Ollqukuna, ¿Cristupa mandädonchöku këkäyanki?

“Jesucristupa mandaduncho[mi] llapan ollqu caqcuna quecayan.” (1 COR. 11:3.)

1. ¿Imataq rikätsikun Jehová “ordenadu” Dios kanqanta?

APOCALIPSIS 4:11 textom kënö nin: “Dios, qamllam puedeq canqui. Llapan imecatapis qammi camashqanqui. Cawenincuna qoshqa captiquim, llapanpis cawecayan. Tsemi qamtaqa llapanpis respetayäshurniqui, alabayäshunqui”. Llapantapis kamashqa karmi, Jehoväqa llapan hanampa këkan. Awmi, ciëlochöpis Patsachöpis pëllam Llapan Puëdeq mandakoqqa. Y “ordenadu” Dios karmi, ciëlochö angelninkunata grupo grupo shumaq patsätsishqa wakin kaqpa mandädonkunachö kayänampaq (1 Cor. 14:33; Isa. 6:1-3; Heb. 12:22, 23).

2, 3. a) ¿Pitataq Jehová puntata kamarqan? b) ¿Pipa mandädunchötaq këkan Jesus?

² Mana yupëtapis puëdepaq watakunam Jehová hapallanlla kawakurqan. Tsëpitam churapakarqan huk espïritunö kawaqta kamanampaq, tsë espiritupam shutin karqan “Willacamoq”, Teytampita willakoq kaptin. Jehoväqa imëkatam Tsurinwan kamarqan, y tsëpitanam kë Patsaman mandamurqan hutsannaq nunanö kawanampaq, y reqishqa karqan Jesucristu nishpam (lei Juan 1:1-3, 14).

³ ¿Jesucristu pipa mandädoncho kanqantataq Biblia yachatsikun? Apóstol Pablum kënö nishpa qellqarqan: “Diospa mandadunchomi Jesucristu quecan. Teyta Jesucristupa mandadunchonam llapan ollqu caqcuna quecayan, y ollqu caqcunapa mandaduncunachonam warmicuna cayänan” (1 Cor. 11:3). Awmi, Jesucristuqa Teytampa mandädonchömi këkan. Alläpa precïsom, kë espirituna shumaq kawakuyänampaqqa Jehová mandädonchö kayänampaq churanqankunata respetayänan. Rikanqantsiknömi, hasta kikin Tsurin “sielucho y que patsacho llapan ricanqantsiccunata y mana ricanqantsiccunata” kamar yanapakushqa karnimpis, Teytampa mandädonchö kanan (Col. 1:16).

4, 5. ¿Imanötaq Jesus Teytan mandakoq kanqanta rikaq?

⁴ ¿Imanötaq Jesus rikarqan Jehoväpa autoridadninta? ¿Y imataq nirqan kë patsaman kachamuptin? Rikärishun Biblia ninqanta: “Jesucristu [...] [“Diosnö”, NM] quecarninpis, manam Dios[nö] queninta cuentapaqpis churarqantsu, sinoqa poderyoq Dios[nö] quecarninpis, juc nunano yuricurninmi, imeca juc sirwipacoqno que patsaman shamorqan. Y umillaquicorqan Diosta cäsucurmi asta waniyaqpis chärerqan, y manam penqacorqantsu cruscho [“qeruchö”, NM] wanitapis” (Fili. 2:5-8).

⁵ Imë hörapis Jesusqa humildem karqan y teytan munanqantam rurarqan. Tsëmi kënö nirqan: “Noqaqa manam quiquï munashqätatsu rurä. [...] Noqaqa jusgashaq nunacunata rurenincunamanno[mi], porqui cachamaqnï Dios Yaya munashqantam rurä, manam quiquïpa munenïtatsu” (Juan 5:30). Kënöpis nirqanmi: “Cachamaq Papänï [...] gustanqantam noqaqa imatapis siempri rurä” (Juan 8:29). Y wanukunanna këkarnam Teytanman kënö mañakurqan: “Que patsacho quecarmi, mandamashqequicunata rurar usharirnin, qam allapa puedeq canqequita musyatsicorqö” (Juan 17:4).  Këchömi rikantsik Jesuspaqqa Teytanta mandaqnintanö rikëqa facil-lla kanqanta.

Tsuripaqqa alläpa allim Teytan ninqanta wiyakï

6. ¿Imanö kanqantataq Jesus rikätsikurqan?

