Hutsapita rasun kaq yachatsikï

¿QESHYËKAQ nuna fiebrempita kachakärinmantsuraq termömetrota pakirirlla? Manam. Hina tsënöllam Dios mandanqankunata nunakuna mana kaqpaq churayanqanqa hutsa rurëta ushakäratsintsu. Hutsapita rasun kaqta musyanapaqqa Bibliapitam yachakunantsik, tsëtam qateqninchö rikärishun.

Llapantsikpis mana allita ruraqmi kantsik

Apóstol Pablum llakishqa kënö nirqan: “Allita rureta munanqäcunataqa manam rurätsu. Antis mana munecarpis, mana allicunatam siempri rurarï” (Romanos 7:19). Rasun kaqchöqa llapantsikmi pë ninqannölla këkantsik. Itsa Chunka Mandamientokuna ninqannö o wakin alli rurëkunata yachakunqantsiknö kawëta tïrantsik, pero imëpis mana allikunatam rurantsik. Y manam ardëpatsu, sinöqa ëtsantsik mana alliman apamashqam. ¿Imanirtaq mana alliman apamantsik? Pablum kënö nin: “Mana allicunata[qa] quiquïnatsu rurä. Sinoqa que debil etsämi jutsa rurellacho yachacashqa car ruratsiman” (Romanos 7:20).

Rasun kaqchöqa, llapantsikmi mana alli ruraq kantsik, y tsëmi rikätsikun hutsayoqllana llapantsikpis yurinqantsikta. Apóstol Pablu ninqannöpis, “llapantsicmi jutsayoqqa quecantsic. Tsenopam Diospa shumaq queninpita melanepaq caquicantsic”. Y, ¿imanöpataq tsënö këkantsik? Hina apóstol Pablum tsëta kënö nir willamantsik: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Romanos 3:23; 5:12).

Wakinkunaqa manam creiyantsu punta teytantsikkunapa culpan hutsayoqllana yurikushqa kar, Diospita karuchö këkanqantsikta y mana cäbeqta ruranqantsikta; pero Bibliaqa tsëtam yachatsikun. Jesuspis Génesis libropa qallanan capïtulonkunapita parlarqanmi, tsënömi Adanpaqwan Ëvapaq Biblia willakunqanman creinqanta rikätsikurqan (Génesis 1:27; 2:24; 5:2; Mateo 19:1-5).

Bibliaqa yachatsikun, nunakunarëkur Jesus Patsaman shamunqanta y wanunqanman markäkoqkuna perdonashqa kayänampaq kaqtam (Juan 3:16). Kikintsikllaqa manam hutsapita salvakushwantsu, tsëmi shamoq tiempochö alli kawakunapaqqa noqantsikrëkur Jehová ruranqampita agradecikunantsik. Pero hutsata Diosnintsik imanö rikanqanta mana musyarqa, manam agradecikushuntsu ni käyishuntsu o mayashuntsu Jesus imanir wanunqanta.

¿Imanirtaq Jesus noqantsikrëkur wanunanta wanarqantsik?

Wiyakoq karqa, imëyaqpis kawakunampaqmi Adanta Jehová nirqan. Pero mana wiyakurninmi hutsayoq tikrarirqan (Génesis 2:15-17; 3:6). Diosnintsik ninqanta mana cäsukurninmi hutsannaq këta y Dioswan alli këtapis oqrarirqan. Hinamampis, awkinyarmi wanurqan. Tsënöpam llapan wambrankuna hutsayoqllana yurintsik, y pë pasanqanllata llapantsikpis pasantsik. Pero ¿imanirtaq noqantsikpis tsëpa pasanantsik?

Hutsasapa nunapitaqa, manam hutsannaq wambra yurintsu. Tsëmi Adanpa llapan tsurinkuna hutsayoq kantsik, y Pablu ninqannöpis, “Jutsapa pägunqa waniymi” (Romanos 6:23, QKW). Pero “Diospa qarëninqa wiñeypaq  kawëmi Señornintsik Jesucristorëkur” nirqanmi hina. Tsëmi rikätsimantsik Jesus noqantsikrëkur wanunqanman paqwë markäkur y Diosnintsikta wiyakurninqa, Adan hutsa ruranqampita salvashqa kanapaq kaqta (Mateo 20:28; 1 Pedru 1:18, 19). * Tsëqa, ¿imatataq noqantsik ruranantsik?

‘Jesucristu cuyamanqantsicrecurmi munashqanno cawanantsic’

Santo espíritu yanapaptinmi apóstol Pablu kënö nir qellqarqan: “Jesucristu cuyamanqantsicrecurmi peta shonqucurcur munashqanno cawantsic. Jesucristum llapantsicpaq wanorqan. [...] Tsemi wanushqa cuenta quecarnin, quiquintsicpa munenintsictaqa manana rurashwannatsu; sinoqa pe munashqanllatanam rurashwan. Porqui tsepaqmi wanurir cawarimushqa” (2 Corintios 5:14, 15). Jesus noqantsikrëkur wanunqan hutsapita salvamänantsikta alli musyar y tsëpita agradecikunqantsikta rikätsikïta munarqa, Dios munanqannö kawakïtam tïranantsik. Tsëmi Diosnintsik mandakunqankunata yachakunantsik, Biblia ninqanman imëpis yarpänantsik, y yachakunqantsiknö cada hunaq ruranantsik (Juan 17:3, 17).

