Kallpata qonakur imëpis yanapanakushun

“Balorta y callpata qonacur quecayanqequinolla jucniqui jucniquicuna quecayë.” (1 TES. 5:11.)

1. ¿Ima bendicionkunatataq congregacionchö chaskintsik, pero imakunatataq si pasantsik?

CONGREGACIONCHÖ këkanqantsikqa imëkachömi yanapamantsik. Jehoväta servirmi kushishqa kawakuntsik, y Palabranta wiyakurmi, wakinkuna llutanta rurayanqampita hipar o ñakar puriyanqannötsu purintsik. Hinamampis alli amïgokunayoqmi kantsik y pëkunaqa kushishqa kanatam munayan. ¡Atska bendiciontam tarintsik! Tsënö karpis, wakin wawqikuna y panikunaqa imëkatam pasayan. Wakimpaqqa sasaran Bibliapa wakin yachatsikïkunata entiendeyänan, y wakinnam, qeshyarnin, alläpa llakinar o imapis mana alli yarqapuptin ñakayan o hipayan. Y kë mana alli mundochöqa llapantsikmi tukïta pasantsik.

2. ¿Imatataq rurashwan wawqintsikkuna o panintsikkuna tukïta pasaptin, y imanir?

² Manam pitapis gustantsu cristiano mayinkuna  tukïta pasar hipayanqanta o ñakayanganta rikëqa. Apóstol Pablu ninqannöpis congregacionqa huk cuerpo cuentam, tsëmi congregacionchö pipis sufriptinqa imëka ‘imantsicpis nanaptin, waquin caq partintsiccuna nanatsicoq’ cuenta noqantsikpis sufrintsik (1 Cor. 12:12, 26). Tsëmi pipis mana allikunata pasaptinqa llapantsik yanapanantsik. Tsërëkurmi punta cristiänokuna tukïta pasar imanö yanapanakuyanqanta Bibliachö rikäshun. Tsëkunata yachakur, kënö tapukushun: “¿Imatataq ruräman pëkunanö yanapakunäpaq? ¿Imanöraq Diospa kaqchö tsarakuyänampaq cristiano mayïkunata yanapäman, tsënöpa congregación alli kanapaq?”.

“Juc laduman pushecur”

3, 4. ¿Imanötaq Apöluta Äquilawan Priscila yanapayarqan?

³ Ëfesoman ëwakurqa alli yachatsikoqnam karqan Apöluqa, tsëmi Hechos libro kënö nin: “Teyta Jesus yachatsicushqancunata allipa[m] musyarqan y shonquncho allapa cushishqam Teyta Jesuspaq rasonpa caqta yachatsicoq”. Pero “bautisacoq Juan yacuwan bautismupaq yachatsiconqanllatam musyarqan”, y “Dios Yayapa, Tsurin Jesucristupa y Santu Espiritupa jutincho” bautizakïpaqqa manam musyarqantsu. ¿Imanir? 33 wata Pentecostés fiesta manaraq kaptinchi itsa Bautizaq Juanpa qateqninkuna, o Jesuspa qateqninkuna yachatsikuyanqankunallata wiyashqa karqan. Alli yachatsikoq karpis, wakin wakintaqa manam musyarqantsu. Pero wakin cristiano mayinkunam yanapayarqan. ¿Imanö? (Hech. 1:4, 5; 18:25; Mat. 28:19.)

⁴ Ëllukäyänan wayichö mana ichikllapis mantsakurnin Teyta Jesuspaq yachatsikoqta Äquilawan warmin Priscila rikarmi, mana yachanqan kaqta yachatsiyänampaq pushakuyarqan (lei Hechos 18:24-26). Tsënömi kuyakoq kayanqanta rikätsiyarqan. Y mana llakinätsirllachi shumaq yanapayarqan. Punta congregación imanö qallanqanta alli musyananmi pishirqan. Alläpachi agradecikurqan mana musyanqan kaqta yacharatsiyaptin. Tsënö yachatsiyashqa kayaptinmi Acäyachö wawqinkunata y paninkunata “allipa yanaparqan” y alli yachatsikurqan (Hech. 18:27, 28).

5. ¿Imanötaq atska millón Testïgokuna nunakunata yanapayan, y imatataq tariyan?

