‘¡Keymi alli tyempu!’

“¡Keymi key alli tyempu! ¡Keymi kanan salbakiy junaq!” (2 COR. 6:2.)

1. ¿Imanirtaq rikänantsikraq mëqan rurëpis más preciso kanqanta?

“LLAPAMPAQMI churashqa tiempo kan, y patsachö imëka rurëpaqpis tiempo kanmi.” (Ecl. 3:1.) Salomonqa tsënö nirqan murunapaq, viajanapaq, negociota ruranapaq, nunakunawan parlanapaq o imëkata ruranapaqpis tiempo rakinan alläpa preciso kanqanta musyarmi. Pero imëkata rurana kaptimpis, rikänantsikmi ima rurë más preciso kanqanta. Tsëta musyëmi yanapamäshun más precïson kaqta puntaman churanapaq.

2. ¿Imanötaq musyantsik Jesus ima tiempochö kawëkanqantapis musyanqanta?

² Kë Patsachö Jesus këkarmi musyarqan imata ruranampaq kaqta y imanö tiempochö kawëkanqantapis. Pëpaq willakunqan profecïakuna cumplikanqanta musyarmi, ima rurë más preciso kanqanta musyarqan (1 Ped. 1:11; Apo. 19:10). Dios awnikunqan Mesias kanqantam rikätsikunan karqan, Gobiernompitam yachatsikunan karqan, y pëwan mandakayämunampaqmi nunakunata akranan karqan. Hinamampis congregaciontam patsätsinan karqan, tsënöpa hinantin Patsapa yachatsikuyänampaq y Jesuspa qateqnin këman chäyänampaq (Mar. 1:15).

3. Imanö tiempochöpis kawëkanqanta musyanqan, ¿imanötaq Jesusta yanaparqan?

³ Këkunata musyarmi Jesusqa kushi kushi Teytampa munëninta rurarqan. Kënömi nirqan qateqninkunata: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Luc. 10:2; Mal. 4:5, 6). Qateqninkunapitam puntata chunka ishkëta akrarqan y tsëpitanam qanchis chunkata. Rurayänampaq kaqta yacharatsirmi, mandarirqan kënö yachatsikuyänampaq: “Diosnintsic mandacoq cananpaq tiempu chäramunnam”. Y pëqa, ¿imatataq rurarqan? Bibliam kënö nimantsik: “Tseno  chunca ishque (12) disipuluncunata cösa notificarirnam, Jesus eucorqan Galilea probinsiacho quecaq marcacunapa alli willaquininta willapäcunanpaq” (Mat. 10:5-7; 11:1; Luc. 10:1).

4. ¿Imanötaq Pabluqa Jesus ruranqanta qatirqan?

⁴ Jesusmi yachatsimarquntsik shonqupita patsë Diosta kuyanapaq y servinapaq. Tsëtam apóstol Pablu rikätsikurqan cristiano mayinkunata kënö nirnin: “Imanomi noqapis Jesucristu cawanqanno cawaquita tirecä, tsenolla qamcunapis yachacuyë alli portaquita” (1 Cor. 11:1). ¿Imanötaq Pabluqa Jesus ruranqanta qatirqan? Tsëtaqa rurarqan willapäkïchö mana qelanarmi. Tsëmi congregacionkunaman cartakurnin këkunata nirqan: “Imatapis rurayänequipaq caqta mana qeläcushpa rurayë”, “llapan shonqiquicunawan cushi cushilla sirwiyë”, hina nirqanmi, Jehovapaq “mas y mas uryashun”, y “cushishqa llapan shonqiquicunawan [Jehoväpaqnö] rurayanqui” nishpa (Rom. 12:11; 1 Cor. 15:58; Col. 3:23). Apóstol Pabluqa manam qonqarqantsu Damasco markaman ëwëkaptin Jesus yuripunqanta, y Ananïaswan Jesus kënö nitsinqanta: “Tse nunataqa noqam acrashqa cä. Jinantin nasioncunapa ewarnin, israel mayincunata y mana israel caqcunatapis puedeq autoridanincunatawan noqapaq willapänanpaq” (Hech. 9:15; Rom. 1:1, 5; Gal. 1:16).

‘¡Keymi alli tyempu!’

5. ¿Imanirtaq Pabluqa mana mantsakushpa yachatsikoq?

⁵ Hechos librota leirqa rikantsikmi apóstol Pablu shonqupita patsë y mana mantsakushpa yachatsikunqanta (Hech. 13:9, 10; 17:16, 17; 18:5). ¿Imanirtaq tsënöqa yachatsikurqan? Ima tiempochö kawëkanqantapis musyarmi. Tsëmi kënö nirqan: “¡Keymi key alli tyempu! ¡Keymi kanan salbakiy junaq!” (2 Cor. 6:2, QKW). Hina kë palabrakunaqa qellqakarqan 537 watachö israelïtakuna Babiloniapita yarquyänampaq ichikllana pishikaptinmi (Isa. 49:8, 9). Pero ¿ima nïtataq apóstol Pablu munarqan kë textochö? Wakin kaq versïculokunachömi këta rikärishun.

6, 7. ¿Ima preciso rurëtataq chaskiyashqa ciëlota ëwaqpaq kaqkuna, y pikunataq yanapëkäyan?

