Mañakï ¿Imakunapaqraq mañakushwan?
LLAPAN mañakïkunapitapis, Jesus yachatsikunqan padrenuestrota nunakuna kutin kutin más rezakuyanqantam pï më niyan. Tsënö kaptimpis, imata mañakïkäyanqantapis manam cuentata qokuyantsu. Atska millón nunakunam hunaqchö kutin kutin padrenuestrota rezakuyan imata mañakïkäyanqantapis mana musyëkar, pero Jesusqa manam tsënö rurayänampaqtsu yachatsikurqan. ¿Imanötaq tsëta musyantsik?
Mañakuyänampaq manaraq yachatsirmi Jesus kënö nirqan: “Ama mañacuyanquitsu Diosta mana cäsucoq nunacunanoqa. Pecunaqa mañacurnin, juc parlayashqanllatam cutïcuryan ushepa ushar parlacuyan” (Mateo 6:7). Tsënö nikarqa, ¿alli yachakïkur palabra por palabra rezakuyänampaqtsuraq padrenuestrota yachatsikunman karqan? Manam. Antis imakuna mañakï más precisanqantam Jesusqa yachatsikïkarqan. Mateo 6:9-13 textokunachö imakunata mañakunapaq yachatsimanqantsikta maslla rikärishun.
“Sielucho quecaq Dios Yayalläcuna, jutillequi allapa respetuwan alabashqa catsun.”
Puntataqa,Teytanllaman mañakuyänampaqmi qateqninkunata Jesus yachatsin. Nïkurqa, ¿imanirtaq Teytampa shutin alläpa respëtowan alabashqa kanampaq nirqan?
Nunakuna Patsachö kawar qallayanqampitanam, Diosta tumpar shutinta mana allichö horqayashqa. Chikeqnin Satanasmi, llapan nunakunata creitsin Jehová ulikoq kanqanta, wambrankunapita alli kaqta pakanqanta, y gobernëta mana yachanqanta (Génesis 3:1-6). Y Satanasman qaqaqkunaqa, Diosnintsik rumi shonqu kanqanta, chiki kanqanta, mana alli ruraq kanqanta o imatapis mana kamanqantam niyan. Wakinkunanäqa Bibliapita Diospa shutinta horqayashqam y parlayänantapis michäkuyanmi.
Pero Diospa Palabranqa tsë llapankunata Diosnintsik paqwë ushakätsinampaq kaqtam willakun (Ezequiel 39:7). Y tsëta rurarqa llapan nunakunapa problëmankunatapis altsamunqam. ¿Imanöraq ruranqa? Qateqninchömi Jesus tsëta willakun.
“Llapan nunacuna mandadiquicho catsun.”
Kanan witsan religionkunachö yachatsikoqkunaqa, Diospa Gobiernon ima kanqantapis manam musyayantsu. Pero Jesuspa tiemponchö judïokunawanqa manam tsënötsu pasarqan. Antis pëkunaqa musyayarqanmi nunakunata salvanampaq Dios akranqan Mesias, llapan Patsata gobernar altsanampaq kaqta unëpitana Biblia willakunqanta (Isaías 9:6, 7; Daniel 2:44). Tsë Gobiernom Diospa shutinta limpioyätsinanrëkur, Satanás ulikoq o llullakog kanqanta rikätsikunqa, y nïkurmi llapan mana alli rurëninkunata ushakätsinqa. Tsëchömi guërrakuna, qeshyakuna, mallaqë, y wanïpis paqwë ushakanqa (Salmo 46:9; 72:12-16; Isaías 25:8; 33:24). Tsëmi Diospa mandakïnin shamunampaq kaqta mañakurqa, këkuna cumplikänampaq mañakïkantsik.
“Sielucho caqcuna qam mandaconqequita rurayanqannolla, que patsachopis nunacuna rurayätsun.”
