¿Imanötaq yanapamantsik Jesus wanunqan?

“Pipis Diospa tsurinman marcäcurnenqa wiñe cawayoqmi cayanqa. Peru peman mana marcacurnenqa, wiñe caweta manam tarenqatsu antis pecunata Dios allapa feyupa castigananpaqmi quecan.” (JUAN 3:36.)

1, 2. ¿Imarëkurtaq kë revistata horqar qallëkuyarqan?

KË REVISTAM julio killa 1879 watachö kënö nirqan: “Bibliata alli estudiaqkunaqa musyayanmi Jesus wanunqan alläpa preciso kanqanta”. Tsëpitam kënö willakurqan: “Jesus wanunqampa valorninta mana kaqpaq imapis churatsimänata ama permitishuntsu” (lei 1 Juan 2:1, 2).

² Kë revistataqa 1879 watachö rurayarqan Jesuspa wanïnimpaq Biblia parlanqan alläpa preciso kanqanta musyatsikuyänampaqmi. 1800 watakuna ushëmi Jesuspa wanïninta mana kaqpaqna churëkäyarqan uli o llulla religionkuna. Tsëmi kë revistachö, kë tema yarqunqanqa alläpa preciso karqan, imëka höranchö ‘miquï’ cuenta (Mat. 24:45). Tsë witsankunachöqa, imëkapis kikinlla rurakanqantam atskaq nunakuna creiyaq, y kë yachatsikïqa, hutsapaq Biblia yachatsikunqampa contranmi karqan. Këqa, nunakuna kikinkunalla watakuna pasanqanman ichikllapa ichikllapa más alliyäyanqantam yachatsikun, y tsënöpa pipis librananta mana wananqanta. Kënö yachatsikïkunaman mana ishkinapaqqa, yarpäshun Pablu Timoteuta kënö qellqanqanman: “Que mandanqaqcunata ¡Ama yö qonqecunquitsu! Ama cäsunquitsu waquincuna mana imapaqpis sirweq llutan yachatsicoqcunata. Pecunaqa allapa yachaq tucurpis, manam Diospaqqa ni imata musyayantsu. Tseno yachaq tucurmi, waquincunaqa raquicacuriyashqa Diosman marcäquinincunapita” (1 Tim. 6:20, 21).

3. ¿Ima tapukïkunapa respuestantataq qateqnin pärrafokunachö yachakushun?

³ Manam ni mëqantsikpis markäkïnintsikta o yärakuynintsikta haqita munantsiktsu. Tsëmi alläpa preciso kënö tapukunantsik: “¿Imanirtaq librayämänanta wanä? ¿Imatataq Jehoväwan Jesus pagakuyashqa? Diosnintsik piñakïnimpita libramänampaq huk alli yanapakïta  patsëkätsimuptinqa, ¿imatataq ruräman tsë yanapakïta chaskinäpaq?”.

Diospa piñakïnimpita salvamaqnintsik

4, 5. ¿Imanöpataq musyantsik kë mundo Diospa piñakïninchö kawëkanqanta?

⁴ Biblia willakunqan y pasanqankunam rikätsimantsik, Adan hutsata ruranqampita patsë, ‘Dios allapa feyupa castigananpaq’ nunakuna këkäyanqanta (Juan 3:36). Tsëmi ni huk nunallapis wanïpita salvakuntsu. Diospa chikeqnin Satanaspa gobiernonqa manam salvashqatsu nunakunata tukï hipakïkunapita, ni manam huk gobiernollapis nunakuna wanayanqanta qoshqatsu (1 Juan 5:19). Kananyaqpis nunakunaqa guërrachö, mana alli rurëchö y waktsallam kawakuyan.