Yarpäshun, mana alli rurëkunaqa Jehoväpitam rakiramantsik. Y tsëmi rey Davidtapis pasarqan, pëqa Bat-seba nishqan warmiwanmi punukïkurqan y pëmi rurarqan nunanta wanutsiyänampaqpis. Llapan mana alli ruranqanta cuentata qokurirqa alläpa penqakurmi llakikurqan. Pero masqa llakikurqan Jehová chikinqanta ruranqampitam. Tsëmi paqwë wanakur nirqan: “Qamta, qamllatam hutsallakur llakitsirqoq, nawiki chikinqantam rurarqö” (Salmo 51:4). Hina Jose pasanqampis tsëtam rikätsimantsik. Casada warmi pëwan punukikïta munaptinmi, conciencian “¿imanöraq kë mana allita rurarnin Diosta llakitsir hutsallakïköman?” nir tapukatsirqan (Génesis 39:9).

Rikanqantsiknöpis, piwampis lluta punukur, suwakur, mana respetakoq kar, Diosta lluta adorar y leyninkunata mana wiyakurnin hutsata rurëqa, manam taripïkamashqa penqakïllamantsu apamantsik. Ni imanir  llutanta ruranqantsikpita wakinkunata willëllamantsu. Tsëkunapita más mana alliqa, Dioswan alli kënintsikta oqratsimanqantsikmi. Y ardëpa kutin kutin hutsata rurarqa Diospa chikeqninmi tikrantsik. Këkunataqa manam pipis ichikllapaq churanmantsu (1 Juan 3:4, 8).

Yarpärishun qallanan yachatsikïchö tapukïman: “¿Rasumpatsuraq mana alli rurëkuna hutsanatsu?” Manam. Sinöqa nunakunam mana alli rurëkunata hutsatanönatsu rikäyan. Pï mëmi conciencian ninqanta paqwë wiyakuyannatsu. Pero Diosnintsikta kushitsita munarqa manam tsënötsu kanantsik. Rikanqantsiknöpis, hutsaqa manam penqakïllamantsu ni mana alli sientekïllamantsu apakun. Wanïmanmi.

Hutsantsikpita rasumpa wanakur y manana yapë rurarninqa perdonta chaskita puedentsikmi. Apóstol Pablum kënö nirqan: “¡Cushicuyätsun, jutsancunata qonqarïcur Diosnintsic perdonashqa caqcuna! ¡Cushicuyätsun pipis jutsata rurayanqanpita Dios mana culpatsaptin!” (Romanos 4:7, 8).

[Päginapa ura kuchunchö willakï]

[10 kaq päginachö recuadru y fötu]

Yachatsikïninkunata ushakäratsiyan

Casi llapan catölicokunam limbo ima kanqanta allillaqa imëpis käyiyashqatsu o mayayashatsu. Qepa watakunataqa, manam alläpaqa tsëpaq parlayashqanatsu, y catesismo libronkunachöpis kananqa manam kannatsu. 2007 watachömi limbo nishqan “sitiota ushakätseq” documentota Iglesia Católica firmashqa, tsë documentochömi niyan “Diospita y religionpa costumbrenkunata alli estudiashqa kar, manaraq bautizakur wanoq wambrakuna salvakuyänampaq kaqta y imëpis kushishqa kawakuyänampaq kaqta shuyä[yanqanta]” (Comisión Teológica Internacional).

¿Imanirtaq tsë creenciankunata ushakätsiyashqa? Huk periödicopaq trabajaq Francia nacionpita Henri Tincq ninqannöpis, “teytakuna wambrankunata ras bautizatsiyänanrëkur punta watakunapita 1900 watakunayaq Iglesia yachatsikunqan mana alli creencia[pita]” librakuyänanrëkurmi. Pero tsë yachatsikïninkunata ushakäratsiyanqanqa huk tapukïkunatanam yuritsimun.

Biblia mana yachatsikunqantam creiyaq Limbo nishqanman creenciaqa qallarqan 1100 watakunachö teölogokuna purgatoriopaq paralayanqampitam. Nuna wanuptin alman kawëkanqantaraq yachatsikushqa karmi, Iglesia Catölicaqa, manaraq Bautizakushqa wambrakuna ni ciëloman ni infiernoman mana ëwayänan kaptin mëman ëwayänampaq kaqtapis yachatsikïta wanayarqan. Tsëmi limbo nishqan creenciata yuritsiyarqan.

Pero Bibliaqa manam yachatsikuntsu nuna wanuriptin imanllapis kawëkanqanta. Antis clärom willakun almaqa ‘wanoq’ y ‘ushakaq’ kanqanta (Hechos 3:23, NM; Ezequiel 18:4). Tsëmi Limboqa rasun kaq yachatsikïtsu. Hinamampis, Bibliaqa yachatsikun wanushqakuna manana imatapis mäkuyanqanta, y imëka paqwë punukashqa cuenta këkäyanqantam (Eclesiastés 9:5, 10; Juan 11:11-14).

Y Bibliaqa yachatsikun, cristiänokunapa wambrankuna Diospa rikënimpaq santo kayanqantam (1 Corintios 7:14, QKW). ¿Biblia tsëta ninmantsuraq salvakuyänanrëkur wambrakuna bautizakuyänan precisaptinqa?

Limbo nishqanman creiqa, Dios alläpa chiki kanqanta crei cuentam. Diosnintsik kuyakoq y alli kaqllata ruraq Teyta kanqanta rikätsikunampa rantinmi, mana culpayoq wambrakunata castigaq mana alli Diostanö rikätsikun (Deuteronomio 32:4; Mateo 5:45; 1 Juan 4:8). Tsëchi mëtsika cristiänokuna imëpis cuentata qokuyashqa kë yachatsikïqa mana rasun kanqanta.

[9 kaq päginachö dibüjukuna]

Biblia ninqanta wiyakoqkunaqa, Dioswan y nuna mayinkunawampis yamëmi kawakuyan