HUK espïritum munantsu nunakuna Dioswan kuyanakuyänanta, tsëmi Diospa shutinta mana reqiyänampaq imëkata ruran. ¿Pipaqtaq parlëkantsik? Satanaspaqmi. Bibliaqa “que patsacho mandacoq” kanqanta, y nunakunata ‘upa cuentata ticratsishqa’ kanqantam nin. Pëqa nunakunata paqaschönö katsin Diospa ‘alli willaquininta mana cäyiyänanpaqmi’. Y tsënölla kakuyänampaqmi Diospa shutinta reqiyänanta munantsu. Pero ¿imanötaq upa cuentata tikratsishqa nunakunata? (2 Corintios 4:4-6).

Llapan mana alli religionkunawanmi rurashqa nunakuna Diospa shutinta mana reqiyänampaq. Unë tiempochönam judïokuna Biblia ninqanta mana wiyakur y costumbrekunata qatir, Diospa shutinta parlayaqtsu. Nunakuna hananchö Biblia leeq judïokunaqa, itsa punta cristiänokuna kawayanqan witsanchö Adhonái (kë palabraqa hebreuchömi y “Señor” ninanmi) niyaqlla cada Diospa shutinta leirnin. Tsënöpa imachi Diosta nunakuna manana shumaq reqiyarqannatsu y pëpita karupäkuriyarqan. Pero Jesusman pensarishun. ¿Tsë tiempochö kawaq nunakunanötsuraq Diospa shutinta parlaqtsu?

Huk kuti Teytanman mañakurmi, “reqitsirqömi jutikita, i masran reqitsishaq” nirqan Jesus (Juan 17:26, QKW). Kë ninqanchömi cuentata qokuntsik Escrituras Hebreas nishqanta leir, tsëpaq parlar o tsëpita yachatsikurqa Diospa shutinta Jesus parlanqanta. Yachatsikur purinqanchöqa unë tiempo profëtakuna rurayanqannöchi tsë shutita imëpis parlaq. Tsë witsan judïokuna Diospa shutinta mana parlayaptimpis, Jesusqa manam tsë costumbreta qatirqantsu. Antis qayaparmi, “Dios mandacushqancunata juc cuchuman churarir, quiquiquicunapa costumbriquicunallata ruraquicayanqui” nirqan (Mateo 15:6).

Qateqninkunapis Diospa shutinta hina yachatsikïkäyarqanmi Jesus kawariramurnin ciëlopa kutikushqanchöpis (“¿Diospa shutinta parlayarqanku punta cristiänokuna?” neq recuadrota rikäri). 33 wata Pentecosteschö punta congregación patsakanqan hunaqmi, apóstol Pedru profeta Joel unë willakunqanta yarpätsikur, “Señorpa jutin llapan qayakoqkunam, salbashqa kanqa” nirqan Judïokunata y Judío tikrashqakunata (Hechos 2:21, QKW; Joel 2:32). Rikanqantsiknöpis, punta cristiänokunaqa llapan nunakunatam Diospa shutin Jehová kanqanta y nunakunapaq imata ruranampaq kaqta musyatsikuyarqan. Hina tsëtam rikätsikun Jerusalenchö apostolkuna y anciänokuna ëllukashqa këkäyaptin Santiagu kënö ninqampis: ‘Dyosmi watukashqa gentilkunata, peykunapita  tsarinanpaq pwebluta jutinpaq’ (Hechos 15:14, QKW).

Tsënö kaptimpis, Diospa shutinta chikeq Satanasqa manam wiyaräkurqantsu. Apostolkuna wanuriyanqanllachömi, imëka mana alli muruta muroq cuenta cristiänokunachö mana rasun kaq yachatsikoqkunata yuriratsirqan (Mateo 13:38, 39; 2 Pedru 2:1). Yarpärishun Justino Martir nunaman, peqa yurikurqan apóstol Juan wanukunqan witsankunam. Cristiano tukurpis, atska kutim qellqanqan librokunachö Diosta “ni ima shutipa mana qayana” kanqanta nirqan.

Hinamampis, mana rasun kaqta yachatsikoq cristiänokunaqa, Escrituras Griëgasta copiar qallarnin Diospa shutin Jehoväta churayänampa rantinmi, Kýrios nirna churayarqan; tsë griëgochö palabraqa “Señor” ninanmi. Hina tsënöllam rurayarqan Hebreuchö qellqaraq Bibliawampis. Diospa shutinta manana parlëta munarmi, ley yachatsikoq judïokunaqa pachak  kima chunka (130) kutikunapitapis más Diospa shutinta churayänampa rantin, Adhonái nirna churayarqan. Hasta 405 watakunachö latín idiömaman Jerónimo traducinqan Vulgata nishqan Bibliachöpis manam Diospa shutin yurintsu.

Kanan witsanqa alli estudiaq nunakuna musyayanmi punta qellqayanqan Bibliachö Diospa shutin qanchis waranqa (7.000) kutipitapis más yurinqanta. Tsëmi Reina-Valërachö y catölicokunapa Biblia de Jerusalén y La Nueva Biblia Latinoamérica nishqan castellano Bibliankunachö Diospa shutin atska kuti yurin. Tsë Bibliakunachöqa, “Yavé”, “Yahveh”, “Yahvé” o “Jehová” nirmi churayan.

