Cantarnin Jehoväta kushitsishun
Cantarnin Jehoväta kushitsishun
“Kawëkanqäyaqqa Diosnïtam cantarnin alabashaq.” (SAL. 146:2.)
1. ¿Imanirtaq David Jehoväpaq cantokunata qellqarqan?
¡ËKA tiemporaq joven Davidqa Belen markachö teytampa üshankunata mitsirnin karqan! Üshankunata mitsirninmi rikaq ciëlochö qoyllurkunata, “tuna animalkunata”, “ciëlochö volaq pishqukunata”, y Dios tukï kamanqankunatapis. Tsë llapanta rikarninmi Jehoväpaq cantokunata qellqëta munarqan, imëkatapis shumaq rurashqa kaptin. David qellqanqan cantokunaqa Salmos librochömi këkan * (lei Salmo 8:3, 4, 7-9 *).
2. a) ¿Imachötaq música yanapamashwan? Willakaramï. b) Salmo 34:7, 8 y Salmo 139:2-8 textokuna ninqannö, ¿imanötaq David Jehoväta rikarqan?
2 Davidqa, itsa üshankunata mitsinqan witsan müsicata más alli tocaq tikrarirqan. Arpa toquëta alli yachaptinmi, rey Saulpaq müsicata tocanampaq apayarqan (Pro. 22:29). Shumaq müsicanwanmi Saulpa llakishqa shonqunta kushiratseq, kananyaqpis müsicata wiyarmi wakin nunakunaqa kushikuyan. Awmi, arpa waqaqta wiyëkurmi “Saulpa shonqun alläpa kushireq” (1 Sam. 16:23). David qellqanqan cantokunaqa kananyaqpis këkäyanllam. David yurinqampita kima waranqa (3.000) watakuna pasashqa kaptimpis, atska millón nunakunam llakinashqa këkarpis tsë salmokunata leirqa alläpa kushikuyan (2 Cró. 7:6; lei Salmo 34:7, 8 * y 139:2-8 *; Amós 6:5).
¿Imanöraq música yanapakun rasumpa kaq religionchö?
3, 4. ¿Imatataq David rurarqan Jehoväpaq müsicata qotsuyänampaq?
3 Davidqa müsicata toquëta yachanqanwanmi Jehoväta alabarqan. Hinamampis Israelpa reynin këman chärirmi, tabernäculochö müsicata tocayänampaq patsätsirqan. Levïta kastapitam 4.000 nunakunata akrayarqan Diosta “alabayänampaq”. Kë llapampitam, 288 “Jehoväpaq qotsuyänampaq yachatsishqa [kayarqan], y llapampis allim cantëta yachayaq” (1 Cró. 23:3, 5; 25:7).
4 Levïtakuna cantayanqan cancionkunaqa, casi llapanmi David salmokunata qellqanqampita karqan. Israelïtakunaqa tsë cancionkunata qotsuyaptin wiyayaqmi, tsëqa ¡imaraq tsë qotsukunata wiyëkurnin kushïkuyaq! Tiempowan arca del pacto nishqanta Jerusalenman apayänampaqmi, “David levïtakunapa jëfenkunata nirqan qotsoq wawqinkunata akrayänampaq, llapampis taksha y hatun arpankunawan, platïllonkunawan sinchipa tocayänampaq, y llapan kallpankunawan kushikïwan qotsuyänampaq” (1 Cró. 15:16).
5, 6. a) ¿Imanirtaq David gobernanqan witsan müsicata alläpa precïsotanö rikäyarqan? b) ¿Imataq rikätsimantsik música Israelïtakunapaq alläpa preciso kanqanta?
5 ¿Imanirtaq David gobernanqan witsan müsicata alläpa precïsotanö rikäyarqan? ¿Müsicata David kuyaptinllatsuraq? Manam. Rey Ezequïasmi rikätsikurqan templochö cantë y toquë alläpa preciso kanqanta. 2 Crónicas 29:25 textom willamantsik rey Ezequías imata ruranqantapis: “Jehoväpa wayinchö levïtakuna tocayänampaqmi churakäyänan karqan tocana platïllonkunawan, cuerdayoq instrumentonkunawan y arpankunawan, rey David y reypaq visionkunata chaskeq Gad nuna, y profeta Natán mandakunqannö, Jehovämi profëtankunawan këtaqa mandakurqan”.
