¿Imatataq rikätsikunqa Jehoväpa hunaqnin?

“Señorpa junaqninqa shamonqa ampichow suwakoqnowmi; [...] i ima kaqkunapis rawrarnin ushakashqa[m] kanqa, patsa i peychow rurashqakuna rupakashqa kayanqa.” (2 PED. 3:10, QKW.)

1, 2. a) ¿Imanötaq mana allikuna ushakanqa? b) ¿Ima tapukïkunapa respuestantataq yachakushun?

KË MUNDOCHÖ nunakunaqa, kikinkunalla Jehová mana yanapëkaptin Patsata alli gobernayänantam pensayan, y këqa pasëpa ulikï o llullakuymi (Sal. 2:2, 3). Tsëpenqa, ¿imëyaqpis nunapa gobiernon tsarakunqatsuraq? Manam. Pero Satanaspa makinchö këkaq nunakuna kikinkunalla ushakäyänanta manam pensanantsiktsu. Antis, kikin Jehovämi ushakätsinqa akranqan tiempochö y munanqannö, y tsëtaqa ruranqa kuyakïpaq y justiciapaq Leyninkunata respetarmi (Sal. 92:7; Pro. 2:21, 22).

² Apóstol Pëdrum kënö qellqarqan: “Señorpa junaqninqa shamonqa ampichow suwakoqnowmi; tseychowmi pasayanqa syelukuna jatun janrareywan, i ima kaqkunapis rawrarnin ushakashqa kanqa, patsa i peychow rurashqakuna rupakashqa [“rikakashqa”, NM] kayanqa” (2 Ped. 3:10, QKW). ¿Ima ninantaq kë versïculochö ‘syeluwan’ “patsa”? ¿Ima ninantaq “ima kaqkunapis” “ushakashqa[m] kanqa” ninqan? Y, ¿imapaqtaq parlëkarqan “patsa i peychow rurashqakuna rupakashqa [“rikakashqa”, NM] kayanqa” nirqa? Kë tapukïkunapa respuestanta tarishun, tsënöpa mantsakëpaq hunaqkuna chämuptin alläpa mana espantakunapaq.

Ushakaqpaq kaq cielo y patsa

3. ¿2 Pedru 3:10 “syelukuna” ninqanqa imataq, y imanötaq ushakanqa?

³ Bibliachö “syelukuna” nirqa, höraqa gobiernokunapaqmi parlan, wakin nunakunapitapis más hatun cargoyoq kayaptin (Isa. 14:13, 14; Apo. 21:1, 2, QKW). ‘Syelum pasarirqan’ nirqa, kanan witsan gobiernokunapaqmi parlëkarqan. ¿Imanirtaq nin “jatun janrareywan” o huk Biblia ninqannöpis “mantsaquepaq bunrururnin” pasarinqa? Tsënöqa nin raslla ushakärinan kaptinchi.

4. ¿Imataq “patsa”, y imanötaq ushakanqa?

⁴ “Patsa” nirqa parlëkan Diospita rakikashqa nunakunapaqmi. Kanannöllam Noe kawanqan witsampis mana alli mundo karqan, tsëmi mantsakëpaq tamyawan ushakänampaq Dios willakurqan. Kanampis, “que patsata y sieluta Diosnintsic [...] shuyarëcatsin ninawan ushacäratsinanpaq[mi]. Tseqa canqa juisiu junaqmi; y mana alli ruraq nunacunam tsecho jipayanqa” (2 Ped. 3:7). Diluviochöqa rasllam mana alli nunakunata Dios ushakätsirqan, pero shamoq tiempochöqa manam rasllatsu nunakuna ushakäyanqa, y këqa kanqa hatun hipakïkuna o ñakakuykuna witsanchömi (Apo. 7:14). Puntataqa, Diosmi gobiernokunata mandanqa chikinqan “jatungare Babilonia[ta]” o hukwan hukwan purikoq warminö uli religionkunata ushakätsiyänampaq (Apo. 17:5, 16; 18:8). Tsëpitanam, hatun hunaqnin Armagedonchö kikin Jehová ushakätsinqa Satanaspa makinchö këkaq nunakunata (Apo. 16:14, 16; 19:19-21).

