KË TAPUKÏPA respuestantaqa pï më nunakunam musyëta munayan. Këyaqqa rikarquntsik wakin mañakïkunallata Dios wiyanqantam. Tsëqa, ¿wiyamantsiktsuraq mañakunqantsikta? Kikintsikpitam kanqa wiyamänantsik o mana wiyamänantsikpis.

Jesusqa piñakurqanmi kawanqan witsan religiösokuna ardëlla Diosman mañakoqtukuyaptin, pëkunaqa nunakuna rikäyänanllapaqmi Diosta sirveqtukuyaq. Tsënö kayaptinmi, “tsellanam pecunapa premiuncuna” nirqan. Tsë religiösokunaqa manam Diosnintsik wiyananta munartsu mañakuyaq, sinöqa nunakuna alabayänanta ashirmi y tsëllanam pëkunapa premionkuna karqan (Mateo 6:5). Kanan witsampis, tsënöllam wakin nunakunaqa rurayan. Manam Diospa munëninta cuentaman churartsu mañakuyan, sinöqa kikinkunaman yarparllam. Y punta kaq yachatsikïkunachö rikanqantsiknöpis, Biblia yachatsikunqannö mana kawayaptinmi mañakïninkunata Dios contestantsu.

Y ¿noqantsiktaqa wiyamantsiktsuraq? Mañakushqa Diosnintsik wiyamänapaqqa, manam alli coloryoq këtaraqtsu, ni alli nacionpita këtaraqtsu, ni atska qellëyoq këtaraqtsu, ni respetashqa këtaraqtsu wanantsik. Antis Bibliaqa nin “llapan nunatapis Dios iwallla ricamanqantsicta[m]”. Hinamampis, “jinantin marcacho pipis allicunata rurar y Diosta respetar cacuyaptenqa, pëqa chasquinmi” (Hechos 10:34, 35). ‘Diosta respetaq’ nunaqa, manam piñatsinqan kaqkunata rurantsu. Y ‘allicunata ruraq’ nunaqa, Diosnintsik munanqanta ruranampaqmi sinchikun y manam kikimpa kaqtatsu ni huk nunakunapa kaqtatsu puntaman churan. Tsëmi mañakunqantsikta Diosnintsik wiyamänata munarqa, Palabran Biblia ninqanta ruranantsik. *

Pï mëmi mañakïninkunata milagrota rurar Dios contestananta shuyaräyan. Pero unë tiempochöpis, milagrota rurarqa hora hörallam mañakïkunata Dios contestarqan. Huk milagro kanqampita yapë huk milagro kanqanyaqqa, atska pachak watakunaraq pasanqantam Biblia willakun. Hinamampis Bibliaqa rikätsikun apostolkuna wanur ushakäyanqanllachö milagrokunapis ushakänampaq kaqtam (1 Corintios 13:8-10). Tsënö karpis, milagrokuna manana kanqanqa manam mañakïnintsikta Dios mana wiyanqantatsu rikätsikun. Rikärishun kanan witsankunapis Diosnintsik mañakïnintsikta imanö contestanqanta:

Yachëtam qomantsik. Diosnintsikllapitam llapan yachë shamun, y pë yanapananta asheqkunata y pëta wiyakuyänanrëkur sinchikoqkunataqa, qonmi yachëninkunata (Santiagu 1:5).

Santo espïritutam qomantsik. Santo espïrituqa Diospa imëkata ruraq kallpanmi, y tsë kallpannöqa manam imapis yanapakuntsu. Tsëmi, imëka pruëbakunapa pasar tsarakunapaq, yarpachakurnin yamë këta tarinapaq y alli nuna kanapaqpis yanapamantsik (Galatas 5:22, 23). Hinamampis Jesusqa nirqan, santo espïrituta mañakushqaqa Diosnintsik qomänapaqmi (Lucas 11:13).

Rasumpa kaqta yachakuyänampaqmi nunakunata yanapan. Hechos 17:26, 27 textokuna ninqannöpis, hinantin Patsapita alli shonquyoq nunakunam Diosta ashiyan. Y shutintam reqita munayan, Patsapaqwan nunakunapaq imata ruramunampaq kaqta y pëman imanö más witiyänampaq kaqtam musyëta munayan (Santiagu 4:8). Jehoväpa testïgonkunaqa tinkuyanmi o topayanmi tsënö nunakunawan y kushishqam tapukïninkunata Bibliawan yacharatsiyan.

¿Tsëku qampis kë revistata chaskirqunki? ¿Rasumpa kaq Diostaku reqita munanki? Tsëqa, itsa mañakunqëkita Diosnintsik këwan contestëkäshunki.