Ushakëpaq chusku tapukïkuna

SHAMOQ tiempochö ushakë kanampaq kaqtam Jesucristo parlarqan, y imanö kanampaq kaqtapis willakurmi, “allapa jipaquimi canqa. Tseno jipaqueqa manam imepis cashqaraqtsu que patsa camacashqanpita; y mananam yapepis canqanatsu” nirqan (Mateo 24:14, 21).

Tsënö kanampaq kaqta Jesus willakunqan y Bibliapis maskunata willakunqanmi rurashqa atska tapukïkuna yurinampaq. Rikärishun kë chusku tapukïkunapaq Diospa Palabran ima ninqanta. Munarqa kë revistachö textokuna ninqanta Bibliëkichö ashirinkimanmi.

1 ¿Imataq ushakanqa?

Kë Patsa ushakänampaq kaqtaqa manam Biblia yachatsikuntsu, antis mana imëpis ushakänampaq kaqtam willakun. Salmo 104:5 textochömi Diosqa “patsata allim takyatsishqa, y manam pipis ni imë kuyutsinqatsu” nin. Hina llapan nacionkuna guërrata rurayaptin Patsachö llapan kawëkaqkuna ushakänampaq kaqtapis manam yachatsikuntsu (Isaías 45:18). Kikin Jesucristum nirqan tsë ushakë chämuptin wakin nunakuna salvakuyänampaq kaqta (Mateo 24:21, 22). Tsëqa, ¿ima ushakänampaq kaqtataq Biblia willakun?

Patsachö gobiernokuna. Santo espïritunwanmi Diosnintsik Danielta kënö nir qellqatsirqan: “Tsë gobiernokunapa tiemponchömi, ciëlochö këkaq Dios, mana ushakaq gobiernota patsätsinqa. Tsë gobiernopa rantinqa mananam hukqa yëkunqanatsu. Y paqwëmi ushakätsinqa patsachö gobiernokunata, y kikinmi imëyaqpis kakunqa” (Daniel 2:44).

Guërrakuna y Patsata lluta rakchatäyanqankuna. Shamoq tiempochö Dios ruranampaq kaqta willakurmi Salmos qellqaq kënö nirqan: “Paqwëmi patsapita ushakätsin guërrakunata. Flëchatam pakikacharkun y lansatapis taksha takshallamanki roqukacharkun, hina guerra cärrokunatapis ninachö kayarmi ushakäratsin” (Salmo 46:9). Hina ‘patsata ushakätseqkunata’ ushakätsinampaqpis ninmi Diosqa (Apocalipsis 11:18, QKW).

Tukï mana alli rurëkuna. Diospa Palabranmi këta nin: “Alli kaqta ruraqkunallam patsachö kawayanqa, y hutsata mana ruraqkunallam tsëchö yachayanqa. Mana alli nunakunaqa, wallushqam kayanqa kikin patsapita;  traicionërokunanam llupishqa kayanqa tsëpita” (Proverbios 2:21, 22).

2 ¿Imëraq ushakë hunaq chämunqa?

Diosqa musyanmi “ime öra” mana allikunata ushakätsinampaq kaqta y Patsa imë gobernar qallamunampaq kaqtapis (Marcos 13:33). Pero nunaqa manam musyantsu imë kanampaq kaqta, tsëmi “ime öra o ime junaq cumplicänanpaq caqtaqa manam pipis musyayantsu, ni sielucho quecaq anjelcunapis, ni noqa Diospa tsurinpis, sinoqa quiquin Dios Yayallam musyan” nirqan Jesus (Mateo 24:36). Tsënö karpis, Jesuswan wakin qateqninkunaqa willakuyarqanmi mana allikuna ushakäyänampaq ichik tiempollana pishikaptin Patsachö imakuna pasanampaq kaqta. Tsëmi Jesus ninqankuna cumplikaqta rikar, mana allikuna ushakäyänan hunaq këllachöna këkanqanta musyarishun. Pero ¿imakunatataq rikänantsik karqan?

Tukï desgraciakunata, mana alli gobiernokunata y imëka mana alli rurëkunata. Huk kutim qateqninkuna Jesusta tapuyarqan ushakë chämunampaqna kaqta imanö musyayänampaqpis, tsëmi kënö nir contestarqan: “Juc nasionmi juc nasionwan guerata rurayanqa. Y juc marca nunacunam juc marca nunacunawan wanutsinacuyanqa. Mechopis patsam temblorwan allapa cuyonqa. Mallaqäqui watacunam canqa. Tsecunaqa imeca juc warmi qeshpicunanpaq nanatsicushqannollaran y sufrimientucunapa qallananllaran” (Marcos 13:8). Hina apóstol Pablupis tsë tiempokuna hukläyana kanampaq kaqta willakurmi kënö nirqan: “Allapa sasa cawaqui tiempucuna[m] chämonqa. Nunacunam queno ticracuriyanqa: codisiosu, qellellapaq locuyäcoq, orgullosu, musyaq tucoq, Teyta Diospa contran parlaq, papänintapis mamantapis mana cäsoq, agradesiquita mana yachaq, Teyta Diospa yachatsiquininta mana cäsoq, mana ancupäcoq, perdonaqui mana yachaqcuna, cuentusteru, llutan rurecunata mana teqñaq, allapa mana baleq, alli rurecuna mana gustaq, amiguncunata lebantar ranticoq, allapa lisu, yachaq tucoq, Diosnintsic munashqanta mana cäsushpa quiquincunapa munenincunallata ruracoq. Allapa relijiosu tucurmi, Diostapis ardella sirweq tucuyanqa; peru rurenincunawanqa Diosnintsicta juc cuchumanmi churariyan” (2 Timoteo 3:1-5).