‘Ima kaqkunapis ushakashqam kanqa’

5. ¿Bibliachö “ima kaqkunapis” ninqanqa imataq?

⁵ ¿Imapaqtaq parlëkarqan ‘ima kaqkunapis ushakashqam kanqa’ nirqa? Pedru “ima kaqkunapis” nirqa, kë mundopa mana alli  pensënimpaq, munënimpaq y Diospa contran mana allita rurënimpaqmi parlëkarqan. Hina “ima kaqkunapis” nirqa, ‘mundupa espiritunpaqwanmi’ parlëkarqan, y kë espïrituqa mana wiyakoq nunakunachömi këkan (1 Cor. 2:12, QKW; lei Efesios 2:1-3). Wakin Bibliakunachöqa kë espïrituta viento ninmi, Satanaspa makinchö këkaq llapan nunakunaman chaptin. Tsënöpam kë espíritu nunakunata pensëninkunachö, munëninkunachö, parlakïninkunachö y rurëninkunachö, Diostukoq y Diospa contranman tikrashqa “Diablupa” munëninta ruratsin.

6. ¿Imanötaq nunakuna rikätsikuyan mundopa espïritunta?

⁶ Nunakunaqa musyar o mana musyarpis mundopa espïritunwan muyashqa karmi, Satanaspa munëninta y pensëninta shonqunkunachö katsiyan, y Satanás munanqanmannö y pensanqanmannö imatapis rurayan. Tsëmi kikinkunapa munëninkunallata rurakuyan, Diosman mana yarpashpa. Y imëpis allishtukuyan, chikikuyan, autoridadkunapa contran churakäyan, y ‘etsancunapa mana alli munenincunata, nawincuna ricanqanta codisyar munapayan’ (lei 1 Juan 2:15-17). *

7. ¿Imanirtaq alläpa preciso shonquntsikta täpanantsik?

⁷ Alläpa precïsom, “shonqïkita alleq täpë” nishqan consëjota wiyakunantsik (Pro. 4:23). Tsëpaqqa rasumpëpa cristiänonömi kawanantsik, y alleqran rikänantsik pukllakunata, amïgontsikkuna, leinqantsikkunata y Internetchö rikanqantsikkunata akranapaq. Pablum kënö willamantsik: “¡Paqtataq, pipis mana allita creyitsiyäshurniqui, shumaq parleninwan llutanta yachatsiyäshunquiman! Tseno mandacur yachatsicuyanqanqa nunacunapa yarpenincunallam y costumbrincunallam, manam Jesucristupatsu” (Col. 2:8). Imëpitapis más precïsom tsënö willamanqantsikta wiyakïqa Jehoväpa hunaqnin këllachöna kaptin, tsëchömi alläpa achachaq ninawan “rupakashqa” kanqa Satanaspa makinchö “ima kaqkunapis”. Awmi, manam tsarakuyanqatsu Jehoväpa hunaqninchöqa. Malaquías 4:1 textopis kënömi nimantsik: “¡Rikäyë!, shamunnam horno rupaqnö hunaq y llapan allishtukoqkunam y mana alli ruraqkunam raströjonö kayanqa. Y tsë hunaqchömi ushakäyanqa”.

“Patsa i peychow rurashqakuna[m] rupakashqa kayanqa”

8. ¿Imanötaq rikakanqa ‘patsachö’ y “peychow rurashqakuna”?

