munarqan y imatataq rurarqan Adanwan Eva hutsata rurariyaptin? b) ¿Imanirtaq Jehoväpa munënin rurakanqanmannö kawashwan?

² Jehoväqa, manam munanqan huknöllapa rurakänantatsu shuyaran, sinöqa ruranampaq kaqta imanöpa o mëmampapis rurarïta puëdenmi (Efe. 3:11). Kë ruranampaq kaqqa karqan, qallanampita kë Patsa huk paraïsoman tikrananmi, y nunakuna tsëchö mana wanushpa kushishqa kawakuyänampaq munanqanmi (Gén. 1:28). Tsëmi Adanwan Eva hutsaman ishkiriyaptin, munanqan cumplikänampaqqa huknöpana kamakäratsirqan (lei Génesis 3:15 *). Y musyatsikurqan ciëlochö warmimpita huk “mirënin” o Wambran yurinanta y Satanasta ushakätsinampaq kaqta, tsënöpa mana alli ruranqankuna altsakänampaq (Heb. 2:14; 1 Juan 3:8).

 ³ Manam ni imapis kantsu ciëlochö ni Patsachö, Diosnintsikpa munënin rurakänampaq kaqta tsapaqqa (Isa. 46:9-11). ‘Parlanqanqa, ninqannöllam rurakan’ (Isa. 55:10, 11). ¿Imanirtaq tsënö nintsik? Tsëtaqa nintsik, llapan munanqanta poderoso kallpanwan o santo espïritunwan ruramunampaq kaptinmi. Shamoq tiempopaq kawakïnintsikqa Jehoväpa munënin rurakanqampitaran, tsëmi llapan ruranqanta altantolla këkänantsik y munanqannö kawanantsik. Hinamampis, imanö santo espíritu unë yanapakunqanta, kanan yanapakïkanqanta y yanapakunampaq kaqta musyanqantsikmi yanapamäshun markäkïnintsik o yärakuynintsik más sinchi kanampaq.

Unë tiempochö santo espíritu yanapakunqan

4. ¿Imanötaq Jehová willakushqa munanqanta ruramunampaq kaqkunata?

⁴ Unë tiempochöqa, Jehová munëninta ruranampaq kaqta ichikllapa ichikllapam willakurqan. Puntataqa tsë mirënin musyakänampaq kaqtaqa, “imayca pacarätsignömi” katsirqan (1 Cor. 2:7, NTCN). Ishkë waranqa wataran shuyararqan pï kë warmipa mirënin kanqantapis musyatsikunampaq. Tsëqa rurarqan Abrahanta awninqanwanmi, këqa cumplikänan karqan tsë tiempochö y shamoq tiempochömi (lei Génesis 22:17, 18 *). Tsë awninqanchömi, “mirënikiwanmi” nirqan, këwanmi rikätsikurqan mirënin huk nuna kananta y Abrahanpa kastampita kananta. Satanasqa wiyëkarqanmi kë llapan ninqanta, y tukïnöpam ushakätsita munarqan Abrahanpa kastanta, tsënöpa Dios munanqan mana cumplikänampaq. Pero manam ushakätsita puëderqantsu, Diospa kallpanmi o santo espïritunmi tsapëkarqan. ¿Imanö?

5, 6. ¿Imanötaq Jehová espïritunwan tsaparqan Abrahanpa mirëninta?

⁵ Jehoväqa santo espïritunwanmi tsaparqan Abrahanpa mirënin mana ushakänampaq. Kënömi nirqan Abrahanta: “Qampaqqa, tsapäshoqniki escudo cuentam kä” (Gén. 15:1). Rasuntam nikarqan. Pensarishun Jesus manaraq shamuptin 1919 watakuna pasakunqanta. Abrahanwan warmin, Guerar markata huk tiempopa täraq ëwakuyanqanchömi, tsë markapa reynin Abimélec Särata apakurqan warmin kananta munarnin, y manam musyarqantsu casada kanqanta. ¿Satanastsuraq rurëkarqan Abrahanpa mirënin kananta mana munar? Bibliaqa manam willakuntsu tsënö kanqanta, pero willamantsikmi kikin Dios tsë mana pasanampaq yanapakunqanta, tsëtaqa rurarqan tsë reyta suëñïninchö Särata mana yatanampaq willarninmi (Gén. 20:1-18).

