Jehoväpa markanqa tsapämantsikmi

“Mëtsikaq ëllukäyanqanchömi qampaq allita parlashaq.” (SAL. 35:18.)

1-3. a) ¿Imanötaq huk cristiano imëka mana alliman heqakurkunman? b) ¿Imataq Diospa sirveqninkunata mana alli rurëkunapita tsapan?

VACACIONNINKUNACHÖMI Joe y warmin lamar kuchunkunachö tukï rikoq y tukï tamaño pescädokuna rikaq ëwayarqan. Chärirnam, mascarata y shütayänampaq tübota churakurkur, más rurichö këkaq coral nishqankunam yëkuyarqan. Alläpa rurimanna charmi, warmin mantsakarnin “alläpanam yëkïkantsik” nirqan, tsënam, “ama yarpachakïtsu. Manam imapis pasamäshuntsu” nirqan nunan. Tsëpita mäkuriyänampaqqa mananam lädonkunachö ni ima pescädokunapis kanaqnatsu. Y rikäriyänampaqmi, huk tiburón hanankunachöna këkänaq. Tsëmi tsëllachöna ushakäriyänampaq kaqta pensariyarqan. Pero pëkunaman chëkarnam tsë mantsëpaq hatun pescadoqa tumarir ëwakurqan.

² Tsaq tsënöllam mëqan cristiänopis Satanaspa mundonchö fiestakunata, trabäjokunata y imëkayoq këta munaparqa, mana cuentata qokurlla tiburón kanan yakuman yëkïkaq cuenta këkanman. Joeqa anciänom congregacionninchö, y vacacionninchö pasanqanman yarparmi kënö nin: “Pasamanqanmi rikätsiman Diospa kaqchöpis tsënölla kanqanta. Alläpam precisan ‘mana imapis pasamänantsik yakuchö’ këkaq cuenta congregacionllachö imëpis këkänantsik, y mana alli amïgokunawan mana juntakunantsik”. Tsë ninqanqa rasunmi, cristiano mayintsikkunapita rakikëta y Diosman markäkïnintsikta oqrëta mana munarqa, manam yëkunantsiktsu “mantsëpaq ruri yakumanqa”. Pero tsëchöna këkanqantsikta cuentata qokurqa, “mana imapis pasamänantsik yakuman” hinan höram kutinantsik. Tsënöpa chikimaqnintsik Diablu mana ushakäratsimänapaq.

³ Kë mundochöqa imëka mana allikunam kan cristiänokunata ishkitsinampaq (2 Tim. 3:1-5). Ushakänampaq ichik tiempollana pishinqanta musyarmi Satanasqa pitapis Diospita rakinampaq listo këkan (1 Ped. 5:8; Apo. 12:12, 17). Pero manam hapallantsiktsu këkantsik, Jehoväpa congregacionninmi tsëkunapita tsapämantsik.

4, 5. ¿Imanötaq wakin nunakuna rikäyan shamoq tiempokunata, y imanir?

⁴ Kë mundochö ni imapita mantsapakur kawakïqa sasaraqmi. Pï mëmi mantsayan wanïkatsiyänanta, imëkatapis rurëkuyänanta, imëkapis chaniyoq tikrananta, tamyapis usyapis mana tiemponchö kananta. Hinamampis, qeshyakunawan y edäyëwampis llapantsikmi hipantsik o ñakantsï. Alli trabäjoyoq, alli wayiyoq, alli qellëyoq y mana alläpa qeshyarnin kawaqkunapis, tsëkunata raslla oqrariyänantam mantsapakuyan.

⁵ Hina tsënöllam kanan witsan yamë këta tarinampis alläpa sasaraq. Llakinëpaqmi, pero mëtsika nunakunam yamë këta y familianwan kushishqa këta ashirpis tsëkunata tariyantsu. Hina tsënöllam Diospa kaqchöpis mëtsika nunakuna religionyoq karpis oqrakashqa cuenta sientekuyan. Atskaqmi pastorninkuna yachatsiyanqantapis creiyantsu lluta rakchakunata rurar purikuyaptin y Bibliapita llutampa yachatsikuyaptin.  Tsëmi cienciaman, nunakunapa alli rurëninkunaman y yachëninkunallaman markäkuyan o yärakuyan. Tsëchi shamoq tiempokuna imanö kananta mana musyar alläpa yarpachakuyan o wakinqa tsëman pensëtapis munayannatsu.

6, 7. a) ¿Imanirtaq cristiänokunaqa imëkata pasarpis paqwë llakikurllatsu kakuntsik? b) ¿Imatataq yachakushun qateqnin pärrafokunachö?