6 Awmi, profëtankunawanmi kikin Jehová willatsikurqan cantokunawan alabayänampaq. Cantaq kaq levïtakunataqa wakin rurëkunapitam horqariyaq, tsënöpa cantokunata qellqayänampaq tiemponkuna kanampaq, y kutin kutin shumaq cantëta yachakuyänampaq (1 Cró. 9:33).
7, 8. ¿Imataq más preciso cantanantsik hora?
7 Pero wakinkunaqa itsa niyanman: “Noqaqa manam cantëta yachallätsu. Manachi noqallätaqa akrayämanmantsu karqan tabernäculochö cantanäpaq”. Pero manam llapan cantaq levïtakunatsu alleq cantëta yachayaq. 1 Crónicas 25:8 textoqa rikätsimantsik tsëraq yachakïkaqkunapis kanqantam. Hinamampis, yarpänantsikmi Israelchö wakin kastakuna cantëta shumaq yachayaptimpis, Jehová levïtakunallata akranqanta. Tsëmi, cantëta yachar o mana yacharpis llapan shonqunkunawan cantayaq.
8 David müsicata toquëta alläpa yachëkuptimpis, manam müsicata alli tocaq kanqanrëkurllatsu Diosnintsik akrarqan. Salmo 33:3 textochömi, kikin David kënö nishpa qellqarqan: “Sinchipa cuerdakunata tocayë y kushikïwan cantayë”. Kë texto ninqannöpis, Jehoväta alabanapaqqa llapan yachanqantsikmannömi cantëta sinchikunantsik.
David wanuriptimpis müsicaqa alläpa precïsom karqan
9. ¿Imakunataraq wiyashwan y rikashwan karqan templopa ushënin witsanchö kawarqa?
9 Salomon gobernanqan witsanqa, Diosta alabayänampaqmi música alläpa preciso karqan. Tantiarinapaq, templo rurëta ushariyaptinmi huk hatun orquesta karqan, y tsë orquestachömi 120 trompëtakunata tocayarqan (lei 2 Crónicas 5:12 *). Bibliam willakun trompëtata tocaq sacerdötekuna, y cantaq kaqkuna ‘Jehoväta alabayanqanchö y agradecikuyanqanchö huknölla wiyakatsiyanqanta’. Y cantayanqan höram Jehoväpaq kënö niyaq: “Pëqa alläpa allim, kuyakïninqa manam imëpis ushakantsu”. Tocar ushariyaptinmi, Jehoväpa “wayin pukutëwan” huntarirqan, tsëmi rikätsikurqan tsë müsicata Jehová chaskinqanta. ¡Imanöraq israelïtakuna kushïkuyarqan pachak ishkë chunka trompeta waqaqta wiyar y waranqëpayan cantaqkunata wiyëkurnin! (2 Cró. 5:13.)
10, 11. ¿Imanöpataq musyantsik unë cristiänokuna müsicawan Jehoväta adorayanqanta?
10 Unë cristiänokunapis müsicawanmi Jehoväta adorayaq. Pero manam israelïtakunanötsu tabernäculochö o templochö ëllukäyaq, sinöqa cristiänokunapa wayinkunachömi. Höranäqa chikeqninkuna qatikachäyaptinmi pakëllapa o mana cuentata qokuyanqanyaqlla ëllukäyaq. Tsënö kaptimpis canticokunawan Jehoväta alabëtaqa manam qonqayaqtsu.