⁵ Kanan witsampis atska millón Testïgokunam Bibliapita yachakuyänampaq yanapayanqan wawqikunata y panikunata alläpa agradecikuyan, y pëkunawan alläpam kuyanakuyan. Atska killakunachi Bibliapita yachatsir kayarqan, pero kushishqachi tiemponta horquyarqan, yachakurnin salvakuyänampaq kaqta musyar (Juan 17:3). ¡Imanöraq kushikïkuyarqan estudiantenkuna rasun kaqta chaskikurnin yachakuyanqannölla ruraqta y Jehoväta serviyänanrëkur bautizakoqta rikar!

 “Pëqa alläpa alli ruraq nunam” niyaqmi

6, 7. a) ¿Imanirtaq viäjenchö yanaqänampaq Timoteuta Pablu akrarqan? b) ¿Imachötaq Timoteu alliyarqan Pablu yanapaptin?

⁶ Ishkë kaq viäjenchömi Pabluwan Silas Listra markaman chäyarqan. Tsëchömi Timoteuta más reqipäyarqan. Y kë jövenqa itsa 20 wataman chëkaq o ichik más watakunayoq karqan, pero “alläpa alli ruraq” niyaqmi Listrachö y Iconiuchö wawqikunawan panikuna. Pëpa maman Eunice y abuëlan Liodaqa cristiänam kayarqan pero teytanqa manam (2 Tim. 1:5). Itsachi Pabluqa kë familiata reqirqan punta kaq viäjenchö Listraman charnin. Pero kanan kaq viäjenchöqa, Diospa kaqchö alli këkaqta rikarmi más yanapakunanta munarqan. Tsëmi anciänokuna alli kanqanta niyaptin, Timoteu më tsë nacionkunapa Diospita yachatsikoq Pabluwan ëwarqan (lei Hechos 16:1-3).

⁷ Timoteuqa Pabluwan viajayanqanchö allichi yachakurqan. Tsëchi Pabluqa pëman yärakur o markäkur congregacionkunata watukanampaq kacharqan. Chunka pitsqa watakunanömi Timoteuqa Pabluwan paqta trabajayarqan, tsënöpam mana alläpa yachaq y mantsakoq joven kashqa karpis, alli yachatsikoq tikrar congregacionkunata visitarqan (Fili. 2:19-22; 1 Tim. 1:3).

8, 9. ¿Imanötaq jövenkunata yanapashwan? Martinta imanö yanapayanqanta willakaramï.

⁸ Kanan witsampis atska joven cristiänokunam Diospa kaqchö tukïta rurëta puëdeyan. Unëpitana Diosta sirveq wawqikuna y panikuna shumaq yanapayaptinqa Diospa kaqchö más rurëta y yanapakïtam munayanqa. Congregacionnintsikllaman pensarishun. ¿Kayanku Timoteunö Diospa kaqchö masta rurëta puëdeq jövenkuna? Mayor kaqkuna shumaq yanapayaptinqa itsa precursor, betelita, misionero o superintendentepis kayanqa. ¿Imanöraq yanapashwan tsëkunaman chëta tïrayänampaq?

⁹ Ishkë chunka wata Betelchö sirveq Martinmi kushikur yarpan huk superintendente de circuito unëna shumaq parlapanqanta. Huk kutish yachatsikoq pëwan yarquyänaq, tsëchöshi joven kar Betelchö trabajanqanta cuentapänaq. Y pënölla Jehoväpa markanchö yanapakïta tïranampaqshi ninaq. Tsënö ninqanmi alläpa yanaparqan Betelita këman chänampaq. ¡Itsa qampis Diospa kaqchö más rurayänampaq jövenkunata yanaparinkiman!

‘Desanimecaqcunata callpata qor yanapecushun’

10. ¿Imataq pasarqan Epafroditota Pablu watukaq ëwanqanchö, y imanir?

¹⁰ Cristiano kanqanrëkur Roma nacionchö carcelarëkaq Pabluta watukaq Filipos congregacionpita  kachayaptinmi, alläpa karuta Epafrodito viajarqan. Apóstol Pablupaq apatsikurmi kachayarqan y imëkata pasanqanchö yanapananrëkurmi Pabluwan këta munarqan. Pero Römaman chärirmi paqwë qeshyakukurqan y ‘ichicllapam wanurirqantsu’. Munanqannö yanapakïta mana pueder y wakinkunata preucupakatseqlla ëwanqanta pensarmi alläpa llakinëwan más qeshyarqan (Fili. 2:25-27).

11. a) ¿Imanirtaq congregacionchöpis llakinëwan qeshyayan? b) ¿Epafrodïtuta imanö yanapayänampaqtaq Pablu nirqan?

