Jehoväta servinqantsikqa kallpantsiktam kutikätsin

“Yugucho noqalla arsuta apaq cuentam qamcunawan purishun. Noqam [...] llapan nacaquiniquicunapita jamaratsiyashqequi.” (MAT. 11:29.)

1. ¿Sinaí hirkachö imatataq Jehová mandakurqan, y imarëkur?

MONTE Sinaïchö markanwan conträtota rurayanqanchömi Jehová patsätsirqan sábado hunaq mana trabajayänampaq. Moiseswanmi Israel markanta këta mandarqan: “Hoqta hunaqmi trabajanëki, pero qanchis hunaqchöqa manam trabajanëkitsu, tsënöpa yuntëki, ashnïki hamanampaq, y esclävëkipa wambran y huk markapita qamwan täraqkuna hamariyänampaq” (Éxo. 23:12). Israelïtakunata kuyar y ankuparmi Diosqa patsätsirqan semänachö huk hunaq “hamariyänampaq”, tsënöpa kallpankuna kutikärinampaq.

2. ¿Imachötaq israelïtakunata yanaparqan sábado hunaqpaq Jehová mandakunqan?

² Pero ¿sábado hunaqqa hamayänanllapaqtsuraq karqan? Manam. Jehoväta adorayänampaqmi más precïsoqa karqan. Tsë hunaqchömi, teytakuna wayinchö kaqkunata yachatsiyaq “Jehová mandakunqanta wiyakuyänampaq, y alli kaqllata rurayänampaq” (Gén. 18:19). Hina familiakuna y amïgokuna ëllukärir o gorikärir Jehová ruranqankunaman yarpäyänampaq y shumaq kariyänampaqmi yanapaq (Isa. 58:13, 14). Hinamampis, sábado hunaqqa rikätsikurqan Jesucristu Waranqa Wata Gobernamuptin imanöpis kawakï kanampaq  kaqtam (Rom. 8:21). Y kanan witsan cristiänokunaqa, ¿imatataq rurashwan Jehoväta más ankash ankashlla servinapaq?

Cristiano mayintsikkunawan ëllukäriqa yanapamantsikmi

3. ¿Imanötaq unë cristiänokuna yanapanakuyaq?

³ Apóstol Pablum congregacionchö kaqkunata ‘mana cuyoq perqano, rasonpa caq yachatsiquicunata defendir quecayanqui’ nirqan (1 Tim. 3:15). Awmi, unë tiempochö cristiänokunaqa huknimpis huknimpis yanapanakuyaqmi. Llapankunam shumaq kuyakïwan parlapänakur kallpata qonakuyaq (Efe. 4:11, 12, 16). Këman yarpärishun, Efeso markachö Pablu këkaptinmi Corintopita cristiänokuna watukayarqan. ¿Imachötaq watukayanqan yanaparqan? Kikinmi kënö willakun: “Estefanas, Fortunato y Acaico [...] yanapayämaptin allapam cushicorqö. [...] Shonqütapis cushitsimur masraq callpata qo[yä]mashqa” (1 Cor. 16:17, 18). Tsënöllam Tïtupis kushikurqan Corinto cristiänokuna shumaq tratayashqa kayaptin, tsëmi pëkunata Pablu nirqan: “Petam tranquiluna cananpaq yanapayarqonqui” (2 Cor. 7:13). Kanampis tsënöllam Jehoväpa testïgonkunaqa llakishqa këkarpis kushikuyan cristiano mayinkunawan watukanakurirqa.

4. ¿Imanötaq reunionkunaman ëwanqantsik yanapamantsik?

⁴ Llapantsikmi musyantsik cristiano mayintsikwan ëllukë kushitsimanqantsikta. Tsëchömi “marcäquinintsiccho mas callpata qonacur jucnintsic jucnintsic yanapanacu[ntsic]” (Rom. 1:12). Cristiano mayintsikkunaqa manam reqinakushqantsikllatsu kayan, sinöqa kuyanqantsik y respetanqantsik rasumpëpa amïgontsikkunam. Y llapan semänakuna reunionchö rikanqantsikmi llakishqa këkaqtapis kushiratsimantsik (File. 7).

5. ¿Imapaqtaq asambleakuna yanapamantsik?

