Cosecha ëllïchö yanapakushun

“Llapan voluntäniquiwan imaycatapis Dios Yayalläpag rurayanqui.” (1 COR. 15:58, NTCN.)

1. ¿Imapaqtaq Jesus qateqninkunata invitarqan?

KIMA CHUNKA watapa ushanan witsanmi, Samaria markapa ëwëkar Jesus Sicar markaman chärir qocha lädonchö hamarirqan, tsëchömi qateqninkunata kënö nirqan: “Alleq cäyiyë. Chacracunacho miquicuna elluyänequipaq poqurishqa cuentam nunacuna quecayan” (Juan 4:35). Rikanqantsiknöpis, manam chakrachö mikï ëllupakïpaqtsu Jesus parlëkarqan, sinöqa qateqnin këman chäyänampaq alli shonquyoq nunakunata ëllïpaq o gorïpagmi parlëkarqan. Awmi, nunakunata yachatsiyänampaqmi invitarqan, y atskam rurëninkuna karqan, y manam alläpa tiempo karqannatsu.

2, 3. a) ¿Imataq rikätsimantsik cosecha ëllïpaq tiempochö kawëkanqantsikta? b) ¿Imatataq kë artïculochö yachakushun?

² Jesus ninqanta wiyakunantsikqa alläpam precisan, nunakuna grano mikïnö ëllïpaqna këkäyaptin, awmi, ‘ellunapaq poqurishqa cuentanam’ këkäyan. Y llapan watakunam atska millón nunakunata qayëkantsik kawatsikoq yakuta upuyänampaq, y atska waranqa nunakunam kë yakuta upoq cuenta Bibliapita yachakïkäyan y bautizakïkäyan. Alläpa kushikïpaqmi Patronnintsik Jehová ninqannö imëpitapis más hatun cosëchachö nunakunata ëllunapaq yanapakunqantsikqa. Tsëmi kënö tapukunantsik: “¿Llapan voluntadnïwanku Dios Yayapaq rurëka?” (1 Cor. 15:58).

³ Kima wata pullan kë Patsachö këkarmi qateqninkunata yachatsirqan más nunakunata ëlluyänampaq. Kë artïculochömi rikäshun Jesuspa más precisaq kima yachatsikïninta. Y cada yachatsikïmi cosëchachö yanapakïta munaq kaqta yanapamäshun. Hukllapa hukllapa kimanta rikärishun.

Alläpa precïsom humilde kë

4. ¿Imanötaq Jesus yachatsikurqan humilde kë alläpa preciso kanqanta?

⁴ Këman yarpärishun: Jesuspa qateqninkunam plëtuyarqan mëqampis más precisaq kayanqanta. Itsachi piñashqallaraq o ajätsinakushgallarag këkäyarqan. Tsënam Jesusqa huk wambrata qayarir pëkunapa chöpinman shäkaratsirqan. Y qateqninkunata rikäratsirnam kënö nirqan: “Que wamrano juclaya ticraqcunallam Diospa mandaquininman yecuyanqa” (lei Mateo 18:1-4). Diosta mana serviq nunakunaqa allitanö rikäyaq kapoqyoq kaqkunata reqishqa kaqkunata y mandakoq kaqkunatam, pero Jesuspa qateqninkunaqa tantiayänanmi karqan “wamrano” humilde kë alläpa preciso kanqanta. Y más cargota chaskiyänampaq y Jehová bendecinampaqqa, humildem kayänan karqan.

5, 6. Jehoväpita más yachatsikunapaq, ¿imanötaq yanapamantsik kapamanqantsikllawan kawakï? Willakaramï.

⁵ Kanampis unënöllam nunakunaqa tïrayan kapoqyoq këta, reqishqa këta y mandakoq këta. Tsëmi Diosta ashiyänampaq ni tiemponkunapis kannatsu (Mat. 13:22). Pero Jehoväta sirveqqa musyanmi bendicionninta y kuyakïninta chaskinampaq wambranö humilde kayänan alläpa preciso kanqanta. Awmi, cristiänokunaqa tsënö këtam imëpis ashiyan (Mat. 6:24; 2 Cor. 11:7; Fili. 3:8).