⁶ Kë patsachö këkarmi Jesusqa alli këninta tukïnöpa rikätsikurqan. Hina rikätsikurqanmi Jehoväta alläpa kuyanqantapis, tsëmi nirqan: “Dios Yayata cuyanqäta nunacuna musyayänanpaqmi mandamashqancunallata rurecä” (Juan 14:31). Hina, nunakunata pasëpa kuyanqantapis rikätsikurqanmi (lei Mateo 22:35-40). Jesusqa manam lluta tratakoqtsu ni piñakoqtsu karqan, tsëpa rantinqa llapantapis shumaqmi rikaq. Y manshu nunakunatam kënö invitarqan: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi. Imeca yugucho noqalla arsuta apaq cuentam qamcunawan purishun. Noqam qollmi shonqu car y umildi car, llapan nacaquiniquicunapita jamaratsiyashqequi. Noqapa yugoqa manam lasantsu. Yanapayäpteq ancashllam canqa” (Mat. 11:28-30). Tukï edadyoq manshu nunakunam imëkata hipashqa karpis Jesusta reqirirnin y yachatsikunqanta musyarirninqa pasëpa kushikuyan.

7, 8. a) Ley ninqanta yarpar, ¿imatataq ruranantsu karqan kë qeshyëkaq warmi? b) ¿Imanötaq Jesus tratarqan kë qeshyaq warmita?

⁷ Kananqa rikärishun warmikunata imanö rikanqantapis. Unëpitam atskaq ollqukuna mana alli tratayashqa warmikunata. Unë Israelchö mandakoq relegiösokunapis tsënö mana allillam tratayaq. Pero Diospa Wambranqa respetarqanmi. Yarpärishun chunka ishkë watana yawar ëwëman qeshyaq warmiman. Llapan kapunqanta gastarnin hampikïkarpis manam kachakarqantsu, masmi antsäkïkurqan. Y ley ninqannömi kënö qeshyayoqtaqa rakchatanö rikäyaq y yatëkoq kaqtapis (Lev. 15:19, 25).

⁸ Qeshyaqkunata Jesus kachakëkätseqta musyarirmi, nunakuna rurimpa yatëkunampaq ëwarqan kënö nirnin: “Mantunta yatecurllam que qeshyapita cachacärishaq”. Y ninqannömi yatarirqan y tsëllanam kachakärirqa. Cristuqa musyarqanmi yatëkunqanqa mana alli kanqanta. Pero piñapänampa rantinmi, shumaq kuyëpa tratarqan. Atska wata hipanqampita llakiparninmi nirqan: “Ija, noqaman marcäcurmi cachacärerqonqui. Canan cushishqana euquï. Mananam mas jipanquinatsu” (Mar. 5:25-34).

9. ¿Imanötaq rikarqan Jesus, wambrakuna witipäyaptin discïpulonkuna michäkuyanqanta?

⁹ Jesusqa pëwan këkarnin wambrakunapis kushishqa sientekuyänantam munarqan. Huk kutim discïpulonkuna piñapäyarqan teytakunata Jesus kaqman wambrankunata apayaptin, itsachi Jesusqa mana allim sientekunqa niyarqan. Pero mana allitam rurëkäyarqan. Bibliam kënö willakun: “Jesus[mi] piñacurcur disipuluncunata queno nerqan: —¡Noqaman wamracuna shayämutsun! ¡Ama michäyëtsu! Que wamracunano caqcunapaqmi Diospa mandaquinenqa”. Tsëpitam “tsecho quecaq wamracunata mellqarcur, pecunaman maquinta churar bendisicorqan”. Manam witipäyänanllatatsu haqeq, sinöqa kushishqam chaskeq (Mar. 10:13-16).

10. ¿Imanötaq alli tratakoq këta Jesus yachakurqan?

¹⁰ ¿Mëpitataq tsënö tratakïta Jesus yachakurqan? Mana yupëtapis puëdepaq atska watakuna Jehoväwan ciëlochö kashqa karmi, Pë imanö kanqantapis yachakurqan. Y llapan kamanqanta kuyakïwan dirigenqantapis rikarqanmi (lei Proverbios 8:22, 23 *, 30 *). Pero mana wiyakoq karqa manachi yachakunmantsu karqan. Clärom këkan Teytampa  mandädonchö këta gustanqanta, y Jehoväqa pasëpam kushikoq wiyakoq Wambrayoq kar. Y kë patsachö këkarnam Teytan imanö kanqantapis pasëpa rikätsikurqan. Tsëmi noqantsikpis, pasëpa kushikuntsik gobernamänapaq Diosnintsik churanqanta. ¡Pëpa mandädonchö këqa alläpa shumaqmi!

