Shamoq tiempota mantsayannatsu

KË PATSA ushakänampaq kaqta pensarmi, 1970 ushanan watakunachö Garywan Karen chakrakunapa yachaq ëwakuyarqan. Mana ushakäyänampaqqa kikinkunallapita llapan wanayanqanta tariyänan precisanqantam pensayarqan.

Tsërëkurmi librokunata rantiyarqan, cläsekunaman ëwayarqan y mëtsika nunakunata tapukuyarqan. Hinamampis, huk huertata rurëkurmi tukïta muruyarqan y fruta wayoq plantakunatam pitsqa chunkata plantayarqan, hina murukunatawan herramientakunatapis wayinkunamanmi churakuyarqan, nïkurmi murupakïta y conserva rurëta yachakuyarqan... ¡Hina animalta pishtarir ëtsanta hampiyänampaqpis huk yanasanmi yachatsirqan! Y Kärenmi mikïninkuna ushakänanman pensar, montichö mikuna plantakuna reqitapis yachakurqan. Garynam ninata wëkanampaq harapa tullun alli kanqanta y yamtawan cosinanampaq tullpa rurëta yachakurqan, tsënöpa manana imatapis rantir kawayänampaq.

“Noqapaqqa clärom karqan nunakuna ushakäyänampaq ichikllana pishinqan. Hinantin Patsachö imëka pasëkaqta rikärirllam cuentata qokurirqä” ninmi Karen. Garynam kënö nin: “Wakin jövenkunanöllam noqapis Vietnamchö guërrapa, huk color nunata chikeqkunapa y imëka mana alli ruraqkunapa contran churakarqä.  Pero nunakunaqa kikinkuna puralla ushakätsinakuyänampaq kaqta cuentata qokurirmi alläpa llakinarqä”.

Nïkurnam kënö nin: “Huk paqasmi tiempo kanqanyaq Bibliata leirqa y llapan Mushoq Testamentotam usharqä. Tsëpitam más yachakunärëkur chusku paqas llapanta yapë leirqä. Pitsqa hunaqtanam, patsa waräriptin Kärenta kënö nirqä: ‘Ushanan hunaqkunachönam kawëkantsik. Manam alläpanatsu pishin kë Patsata Diosnintsik pitsaramunampaq, tsëmi salvakoqpaq kaqkunata ashinantsik y pëkunawan këkänantsik’”. Hinan höram tukï religionkunachö ashiyarqan.

Tsënö këkäyaptinmi huk Testigo punkunman takakurirqan y pëwanmi Bibliapita yachakur qallëkuyarqan. Kärenmi kënö willakun: “Alläpam kushikurqä Biblia yachatsikunqanta willarayämaptin. Kë mundo ushakänampaq kaqta yachëkatsiyämänantaqa unëpitanam munarqä, pero kananqa rasun kaqtam yachakurirqö. Shamoq tiempochö llapan altsakänampaq kaqtam musyarirqä. Hinamampis, ciëlochö Teytantsik y Llapanta Kamaq Jehová Diospa más lädonchö këkaq cuentam sientekurqä”.

Garynam kënö nin: “Kawënïchö rasumpa kushishqa këtam tarirqä. Alläpam Bibliapita yachakï gustëkamaq, kanan witsampaq willakunqan cumplikaqta rikarmi, ichik tiempollachöna Patsata Diosnintsik limpiaramunampaq kaqta paqwë cuentata qokurirqä. Hina kënö pensanqätam yarpä: ‘Kë Patsa paqwë ushakänampaq alistakïtsu manam precisanqa, sinöqa Diosnintsik munanqannö kawëmi’”. Patsata Dios altsanampaq kaqta musyarirmi, ushakänampaq kaqmanqa yarparäyarqannatsu. Ichik tiempollachöna nunakunapa llapan problëmankunata ushakäratsimunampaq kaqta y kë Patsata shumaq huertaman tikratsinampaq kaqtam cuentata qokuriyarqan.

¿Imanönataq pensayan ishkë chunka pitsqa wata pasashqanchönaqa? Kärenmi kënö nin: “Imëpitapis masmi Jehoväta kuyä y pëman markäkö. Hina wakinkunapis Jehoväta kuyayänampaq y reqiyänampaqmi yanapëta tïrä, Garywan ishkämi yanapanakuyä familiä alli tsarakunampaq y huknölla Diosta serviyänäpaq. Tiempökunata shumaq patsëkatsirmi wanayanqällawan kawëta tïrayä. Tsënöpam nuna mayïkunata más yanapayä”.

Garynam kënö nin: “Diospa Gobiernon shamur nunakunapa hipakïninta ushakätsinampaqmi llapan hunaqkuna mañakö. Cada wayin wayin vicinökunaman yachatsikoq yarqurmi, huk nunallatapis Bibliawan yacharatsinäpaq Jehoväta mañakö. Y Jehoväqa 25 watanam mañakunqäta wiyaman. Kë Patsa paqwë hukläya tikranampaq kaqta musyarpis, Kärenwan noqaqa manam mantsayänatsu mana alli kaqkuna ushakäyanan hunaqta” (Mateo 6:9, 10; 2 Pedru 3:11, 12).

[9 kaq päginachö dibüju]

Garywan Kärenqa Bibliapita yachatsirmi nuna mayinkunata yanapayan