⁶ Cristiänokunaqa imëkata pasarpis yamëran kawakuntsik. Y manam wakinkunanötsu paqwë llakikur kakuntsik (lei Isaías 65:13, 14 * y Malaquías 3:18 *). ¿Imanir? Nunakuna imanö tiempochö kawëkäyanqanta y imëkata pasar imanö tsarakunapaqpis Bibliapita yachakushqa karmi. Tsëmi shamoq tiempokunaman pensarpis alläpaqa yarpachakuntsiktsu. Diospa sirveqninkuna karmi musyantsik mëqan yachatsikïkuna mana rasumpa y Bibliapa contran kanqanta, hinamampis tukï rakchakunata mana rurarmi tsëkunapita hipantsiktsu o ñakantsïtsu. Tsënöpam wakin nunakunapitaqa yamë kawakïta tarintsik (Isa. 48:17, 18; Fili. 4:6, 7).

⁷ Jehoväta sirveqkunalla yamë kawakunqantsikta kushikunapaqmi, unë pasanqankunata Biblia willakunqan yanapamantsik. Qateqninchö tsëkunata yachakunqantsikmi yanapamäshun imanö këkanqantsikta y kawëkanqantsiktapis musyanapaq. Tsënöpam yamë kawakunapaq Diosnintsik yachatsimanqantsikkunata alli wiyakur rurashun (Isa. 30:21).

“Ichikllapam chakï llutanman yaqaratsimarqan”

8. ¿Imatataq Diosta sirveqkuna unëpitana rurayashqatsu?

⁸ Unë witsankunapitanam Diosta wiyakoq nunakunaqa mana wiyakïta munaqkunawan takukäyashqatsu. Qallananllachönam Jehová willakurqan Satanaspa munëninta ruraqkuna markanta chikiyänampaq kaqta (Gén. 3:15). Dios munanqannö kawakïta munarmi cristiänokunaqa kë mundochö nunakuna rurayanqanta qatiyantsu (Juan 17:15, 16; 1 Juan 2:15-17). Pero manam fäciltsu. Tsëmi wakinqa, “¿Diosta wiyakunärëkur imëkakunata haqir allitatsuraq rurëka?” nir tapukuyashqa.

9. ¿Imatataq musyëta munarqan Salmo 73 qellqaq?

⁹ Salmo 73 qellqaq Jehoväpa unë sirveqninmi, rurëkanqan alli o mana alli kanqanta musyëta munarqan, itsachi pëqa Asafpa kastampita karqan. Mana alli ruraq nunakuna imanir kushishqa y alli kawakuyanqanta, pero Diosta sirveq alli nunakunaqa imanir alläpa hipayanqantam musyëta munarqan (Salmo 73:1-13).

10. ¿Imanirtaq Salmo qellqaq pasanqankunapita alli yachakunantsik precisan?

¹⁰ ¿Imëllapis Salmo qellqaqnö yarpachakushqankiku? Tsënö karqa, ama mana alli sientikïtsu ni Diosman markäkïniki paqwë ushakëkanqanta pensëtsu. Mëtsikaq Jehoväta sirveqkuna y hasta wakin Biblia qellqaqkunapis tsënömi sientekuyarqan (Job 21:7-13; Sal. 37:1; Jer. 12:1; Hab. 1:1-4, 13). Rasun kaqchöqa, llapan Diosta kushitsita munaqkunam, ¿allitaku rurëka llapanchö Jehoväta wiyakur? nir tapukuyänan. Y kë tapukïqa yarpätsimantsik Edén huertachö Satanás ulikurkur Jehová mana alli gobernaq kanqanta tumpanqanmanmi, tsëmi pita wiyakunapaqpis kikintsik akranantsik (Gén. 3:4, 5). Tsënöpam Salmo qellqaq pasanqankunapita yachakunantsik alläpa precisan. ¿Munapashwantsuraq Diosta mana sirveq nunakuna alli kawakuyanqanta rikar? ¿Jehoväpa nänimpita  yarqurir pëkunanötsuraq kawar qallëkushwan? Tsaq tsëtam Satanás munëkan.

11, 12. a) ¿Imataq Salmo qellqaqta yanaparqan tapukunqampa respuestanta musyanampaq, y imatataq tsëpita yachakuntsik? b) ¿Imataq yanapashurqunki Salmo qellqaqnö cuenta qokunëkipaq?