Hinantin Patsapa tukï idiömachö Diospita yachatsikïkuna. Jesusqa, “llapan nunacunata alli willaquinïta willayänequi[m] presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” nirqanmi (Mateo 24:14).

3 ¿Imaraq tsëpita pasanqa?

Llapan alli nunakuna ciëloman apashqa kayänampaq kaqta y tsëchö imëyaqpis kawayänampaq kaqtaqa manam Biblia yachatsikuntsu. Antis Patsachö imëyaqpis kawayänampaqmi Diosqa nunakunata kamarqan y tsënö kanampaq kaqta rikätsikurmi Jesus kënö nirqan: “Cushicuyanqam qollmi shonquyoqcuna, porqui pecunapam que patsaqa” (Mateo 5:5; 6:9, 10). ¿Pero imanöraq kanqa mana alli nunakunapa ushakënin hunaq manaraq chämuptin wanukoqkunapaqqa? Kawariyämunampaq kaqtam Biblia willakun (Job 14:14, 15; Juan 5:28, 29). Y, ¿imaraq tsëpita pasanqa?

Jesustam Dios gobernatsinqa. Profeta Danielmi kënö nir qellqarqan: “Paqaspa visionchömi hina rikarqä, y ¡rikëki!, nunapa tsurin rikoqmi ciëlochö pukutë rurimpa shamïkarqan; y mana yupëpaq kawaq Awkinmanmi [Jehová Diosman] yëkurqan, y nöpanmanmi chätsiyarqan, tsë Awkimpa puntanman. Y pëtam qorqan mandakïta, respetashqa këta y gobiernota, tsënöpa llapan markakuna, llapan nacionkuna y tukï idioma parlaqkuna pëta serviyänampaq. Mandakïninqa mana ushakaq mandakïmi y manam hukmanqa pasanqatsu, y gobiernonqa manam imëpis ushakanqatsu” (Daniel 7:13, 14; Lucas 1:31, 32; Juan 3:13-16).

Nunakunaqa manam qeshyayanqanatsu y yamëmi imëyaqpis kawakuyanqa. Tsë tiempopaqmi profeta Isaías kënö nirqan: “Wayikunatam rurayanqa, y tsëchömi yachayanqa, atska  chakrakunatam murupakuyanqa, y wayunqantam mikuyanqa. Manam huk yachanampaqtsu wayita rurayanqa ni huk mikunampaqtsu muruyanqa” (Isaías 65:21-23). Hina apóstol Juanpis shamoq tiempopaq kënömi nirqan: “Diospa wayincho wamrancuna juntunam pewan cawacuyanqa. Pellatam llapan nunacuna sirwiyanqa, y pellam Diosnincunapis canqa. Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apocalipsis 21:3, 4).

4 ¿Imataraq rurashwan tsë ushakë chämuptin salvakunapaq?

Apóstol Pëdrum willakurqan, kë Patsapita llapan mana alli kaqkunata Dios ushakätsimunanna këkaptin, nunakuna tsëta mana creir burlakuyänampaq kaqta (2 Pedru 3:3, 4). Tsënö kaptimpis, këkunata ruranapaqmi apóstol Pedru atikakurqan:

Unë pasanqankunapitam yachakunantsik. Apóstol Pedru ninqannöpis, “Diosnintsic mana[sh] perdonanaqtsu une tiempu jutsasapa nunacunata. Masbienshi apäqui tamyawan ushacätsinaq. Noellatash qanchis nunacunatawan salbanaq. Peshi nunacunata willapänaq allicunata rurar cawayänanpaq” (2 Pedru 2:5). Y burlakoqkunapaqnam kënö nirqan: “Tse nunacuna cäyiyantsu Diosnintsic sieluta camashqanta, ni yacullacho que patsata muneninwan  camashqanta. Tsenollam jina cäyiyantsu Diosnintsic une tiempu que patsacho cawaqcunata apäqui tamyawan ushacätsishqanta. Peru que patsata y sieluta * Diosnintsic muneninwan camashqannollam shuyarëcatsin ninawan ushacäratsinanpaq. Tseqa canqa juisiu junaqmi; y mana alli ruraq nunacunam tsecho jipayanqa [“ushakäyanqa”, NM]” (2 Pedru 3:5-7).

Dios ninqantam wiyakunantsik. Mana ushakëta munaqkunaqa, ‘Diosnintsic munashqanno jutsata manana rurashpa shumaq cawacuyanampaqmi’ Pedru nirqan (2 Pedru 3:11). Tsënö nirqa, ushakë chämoqnö kaptinraq salvakïta munar Diosman markäkïta o pë munanqanta rurëta tïrë manana imachö yanapakunqantam rikätsikïkarqan.

Tsëqa, “Diosnintsic munashqanno jutsata manana rurashpa shumaq cawacushun” nirnin, ¿imapaqtaq Pedru parlëkarqan? ¿Munankimantsuraq Bibliëkipita yachakurita? Jehoväpa testïgonkunam kushishqa yanapariyäshunki. Tsënöpam shamoq tiempochö shumaq kawakï kanampaq kaqman markäkunki o yärakunki y manana mantsankinatsu.

[Päginapa ura kuchunchö willakï]

[7 kaq päginachö ninqan]

Diosqa manam kë Patsatatsu ushakätsinqa, antis malogrëkaqkunatam