¹¹ Kanan witsampis pï mëmi tukïta pasar alläpa llakinëwan qeshyayan. Organización Mundial de la Salud nishqanmi willakun, cada 5 nunakunapita 1 alläpa llakinëwan kawëninchö imë karpis qeshyanampaq kaqta. Diosta sirveqkunapis tsëwan qeshyayanmi. Trabajo mana kaptin, qeshyapäkurnin y mana allitapis rurashqa kar itsa llakishqa purishwan. Epafrodïtutaqa, ¿imanöraq Filipos cristiänokuna kallpata qoyanman karqan? Kënömi apóstol Pablu nirqan: “Chäramuptin Teytantsicman creyicoq mayintsicta cushicur chasquiyanqui. Peno nunacunataqa llapantapis shumaqmi estimayänequi. Pëqa Jesucristuta sirwenqanchomi wanitapis casi tarerqon. Cuentequicuna nesidanïcunata ashimonqanchomi casi bidantapis oqrarqon” (Fili. 2:29, 30).

12. ¿Imanöraq yanapashwan alläpa llakinëwan qeshyaqkunata?

¹² Noqantsikpis shumaq parlaparmi wamayashqa y alläpa llakinëwan qeshyaq cristiano mayintsikkunata yanaparishwan. Allim yarpäratsishwan Jehoväpa markanchö alli rurayanqankunata. Bautizakuyänanrëkur o llapan tiemponkunawan Diosta serviyänanrëkur itsa imëkakunata haqiyarqan. Rurayanqankunapita Jehová y noqantsikpis alläpa kushikunqantsiktam nirishwan. Wakin wawqintsikkuna y panintsikkuna edäna kar o qeshyapäkurnin puntatanöna mana rurayaptimpis, respetanantsikmi Jehovärëkur llapan rurayanqampita. Tukïta pasayaptimpis, llapantsikmi Jehová kënö ninqanta wiyakunantsik: ‘Desanimecaqcunata, y qepaman cuticaqcunata callpata qor yanapecuye, y llapan nunacunatapis shumaq pasensiequicunawan ricaye’ (1 Tes. 5:14).

“Perdonecur callpata qor yanapecuyë”

13, 14. a) ¿Imatataq rurayarqan Corinto congregacionchö hutsa ruraqta, y imanir? b) ¿Imanirtaq qarquyanqan alli karqan?

¹³ Corinto congregacionchömi huk wawqi hutsa rurëllachö kawakïkarpis wanakurqantsu. Mana alli ruranqanmi congregacionta rakchatëkarqan y mana cristiano nunakunapis mana allitam parlayaq. Tsëmi congregacionpita qarquriyänampaq nirqan Pablu (1 Cor. 5:1, 7, 8, 11-13).

¹⁴ Tsëta ninqanqa allipaqmi karqan. Tsënöpam mana alli rurëninta congregacionta muyarqantsu y hutsanta haqirmi shonqumpita wanakunqanta rikätsikurqan. Tsëmi ishkë kaq cartanchö corintokunata Pablu nirqan congregacionchö yapë chaskiyänampaq. Pero manam tsëllatatsu nirqan, hina “perdonecur callpata qor yanapecuyë. Paqtam llaquishqa puricaqta imapis pasecanman. Tsemi llapequita rogayaq yape shumaq cuyaquiniquicunawan tratayänequipaq” nirqanmi (lei 2 Corintios 2:5-8).

15. ¿Imanötaq rikashwan hutsankunapita wanakur congregacionman kutimoqkunata?

¹⁵ Tsë pasanqan imata yachatsimanqantsiktapis rikärishun. Pitapis congregacionpita qarquyaptinqa alläpam llakinantsik. Hinamampis Diospa shutinta y congregacionta itsa penqakïman churashqa y noqantsiktapis mana allita ruramashqantsik. Pero ¿imataq pasan hutsa ruraq congregacionman kutimïta munaptinqa? Anciänokunam pëwan parlayanqa. Hutsampita rasumpa wanakushqa kanqanta rikar yapë kutimunampaq allina kanqanta niyanqanmi, Jehoväpis hutsampita perdonashqana kanqanta rikätsikunqa (Mat. 18:17-20). Jehová  perdonashqana këkaptinqa, ¿manatsuraq noqantsikpis tsënölla rurashwan? Kutimushqana këkaptin mana alli rikarqa Jehoväpa contranchi këkashwan. Cristiänokunaqa munantsik llapantsik yamë y kushishqa këta y Diospa rikënimpaq alli këtam. Tsëmi huk hutsa ruraq wanakurnin kutimuptinqa, ¿manaku ‘shumaq cuyaquiwan tratashwan’? (Mat. 6:14, 15; Luc. 15:7.)