Diospa Tsurinmi, Satanastawan demonionkunata kë Patsaman qarpamurqan, tsëpita witsëpam ciëlochöqa Diospa munëninllatana rurayan, y tsënölla kë Patsachöpis rurakänampaq kaqtam kë palabrakunaqa rikätsikun (Apocalipsis 12:9-12). Punta ishkan kaq mañakikunanöpis, kë mañakïqa, kikintsikpa munënintsikpitaqa, Diospa munëninta puntaman churanan precisanqantam yarpätsimantsik. Musyanqantsiknöpis, Diospa munëninta rurarqa alläpa kushishqam kawakushun. Tsëmi kikin Jesuspis kënö nirqan: “Noqa munashqänoqa ama callatsuntsu, sinoqa qam munashqequino quecullatsun” (Lucas 22:42).
“Miquilläcuna cada junaq qoycalläyämë.”
Wananqantsikkunata mañakïta puëdenqantsiktam Jesusqa nirqan. Rikanqantsiknöpis, cada hunaq imata wananqantsikta mañakïqa manam hutsatsu. Antis tsëkunata mañakurqa, Diosnintsik ‘imecatapis qomarnintsic yanapamanqantsicta y cawenintsicpis qomanqantsicta’ cuentata qokunqantsiktam rikätsikïkantsik (Hechos 17:25). Imanömi kuyakoq teyta wambrankuna wananqanta kushishqa qon, tsaq tsënölla Jehoväpis kanqantam Bibliaqa rikätsikun. Y musyënam, kutin kutin mañakuyaptimpis imatapis mana alli kaqtaqa manam wambrankunata qonmantsu.
“Jutsalläcunapita perdonecalläyämë.”
¿Imanirtaq Jehová perdonamänantsikta wanantsik? Pï më nunakuna hutsa rurëta mana kaqtanö rikäyaptin o mana kaqpaq churayaptimpis, tsëpa culpan tukï problëmakunayoq kanqantsikta y hasta wanïmampis apamanqantsiktam Bibliaqa willakun. Hutsasapana yurirninmi Diosnintsikta piñatsinqankunata rurantsik. Tsëmi imëyaqpis kawakïta munarqa, Diosnintsik perdonamänantsikta wanantsik (Romanos 3:23; 5:12; 6:23). Pero Jehová alli kanqanta y perdonamänapaq listo këkanqanta Biblia yarpätsimanqantsikqa, alläpa kushikïpaqmi (Salmo 86:5).
“Jutsa rureman diablu ishquitsiyämeta munaptin ama jaqiralläyämëtsu.”
Llapantsikmi Diablupita Diosnintsik tsapëkamänantsikta wanantsik. Itsa pï më Satanás kawanqanta paqwë negayan. Pero Jesuspaqqa rasumpam karqan, tsëmi “que patsacho mandacoq” kanqantapis nirqan (Juan 12:31; 16:11). Diabluqa, manam nunakunata makinchö katsinqanllawantsu, ni imëka mana allikunata ruratsinqanllawantsu kushishqa kakun, hina Teytantsik Jehoväta manana servinapaqmi mana allikunata ruratsimënintsikta munan (1 Pedru 5:8). Pero Satanastaqa manam ni imanöpa mantsanantsiktsu, Diosnintsikqa pëpitapis más kallpayoqmi y kuyaqninkunataqa imëkapitapis tsapanmi.
Pero Jesus yachatsikunqan mañakïchöqa manam llapan mañakunantsikpaq kaqtsu këkan. Tsëmi 1 Juan 5:14 textochö kënö nin: “Sitsun pe munashqanno imatapis mañacushun, wiyamäshunmi”. Kë textoqa rikätsimantsik llapan yarpachakunqantsikta Diosnintsikta willëta puëdenqantsiktam, y musyantsikmi pëqa mana kaqpaq mana churanqanta (1 Pedru 5:7).
Pero ¿mañakïnintsik imakunachöraq yanapamantsik? ¿Tsëkunata Biblia willakuntsuraq? Qateqninchömi tsëpita yachakurishun.
Capaz këkunapis gustashunki
Mañakuy: ¿Imëtan y mëchötan Diosman mañakushwan?
¿Bibliachöqa mëchö o imë höra mañakunapaq kaqta ninku?
ENSEÑANZAS IMPORTANTES DE LA BIBLIA
¿Imataq Diospa Gobiernun?
Jesusqa, yachatsikur qallanqampita patsëmi, Diospa Gobiernumpita mas parlarqan. Jesuspa qateqninkunaqa unëpitam tsë Gobiernu chämunanta mañakïkäyan.