⁵ Tsëwanmi musyantsik kë mundochö mana alli nunakuna Diospa bendicionninta mana chaskiyanqanta. Pablum kënö nirqan: “Diospa contran nunacunam llutancunata ruracur cawacuyan” (Rom. 1:18-20). Tsëmi mana alli rurëninkunata mana haqeq nunakuna, o Diospa munëninta mana ruraqkunaqa, alläpa hipayanqa. Y kanan witsan Jehoväpa testïgonkunam Diospa piñakïnin hunaqta willakïkäyan, imëka ciëlopita tazonwan Satanaspa mundonman plägata hichamoq cuenta. Tsë willakïkunaqa yarqamun publicacionnintsikkunachömi (Apo. 16:1).

6, 7. ¿Ciëlopaq akrashqakuna imatataq rurëkäyan hinantin Patsachö? Y, ¿ima punkutaq kicharëkan arrepentikoq nunakunapaq?

⁶ Tsënö kaptinqa, ¿Satanaspa mundompita librakärir Diosman kutinapaq tiempo kanraqtsuraq? Awmi, Diosqa punkuta kicharätseq cuentam shuyarëkämantsik. Ciëlopaq akrashqakunam ‘Jesucristu cachanqancuna cayan’, y pëkunam hinantin Patsapa Diospita yachatsikur nunakunata yanapëkäyan. Tsënömi ‘Dioswan amishtayänampaq’ nunakunata invitëkäyan (2 Cor. 5:20, 21).

⁷ Apóstol Pablum willakurqan “shamoq piñakiypita” Jesus libramanqantsikta (1 Tes. 1:10, QKW). Këtaqa Jehová ruranqa arrepentikïta mana munaq nunakunata ushakätsirmi (2 Tes. 1:6-9). ¿Pitaq salvakunqa? Bibliam kënö nimantsik: “Pipis Diospa tsurinman marcäcurnenqa wiñe cawayoqmi cayanqa. Peru peman mana marcäcurnenqa, wiñe caweta manam tarenqatsu antis pecunata Dios allapa feyupa castigananpaqmi quecan” (Juan 3:36). Këchö rikanqantsiknömi Jehová Diospa piñakïnin hunaq chämuptinqa, salvakuyanqa Jesuspa wanïninman markäkoqkunalla.

¿Imanötaq yanapamantsik Jesus wanunqan?

8. a) ¿Imanötaq mana hutsata rurar Adanwan Eva kawakuyanman karqan? b) ¿Imanötaq musyakarqan Jehová parlanqannö ruranqanta?

⁸ Diosqa Adantawan Ëvata hutsannaqtam rurarqan. Diosta wiyakushqa kayaptinqa hinantin Patsam shumaq paraíso këkanman karqan, y tsëchömi pëkuna y llapan tsurinkuna kushishqa kawëkäyanman karqan. Pero pëkunaqa mana wiyakurmi Diospa contran churakäriyarqan, tsënöpam wanuyänampaq Dios disponirirqan y Edén huertapita qarqurirqan. Hutsata rurashqa kayaptinmi, llapan wambrankunapis hutsayoqllana yuriyarqan. Tsëpitam  pëkunaqa awkinyar y chakwanyar wanuyarqan. Tsëwanmi rikätsikurqan parlanqanta cumplenqanta, y imëpis alli kaqllata ruranqanta. Willashqam karqan michanqan montepa frütanta mikurqa wanuyänanta y ninqannöllam karqan.

9, 10. a) ¿Imanirtaq Adanpita yureqqa llapantsikpis wanuntsik? b) ¿Imanötaq wanïpita salvakashwan?

⁹ Llapampis Adanpita yureq kaqqa, hutsayoq y wanoqllapaqnam yurintsik. ¿Imanir? Adan hutsata ruraptinqa imëka pachanchö këkaqnöllaran karquntsik, tsënöpam noqantsikpis wanïta chaskinallapaqna yurirquntsik. Tsë hutsapita mana pagakur wanïpita libramarnintsikqa, manachi parlanqannö rurëkanmantsu karqan. Tsëmi Pablu imanö kanqantsiktapis kënö nir parlarqan: “Musyantsicmi tse leycunaqa Diospita car alli cashqanta. Peru noqanam mana allicuna rureta munapar jutsapa esclabun cuenta caquicä. ¡Ay, noqalla! ¿Imanoraq calläshaq! ¿Pillaraq libreconqa condenasionpita jutsasapa etsalläta!” (Rom. 7:14, 24).