 ⁵ Hina asambleakunaman ëwëpis kushitsimantsikmi. Asambleakunachö Bibliapita yachakunqantsikqa shonquntsikmanmi yakunö chärin, y wakinkunatapis más reqinapaqmi yanapamantsik (2 Cor. 6:12, 13). Pero mantsakoq karqa, ¿imatataq rurashwan manana mantsakunapaq? Asambleakunachö yanapakunqantsikmi yanapamäshun. Atska nacionkunapaq asamblea rurakaptin yanapakoq cristiänam kënö willakun: “Manam familiapita y huk ishkë amïgökunapitaqa mastaqa reqeqtsu kä. Pero pitsapakïchö yanapakurqa atskaq turikunata y nanakunatam reqirqä. Alläpa kushikïpaqmi karqan”.

6. ¿Imatataq rurashwan más kushi kushi Jehoväta servinapaq?

⁶ Israelïtakunaqa Jerusalentam ëwayaq watachö kima kuti Jehoväta adorayänampaq (Éxo. 34:23). Tsëmanqa ëwayaq trabäjonkunata y qatukuyanqankunata haqirïkurmi, hinamampis chakipam atska hunaqkuna ëwayaq. Pero llapan rurayanqampitam temploman chärirqa, “alläpa kushikuyaq [tsëchö këkaqkunawan] Jehoväta alabarnin” (2 Cró. 30:21). Tsënöllam kanan witsan cristiänokunapis alläpa kushikuyan Testïgokunapa sucursalninman familianwan ëwarnin. ¿Manatsuraq qampis churapakärinkiman Betelta reqeq ëwarinëkipaq?

7. a) ¿Imanötaq yanapamantsik cristiano mayintsikwan juntakanqantsik? b) ¿Imatataq rurashwan tsë reunionkuna yanapamänapaq y kushitsimänapaq?

⁷ Cristiano mayintsikkunawan y familiantsikkunawan ëllukanqantsikpis alläpam yanapamashwan. Yachaq rey Salomonmi kënö qellqarqan: “Nunapaqqa, mikurnin upurnin y makinwan alli trabajanqampita kushikïnöqa manam ni imapis más alli kantsu” (Ecl. 2:24). Cristiano mayintsikwan juntakarqa manam kushikuntsikllatsu, sinöqa masmi reqinakuntsik y kuyanakuntsik. Tsëmi, kushikunapaq ëllukanqantsik yanapamänapaq, y shumaq kanqampita yarparänapaqqa, alläpa hatusaq kanantsu, y dirigeq kaqmi rikänan ima mana allipis mana pasakunampaq. Tsënö rurëqa alläpa precïsom, licorta qarakuyänan kaptinnäqa.

Kallpantsik kutikänampaqqa yachatsikunantsikmi

8, 9. a) ¿Imachötaq hukläya Jesuspa yachatsikïnin farisëokunapa yachatsikïninkunapita? b) ¿Imanötaq yanapamantsik Diospita yachatsikunqantsik?

⁸ Jesusqa shonqupita patsëmi yachatsikurqan, y qateqninkunatapis tsënölla rurayänampaqmi yachatsirqan. Kënömi nirqan: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Mat. 9:37, 38). Yachatsikunqanqa, ‘alli willaqui carninmi’ nunakunata alläpa kushitseq (Mat. 4:23; 24:14). ¡Këqa alläpa hukläyam karqan farisëokuna mana cumplipaqtanö yachatsikuyanqampitaqa! (lei Mateo 23:4, 23, 24).

⁹ Diospita yachatsikurninqa, manam wiyamaqnintsikkunallatatsu kushiratsintsik, sinöqa kikintsikpa peqantsikchö y shonquntsikchö kë yachatsikïkuna kanampaqmi yanapamantsik. Tsëmi salmistapis kënö nirqan: “Jähta alabayë, alläpa alli kanqanrëkur müsicawan alabayë Diosnintsikta, pëqa yachanëpaqmi” (Sal. 147:1). ¿Qampis Jehoväpita maslla yachatsikunëkipaq churapakankimantsuraq?

10. ¿Imanirtaq kushikïnintsikqa nunakuna wiyakuyanqampitaraqmi nishwantsu?

¹⁰ Awmi, wakin territoriokunachöqa masmi wiyakuyan (lei Hechos 18:1, 5-8). Vesïnïkikuna Diospita wiyakïta mana munayaptinqa, ama tsëman yarparëtsu, tsëpa rantinqa llapan ruranqëkikunapita kushikï. Y yarpänëkim Diosnintsikpa shutinta  willakunqëki allipaq kanqanta (1 Cor. 15:58). Hinamampis, kushikïnintsikqa manam nunakuna wiyakuyanqampitatsu. Y yarpänantsikmi, kikin Jehovämi alli shonquyoq nunakunata Palabranta wiyakuyänampaq yanapan (Juan 6:44).