⁶ Manam tsëpunllatsu Jehoväqa Abrahanta y kastanta peligropita librarqan (Gén. 12:14-20; 14:13-20; 26:26-29). Tsëmi Salmos qellqaqqa kënö nirqan: “[Jehoväqa] manam haqirqantsu [Abrahanta ni mirëninta] pipis mana allita rurananta, tsëpa rantinqa, pëkunarëkurmi reykunatapis piñaparqan kënö nir: ‘Ama akrashqäkunata yatayëtsu, y profëtakunatapis ama ni ima mana allitapis rurayëtsu’” (Sal. 105:14, 15).

7. ¿Imakunapitataq Jehová tsaparqan markan Israelta?

⁷ Hinamampis Jehoväqa kallpanwan o santo espïritunwanmi tsaparqan markan Israelta, tsë awninqan Akrashqa yurinan kaptin. Tsapänampaqqa qellqatsirqan Leyninkunatam, markakunapa mana alli rurëninkunaman mana takukäyänampaq, adoracionninkunachö, kawëninkunachö, portakïninkunachö y llapanninkunachöpis limpio kayänampaq (Éxo. 31:18; 2 Cor. 3:3). Juezkunapa tiemponchönam espïritunwan Israelta yanaparqan  chikeqninkunapa makimpita libranampaq (Jue. 3:9, 10). Y Jesus yurinan tiempoyaqpis, tsë espïritunwanmi tsapëkarqan Jerusalenta, Belenta, templota y Akrashqampaq parlaq profecïachö yureq sitiokunatapis.

8. ¿Imanötaq santo espíritu Jesusta kawëninchö y yachatsikïninchö yanaparqan?

⁸ Santo espïritum yanapaq Jesusta kawëninchö y Teytampita yachatsikunqanchöpis. Maman Marïapa pachan rurinchömi huk milagrota rurarqan, kë hutsayoq warmi hutsannaq wambrata qeshpikunampaq, tsënöpa hutsapita y wanïpita libre kanampaq. Hinamampis manam haqirqantsu wambra këninchö wanunanta, hasta tiempon chämunqanyaq (Luc. 1:26-31, 34, 35). Tsëpita kima chunka watayoq këkaptinnam, Jehová akrarirqan santo espïritunwan, Davidpa trönonta chaskinampaq y gobiernompita yachatsikunampaq (Luc. 1:32, 33; 4:16-21). Tsë espïritunwanmi atska milagrokunata rurarqan, qeshyaqkunata kachakätsirqan, ichiklla mikïta atska nunakunapaq miratsirqan y wanushqakunata kawaritsirqan. Kë ruranqankunam rikätsimantsik Jesus gobernaptin atska bendicionkunata apamunanta.

9, 10. a) ¿Imakunataq rikätsimantsik Jesuspa qateqninkunata santo espíritu yanapanqanta? b) ¿Jehoväpa munënin imanöna kanqantataq rikätsikurqan Jesuspa qateqninkuna kawayanqan tiempochö?

⁹ 33 wata Pentecostés fiestapita patsëmi, Jehoväqa santo espïritunwan akrëkashqa ciëlota ëwaqpaq kaqkunata, pero manam llapantsu Abrahanpa kastampita kayarqan (Rom. 8:15-17; Gal. 3:29). Alli clärom rikakorqan pëkunachö santo espíritu këkanqan, tsëmi pasëpa kushishqa yachatsikuyaq y milagrokunatapis rurayaq (Hech. 1:8; 2:1-4; 1 Cor. 12:7-11). Këkuna rurayanqanmi, rikätsikurqan Jehoväpa markan hukläyana kanqanta. Unëpitana Jehová Jerusalen templochö adorayänanta permitishqa karpis, kananqa pëkunapa rantinmi akrarqan ciëlota ëwayänampaq kaq cristiänokunata, tsënöpa munënin cumplikänampaq.