11 Pablum Colösaschö täraq cristiänokunata kënö nirqan: “Alli yacheniquicunawan jucniqui jucniqui shumaq consijanacuyë. Llapan shonqiquicunawan Diosta ‘Grasias’ nicur, alabecuyë Salmu cantucunawan, corucunawan pepaq cantacur” (Col. 3:16). Carcelchö këkarpis “Pabluwan Silasqa cantacur Diosta alabarnin[mi] mañaquicayarqan”, tsëpis cantayänampaq música mana këkaptin (Hech. 16:25). Pëkuna rurayanqanman pensarnin kënö tapukushun: “Noqatapis carcelman apayämaptinqa, ¿ëka canticokunataraq cantanäpaq yarpäman?”.
12. ¿Imanötaq canticokuna alläpa preciso kanqanta rikätsikuntsik?
12 Jehoväta adoranqantsikchö música alläpa preciso kaptinmi këkunata tapukunantsik: “¿Canticokunata respetanqäta rikätsiköku? ¿Reunionkunachö y asamblëakunachö cristiano mayïkunawan qallanan canticokunata cantanäpaq imëkanöpapis hörachö chëtaku tïrä? ¿Shonqüpita patsëku cantä? ¿Yachatsikunapaq Diospa Escuëlan, y Diospa Gobiernompita Yachatsikunapaq, y Discursopita Yachakunapaq y Täpakoqpita Yachakunapaq reunionkunachö canticokunata familiä respetanku? ¿Wambräkunata yachatsïku cántico hora sutapäkoq o purikoq mana yarquyänampaq?”. Ama qonqashuntsu, cantarnimpis Jehovätam adorëkantsik. ‘Alli cantëta yachar’ o ‘tsëraq yachakïkarpis’ cantanantsikmi. Llapantsikmi Jehoväta alabanapaqqa cantanantsik (igualaratsi 2 Corintios 8:12).
Tiempo pasanqanmannömi wananqantsikkunapis cambiarëkan
13, 14. ¿Imanirtaq alläpa preciso reunionkunachö sinchipa cantanantsik? Willakaramï.
13 Pachak watapitapis masnam pasarishqa, ingleschö kë revista canticokuna imanir alläpa preciso kanqanta kënö willakunqan: “Rasumpa kaqta cantëqa, Diospa kaqta shonquntsikchö y peqantsikchö kanampaq yanapëmi”. Canticokunapa letran Bibliapita kaptinmi, cantëta alli yachakushqaqa Diospa Palabran shonquntsikman más chanqa. ¡Tsëqa alläpa precïsom huk ishkë canticokunallatapis yachakunantsik! Wakin congregacionkunachö Testïgokuna shumaq cantayanqanmi, atskaq ëwaqkunata Diospita yachakuyänampaq yanapashqa.
14 1869 watachö huk paqas pasanqankunata yarpärishun. C. T. Russell jövenmi, wayinman kutikïkanqanchö, patsa rurin wayichö cantëkäyaqta wiyëkurqan. Tsë witsampaqqa, mananam Diosta ashirqannatsu, tsëpa rantinqa negocionchö más trabajanampaqmi churapakarqan. Diospita yachatsikur nunakunata mana yanapëta puëdermi, gananqan qellëllawanna yanapëta munarqan. Patsa rurin wayiman yëkurirnam, rikëkurqan religiösokuna cantar këkäyanqanta. Ëllukäyanqan o gorirëkäyangan wayi rakcha y shumaq altsashqa mana këkaptimpis, wiyanampaqmi täkurirqan. Watakuna pasariptinnam qellqarqan, “tsë wiyanqankuna Biblia ninqanman yapë markäkunampaq y markäkïnin miranampaq yanapanqanta”. Këchö rikanqantsiknöpis, cantaqta wiyarmi tsë reunionman yëkurirqan.
15. ¿Imanirtaq mushoq canticotana wanarquntsik?