¹⁰ Hutsapita perdonamänapaq y wanïpita libramänapaqqa, kikin Jehovällam libramënintsikta puëderqan. ¿Imanötaq tsëtaqa rurarqan? Tsëtaqa rurarqan ciëlochö këkaq kuyë Tsurin kë Patsaman hutsannaq yurinampaq kachamur, y tsëpita libramänapaqrëkur wanunampaq haqirmi. Adanqa hutsamanmi ishkirirqan, pero Jesusqa “ni ima jutsatapis manam rurarqantsu” (1 Ped. 2:22). Tsëmi pëpaqa wambrankunapis hutsannaq yuriyanman karqan. Tsënö kaptimpis Diospa chikeqninkuna wanutsiyänantam haqirqan, tsënöpa pëman markäkoq nunakunata wambrankunatanö rikänampaq y mana wanushpa kawëman chätsinampaq. Bibliam kënö nin: “Jucllellam Diosnintsicqa, y jucllellam Diosnintsicwan amishtatsicoq nunaqa. Tse nunaqa Teytantsic Jesucristum. Pemi yawarninwan rescatamarqantsic llapantsic mana castigashqa canantsicpaq” (1 Tim. 2:5, 6).

11. a) ¿Ima igualatsikïtaq yanapamantsik Jesuspa yawarnin salvamanqantsikta más tantianapaq? b) ¿Pikunatataq Jesuspa wanïnimpa chanin salvanqa?

¹¹ Jesuspa wanïninwan Jehová salvamanqantsikta maslla tantiarinapaq këmi yanapamäshun: Huk banco, nunakunapa qellëninkunata churakuyanqanta suwarinman, tsënöpa tsë nunakuna waktsa y aqayoq tikrariyanman. Y tsëta rurayanqampitana bancopa duëñonkunata atska watapa carcelman wichqariyanman o llawiriyanman. Pero ¿imataq pasan qellëninnaq nunakunata? Pëkunataqa salvëta puëdenman huk qellëyoq nuna, bancota rantirir aqankunata pagakuyänampaq qellëninkunata kutitsinqanmi. Tsënöllam Jehoväwan Tsurin Jesuspis rantiyashqa Adanpa kastanta, Jesuspa yawarnimpa chaninwan hutsantsikpita pagakur. Tsëmi Bautizakoq Juan Jesuspaq kënö nirqan: “¡Ricayë, taqemi Diospa achcasnin. Pemi jinantin munducho nunacunapa jutsancunarecur wanonqa!” (Juan 1:29). Mundochö nunakunapa hutsankuna nirqa, parlëkan kawëkaqkunapaq y wanushqakunapaqmi.

¿Sasatsuraq karqan hutsapita pagakunan?

12, 13. ¿Imatataq yachakuntsik Abrahan tsurin Isaacta sacrificänampaq listo këkanqampita?

¹² Manam alleqqa musyantsiktsu Diosnintsik y Tsurin hutsantsikpita salvamänantsikpaq rurayanqampita imanö tikrariyanqantapis, tsëta más käyinapaqmi Bibliachö yanapamantsik. Abrahan pasanqanta yarpärishun. Imanöraq tikrarirqan kima hunaq Moria markayaq viajarnin Jehová kënö ninqanta cumplinampaq: “Wambrëkita pusharillë, kuyanqëki hapallan wambrëki Isaacta, y Moria markayaq ëwë, noqam rikätsishqëki mëqan hirkatapis tsëchö wambrëkita kayashqa ofrendatanö qaramänëkipaq” (Gén. 22:2-4).