¹⁰ Rikanqantsiknömi unëqa espïritunwan tukïta rurarqan, hasta sirveqninkunata tsaparqan, milagrokunata rurayänampaq yanaparqan, ciëlopaq kaqtapis akrarqan. Tsënöpam munanqan cumplikänampaq patsëkätsirqanna. ¿Y kanan tiempoqa imanötaq yanapakïkan santo espïritunwan? ¿Imanötaq yanapakïkan munënin cumplikänampaq? Alläpa precïsom këta musyanantsik, tsënöpa espíritu pushamänata haqinapaq. Tsëmi kanan rikärishun chusku yachatsikïkunata Jehová santo espïritunwan imanö yanapakïkanqantapis.

Kanan witsanchö santo espíritu ruranqan

11. a) ¿Imankunataq rikätsimantsik Diosnintsikpa markan limpio kanampaq santo espíritu yanapakunqanta? b) ¿Imanötaq Diosta sirveqkuna rikätsikuyan santo espíritu pushananta haqiyanqanta?

¹¹ Puntataqa, santo espïrituqa yanapakun cristiänokuna limpio kawakuyänampaqmi. Ollqupis warmipis Jehová Diosta adoraq kaqqa, llapan kawëninkunachomi limpio kayänan (lei 1 Corintios 6:9-11). Cristiano manaraq tikrarqa, wakinkunaqa warmiwampis ollquwampis llutam kawakuyaq, casado këkarpis hukwan hukwanmi kakuyaq, ollqupura o warmipurapis kakuyaqmi, y wakinnam tukï mana allikunata rurëllapaq yarparäkuyaq (Sant. 1:14, 15). Pero Jehoväta kushitsiyänanrëkurqa tsë mana alli rurëninkunata haqiyashqam, tsëmi kananqa Diosnintsik ‘limpiu shonquyoqtana ticrararatsishqa’. ¿Imanötaq venciyan tsë mana alli munëninkunata? 1 Cor. 6:11 ninqannöpis Diospa ‘santu espiritunwanmi’. Limpio kawakïta sinchikurninmi, rikätsikuyan kawëninkunachö santo espíritu yanapanqanta.

12. a) Ezequiel visionchö rikanqannö, ¿imanötaq Jehová markanta pushëkan? b) ¿Imanötaq rikätsikuntsik santo espíritu munanqannö rurëkanqantsikta?

¹² Ishkë kaqqa, Jehová santo espïritunwan pë munanqanmannö markanta pushanqanmi,  pëpa markanqa Patsachöpis ciëlochöpis këkanmi. Ezequiel rikanqan visionchömi, ciëlochö kaq Jehoväpa markanta huk cärrotawan igualatsin, y tsë carro Jehoväpa munëninta ruranampaq vientopa mana pärashpa ëwanqantam willakun. ¿Imataq yanapan kë carro mëmampapis ëwanampaq? Diospa santo espïritunmi (Eze. 1:20, 21). Tsë espïritullam kë Patsachö kaq markantapis pushëkan. Tsëmi nimanqantsikkunata wiyakurninqa, ëwëkantsik Jehoväpa cärron ëwanqanmannö y santo espíritu pushamänatam haqikantsik (Heb. 13:17).

13, 14. a) ¿Pikunataq kayan “canan tiempu nunacuna” nishpa Jesus ninqan? b) Imakunata musyanapaqtaq santo espíritu yanapakïkan (“¿Qepa yarqamoq yachatsikïkunata musyëkantsikku?” nishqan recuadrota rikë).