15 Watakuna pasanqanmannömi Bibliapita más yachakurquntsik. Proverbios 4:18 texto ninqannömi: “Alli ruraqkunapa kawëninqa patsa warämuptin atsikyënö, y hora ëwanqanmannömi más y más atsikyan imëkapis rikakanqanyaq”. Jehoväpita más yachakurqa aktsiwannömi rasumpa kaqta más musyarintsik, tsëmi punta parlanqantsikkunata wakintaqa parlantsiknatsu. Ishkë chunka pitsqa (25) watakunapanam cantarquntsik Canten alabanzas a Jehová * nishqan canticopita. Pero tsë cántico yarqamunqampitaqa Biblia parlanqankunata masnam yachakurquntsik, tsëmi canticochö wakin palabrakunataqa parlantsiknatsu. Kë palabrakunaman yarpärishun, castellänochöqa “nuevo orden” nishpam unë parlaq kantsik, pero kananqa “mushoq mundo” nintsikmi. Hina manam Diospa shutin “vindicädom” kanqa nintsiknatsu, sinöqa Diospa shutin “respetashqam” kanqa nintsikmi. Kë yachatsikïkuna más claro kanqanmi, rikätsikurqan huk mushoq canticotana wananqantsikta.
16. ¿Imanötaq mushoq cántico yanapamäshun Efesios 5:19 texto ninqanta ruranapaq?
16 Tsërëkurmi Jehoväpa Testïgonkunata Pushaqkuna horqayämushqa mushoq canticota, shutinqa Cantarnin Jehoväta kushitsishun ninmi. Y kë cancionërochöqa 135 canticokunam kan, tsëmi yanapamäshun wakin wakinllatapis cancionërota mana rikashpa cantanapaq. Tsënö ruranapaqmi apóstol Pablu Efesios 5:19 (lei) textochö nimantsik.
Alläpa agradecikushun
17. ¿Imataq yanapamäshun congregacionchö cantëta mana mantsakunapaq?
17 ¿Cantayanqan hora upällatsuraq kakushwan pantarita mantsar? ¡Manam! ¿Manaku parlanqantsik hora ‘llapantsic imanopapis mana allicunata’ nirintsik? (Sant. 3:2.) Pero manam tsërëkurtsu wayin wayin Jehoväpita yachatsikoq ëwëta haqirintsik. Tsënö kaptinqa, ¿imanirtaq canticokunawan Jehová alabëta haqirishwan? Jehovämi “nunata shimin qorqan”, tsëmi cantarnin alabanapaq sinchikushqa alläpa kushikun (Éxo. 4:11).
18. ¿Imataq yanapamäshun canticokunapa lëtrankunata yachakunapaq?
18 Cantarnin Jehoväta kushitsishun cancionërom atska idiömachöna discochö yarqamushqa, tsëchöqa müsicawan cantëkäyaqtam wiyantsik. Kë grabacionkunaqa alläpa shumaqmi. Kë canticokunata kutin kutin wiyarninqa, wakin wakin letrakunallatapis yachakurishunmi. Canticokunaqa qellqakashqa qallananta cantarkushqa qateqnin kaq ima ninqantapis musyarinapaqnöllam. Tsënö kaptinqa, ¿imanirtaq tsë grabacionkunata wiyëkar cantantsiktsu? Wayintsikchö müsicawan imanö cantana kanqanta y letranta yachakurninqa, más allim reunionkunachöpis cantashun.
19. ¿Fäciltsuraq asamblëakunapaq müsicata grabananqa?
19 Huk hunaq kaq, ishkë hunaq kaq, y hatun kaq asamblëantsikchömi shumaq müsicata churayämun. Itsa höraqa mana kaqpaqnö churarishwan, pero rurayämunampaqqa sasaraqmi o ajarämi. Puntataqa canticokunatam akrariyan, tsëpitanam orquesta Watchtower tsë llapan canticokuna hukllëllachö yarqamunampaq tocariyan. Kë orquestachöqa 64 Testïgokunam tocayan. Llapankunam, atska tiempopa hapallankuna practicayan, y Patterson (Nueva York) markachönam atska hora grabayan. Y tsë orquestachö chunka tocaqkunam, nacionninkunapita Estados Unidos nacionyaq ëwayan asamblëantsikkunapaq müsicata grabayänampaq. Kë llapan rurayämunqampitam alläpa agradecikunantsik. Tsëpenqa, ¿imanötaq asamblëakunachö agradecikunqantsikta rikätsikushwan? Hamakunapaq niramashqa müsicata qallanampita ushanqanyaq wiyakurninmi.