¹³ Hina pensarishun wambranta sacrificänampaq kaq sitioman chärirnin, altarta rurarnin wambranta makipita y chakipita pankëkur sacrificänampaq patsätsinqan hora pasëpa  llakikunqanta. ¡Imaraq shonqunchö nanatsikurqan wambranta wanutsinampaq cuchïllota tsarinqan hora! Kananqa Isaacman yarpärishun. ¡Imanöraq tikrarirqan altar hananchö hitarëkar cuchillo qaranta roqur wanuratsinanman pensar! Wambranta wanuratsinanna këkaptin Jehoväpa angelnin michashqa kaptimpis, Abrahanwan Isaac rurayanqanmi yanapamantsik Jesusta Satanaspa nunankuna hipatsir wanutseqta rikar Jehová imanö tikrarinqantapis musyanapaq. Y Isaac teytan sacrificänampaq listo këkanqanmi rikätsimantsik Jesuspis noqantsikrëkur hipar wanunampaq listo këkanqanta (Heb. 11:17-19).

14. ¿Jacobta ima pasanqantaq yanapamantsik Jesusta wanutsiyaptin Jehová llakikunqanta?

¹⁴ Jehová imanöpis tikrarinqanta musyanapaqqa, hina Jacob pasanqampis yanapamantsikmi. Josëqa más kuyë tsurinmi karqan, pero wakin kaq tsurinkunaqa chikiyaqmi. Huk hunaqmi teytan kacharqan wakin wawqinkuna imanöpis këkäyanqanta rikänampaq, pëkunaqa këkäyarqan alläpa karuchömi, wayinkunapa norte lädonchö üshankunata mitsirnin. Wawqinkuna chikikäyaptimpis Josëqa teytanta wiyakurninmi ëwarqan. ¡Imaraq Jacob llakikurqan Josëpa röpanta yawaryoqta wawqinkuna chëkatsiyaptin! Rikëkurmi waqar kënö nirqan: “¡Wambrapa hatun röpallanmi! ¡Huk mikukoq animalchi wanuratsir mikurishqa! ¡Josëtaqa rachirchi ushakätsishqa!” Tsë pasanqampita patsëmi atska hunaq llakishqa kawakurqan (Gén. 37:33, 34). Jehoväqa manam nunakunanötsu llakikïninta rikätsikun. Tsënö kaptimpis kë pasakunqankunawanmi musyantsik Jesusta tukïta rurar hipatsir wanutsiyanqanta rikar Jehová llakikunqanta.

¿Imanötaq yanapamantsik Jesus wanunqan?

15, 16. a) ¿Jesus wanïninwan salvamanqantsikta Jehová chaskirqantsuraq? b) ¿Imanötaq yanapashunki Jesus wanïninwan salvamanqantsik?

¹⁵ Jehoväqa Tsurinta kawaritsimurqan ciëlochö täränampaq cuerpoyoqtam (1 Ped. 3:18). Kawariramurninmi Jesusqa chusku chunka hunaq qateqninkunata yuripurqan, y sinchi  kayänampaq y hinantimpa yachatsikoq ëwayänampaq yanaparqan. Tsëpitanam ciëlota ëwakurqan, yawarnimpa chaninta Teytanman aparnin, tsënöpa llapan qateqninkunata wanïninman markäkoqkunata salvanampaq. Jehoväqa yawarnimpa chaninta chaskirmi santo espïrituta qorqan wakin qateqninkunamampis ramanampaq. Tsënam Jesus Jerusalenchö ëllurëkaq o qorirëkaq qateqninkunaman 33 wata Pentecostés hunaqchö espïrituta ramarqan (Hech. 2:33).

¹⁶ Jesuspa qateqninkunaqa rasllam nunakunata willayarqan Jesuspa shutinchö bautizakur hutsankunapita perdonta chaskirir Jehoväpa piñakïnimpita salvakuyänampaq (lei Hechos 2:38-40). Tsë hunaqpita patsëmi, Diosnintsikqa tukï nacionpita atska waranqa nunakunata pushëkämun Jesus wanunqanman markäkur Pëwan alli këta tariyänampaq (Juan 6:44). Këta yachakurirmi, ishkë tapukïpa respuestantaraq musyanantsik: ¿Alli rurënintsikrëkurllatsuraq mana wanushpa kawakïta chaskishun? ¿Y mana wanushpa kawanapaq shuyäkïta oqrarishwantsuraq?