⁸ ¿Imapaqtaq Pedru parlarqan “patsa i peychow rurashqakuna rupakashqa [“rikakashqa”, NM] kayanqa” nirqa? Rikakashqam kanqa nirninqa, rikätsikun “rikakänanta”, “musyakänanta” o “taripushqa kanantam”. Tsëmi Pedru ninqanqa rikätsikun hatun hipakï hunaqchö Satanaspa makinchö këkaq nunakunapa mana alli rurëninkuna musyakänanta. Jehoväqa musyatsikunqam kë mundo Satanaspa makinchö këkanqanta y Gobiernompa contran këkanqanta, hina tsërëkur ushakätsinampaq kaqtapis. Isaías 26:21 textochö Diospa juicio hunaqnimpaq parlarninmi, kënö nimantsik: “Täkunqampitam Jehová urämunqa mana alli ruraqkunata cuentata mañanampaq. Y kë patsam rikätsikunqa wanutsinqan nunakunapa yawarninta. Y wanutsikuyanqanta kë patsa mananam pakanqanatsu”.

9. a) ¿Imakunatataq ruranantsiktsu, y imanir? b) ¿Imanö kawëtataq yachakunantsik, y imanir?

⁹ Jehová Diospa hunaqninchöqa, kë mundo y mana alli espïritupa munëninta qatiyanqantam nunakuna rikätsikuyanqa, hasta kikinkunapura wanutsinakurnimpis. Tsëpaqmi pasëpa wanutsinakoq pelïculakunata rikäyanqan yachëkätsin. Tsëmi Biblia kënö nimantsik: “Cada nunam yanaqimpa contran sharkukurkunqa” (Zac. 14:13). Tsëmi rikänantsiktsu wanutsikïta y allishtukïta yachatsikoq pelïculakunata, librokunata, videojuëgokunata o Diosnintsik chikinqan wakin mana alli rurëkunatapis  (2 Sam. 22:28; Sal. 11:5). Hinamampis, Diospa espïritun munanqannömi kawëta yachakunantsik, tsëmi yanapamäshun Diosnintsikpa piñakïnin hunaqpita salvakunapaq (Gal. 5:22, 23).

‘Mushoq sielu y mushoq patsa’

10, 11. ¿Imataq ‘mushoq sielu y mushoq patsa’?

¹⁰ (Lei 2 Pedru 3:13.) ¿Imapaqtaq parlëkan ‘mushoq sielu’ nirninqa? Këchöqa parlëkan 1914 watachö “Dios dispunishqan” tiempo Gobiernonta ciëlochö patsätsinqampaqmi (Luc. 21:24). Dios patsätsinqan Gobiernochöqa këkäyan Jesus y 144.000 ciëlochö kayänampaq akrashqakunam. Apocalipsis librochömi kë akrashqakunapaq kënö nin: “Riquecorqäqa mushoq santu Jerusalen marcatam, quiquin Diospa nopanpita uräquecamoqta. Tse marcam allapa cuyellapaq carqan. Imeca casacunanpaq shumaq bistishqa shipash nobiunta shuyarëcaqno” (Apo. 21:1, 2, 22-24). Unë Israelchöqa, Diospa akrashqa gobiernonqa mandakoq Jerusalen markapitam. Pero mushoq Patsachöqa Jesus gobernamunqa novianwan o mushoq Jerusalenwanmi. Y ‘Diospa nopanpitam urämunqa’ nirqa, kë Patsaman gobernayämunampaqmi parlëkan.

¹¹ ‘Mushoq patsaqa’ kayan, Dios churanqan Gobiernota wiyakoq nunakunam. Kë nunakunaqa kanampitanam alläpa kushishqa huk shumaq paraïsochönö kawëkäyan. Pero shamoq tiempochöqa paqwëmi cumplikärinqa Diosnintsik awnikunqan, tsëqa pasëpa kushishqam kawakushun mushoq patsachö (Heb. 2:5). ¿Imatataq rurashwan tsë shumaq paraïsochö kawanapaq?

Listo këkäshun Jehoväpa hatun piñakïnin hunaqpaq

12. ¿Imanirtaq mantsakar espantakuyanqa Diospita rakikashqa nunakuna Jehoväpa hunaqnin chämuptin?