¹¹ ¿Imataq Salmo qellqaqta yanaparqan tapukunqampa respuestanta musyanampaq? Alli kaqpita ichikllapa rakikäkurinqanta cuentata qokunqanmi, pero “Diospa shumaq templonman” yëkurir Diospa kaqchö alli këkaq nunakunawan juntakunqan y sirveqninkunapaq Dios alli kaqta munanqanta yarpanqanmi masqa yanaparqan. Tsënömi cuentata qokurirqan mana alli ruraq nunakuna imaman chäyänampaq kaqta y manam tsënö këta munarqantsu. Y kawayanqan y rurayanqankuna mana alli kaptin imëka “lutska nänichö” këkaq cuenta kayanqantam musyarirqan. Mana alli rurëkunachö kakuyänanrëkur Jehoväta haqeqkunaqa, “illaqpita mantsakëkunawan” nitipakashqam kayanqa. Pero sirveqninkunataqa Jehová yanapanqam (Sal. 73:16-19, 27, 28). Llapantsikmi tsë ninqan rasun kanqanta musyantsik. Itsa wakinkunaqa Diosman mana yarpar mana alli kawakïta allitanö rikäyanman, pero rurayanqankunapita tarirmi llakishqa puriyanqa (Gal. 6:7-9).

¹² ¿Ima mastataq Asaf pasanqampita yachakuntsik? Jehoväpa markanllachö alli kaqta yachakunqantsikta y mana allipita tsapashqa kanqantsiktam yachakuntsik. Diosta adorayänanman Salmo qellqaq ëwarirqa alli kaqta y rasun kaqta pensarmi qallëkurqan. Kanan witsampis tsënöllam Diospa markanchö alli yachatsikïkunata tarintsik. ¡Tsëchi Jehoväqa reunionkunaman imëpis ëwanapaq nimantsik! Tsëchömi alli kaq nänipa imëpis ëwanapaq yachakuntsik y kallpata tarintsik (Isa. 32:1, 2; Heb. 10:24, 25).

Alli kaq yanaqikunata ashishun

13-15. a) ¿Imataq pasarqan Dïnata, y imatataq tsëpita yachakuntsik? b) ¿Imanirtaq Cristiano mayintsikkunallawan juntakïqa mana allipita tsapämantsik?

¹³ Jacobpa wambran Dïnata pasanqanmi  rikätsimantsik mana alli yanaqikunaqa mana alliman chätsikunqanta. Yanasata ashir cananea chïnakunaman imëpis ëwanqantam Génesis libro nimantsik. Pero Canaan nacionchö yachaqkunaqa manam Jehová munanqannötsu kawayaq. Antis unë markakunachö pasanqankunata estudiaqkuna tariyanqanmi rikätsikun, cananeokunaqa hinantin nacionninkunachö ïdolokunata adorar, ollqupis warmipis imëka rakchakunata rurar, wanutsinakur y diosninkunata adorarnin mana allikunata rurar kakuyanqanta (Éxo. 23:23; Lev. 18:2-25; Deu. 18:9-12). ¿Imataq Dïnata pasarqan tsë cananea chïnakunawan yanasa kanqampita?

¹⁴ “Teytampa familiampita más respetashqa” Siquem shutishqa cananeosh, Dïnata ‘violëkunaq’ ninmi Biblia (Gén. 34:1, 2, 19). ¡Ima mana allimanmi heqëkurqan! ¿Tsë pasanampaq kaqta Dina pensarqantsuraq? Tsë markachö amïgokunayoq këllatachi munarqan y mana imatapis rurayänantachi pensarqan. Pero imanö kayanqantaqa manam ichikllatapis musyarqantsu.

¹⁵ Kë pasanqanmi yachatsimantsik Diosta mana sirveqkunawan juntakurqa imëpis mana alliman heqanapaq kaqta. Biblia ninqannöpis, “mana alli amigucunaqa, llutantam yachatsishunqui” (1 Cor. 15:33). Pero Jehoväta kuyaq, sirveq y pë ninqanta ruraq cristiänokunawan juntakïqa alläpa allim y imëka mana allipitam tsapämantsik. Pëkunaqa imëpis alli kaqta ruranapaqmi yarpätsimäshun (Pro. 13:20).

‘Limpiu shonquyoqtanam ticrararatsiyäshushqanqui’

16. ¿Ima nirqantaq apóstol Pablu Corinto markachö wakin cristiänokunapaq?

¹⁶ Congregacionchö Diospita yachakuyanqanmi atska nunakunata yanapashqa mana alli rurëninkunata haqiyänampaq. Corinto markachö cristiänokunaman cartakurmi apóstol Pablu nirqan Diospa kaqta rurayänanrëkur mana alli rurëninkunata haqiyanqanta. Wakinkunaqa, hukwan hukwan punukoq, ïdolokunata adoraq, hukpa majanwan purikoq, ollqupura punukoq, suwakoq y borrächom kayarqan. Pero ‘limpiu shonquyoqtanam ticrararatsiyäshushqanqui’ nirqanmi Pablu (lei 1 Corintios 6:9-11).