Tsënö kaptimpis, Biblia ruraqkunatam atska religionkuna niyan utilizäyanqan kaq Bibliakunaman Diospa shutinta mana churayänampaq. Tsëtam Vaticano rikätsikurqan 29 de junio de 2008 fëchayoq cartata obispokuna ëllukäyanqanman apatsir. Tsëchömi, “qepa watakunataqa pï mëmi Israel Diospa Shutinta parlëkäyan” nin. Nïkurnam, “Diospa Shutintaqa manam parlayanmantsu, ni imaman churayanmantsu” nir mandakun. Hinamampis, “kanan witsan traduciyanqan Bibliakunachöqa, [...] tetragrammatonpa rantin Adonai o kyrios: [...] ‘Señor’ nirmi traduciyänan” ninraqmi. Clärom këkan, Vaticänoqa Diospa shutinta mana pipis parlanantam munan.

Catölicopita rakikashqa religionkunapis manam Diospa shutinta respetayashqatsu. Ingleschö 1978 y castellänochö 1999 watakunachö yarqamoq Nueva Versión Internacional nishqan Bibliata traduciyanqampa secretarionmi kënö nirqan: “Más alliqa kanman karqan, Diospa shutin Jehoväta churëmi. Pero Salmo 23 textollaman yarpärishun, ‘Yavëmi mitsimaqnï’ nirnin traducirqa, 2.250.000 dólares gastayanqä qellëta yakuman hitareq cuentachi rurayäman karqan. [...] Mana pipis utilizaptin”.

Latinoamëricachöpis, religionkunam Diospa shutinta ushakätsita munayan. Sociedades Bíblicas Unidaspaq traduceq Steven Vothmi kënö nin: “Latinoamëricachö Iglesia Catölicapita rakikashqa religionkunapis, Jehová shutita parlayänampaq o mana parlayänampaqpis rikëkäyanraqmi. [...] Y tsëtam rikätsikun huk mushoq Pentecostal religionpis, [...] pëkunaqa 1960 kaq Reina-Valera nishqan Bibliapita Jehová shutita horqarir Señor nirllana churayänampaqmi mañakuyarqan”. Puntataqa Sociedades Bíblicas Unidas manash tsë rurëta munanaqtsu,  pero tsëpitaqa Jehová shutita mana churarllana Reina-Valera nishqan Bibliata horqayanqantam nin tsë secretario.

¿Imataq pasashqa Diospa shutinta Bibliaman churayänampa rantin Señor nirllana churayanqampita? Más sasam nunakunapaq tikrashqa Jehová imanö Dios kanqanta musyayänan. ¿Imanir? Pantatsikuptinmi, höraqa leeqkuna manam musyayantsu Señor nirnin, Jehoväpaq o Tsurin Jesuspaq parlëkanqanta. Tsëta rikärishun, Hechos 2:34 (NM) textochömi David ninqanta yarpätsikur apóstol Pedru kënö nin: “Jehovämi, ‘derecha kaq lädöman täkamï’ nirqan Señornïta [kawarimushqa Jesucristuta]”. Pero wakin Bibliakunaqa Mushoq Testamentu Kechuachow nishqan Biblianöpis “Señormi nerqan Señornïta” nirmi kë textota traduciyan. Hina Diospa shutinta mana churayanqan, ¿ima masmantaq chätsikushqa? Estudioso David Clinesmi, “Yavé y cristiänokuna creiyanqan Dios” neq tïtuloyoqta qellqanqanchö kënö nin: “Cristiänokuna Yavëpaq manana yarpäyanqanqa rurashqa, Cristullamanna más pensayänampaqmi”. Tsëmi rikätsikun Diosman Jesus mañakurqa, rasumpa kawaq y shutiyoq Diosman mañakunqanta religiösokuna imanir mana cuentata qokuyanqanta.

Këkunam rikätsimantsik Diospa shutinta nunakuna qonqayänanrëkur Satanás imëkata ruranqanta. Tsënö kaptimpis Jehoväta reqita y pëwan kuyanakïta puëdentsikmi.

Musyënam, Satanasqa Diospa shutinta paqwëmi ushakätsita munan y mana rasun kaq religionkunawanmi tsëta rurëkan. Tsënö kaptimpis, cielochö o Patsachö shutinta Jehová reqitsikunanta manam ni pï, ni ima michanqatsu. Pëpita rasun kaqta y sirveqninkunapaq imata pë munanqanta musyëta munaqkunaqa yachakïta puëdeyanmi.

Jehoväpa testïgonkunaqa kushishqam Bibliawan yanapayäshunki Diosta más reqinëkipaq. Jesusqa, Diospita yachatsikushqa karmi, “reqitsirqömi jutikita” nirqan, y tsënöllam pëkunapis rurayan (Juan 17:26, QKW). Bibliata estudiarllam ichikllapa ichikllapa yachakunki nunakunarëkur Jehová imakunata rurëkanqanta y Dios imanö kanqantapis.

Unë Diospa sirveqnin Jobpis “Dioswan alläpa amïgom” kayarqan, y qampis amïgon këta puëdenkim (Job 29:4). Bibliaqa qamtapis yanapashunkimanmi Diospa shutinta reqinëkipaq. Llapan yachakunqëkichömi rikärinki shutin “Noqaqa munanqa Këmanmi Chäshaq” ninan kanqanmannö Diosnintsik imëkatapis ruranqanta (Éxodo 3:14,nota). Y tsëqa paqwëmi yärakunki Diosnintsik nunakunata awninqanta cumplimunampaq kaqman.