Jesus kanqannö kashun

11. a) ¿Pitataq qatita tïrantsik? b) ¿Imanirtaq ollqukuna Jesus imanö kanqantapis rikätsikïta sinchikuyänan?

¹¹ Congregacionchö llapan cristiänokunam Jesus kawanqannö cada hunaq kawëta sinchikuyänan, y ollqukaqkunanäqa masran. ¿Imanir? Biblia ninqannömi, ‘Jesucristupa mandaduncho llapan ollqu caqcuna quecayan’. Imanömi Jesuspis Teytampita yachakurqan, tsënöllam bautizakushqa ollqukunapis Jesuspita yachakuyänan, pënö kayänampaq. Tsëtam Pablupis cristiano tikrarir rurarqan. Cristiano mayinkunatam kënö nirqan: “Imanomi noqapis Jesucristu cawanqanno cawaquita tirecä, tsenolla qamcunapis yachacuyë alli portaquita” (1 Cor. 11:1). Tsënöllam apóstol Pëdrupis nirqan: “Jesucristu noqantsicrecur sufrishqa captinmi, musyantsic peno sufrinantsicpaq cashqanta” (1 Ped. 2:21). Hinamampis ollqukunaqa anciano y siervo ministerialmi këta puëdeyan, tsëmi Jesusta llapanchö qatiyänan. Imanömi Jesus Teytan ruranqanta qatir kushikoq, tsënömi yachatseqninkuna Jesusta qatir kushikuyänan.

12, 13. ¿Imanötaq anciänokuna tratayanman Jehoväpa üshankunata?

¹² Anciänokunaqa Jesus ruranqannömi  rurëta tïrayänan. Tsëta rurarllam cumpliyanqa Pedru kënö ninqanta: “Üsha mitseq üshancunata cuidaqno qamcunapis Diosman creyicoqcunata cuidayë. Pecunata alli boluntaniquicunawan ricayë. Peru ama pipis mandayäshuptiquillaqa, tseno rurayëtsu; sinoqa Diosnintsic munashqanno ganas ganaslla rurayë, qellepaq mana erayashpa. Y ama patronnoqa cuentequicunacho quecaq wauqicunata allqutsayëtsu; antis alli ruraq cayë pecunapaq” (1 Ped. 5:1-3). Anciänokunaqa manam kikinkunapa munëninkunata rurayänampaqtsu obligayänan. Tsëpa rantinqa Jehoväpa üshankunawanqa kuyakoq, ankupäkoq y humildem kayänan.

¹³ Congregacionta rikaqkunaqa hutsa ruraq kayanqantam yarpäyänan (Rom. 3:23). Tsëmi más sinchikuyänan Cristuta reqita y pënö kuyakoq këta. Jehoväwan Jesus imanöpis tratamanqantsikmanmi yarpäyänan tsënölla tratakoq kayänampaq. Y manam qonqayänantsu Pëdrupa consëjonta: “Jucniqui jucniquicuna qollmi shonqiquicunawan respetanacuyë. Porqui Diospa palabranpis quenomi escribirecan: ‘Diosnintsicqa manam yanapantsu musyaq tucoqcunata; peru qollmi shonquyoqcunataqa alli queninwanmi yanapan’” (1 Ped. 5:5).

14. ¿Imanötaq anciänokuna tratayanman Jehoväpa üshankunata?

¹⁴ Jehoväpa üshankuna rikaq ollqukunaqa Romanos 12:10 ninqantam rurayänan: “Jucniquipis jucniquipis juc castanolla cayanqequirecur, shumaq cuyanacuyë, y respetanacuyë, y waquincunatapis mas presisaqpaq churayë”. Awmi, anciänokuna y siervos ministerialkunaqa punta puntachömi kayänan wakinkaqkunata respetëchö. Y manam imatapis rurayänantsu “piñatsinakorqa, o alabakorqa, sinoqa manshu këwan wakinkunata” estimarmi, “más valeqtano” churayänan (Fili. 2:3). Congregacionta llapan rikaq kaqkunaqa cristiano mayinkunata rikäyänan pëkunapita más presisaqtanömi. Tsëta rurarmi kë consëjota wiyakïkäyan: “Jesusman mas firmi creyicoqcuna manaraq alleq creyicoq wauqintsiccunata imecanopapis yanapecushun, pecunapis marcäquinincunacho alli firmi patsacashqa cayänanpaq. Y ama quiquintsicpa biennintsicllaqa imatapis rurashuntsu. Antis noqantsicqa imecatapis alli caqta rurashun nuna mayintsicwan cushishqa cawacunantsicpaq, y mas marcäcoq ticranantsicpaq. Porqui Jesucristupis manam quiquin cushicunanpaqtsu imatapis rurarqan” (Rom. 15:1-3).