¹³ Kima kaqqa, santo espíritu Bibliapa yachatsikïninkunata musyanapaq yanapamanqantsikmi (Pro. 4:18). Unë watakunapitanam, mäkoq mäkoq sirveq kë revistawan Bibliapita yachatsimantsik (Mat. 24:45). Más tantearinapaq “canan tiempu nunacuna” nishpa Jesus parlanqanta rikärishun (lei Mateo 24:32-34). ¿Pikunataq tsë nunakunaqa kayan? “¿Qué significa para usted la presencia de Cristo?” (¿Qampaq ima ninantaq Jesus këchöna këkanqan?) nishqan artículo willakunqannöpis, Jesusqa manam mana alli nunakunapaqtsu parlëkarqan, sinöqa ichik tiempollatana santo espïrituta chaskiyänampaq kaq qateqninkunapaqmi. * Profecïakuna cumplikanqantaqa rikäyänan karqan tsë tiempochö kar o kanan tiempochö karpis ciëlota ëwaqpaq kaq Jesuspa qateqninkunam, y manam rikäyänanllatsu karqan, sinöqa musyayänanmi karqan imarëkur tsëkuna pasëkanqantapis Cristu kutimunampaq “ichicllana pishicanqanta”.

¹⁴ ¿Imatataq tsëqa yachatsimantsik? Manam musyantsiktsu “canan tiempu nunacuna” nishpa Jesus parlanqan ëka wata tsarakunantapis, pero yarpänantsikmi “canan tiempu nunacuna” nirqa parlëkan tukï edäyoq ichikllapis reqinakuyanqan nunakunapaqmi, y tsë tiempoqa manam alläpatsu tsarakun y ushanampis kanmi (Éxo. 1:6). Tsëqa, ¿ima ninantaq “canan tiempu nunacuna” nishpa Jesus ninqanqa? Tsëqa 1914 watapita patsë ciëlota ëwaqpaq kaqkunapa kawëninkuna, hipakï hunaq qallaqta rikaqkunapa kawëninkuna tinkunqanmi. Y tsë tiempochö  kawaq nunakunapaqa qallanan kashqam y ushanampis kanqam. Tsëmi tukï señalkuna cumplikaqta rikanqantsik musyatsimantsik hipakï hunaq këllachöna kanqanta. Tsëmi mäkoq mäkoqlla këkänantsik, y alli kaqta ruranapaqmi sinchikïkänantsik (Mar. 13:37). Tsëta rurarqa rikätsikushunmi mushoq yachatsikïkunata chaskikanqantsikta y santo espíritu pushamänata haqikanqantsikta.

15. ¿Imanötaq musyantsik yachatsikunapaq santo espíritu yanapëkämanqantsikta?

¹⁵ Kananqa chusku kaqta rikärishun, santo espïritum yachatsikunapaq yanapamantsik (Hech. 1:8). ¿Santo espíritu mana yanapamashqaqa hinantin patsaman kë willakï chanmantsuraq karqan? Kikintsikllaman yarpärishun. Itsa parlëta o imapis pasamänata alläpa mantsakoq kantsik, itsachi nirqantsik: “Noqaqa manam imëpis wayin wayin yachatsikoqqa yarqushaqtsu”. Pero kananqa punta puntachöraq yachatsikur purintsik. * Y atskaq testïgokunam chikikäyaptin y imëkata pasëkarpis yachatsikïkäyanlla. Kikintsikpa kallpantsikwanqa manam ima rurëta puëdeshwantsu, këkunata ruranapaqqa santo espïritullam yanapamantsik (Miq. 3:8; Mat. 17:20). Tsëmi imëkanöpapis yachatsikïkarqa santo espíritu pushamänata haqikantsik.

¿Shamoq tiempochö imanöraq yanapakunqa santo espïritu?

