PIMAN mañakushqapis Diosllaman chanqantam kanan witsanqa pï mëpis creiyan. Movimientos interconfesionales nishqanchö kaqkuna y llapan religionkuna allilla kanqanta pensaqkunam tsëta niyan. Pero, ¿tsënötsuraq?

Rasun kaqchöqa, wakin mañakïkuna Diosman mana chanqantam Bibliaqa yachatsikun. Bibliata qellqayanqan witsankunapis pï mëmi ïdolokunaman mañakuyaq. Tsënö kaptimpis, kutin kutinmi Diosqa tsëta mana rurayänampaq markanta nirqan. Salmo 115:4-6 textokunam ïdolokunapa “rinrinkuna kaptimpis manam wiyayantsu” nin. Tsënö claro nikaptinqa, ¿imapaqraq mañakushwan mana wiyaq dioskunaman?

Tsëpita más yachakurinapaqqa, unë pasanqampaq Biblia willakunqanta rikärishun. Baal diospa sacerdötenkunatam, profeta Elias nirqan cada uno diosninkunaman mañakuyänampaq y mëqampis contestaq kaq, rasumpa kaq Dios kanqanta rikätsikunampaq. Tsëmi tsë profëtankunaqa Baalman rezakur qallëkuyarqan. Atska höram Baalman mañakuyarqan. Y “manam ni pï wiyarqantsu ni ichikllapis cäsorqantsu” (1 Reyes 18:29). ¿Tsënöllaku Elïastapis pasarqan?

Manam, antis mañakur ushariptinllam Diosqa ciëlopita ninata kachamurqan sacrificio ruranqanta ruparinampaq. ¿Imanirtaq Elïastaqa Dios wiyarqan? Tsëtaqa musyatsimantsik 1 Reyes 18:36, 37 textokuna imanö mañakunqanta willakunqanmi. Elias mañakunqanqa kima chunka palabrakunallawanmi unë kaq hebreu idiömachö këkan, y kima kutim Jehová nirnin Diosta shutimpa qayarqan.

¿Imanirtaq Elias mañakunqanqa hukläya karqan? Yarpäshun, Baalqa (“dueño” o “patrón” ninan) cananeokunapa diosnimpa shutinmi karqan, y tsënö shutiyoqqa atska dioskunam kayarqan. Pero Jehová shutiqa rasumpa kaq Diosllapam, y pëllam Llapan Kamanqan hanampa këkan. Tsëmi kënö nirqan: “Noqam Jehová kä. Tsëmi shutï; y manam ni pitapis qoshaqtsu gloriäta” (Isaías 42:8).

Tsëqa, Elias mañakunqan y Baalpa profëtankuna mañakuyanqan, ¿huk diosllamantsuraq charqan? Manam. Baalta adorëchöqa nunakunatam wanutsiyaq y warmipis ollqupis pununakurmi tukï rakchata rurayaq dioskunapaq, tsënöpam nunakunata hipatsiyaq y pensëninkunata mana alliman tikratsiyaq. Pero Jehoväta adorayanqanqa limpiom karqan, y nunakuna tukï mana allikunata rurayänampaq manam obligaqtsu. Tsëmi Jehoväman mañakuyanqanqa Baalmantsu charqan. Tsëqa kanman karqan, imëka alläpa kuyashqa amïgonman pipis cartakunqan, huk shutiyoq y mana reqinqan nunapa makinman chäreq cuentachi.

Jehoväman mañakoqkunaqa, llapan nunakunapa Teytan Kamakoqmanmi mañakikäyan. * Profeta Isaiaspis Diosman mañakur kënömi nirqan: “Jehová, qammi Teytäkuna kanki” (Isaías 63:16). Pëpaqmi Jesuspis qateqninkunata kënö nirqan: “Papänïqa qamcunapapis Papäniquicunam, y Diosnïqa qamcunapapis Diosniquicunam” (Juan 20:17). Jehoväqa, Jesuspa Teytanmi y pëmanmi mañakurqan, tsëmi qateqninkunapis Jehovällaman mañakuyänan karqan (Mateo 6:9).

Pero, ¿Bibliaqa mandakuntsuraq Jesusman, Mariaman, santokunaman y angelkunaman mañakunapaq? Manam, mañakunantsikqa Jehovällamanmi. Rikärishun imanir tsënö kanantapis. Mañakurninqa Diostam adorëkantsik,  y pëllata adoranapaqmi Bibliaqa yachatsikun (Éxodo 20:5). Hina pëllam “mañakïkuna Wiyaq[qa]” (Salmo 65:2). Tukï rurëchö yanapayänampaq hukkunata nishqa karpis, mañakïnintsiktaqa kikinmi wiyan y manam pitapis tsë derëchon qoshqatsu.

Tsëmi Dios wiyamänantsikpaqqa, “Señorpa jutin [“Jehoväman”, NM] llapan qayakoqkunam, salbashqa kanqa” nin Biblia (Hechos 2:21, QKW). Pero shutinchö mañakuyaptinqa, ¿llapan nunakunatatsuraq Dios wiyan? O ¿ima masraq pishin?