 ⁶ Sudamericana congregacionchö dirigeq Francisco ruranqanta rikärishun. Joven këkarmi universidadchö estudionta haqirirqan precursor kanampaq. Tsëpitanam casakurirqan y kënömi willakun: “Alli kawayänäpaq alli trabäjota ashïmanmi karqan. Pero llapan tiempökunawan Jehoväta servita munarmi, kapayämanqanllawan kawakuyänäpaq churapakäyarqä. Tsëpita wambrakuna kariptinnam gananqä tinkurqannatsu. Pero Jehovämi yanapayämarqan pëta imëpis serviyänäpaq. Kima chunka watapitapis masnam anciano kä y más cargokunatapis chaskirqömi. Manam ni imëpis tsënö kawakuyanqäpitaqa pësakuyarqütsu”.

7. ¿Imanötaq Romanos 12:16 ninqanta wiyakïkanki?

⁷ Kë mundochö ‘alli tucoq queta’ mana ashir y ‘qollmi shonqulla’ kashqaqa, atska bendiciontam chaskishun y Jehoväpa rurëninchömi más yanapakushun (Rom. 12:16; Mat. 4:19, 20; Luc. 18:28-30).

Alli trabajarqa atska bendicionkunatam chaskishun

8, 9. a) Talentokunapaq yachatsikïta ichikllachö willakaramï. b) ¿Pikunatataq yanapanman kë talentokunapaq yachatsikï?

⁸ Cosecha ëllupakïchöqa alli trabajëmi alläpa preciso. Tsëtam Jesus yachatsikurqan talentokunapaq parlarnin. * Tsëchömi parlan karu markata ëwakoq patronpaq y kima trabajaqninta atska qellëta o talentokunata rakipunqampaq. Punta kaqtam qoykurqan pitsqa talentota, huknintanam ishkëta y qepa kaqtanam hukta. Patronnin ëwakuptinnam, ishkan nunakunaqa hinan hora qellëwan negociar qallëkuyarqan. Pero kima kaq nunanam qela karnin patsata uchkïkur qellëta pampëkurqan. Patrón kutiramurnam ishkan trabajadorninkunata “mas jatun cargu[cunaman]” churarqan. Pero kima kaqtaqa, qonqan talentota qechurirmi wayimpitapis qarqurirqan (Mat. 25:14-30).

⁹ Awmi, llapantsikmi Jehoväpita yachatsikïchö alli trabajadorkunanö këta munantsik. Pero itsa höraqa wakinkunanö rurëta puëdeshwantsu. Y familiata manteninapaq qellënintsik pishiptin más hörakuna trabajëta tïrashwan. O itsa joven kanqantsiknöqa kallpantsik ni saludnintsik kannatsu. Tsënö kaptinqa, talentokunapaq yachatsikïmi yanapamäshun.

10. ¿Imanötaq patrón rikätsikurqan trabajaqninkuna rurëta puëdeyanqanmannölla mañanqanta, y imatataq kë yachatsimantsik?

¹⁰ Kë yachatsikïchö patronqa, kiman trabajaqnin igual mana trabajayanqanta musyaqmi,  tsëmi “segun negosiu rureta yachayanqanmanno” qellëta rakipurqan (Mat. 25:15). Alli trabajaq kanqanmannömi punta kaq trabajadorqa huknin trabajadorpitapis más qellëta miraratsirqan. Pero alli kaq trabajaqnintanömi “alli sirwimaqnïmi canqui, y llapan nenqaqtam cumplerqonqui” nir alabarirqan, y imëkankunatapis rikänampaqmi más cargon qorirqan (Mat. 25:21, 23). Tsënöllam, cosëchapa Dueñon Jehoväpis musyan imakuna rurëta puëdenqantsikta. Servinarëkur llapan kallpantsikwan ruranqantsiktam rikëkan, y wananqantsikkunataqa manam pishitsinqatsu (Mar. 14:3-9; lei Lucas 21:1-4).

11. Wakinkuna tukïta pasëkarpis Diosnintsikta imanö serviyanqampita willakaramï.

¹¹ Brasil nacionchö täraq Selmira shutiyoq cristiana pasanqanta rikärishun. Pë pasanqanmi rikätsimantsik Jehoväta servinapaq alli tiempotaraq y alli kawakïtaraq mana shuyaränata. Ishkë chunka watanam pasarishqa suwakuna qowanta wanuratsiyanqan, tsëmi kima warmi wambrankunata hapallanlla wätanan karqan. Y huk wayichö empleada karmi atska hora trabajaq, y trabäjonman chänampaqmi karuta kichki cärrokunachö viajaq. Tsënö këkarpis precursor regular kanampaqmi churapakarqan, y ishkë wambrankunapis precursora këmanmi chäyarqan. Kë cristiänam willakun: “Kananyaqqa, ishkë chunkapitapis más nunakunatam Bibliapita yachatsirqö, y familiänönam kayan. Kananyaqmi kuyayämanqanta y yanasäkuna kayanqanta kushikü. Manachi kë patsachö llapan örowampis tsëta rantita puëdëmantsu”. Rikanqantsiknömi, Diosnintsikqa alli sirvenqampita Selmïrata bendecishqa.