‘Allpa täsatano tratayë warmiquicunata’

15. ¿Imanötaq huk cristiano warminta tratanman?

¹⁵ Kananqa rikärishun casädokunata Pedru ninqanta: “Casadu nunacunapis, shumaq tratayë warmiquicunata. Porqui pecunaqa allpa tasano delicadum cayan” (1 Ped. 3:7). ¿Ima ninantaq shumaq tratayë ninqanqa? Alläpa valoryoqta rikëmi, ninqankunata respetë, munanqankunata y wananqankunata yarparëmi, y imapis mana tsapaptinqa munanqanta rurar kushitsïmi. Tsënömi huk ollqu warminta tratanan.

16. ¿Huk ollqu warminta shumaq mana trataptin imataq pasakunman?

¹⁶ Tsënö nirpis apóstol apostol Pëdruqa manam ollqu warminta shumaq tratananllapaqtsu nin. Sinöqa, “tseno mana rurayaptiqueqa, imatapis Diosta mañacuyaptiqui manam wiyayäshunquitsu” ninmi (1 Ped. 3:7). Këta ninqanwanmi rikätsikun, warmita shumaq  tratëqa Jehoväpaq alläpa preciso kanqanta. Huk ollqu warminta mana shumaq trataptinqa manam mañakunqantapis Jehová wiyanqatsu. Hinamampis, shumaq respetar tratanqampitam warmin pasëpa kushikunqa y más respetanqa.

17. ¿Mëyaqtaq chanman casado ollqupa kuyakïnin?

¹⁷ Apóstol Pablupis kënömi casado ollqukunata consejan: “Quiquiquicunapa cuerpiquicunata cuyanqequino warmiquicunatapis cuyayë. [...] Porqui manam pipis cuerpunta chiquintsu; antis cuidarmi tuquinopa alimentan. Tsenollam Jesucristupis peman creyicoqcunata cuyar cuidamantsic [...] imanollam cuerpiquicunata cuyayanqui tsenollam warmiquicunatapis cuyayänequi” (Efe. 5:28, 29, 33). ¿Mëyaqtaq warminta kuyanqan chanman? Tsë capïtulollachömi Pablu nin: “Warmiyoq ollqucuna, imanomi Teytantsic Jesucristupis Peman creyicoqcunata cuyarnin pecunarecur wanorqan; tsenolla qamcunapis warmiquicunata shumaq cuyayë” (Efe. 5:25). Imanömi Cristupis nunakunarëkur wanurqan, tsënöllam casado ollqukunapis warminkunarëkurqa wanurpis wanuriyanman. Shumaq kuyëpa respëtowan trataptinqa, warmimpaqqa mandädonchö kë más fäcil-llam kanqa.

18. ¿Imataq casado ollquta yanapanqa warminta shumaq tratanampaq?

¹⁸ ¿Alläpataku ollqukunata Jehová mañëkan? Manam. Rurëta mana puëdenqantaqa manam imëpis Jehová mañanmantsu. Hinamampis ollqupaqa, imawampis mana igualaq yanapaqninmi kan: santo espíritu. Tsëtam Jesus nirqan: “Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa” (Luc. 11:13). Tsëmi casado ollquqa Jehoväta mañakïta puëden santo espïritunta qoykunampaq, tsënöpa warminta y hukkunatapis shumaq tratanampaq (lei Hechos 5:32).

19. ¿Imatataq yachakushun qateqnin kaq artïculochö?

¹⁹ Ollquqa manam ichikllapaq churanmantsu Cristu qatita y pënö alli tratakoq këta. Pero ¿imanötaq casakushqa warmikuna rikäyanman qowankunapa mandädonchö kayänampaq Jehová churanqanta? Qateqnin kaq artïculochömi tsëta yachakushun.

[Päginapa ura kuchunchö willakïkuna]

Yarpärishun yachakunqantsikkunata

• ¿Jesus imanö kanqantataq qatishwan?

• ¿Imanötaq anciänokuna rikäyanman Jehoväpa üshankunata?

• ¿Casado ollqukuna imanötaq warminkunata tratanman?

[Yachakunapaq kaqpa tapukïninkuna]

[14 kaq päginachö dibüjukuna]

Jesusnö wakinkunata tratashun