¹² Pëdrunömi apóstol Pablupis Diospa piñakïnin hunaq “imeca suwa paqaspa shamoqno” chämunanta willakurqan (lei 1 Tesalonicenses 5:1, 2). Tsëqa cristiänokunapis mantsakäyanqam raslla chämoqta rikar (Mat. 24:44). Pero Diospita rakikashqa nunakunaqa manam mantsakäyanqallatsu, sinöqa pasëpam espantakuyanqa. Pablum kënö qellqarqan: “Nunacunam niyanqa: ‘Segurunam y alli pasaquichonam cantsic’ nishpa. Tseno nicayaptinmi, derepentita chaquiconqa limpu ushacäyänan öraqa, imeca qeshyaq warmipa qeshpicunanpaq nanatsiquinin öra chäreqno, y manam ni imano safeta puediyanqatsu” (1 Tes. 5:3).

13. ¿Imatataq rurashwan “segurunam y alli pasaquichonam cantsic” nishpa kë mundo mana ulipämänantsikpaq?

¹³ “Segurunam y alli pasaquichonam cantsic” niyanqanqa, supëkunapa ulikïnin o llullakuyninmi, pero manam Diospa sirveqninkunataqa pantatsinqatsu. Apóstol Pablum kënö nirqan: “Qamcuna alli rureniquicunacho cawaquicayaptiqueqa, cutimurpis, manam juc suwanotsu derepentita tariyäshunqui. Tseno allicunata rurarmi, actsichonona y junaqchonona cayanqui, y manam tutapechononatsu ni paqaschononatsu cayanqui” (1 Tes. 5:4, 5). ¡Tsëmi alläpa preciso Satanaspa mundompita karuchö kakunantsik, y Diospa aktsinö yachatsikïninta yachakunantsik!  Congregacionchö mana allita yachatsikoqkunapita cuidakuyänampaq Pedru qellqarmi, kënö nirqan: “Cuyashqa wauqicuna panicuna, quecunata alli musyecar, ¡paqtaraq creyiyanquiman jutsasapa nunacuna llutanta yachatsiyäshuptiqui! Jina Diosnintsicman alli marcäcuyashqequipita cuidadu qepaman cutiyanquiman” (2 Ped. 3:17).

14, 15. a) ¿Imatataq Jehová musyatsimantsik? b) ¿Jehová ima nimanqantsiktataq wiyakunantsik?

¹⁴ Jehoväqa manam “paqtaraq creyiyanquiman”, o cuidakuyë nimantsikllatsu. Tsëpa rantinqa, puntallatanam imanö kananta y ima pasakunantapis musyatsimantsik.

¹⁵ Pero llakikïpaqqa, congregacionchö mäkoq mäkoqlla kanapaq willamashqapis wakinkuna mana creiyanqan y imapis mana qokuyanqanmi. Itsa niyan: “Atska watapanam tsënö willakïkunata wiyarqü”. Pero yarpäyänanmi, tsënö parlarqa, manam mäkoq mäkoq cumplido sirveqpa contranllatsu parlëkäyan, sinöqa kikin Jehoväpa y Jesuspa contranmi parlëkäyan. Awmi, kikin Jehovämi kënö nimantsik: “Rikachakurllana këkë” (Hab. 2:3). Tsënöllam Jesucristupis nimantsik: “[¡]Mäcoq, mäcoq[llam] quecayänequi! Manam musyayanquitsu ime junaq ni ime öra Teyta Diosniquicuna cutimunantapis” (Mat. 24:42). Hina Pëdrupis kënömi qellqarqan: “Qamkuna puriy[ë] santu i ankupäkiy kawakiychow, mäkoqlla i shuyararnin Dyospa shamïnin junaqta” (2 Ped. 3:11, 12, QKW). Mäkoq mäkoq cumplido sirveq y Jehoväpa Testïgonkunata Pushaqkunaqa, manam ichikllapaqtsu churayan Dios tsënö ninqantaqa.

16. ¿Imatataq rurashwantsu, y imanir?