17. ¿Imanötaq Diospa amïgon kanqantsikta rikantsik?

¹⁷ Manam ni pipis kikinllapitaqa salvacionta chaskita puëdentsu. Pero Jesus salvamänantsikman markäkurmi atska waranqa ollqukuna y warmikuna Dioswan alli këta tariyan y huk shumaq Patsachö mana wanushpa kawakïta shuyaräyan. Tsënö kaptimpis Jehoväwan alli kënintsiktaqa oqrarishwanmi. Tsëmi piñakïnin hunaqpita salvakunapaqqa, Jesus wanunqanman markäkunqantsikta rikätsikunantsik cada hunaq (Rom. 3:24; lei Filipenses 2:12).

Jesus wanïninwan salvamanqantsikman markäkushun

18. ¿Imanötaq rikätsikuntsik Jesus wanunqanman markäkunqantsikta?

¹⁸ Qallananchö Juan 3:36 texto ninqanmi rikätsimantsik Jesusta wiyarqa pëman markäkïkanqantsikta. Jesus wanïninwan pagakunqanqa yanapamashwan Cristu yachatsikunqannö llapan kawënintsikchö limpio kanapaqmi (Mar. 7:21-23). Pero ‘jucwan jucwan pununacoqcunata’, ‘llutan bromacunata parlaqcunata’, ‘melanepaq mana allita ruraqcunata’, röpannaq warmita, ollquta o rakchakunata rurëkaqta rikaqkunaqa Jehoväpa piñakïnin hunaqchömi ushakäyanqa (Efe. 5:3-6).

19. ¿Imatataq ruranantsik Jesus ruranqanman markäkurqa?

¹⁹ Jesus wanurnin salvëkämashqaqa, “Dios Yaya munangannö llapan imaycatapis allillata rurarnin” kawakushun (2 Ped. 3:11, NTCN). Alläpa precïsom tiempontsikta rakinantsik Diosnintsikman mañakunapaq, Bibliapita yachakunapaq, reunionkunaman ëwanapaq, familiantsikwan Diospita yachakunapaq y yachatsikoq yarqunapaq. Hinamampis Biblia kënö ninqanta manam qonqanantsiktsu: “Cayäpushonqequicunawan jucniqui jucniquipis yanapanaquicuyë; porqui tseno rurayanqequim Diospaq allapa alli qareqa” (Heb. 13:15, 16).

20. ¿Ima bendicionkunatataq chaskiyanqa Jesus wanunqanman markäkoqkuna?

²⁰ Jehoväpa piñakïnin hunaqchö mana alli nunakuna ushakäyaptin, ushananyaq markäkunqantsikpita y Jesus wanurnin salvamanqantsikman markäkunqantsikpita alläpam kushikushun. Diosnintsik awnimanqantsik Patsachöqa kushishqam imëyaqpis kawakushun Tsurinwan salvamanqantsikman agradecikurnin (lei Juan 3:16 y Apocalipsis 7:9, 10, 13, 14).

¿Yarpankiku?

• ¿Imanirtaq Cristu salvamänata wanantsik?

• ¿Ajatsuraq karqan Jehoväpaq y Jesuspaq hutsapita pagakï?

• ¿Imanötaq yanapamantsik Jesus wanunqan?

• ¿Imanötaq Jesus wanurnin salvamanqantsikman markäkuntsik?

[Yachakunapaq kaqpa tapukïninkuna]

[14 kaq päginachö dibüju]

Jehoväqa pï mëwampis amishtanampaqmi shuyarëkan

[16 kaq päginachö dibüju]

Abrahan, Isaac y Jacob pasayanqankunaman pensarqa, masmi musyantsik Jehová y Jesus salvamänantsikrëkur shonqunkunachö nanatsikuyanqanta