12. ¿Imatataq rurashwan más alli yachatsikunapaq?

¹² Manam llapantsiktsu llapan tiempontsikwan yanapakïta puëdentsik. Pero llapantsikmi sinchikunantsik alli yachatsikunapaq. Diospa Gobiernompita Yachatsikunapaq reunionchö yachakunqantsikta rurashqaqa, mëchö tsëchö këkarnimpis allim yachatsikïta tïrashun (2 Tim. 2:15). Hinamampis, congregación patsätsinqan hora yachatsikoq yarqunapaqqa, itsa mana precisaq rurëkunata o huk hunaqchö rurëta puëdenqantsikta haqirishwan (Col. 4:5).

13. ¿Imataq yanapamäshun Diospita alli yachatsikunapaq?

¹³ Shonqupita patsë Jehoväta kuyarqa, pëpitam más yachatsikïta munashun (Sal. 40:8). Tsë qela esclävoqa patronnintam mantsaq, y rurëta mana puëdenqanta mañëkaqtanömi rikaq. Tsëmi patronnin qonqan qellëta negociar miratsinampa rantin pakëkurqan. Kë qela nunanö mana kanapaqqa, Jehová Diospita llapan hunaq yachakunqantsikmi yanapamäshun. Diosnintsik kuyakoq, mana piñakoq, ankupäkoq, llakipäkoq kanqampita yachakunapaq tiempota horqarqa, shonqupita patsëmi Diosta servir qallëkushun (Luc. 6:45; Fili. 1:9-11).

“Jutsannaq cayë”

14. ¿Imataraq rurayanman cosecha ëllïchö yanapakïta munaqkuna?

¹⁴ Escrituras Hebreaspita parlarmi apóstol Pedru, Diospa sirveqninkuna imanö kayänantapis nirqan: Acramaqnintsic Diosqa jutsannaqmi. Tsenollam noqantsicpis jutsannaq canantsic, allicunata rurarnin; porqui Diospa palabranmi queno escribirëcan, “Jutsannaq cayë, noqa jutsannaq cashqäno” (1 Ped. 1:15, 16; Lev. 19:2; Deu. 18:13). Kë textom rikätsimantsik cosëchata ëlloqkuna kawëninkunachö y Diosta adorayanqanchö limpio kayänanta. Y tsëpaqqa paqakunantsikmi. ¿Imataq limpioyätsimäshun? Rasumpa kaqta yachatsikoq Diospa Palabranmi.

15. ¿Imapaqtaq Diospa Palabran yanapamantsik?

¹⁵ Bibliaqa limpioyätsikoq yakutawanmi Diospa Palabranta tinkutsin. Apóstol Pablum qellqarqan Cristu novianta o ciëlota ëwaqkunata “yacuwan paqareq cuenta  limpiar[inqanta]”, tsënöpa “allapa shumaq imeca mana manchayoq” Jehoväpa rikënimpaq kayänampaq (Efe. 5:25-27). Y unëpitanam Jesuspis qateqninkunata Diospa Palabran limpiakunqanta kënö nirqan: “Qamcunaqa rämapärishqa cuentanomi limpiuna cayanqui noqa yachatsishqa cayapteq” (Juan 15:3). Awmi, Diospa Palabranqa limpioyätsimantsikmi kawënintsikchö y Diosta adoranqantsikchöpis. Sirvenqantsikta Dios chaskinampaqqa, alläpa precïsom Palabrampa yachatsikïnin limpioyätsimänata haqinantsik.

16. ¿Imatataq rurashwan portakïnintsikchö y Diospaq limpio kanapaq?