17. ¿Imanötaq Biblia yachatsikunqan yanapashqa atska nunakuna hukläyana kawakuyänampaq?

¹⁷ Diosman mana markäkoq nunakunaqa manam imanö kawayänampaqpis musyayantsu. Bienmi kikinkuna akrakuyan imanö kawakuyänampaqpis, o bienmi Corinto cristiänokuna punta kayanqannö wakinta rikar lluta kawakuyan (Efe. 4:14). Pero Diospa munëninta y Palabrampita alli yachakïqa alläpam yanapakun. Yachakuyanqanta ruraqkunaqa imëkata mana allikunata rurashqa karpis hukläyanam kawakuyan (Col. 3:5-10; Heb. 4:12). Jehová mandakunqankunata manaraq musyarqa, mëtsikaq wawqikuna y panikunam munëninkunata rurar kawakuyaq. Pero rasumpa kushishqa këta ni yamë këta mana tariyanqantam niyan, y tsëtaqa Diospa markanman yëkur y Biblia yachatsikunqannö kawar-ran tariyarqan.

18. ¿Imataq huk jöventa pasarqan, y imatataq pasanqampita yachakuntsik?

¹⁸ Pero congregacionta haqishqa kaqkunaqa llapan shonqunwan llakishqam puriyan. Huk panitam wambra kanqampita teytankuna Diospita yachatsishqa kayarqan, pero 16 watayoq këkarmi, mundopa shumaqnö rurëninkunata munaparqan. Tsënöpam alläpa  mana alliman charqan: qeshyaq tikrarirmi wambranta hitarirqan. Kananqa kënömi nin: “Diospa markampita kima wata rakikärurinqäqa alläpa llakishqatam haqimashqa, y tsëpitaqa manachi imëpis kachakäshaqtsu. Wambräta wanutsinqäta yarparmi yamë kawakïta imëpis tarïtsu. [...] Musyämi kë mundopa mana alli rurëninkunata jövenkuna ichikllapis probarita munayanqanta. Pëkunatam ‘¡ama tsë rurëtaqa yarpäyëpistsu!’ nï. Probanqëki höraqa shumaqnömi, pero tsëpitaqa manam yamë kawakïta tarinkitsu. Waqtachöqa tarinki alläpa hipakïkunallatam [ñakaykunallatam]. Pasamashqa kaptinmi musyä. ¡Jehoväpa markampita ama imëpis yarquyëtsu! Tsëllachömi kushishqa këta tariyanki”.

19, 20. ¿Imanötaq congregación tsapämantsik, y imatataq rurashwan tsapämänapaq?

¹⁹ ¿Imanöraq kashwan imëkapita tsapämaqnintsik congregacionta haqirirqa? Jehoväta manaraq reqirnin paqwë mana alli kawakuyanqanta yarparninmi casi llapan tsëtaqa pensëtapis munayantsu (Juan 6:68, 69). Mana alli rurëkunapita tsapashqa kanapaq y kanan witsan nunakunanö Satanaspa munëninchö hipar mana kanapaqmi, wawqintsikkunawan y panintsikkunawan junto imëpis kanantsik. Pëkunawan amigo këta tïrë y reunionkunaman imëpis ëwëmi, Diospa yachatsikïnin alli kanqanta mana qonqanapaq y imëpis ruranapaq yanapamäshun. Salmota qellqaqnöpis, ¡“mëtsikaq ëllukäyanqanchömi” llapan qomanqantsikpita Jehoväpaq allita parlëta munantsik! (Sal. 35:18).

²⁰ Llapan cristiänokunam tukïta pasayan, tsëmi höraqa sasaraq Jehovällapaq kayänan. Tsënö karqa, itsa ima rurë más alli kanqanta yarpäratsiyänanllata wanayan. ¿Imanöraq congregacionchö llapan këkaqkuna yanapayanman? Qateqnin yachatsikïchömi rikäshun imanöpis wawqintsikkunata y panintsikkunata shumaq yanapanapaq y kallpata qonapaq (1 Tes. 5:11).

[Päginapa ura kuchunchö willakïkuna]

Mä respuestanta niramï

• ¿Imatataq yachakuntsik Salmo 73 qellqaqpita?

• ¿Imatataq yachakuntsik Dïnata pasanqampita?

• ¿Imapitataq congregación tsapämantsik?

[Yachakunapaq kaqpa tapukïninkuna]

[10 kaq päginachö dibüjukuna]

Mana ni imapis pasamänantsik yaku cuenta congregacionta ama haqitsu