2 kaq yachatsikï

Hukpa kaqta qampa kaqtawan igualatsitsu

BIBLIAQA KËNÖMI NIN: “Cada ünu allita o mana allita ruraycanganta shumag tantiyacutsun. Si imatapis allillata rurashga carga, ama jucpa ruraynincunawanga ricaparnin iwalatsingatsu” (Galatas 6:4, NTCN).

¿IMATAQ LLAKISHQA KËMAN CHÄTSIKUN? Kapamanqantsikta wakinkunapatawan igualatsinqantsikmi, y wallkalla kapoqkunawanmi höraqa tsëta rurantsik, pero imëkayoq kaqkunawan, más puëdeqkunawan o más yachaqkunawanmi masqa igualatsikuntsik. Y nunakuna imëkayoq kayanqampita o imëka rurëta puëdeyanqanllapita respetarqa, mana allitam rurëkäshun. Tsënö karqa itsa chikinakïmampis chäkurishun (Eclesiastés 4:4).

¿IMATAQ KUSHISHQA KANAPAQ YANAPAMÄSHUN? Jehová * rikämanqantsiknö rikäkïta yachakunqantsikmi. Tsënöpam imanö kanqantsikpitapis más kushishqa kashun. 1 Samuel 16:7 ninqannöpis “nunaqa nawin rikanqanllatam rikan, pero Jehoväqa shonqutam” rikan. Tsëmi pëqa pitawampis igualatsimantsiktsu. Alli kaqta pensanqantsikpita, sientekunqantsikpita y alli kaqta munanqantsikpitam alläpa kuyamantsik (Hebreus 4:12, 13). Pëqa musyanmi hutsasapa kanqantsikta y tsëta cuentata qokunantsiktam munan. Kapamanqantsikkunata wakinkunapatawan igualatsirqa, bienmi wakinkunapita alli kanqantsikta pensashun, o bienmi llakishqalla imëpis kawakushun. Noqantsikpaqqa alli kanqa humilde kë, y pipis noqantsikpita más puëdeq o más alli kanqanta cuentata qokïmi (Proverbios 11:2).

Tsëqa, ¿imataq yanapamäshun Diosnintsik más kuyamänapaq? Profeta Miquëasmi kënö nirqan: “Patsa nuna, pëqa alli kaqtam nishurqunki. ¿Imatataq Jehová yapë mañëkäshunki? ¿Manaku pëwan purirnin alli kaqta ruranëkita, ankupäkoq [llakipäkoq] kanëkita y humilde kanëkita?” (Miqueas 6:8). Kë ninqankunata wiyakushqaqa Diosnintsik cuidamäshunmi (1 Pedru 5:6, 7). ¡Diosnintsik kuyamanqantsikta musyënöqa manachi imapis kushitsimashwantsu!

[Päginapa ura kuchunchö willakï]

[5 kaq päginachö dibüju]

Shonquntsik imanöpis kanqampitam Jehoväqa kuyamantsik