20. ¿Imanö cantanapaqtaq churapakänantsik?
20 Diosnintsikqa, reunionkunachö pëta alabar cantanqantsiktam wiyamantsik, y alläpam kushikun. Tsëmi shonquntsikpita patsë kushishqa cantanantsik. Alli cantëta yachaq karpis o tsëraq yachakïkarpis, ¡cantarnin Jehoväta kushitsishun! (Sal. 104:33.)
[Päginapa ura kuchunchö willakïkuna]
^ par. 1 Hina kënöllam David wanunqampita waranqa wata pasarinqanchö, angelkuna Belenchö mitsikoqkunaman yurïkurnin Mesïaspa yurikïninta willayarqan (Luc. 2:4, 8, 13, 14).
^ par. 1 Salmo 8:3, 4, 7-9: “Makikiwan cielo ruranqëkita, y killatawan qoyllurkunata churanqëkita rikarmi noqa tapukü, ¿imataq wanoq nuna pëta yarpänëkipaq, y nunapa wambran pëta rikänëkipaq? Üshakunata, chiwakunata y törokunata, hina tuna animalkunata, ciëlochö volaq pishqukunata, lamarchö pescädokunata y tsëchö tukïläya animalkunatam. Oh Jehová Teytalläkuna, ¡imëka hatunmi shutikiqa hinantin patsachö!”.
^ par. 2 Salmo 34:7, 8: “Jehoväpa angelninqa llapan mantsakoqkunata hiruruparmi libran. Jehová alli kanqanta rikäyë y kushikuyë; pëpa tsapäkïninchö kaq nunaqa alläpa kushikutsun”.
^ par. 2 Salmo 139:2-8: “Qammi täkunqä hörata y sharkunqä hörata rikëkanki. Llapan pensënïkunatam karupita rikëkämunki. Viajanqäta y hamarinqätapis rikankim y llapan rurënïkunatam musyanki. Manaraq imatapis parlaptïmi, ¡oh Jehová! llapan parlanäpaq kaqkunata musyankina. Qepäpa y puntäpapis rikarëkämankim; y makikitam noqapa hanäman churarqunki. Tsënö alläpa musyanqëkiqa noqapaq alläpa shumaqmi. Alläpa hatun kaptinmi, musyëta puëdëtsu. ¿Mëmantaq espïrïtïkipita ëwäman, y rikënikipita mëmanraq safaküman? Ciëlopa ëwakuptïpis rikëkämankimanllam; y wanushqakuna pamparäyanqanchö cämä kaptimpis, ¡tsëchömi qam këkankiman!”.
^ par. 9 2 Crónicas 5:12: “Asaf, Hemán, Jedutún y tsurinkunawan y wawqinkunawan llapan cantaq levïtakunam, fino lïnowan vestishqa y tocana platïllonkunawan, cuerdayoq instrumentonkunawan, y arpankunawanmi shëkäyarqan altarpa inti yarqamunan lädonmampa, y pëkunawanmi këkäyarqan pachak ishkë chunka trompëtata tocaq sacerdötekuna”.
^ par. 15 Kë canticochöqa 225 canticokunam kaq, y pachak idiömapitapis maschömi rurayämoq.
¿Imataq ninki?
• ¿Bibliachö ima willakïkunatataq tarintsik cantarnin Jehoväta alabë alläpa preciso kanqanta musyanapaq?
• Mateo 22:37 texto ninqannö, ¿imanirtaq llapan shonquntsikwan cantashwan?
• ¿Imanötaq rikätsikushwan canticokunata alläpa kuyanqantsikta?
[Yachakunapaq kaqpa tapukïninkuna]
[30 kaq päginachö dibüju]
¿Wambrantsikkunata yachatsintsikku cántico hora tëkäyanqampita ardëpa mana yarquyänampaq?
[31 kaq päginachö dibüju]
¿Mushoq canticopa lëtrankunata wayintsikchö yachakïkantsikku?