Kanan witsan, ¿tarishwantsuraq kushishqa kawakïta?

“Huk waktsa kapunqanllawan kushishqa kawakurqa, rico cuentam; y huk rico imëkayoq karpis mana kushishqa karqa, waktsa cuentam.” (Estados Unïdospita, político y científico Benjamin Franklin ninqan)

PÏ MË nunakunam cuentata qokuyashqa imëkayoq këwantsu kushishqa këta tarina kanqanta. Tsënö kaptimpis, pï mëtam rikantsik llakishqallata, ¿imanirtaq tsënö kawakuyan? Mana atskata tarirnin, munayanqanta mana lograr o vecïnonkunanö imëkayoq këta mana puëder. Itsa qampis llakikunki kë qateqninchö ninqankuna pasashuptiki:

• Imëkatapis rantir-raq kushishqa kawanëkipaq kaqta propagandakunachö rikar.

• Escuëlachö o trabäjochö wakinkuna más yachaq o más alli trabajaq kayaptin pëkunanö këta munar.

• Wakinkuna agradecikïta mana yachayaptin.

• Pï mëpis o hasta amïgokunapis imëkayoq karnin qälakuyaptin.

• Kawënikichö más precisaq kaq tapukïkunapa respuestanta mana tarir.

Këkuna pasaptimpis, ¿tarinqantsikllawan kushishqa kawakushwantsuraq? Apóstol Pablum nirqan tarinqanllawan kushishqa këta ‘yachanqanta’. Höraqa imëkayoqmi kawarqan, pero höraqa manam imampis kapurqantsu. Wakinkunam allita pëpaq parlayarqan, pero wakinkunaqa paqwëmi chikiyarqan. Tsëkunapa pasarpis, “noqaqa yachacushqam cä capamanqanllawan cawaquita” nirqanmi (Filipenses 4:11, 12).

Tsënö ninqanmi rikätsikun, kushishqa këtaqa yachakïta puëdenqantsikta. Bibliachöqa pitsqa yachatsikïkunam kan wakinkuna llakishqalla kawakuyaptimpis, kushishqa këta tarinapaq. ¿Tsëkunata musyëta munankimantsuraq?