16. Hatun hipakï chämuptin, ¿imanirtaq markäkuntsik Jehová markanta tsapänampaq kaqta?

¹⁶ Shamoq tiempochöqa, Jehová santo espïritunwan imëka allikunatam ruranqa. Puntataqa, serviqninkunatam imëka mana allikunapita tsapanqa. ¿Manaku tsëtaqa unëpitana rurashqa serviqninkunata y markan Israelta tsaparnin? Tsëmi creintsik hatun hipakï chämuptimpis, Dios markanta tsapänampaq kaqta. Tsëmi, kënötsuraq o waknötsuraq salvamanqa nishpa purikïkänantsiktsu. Shamoq tiempota mana mantsakushpam shuyarantsik, Jehoväta kuyarmi musyantsik kuyënimpita y espïritumpita ni imapis mana rakimänata (2 Cró. 16:9; Sal. 139:7-12).

17. ¿Y mushoq Patsachöqa imataraq Jehová ruranqa santo espïritunwan?

¹⁷ ¿Y mushoq Patsachöqa imataraq Jehová ruranqa santo espïritunwan? Tukïtam ruranqa, hina mushoq librokunata qellqayänampaqpis santo espïritunwanmi yanapakunqa (Apo. 20:12). ¿Imataq tsë librokunachö qellqaranqa? Waranqa Watachö yachakuyänampaq leykunam. ¡Tsë librokunata leinapaq y mushoq Patsachö bendicionkuna chaskina hunaq chäramunantanam munantsik! Patsapaq y nunakunapaq Jehoväpa munënin Santo espïritupa yanapakïninwan rurakäriptin kawakïqa, pensanqantsikpitapis más shumaqmi kanqa.

18. ¿Ima rurëtataq tïranantsik?

¹⁸ Ama qonqashuntsu, Jehoväpa munëninqa santo espïritupa yanapakïninwanmi rurakanqa. Diosnintsikpa munënin rurakänanchöqa noqantsikpis këkantsikmi, tsëmi santo espïritunta mañakunantsik y pushamänata haqinantsik (Luc. 11:13). Tsënöpam Diosnintsik qallanampita patsë nunakunapaq munanqanta tarishun; mana wanushpa shumaq Patsachö kawakïta.

[Päginapa ura kuchunchö willakïkuna]

¿Yachakurqontsikku?

• ¿Imanötaq santo espïritunwan Jehová munëninta ruratsirqan unë tiempochö?

• ¿Imatataq kanan tiempochö Jehová espïritunwan rurëkätsin?

• ¿Imanöraq shamoq tiempochö santo espïritunwan munëninta Jehová ruranqa?

[Yachakunapaq kaqpa tapukïninkuna]

[16 kaq päginachö recuadru]

¿Qepa yarqamoq yachatsikïkunata musyëkantsikku?

Jehoväqa watakuna pasanqanmannömi markanta más yachatsin. ¿Imakunapitataq más clärona willakushqa La Atalaya nishqan revista kë qepa watakunachö?

▪ Puntataqa Mateo 13:33 textochö levadürapaq parlaqtaqa yachakurqantsik mana alli religionkunapa yachatsikïnin kanqantam, ¿pero kananqa ima kanqantataq musyantsik? (Mat. 13:33; 15 de julio de 2008, páginas 19, 20.)

▪ Puntataqa yachakurqantsik, ciëlota ëwaqpaq kaqkunaqa 1930 wata witsankuna akrakar ushakanqantam, ¿pero imatataq kananqa musyantsik? (1 de mayo de 2007, páginas 30, 31.)

▪ ¿Ima ninantaq Jehoväta “espirituchow” adorëqa? (Juan 4:24, QKW; 15 de julio de 2002, página 15.)

▪ ¿Kë patsachö kawaqpaq kaq mana yupëtapis puëdepaq nunakuna templopa mëqan pationchötaq serviyan? (Apo. 7:15; 1 de mayo de 2002, páginas 30, 31.)

▪ ¿Imëtaq üshanö nunakuna rakikanqa cabranö nunakunapita? (Mat. 25:31-33; 15 de octubre de 1995, páginas 18 a 28.)