¹⁶ Patrón tardiyëkämoqta pensaq kaqqa, “mana alli sirwikoq[mi]” (Mat. 24:48, QKW). Pëkunapaqmi 2 Pedru 3:3, 4 textochö kënö nin: “Que patsa ushacänan junaqcunam quiquinpa munenincunallata ruraq nunacuna burlacurnin, yuriyämonqa”. Kë nunakunaqa, Jehoväpa hunaqninta shuyaraq y wiyakoq nunakunapitam asikuyan. Diospa kaqta puntaman churayänampa rantinmi, kikinkunapa munëninkunallata rurakuyan. Tsënö kayanqampitam ushakäyanqa, tsëmi, ¡ama tsënöqa imëpis kashuntsu! Tsëpa rantinqa, “llapan nunacuna salbacuyänanpaq [Teytantsik] shuyarëcanqanta” yarparnin Diosnintsikpita yachatsikushun, y bautizakuyänampaq yanapakushun. Ama yarparäkïkäshuntsu Diospa hunaqnin imë kananta, kikin Jehovämi imë kanantapis musyan (2 Ped. 3:15; lei Hechos 1:6, 7).

Salvakoq Diosman markäkushun

17. ¿Jerusalenpita yarquyänampaq Jesus willakunqanta cristiänokuna wiyakuyarqantsuraq, y imanir?

¹⁷ Romano soldädokunam 66 watachö Judëaman yëkuyarqan. Soldädokunata rikëkurlla Jerusalenpita raslla yarquyänampaq Jesus mandanqantam cristiänokunaqa musyayarqan,  y ninqannöllam rurayarqan (Luc. 21:20-23). ¿Imanirtaq raslla yarqukuriyarqan? Jesus willakunqanta yarparninmi. Cristum willarqan tsë markapita yarqurnin imëkapa pasayänanta, pero Jehová pëkunawan imëpis këkänampaq kaqtam markäkuyarqan (Sal. 55:22).

18. Lucas 21:25-28 ninqannö, ¿imanötaq qam rikankiman hatun hipakïta?

¹⁸ Noqantsikpis Jehovällamanmi shonqupita patsë markäkunantsik, pëllam salvamäshun hatun hipakï chämuptin, tsë hipakïqa mana imëpis rikanqantsiknömi kanqa. Kë mana alli nunakunata manaraq ushakätsiptinmi, hatun hipakïchö “nunacuna mantsaquewan desmayariyanqa que patsa ushacänanta pensarnin”. Pero Jehoväta sirveqkunaqa, manam wakin nunakunanötsu pasëpa espantakuyanqa. Tsëpa rantinqa, alläpa kushishqam kayanqa salvacionninkuna tsëllachöna kaptin (lei Lucas 21:25-28).

19. ¿Imapitataq qateqnin kaq artïculochö yachakushun?

¹⁹ Mana alli nunakunapita y patsachö “ima kaqkuna[pita]pis” rakikashqa kaqkunataqa, huk shumaq kawakïmi shuyaran. Pero mana wanushpa kawëta tarinapaqqa, manam mana alli rurëkunallatatsu haqinantsik, tsëtam qateqnin kaq artïculochö yachakushun. Hina kallpachakunantsikmi cristiänonö kawanapaq y Jehoväpa shonqunta kushitsinapaqpis (2 Ped. 3:11).

[Päginapa ura kuchunchö willakï]

¿Yarpankiku?

• ¿Imataq kanan ‘syelu’ y “patsa”?

• ¿Imataq Bibliachö “ima kaqkunapis” ninqan?

• ¿Imataq ‘mushoq sielu’ y ‘mushoq patsa’?

• ¿Imanirtaq shonqupita patsë Diosman markäkuntsik?

[Yachakunapaq kaqpa tapukïninkuna]

[17 kaq päginachö dibüju]

¿Imanötaq shonquntsikta täpashwan, y mana alli nunakunapita rakikashwan?

[18 kaq päginachö dibüju]

¿Imatataq rurashwan Diosnintsik ‘salbamänapaq shuyarëcaptinqa’?