“Pemi alli canqa”

16. ¿Imanirtaq Pablu Marcoswan piñashqa karqan?

¹⁶ Huk pasanqanmi yachatsimantsik imatapis ruramaqnintsikkunawan mana piñashqalla kakunapaq. Juan Marcosmi huk kuti Pabluta piñatsirqan. Pabluwan Bernabe viajar qallaptinmi Juan Marcos pëkunata yanapananrëkur yanaqarqan. Pero huk kutiqa pëkunata haqirirmi wayinta kutikurqan y manam musyëtsu imanir tsëta ruranqan. Pero Pabluqa alläpam tsë ruranqanta piñakurqan. Tsëmi ishkë kaq viäjenkunapa yarqur Marcos yapë pëkunawan ëwananta mana munar Bernabëwan qayapänakuyarqan. Punta kaq viäjenchö ruranqanta manam qonqashqatsu kanaq (lei Hechos 13:1-5, 13 y 15:37, 38).

17, 18. ¿Imanötaq musyantsik Pabluwan Marcos problëmankunata altsayanqanta, y imatataq tsëpita yachakuntsik?

¹⁷ Pablu apëta manana munaptimpis, manam tsëpita llakikurllatsu karqan Marcosqa, antis Benabëwanmi huk markakunapa ëwar yachatsikur kayarqan (Hech. 15:39). Markäkïpaq y alli yachatsikoqmi karqan, tsëchi watakuna pasariptin Pablu alabarqan. Tsëmi Roma nacionchö Pablu carcelarëkar Timoteu watukaq ëwanampaq cartakurnin këtapis nirqan: “Marcosta [...] pushamï, porqui pemi alli canqa Diospa palabranta willapäcunanpaq” (2 Tim. 4:11). Rikanqantsiknöpis Pabluqa Marcos alli cristiano kanqanta rikar masmi kuyarqan.

¹⁸ Kë pasanqampitaqa noqantsikpis yachakushwanmi. Pablu manana pushanqampita piñakur llapanta haqirinampa rantinqa, alli cristiano këtam yachakurqan, tsëmi alli yachatsikoq tikrarqan Marcos. Ishkampis Diospa kaqchö alli karninmi llakitsinakuyanqanta yarparäkuyarqantsu. Tsëpa rantinqa, Marcos alli yanapakoq kanqantam apóstol Pablu tsëpita nirqan. Kanan witsankunapis, ¿imataraq rurashwan huk cristiano mayintsikwan imata llakitsinakunqantsiktapis altsashqana karqa? Paqwënam qonqëkunantsik y wakinkunatam más yanapanantsik Diospa kaqchö más alliyäyänampaq. Imachöpis perdonakoq karninqa congregación alli kanampaqmi yanapakushun.

Congregacionchö llapantsik yanapanakushun

19. ¿Imanötaq huknintsik huknintsik yanapanakushwan?

¹⁹ Kanan witsan “allapa sasa cawaqui tiempucuna” kaptinmi, wawqintsikkuna y panintsikkuna yanapamänata imëpis wanantsik, y pëkunapis wanayanmi yanapanantsikta (2 Tim. 3:1). Huk cristiano problëmankunata imanö altsëta mana yachaptimpis Jehoväqa yachanmi. Pëqa congregacionchö mëqan sirveqninwampis yanaparinmanmi, y itsa qamwampis yanaparinman (Isa. 30:20, 21; 32:1, 2). Tsëmi “balorta y callpata qonacur quecayanqequinolla jucniqui jucniquicuna quecayë” nir Pablu yarpätsikunqannölla ruranapaq llapantsik kallpachakunantsik (1 Tes. 5:11).

¿Ima ninkimanraq?

• ¿Imanirtaq huknintsik huknintsik kallpata qonakushwan?

• ¿Imakunatataq wakin cristiano mayintsikkuna pasayan, y imanötaq yanapashwan?

• ¿Imanirtaq wakin cristiano mayintsikkuna yanapamänata wanantsik?

[Yachakunapaq kaqpa tapukïninkuna]

[13 kaq päginachö dibüju]

Imëkata pasayaptimpis cristiano mayintsikkunata yanapashun

[14 kaq päginachö dibüju]

Atska joven cristiänokunam tukïta rurëta puëdeyan