¹⁶ Yachakunqantsiknöpis, cosëchachö yanapakïta munarqa, puntatam mana alli rurëkunata y mana alli creenciakunata haqiyänan. Y Jehoväpita imëpis yachatsikïta munarqa, Teyta Diospa Leynintam wiyakuyänan y allim portakuyänan (lei 1 Pedru 1:14-16). Limpio këta munëwan imanömi taqshakuntsik, pitsapakuntsik y imëkatapis rurantsik, tsënöllam limpio kawanapaqpis Diospa Palabrampita yachakunapaq sinchikunantsik. Tsëtaqa rurantsik Bibliata leir, reunionkunaman ëwar y yachakunqantsiknö kawarmi. Tsënöpam kë mundochö tukï hutsakunaman mana ishkinapaq listo këkantsik (Sal. 119:9; Sant. 1:21-25). ¡Imanömi kushikuntsik Diospa Palabranwan hutsa ruranqantsikkunapita “limpiu” këman chanqantsikta! (1 Cor. 6:9-11.)

17. ¿Limpio kawakunapaq Bibliachö ima ninqantataq wiyakunantsik?

¹⁷ ¿Llapan shonquntsikwanku munantsik Diospa Palabran kawënintsikta altsananta? Këkunaman yarpärishun. Müsicata wiyanqantsik, libro leinqantsik o televisionchö rikanqantsik mana alli kanqanta huk cristiano willapämashqa, ¿wiyakuntsikku? (Sal. 101:3.) ¿Estudiochö y trabäjochö mana alli yanaqikunapita rakikëta tïrantsikku? (1 Cor. 15:33.) ¿Hutsaman ishkitsikoq mana alli munëkunata rasllaku shonquntsikpita horqarintsik? (Col. 3:5.) ¿Polïticakunapita rakikantsikku, y nacionnintsik huk nacionkunawan pukllaptin ima markapitapis kanqantsikta alabakuntsikku? (Sant. 4:4.)

18. ¿Imapaqtaq yanapamäshun Diospa kaqchö y kawënintsikchö limpio kanqantsik?

¹⁸ Dios ninqanta wiyakurqa masmi cosecha ëllichö yanapakushun. Qateqninkunata üvaspa rämanwan tinkutsirmi Jesus kënö nirqan: “Noqapa rämäcuna mana wayuptenqa, Papänïmi limpu rämacacharcur jitarenqa. Wayoq caq rämacunataqa allapa atsca wayünanpaqmi shumaq rämapärenqa” (Juan 15:2). Diospa Palabranwan yakuwannö paqakurqa, noqantsikpis allim wayushun.

Kanan, y shamoq kaq bendicionkuna

19. ¿Jesuspa qateqninkuna ima bendicionkunatataq chaskiyarqan?

¹⁹ Jesuspa qateqninkunaqa, 33 wata Pentecostés fiestachömi santo espïrituta chaskiyarqan, ‘tsenam Jesus rurashqancunata willacurnin puriyarqan y jinantin munduyaq chäratsiyarqan’ (Hech. 1:8). Tsë qateqninkunam yanapakuyarqan “mechopis tsechopis” Diospita yachatsikurnin, y Punta Cristiänokunapa Pushaqninkuna këman, misionero këman y anciano këmampis chäyarqan (Col. 1:23). Tsëmi tukï bendicionta chaskiyarqan y nunakunatapis kushitsiyarqan.

20. a) ¿Ima bendicionkunatataq chaskirqunki cosecha ëllichö yanapakunqëkipita? b) ¿Imata ruranapaqtaq sinchikushwan?

²⁰ Humilde karqa, alli yachatsikurqa y  Diospa Leyninta wiyakurqa imëpis yanapakïkäshunmi Diospa cosëchanchö. Kë mundochö nunakuna kikinkunapa munëninkunata ashikur y qellëllapaq pasëpa yarparäkur kawakuyaptimpis, noqantsikqa manam tsëkunaman yarparäkurtsu kawakuntsik, tsëpa rantinqa Jehová qomanqantsikwanmi kushi kushi kawakuntsik (Sal. 126:6). “Pay munanganta rurarnin cawacun[gantsic] manam envänutsu canga”, tsëmi kushikïpaqqa (1 Cor. 15:58, NTCN). Y cosëchapa Dueñon Jehovämi, shutinrëkur trabajanqantsikpita bendecimäshun (Heb. 6:10-12).

[Päginapa ura kuchunchö willakï]

¿Yarpankiku?

• ¿Imanirtaq humilde kë alläpa preciso cosëchachö alli trabajanapaq?

• ¿Imataq yanapamäshun mana qelanashpa yanapakunapaq?

• Cosëchata ëllïkarqa, ¿imanirtaq Diospa kaqchö y kawakïnintsikchö limpio kanantsik?

[Yachakunapaq kaqpa tapukïninkuna]

[25 kaq päginachö dibüju]

Humilde këmi yanapamantsik Diospa kaqta puntaman churanapaq