Familiachö Diosta Adorana Hora yanapamantsikmi

11. ¿Imata rurayänampaqtaq Jehová mandan teytakunata, y imanötaq rurayanman?

¹¹ Teytakuna, qamkunam wambrëkikunata yachatsiyänëki Jehoväpita y munënimpita (Deu. 11:18, 19). ¿Tiempïkikunata patsätsiyarqunkinaku wambrëkikunata kuyakoq Teytantsikpita yachatsiyänëkipaq? Familiëkikunata shumaq yachatsiyänëkipaqqa, Diosmi yanapayäshunëkipaq awniyäshunki. ¿Imanö? Librokunata, revistakunata, videokunata y wiyanapaq kaqkunatapis atskapa ruratsimurmi.

12, 13. a) ¿Imanötaq yanapakun Familiachö Diosta Adorana Hora? b) ¿Imatataq teytakuna rurayanman shumaq kanampaq?

¹² Hinamampis mäkoq mäkoq cumplido sirveqmi Bibliata estudianapaq Familiachö Diosta Adorana Hörata churamushqa. Atskaq teytakunam willakuyan kë reunionkuna familiachö más kuyanakuyänampaq, huknölla kayänampaq y Jehoväta más kuyayänampaq yanapanqanta. Pero ¿imanötaq kë reunionkunaqa kanman llapampis kushi kushilla wiyakuyänampaq?

¹³ Hinamampis Familiachö Diosta Adorana Höraqa, manam congregacionchö reunionnöraqtsu ni ajayëpaqtsu kanan. Yarpänantsikmi ‘kushishqa Diosta’ sirvenqantsikta, y pëqa munan kushi kushilla adoranantsiktam (1 Tim. 1:11; Fili. 4:4). Bibliapita familiantsikwan yachakunapaq huk paqas kapamanqantsikqa alläpa kushikïpaqmi. Teytakunaqa familian wanayanqanmannömi tukïnöpa yachatsiyanman. Këman yarpärishun, chunka watayoq Brandon shutiyoq wambratam teytankuna niyarqan huk tëmata ruranampaq, tïtulonqa karqan: “¿Imanirtaq Biblia igualatsin Satanasta culëbratawan?”. Culebrata kuyarninmi, culëbratawan Satanasta Bibliachö igualatsinqanta gustaqtsu. Huk familianam, huk puchata Bibliapita akrarir familianta leiyämunampaq o tsëchö ninqannö rurayämunampaq niyan. Kënö yachakïqa manam kushikïllapaqtsu, sinöqa wambrakunatam rikätsin pëkunapis yanapakïkäyanqanta y masmi shonqunkunaman chärin. *

Ama mana precisaqkunawan nitipakäshuntsu

14, 15. a) ¿Imanirtaq alläpa yarparäkurlla y mantsakurlla kë ushanan tiempochö kawakuyan? b) ¿Ima maskunapataq cristiänokuna pasantsik?

¹⁴ Kë ushanan tiempokunachöqa mantsakurllanam y yarpachakurllanam nunakuna kawakuyan. Atska waranqa nunakunapam qellëninkuna pishin o trabäjonnaq kayan. Y trabäjoyoq kaqkunaqa manam ganayanqan qellëta tinkupakuyantsu, imëka uchkushqa  mankaman yakuta winaqpanömi raslla ushakärin (igualaratsi Ageo 1:4-6). Polïticokuna y mundochö mandakoqkunaqa terrorismopita y imëka mana allipita mantsakurllanam kawakuyan. Y wakin nunakunanam mana allita rurayanqampita hipayan (Sal. 38:4).

¹⁵ Jesucristupa qateqninkunapis imëka mana allikunapam pasantsik, y Satanaspa mundonnäqa mana allimanmi churamantsik (1 Juan 5:19). Höraqa hipantsik Jehová Diosta sirvenqantsikpitam. Tsëmi Jesus kënö willakurqan: “Noqata chiquiyämarneqa, qamcunatapis chiquiyäshunquim” (Juan 15:20). Chikir qatikachämashqapis, Diosnintsikqa manam hapallantsikllataqa haqimantsiktsu (2 Cor. 4:9). ¿Imanirtaq tsënö nintsik?

16. ¿Imataq kushishqa kanapaq yanapamantsik?

¹⁶ Jesusmi nimantsik: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi” (Mat. 11:28). Jesus wanunqanman pasëpa markäkurninmi, Jehoväpa makinman kawënintsikta churëkantsik, tsënam “Teyta Diospa” poderninta chaskintsik (2 Cor. 4:7). Hinamampis yanapamaqnintsik santo espïritum kallpantsikta mushoqyätsin. Tsëmi hiparnimpis tsarakuntsik y kushishqa kawakuntsik (Juan 14:26; Sant. 1:2-4).

17, 18. a) ¿Ima rurëkunamantaq ishkishwantsu? b) ¿Imataq pasamashwan munënintsikllata puntaman churashqaqa?

¹⁷ Hinamampis Jehová Diospa sirveqninkunaqa, manam kë mundonö ëtsapa munëninta ashikïllamanqa yarparänantsiktsu (lei Efesios 2:2-5). Tsëkunaman yarpararqa, ‘etsantsicpa mana alli munenincunaman, nawintsic ricanqanta codisyar munapeman, y imantsicpis capamanqantsicta galapäquimanmi’ ishkirishwan (1 Juan 2:16). O itsa, Dios chikinqan rurëkunata rurarqa kushishqam kashaq nishpa pensarishwan (Rom. 8:6). Wakinqa drögata mikuyan, alcoholta upuyan, röpannaq warmita ollquta o rakchakunata rurakïkaqta rikaräkuyan, kawëta peligroman churaq pukllakunata pukllayan y huk mana alli rurëkunatapis kushikuyänanrëkurlla rurayan. Satanasqa, yachëllapam kë mana alli rurëkuna kushikïpaq kanqanta creitsimënintsikta munan (Efe. 6:11).

¹⁸ Awmi, mikïwan, upyë y kushikunapaq imallatapis alleq tanteëkur ruranqantsikqa manam hutsatsu. Tsëpis, manam tsëkunata puntaman churashwantsu. Y kë mana alli tiempokunachönäqa, manam kikintsikpa munënintsiktatsu rurakïkänantsik. Llapan munanqantsikta rurëta munarqa alläpam utirishun, y ‘qela i mana wayoq’ plantanömi tikrarishun (2 Ped. 1:8, QKW).

19, 20. ¿Imatataq rurashwan ankash ankashlla Diosnintsikta servinapaq?

¹⁹ Jehová Dios kushikïkunata rikanqannö rikaq cristiänoqa, musyanmi kë mundochö imëka kaqkunapis raslla pasarinanta. Moisesqa alleqmi musyarqan, y noqantsikpis tsënöllam musyantsik (Heb. 11:25). Diosnintsikta ankash ankashlla kushishqa servita munarqa, mandamanqantsiktam cumplinantsik (Mat. 5:6).

²⁰ Kallpantsik kutikänampaq Diosnintsik mandamanqantsikta rurashun. Tsënöpa “quiquintsicpa munenintsiccunallata manana ruranapaq [...]. Tseno cawacurmi cushishqa shuyaquicantsic Dios änimashqantsicta. Y tse änimashqantsicqa cumplirenqa puedeq Diosnintsic y Salbadornintsic Jesucristu allapa shumaq que patsaman cutimuptinmi” (Titu 2:12, 13). Jesuspa yügonta chaskishun. O mandakoq këninta respetashun, y pushamänantsikta haqishun. Tsëmi yanapamäshun ankash ankashlla y Diosnintsikta kushishqa servinapaq.

[Päginapa ura kuchunchö willakï]

¿Yarpankiku?

• ¿Imatataq kanan witsan cristiänokuna rurayänan kallpankuna kutikänampaq?

• Yachatsikunqantsik, ¿imanötaq noqantsikta y wiyamaqnintsikkunatapis yanapan?

• ¿Imatataq rurayanman teytakuna Familiachö Diosta Adorayänan Hora llapankuna kushishqa yachakuyänampaq?

• ¿Imataq qelanäratsimashwan Diosnintsikpa rurëninta rurakunantsikta?

[Yachakunapaq kaqpa tapukïninkuna]

[28 kaq päginachö dibüjukuna]

Jesuspa yügonqa kushishqatam kawatsimäshun