⁶ Qepan kaq versïculokunachömi, apóstol Pablu parlarqan pëta y ciëlopaq kaqkunata huk preciso rurëta rurayänampaq Diosnintsik mandanqampita (lei 2 Corintios 5:18-20). Tsë alläpa preciso rurëqa karqan: “Pewan jucnolla cayänanpaq llapan nunacunatapis willap[ëmi]” y ‘Dioswan amishtayänampaq’ roguëmi. Huk parlakïchöqa, Dioswan amishtëkur kuyakïninta tariyänampaqmi yanapakuyänan karqan.

⁷ Nunakunaqa Jehoväpita rakikäyarqan Edén huertachö Jehoväpa contran churakarmi (Rom. 3:10, 23). Jehoväpita rakikarmi, hipakïman y wanïman kikinkuna churakäyarqan. Pablu ninqannöpis: “Musyantsicmi unepita asta canancamayaq Dios llapan camashqancuna imeca juc qeshyaq warmi qeshpicur nanatsiconqanno jipaquicayanqanta” (Rom. 8:22). Tsënö këkäyaptimpis, Diosqa pëman kutirnin amishtayänampaqmi nunakunata rogarqan. Tsëtam Pablu y ciëlota ëwaqpaq cristiano mayinkuna willakuyänan karqan. Awmi, Jesucristuman llapan markäkoqkunapaqmi “salbakiy junaq” karqan. Kanan witsampis, ciëlota ëwaqpaq kaqkuna y yanapaqnin ‘mas üshacunam’, ‘alli tyempu’ hunaq manaraq ushaptin nunakuna Dioswan amishtayänampaq willakïkäyan (Juan 10:16).

8. ¿Imanirtaq alläpa preciso Dioswan amishtayänampaq willakï?

⁸ ¿Imanirtaq alläpa preciso Dioswan amishtayänampaq  willakï? Nuna mana wiyakurnin Diospita rakikashqa kaptimpis, kikin Jehovämi tsëta altsanampaq churapakarqan (1 Juan 4:10, 19). ¿Imanötaq tsëtaqa rurarqan? Pablum kënö nin: “Teyta Jesucristum wanininwan llapan nunacunapa jutsanta mana caqpaq churarïcur Teyta Diosnintsictawan amishtatsimarqontsic. Tsemi noqacunata encargayämashqa tse willaquita pitapis metapis willapäyänäpaq” (2 Cor. 5:19; Isa. 55:6).

9. ¿Imanötaq Pablu rikätsikurqan Jehová ankupäkoq kanqampita agradecikunqanta?

⁹ Jehovämi Tsurin wanunampaq haqirqan, y Jesuspa wanïninman markäkoqkunatam yanaparqan hutsankunapita perdonta chaskiyänampaq y Dioswan amishtayänampaq. Hinamampis, tiempo manaraq ushakaptinmi sirveqninkunata willakuyänampaq hinantin Patsapa kacharqan Dioswan nunakuna amishtayänampaq (lei 1 Timoteu 2:3-6). Diospa munëninta Pablu musyarir y ima tiempochö kawëkanqantapis tantearirmi, Dioswan “jucnolla cayänanpaq llapan nunacunatapis willap[arqan]”. Diosqa nunakunawan amishtëta munëkanllam. Manam nunakunapita rakikäkurishqatsu. Tsëmi kanampis rasunlla Pablu ninqanqa: “¡Keymi key alli tyempu! ¡Keymi kanan salbakiy junaq!” ¡Alläpa ankupäkoq y llakipäkoqmi Jehová Diosnintsikqa! (Éxo. 34:6, 7.)

“Ama mana caqpaq churayëtsu [...] Dios musyätsiyäshunqequita”

10. ‘Salbakiy junaqpita’ musyarirnin, ¿imatataq rurëkäyan puntapitana ciëlota ëwaqpaq kaq cristiänokuna?

¹⁰ Puntataqa, “Jesucristuwan juc shonqunolla” kaqkuna o ciëlota ëwaqpaq kaqkunam Dioswan amishtayashqa (2 Cor. 5:17, 18). Pëkunapaqqa, “salbakiy junaq” qallarqan 33 wata Pentecostés hunaqchömi. Tsëpita patsëmi, Jehová mandanqannö ‘pitapis metapis willëcäyan’ pëwan amishtayänampaq. Awmi, kanan witsanyaqmi ciëlota ëwaqpaq kaqkunaqa Dioswan “jucnolla cayänanpaq llapan nunacunatapis willap[ëcäyan]”. Pëkunaqa musyayanmi “chuscu anjelcuna que patsapa chuscun esquinancunacho shëcayaqta”. Y patsaman mana vientonampaq vientota tsaparëkäyanqanta. ¡Manam ushanraqtsu salvakï ‘alli tyempu’ hunaqqa! (Apo. 7:1-3.) Tsëmi 1900 witsëpita patsë, ciëlota ëwaqpaq kaqkuna mana mantsakushpa hinantin Patsapa yachatsikïkäyan nunakuna Dioswan amishtayänampaq.

11, 12. Ciëlopaq ëwaqpaq kaqkuna 1900 witsanchö, ¿imanötaq rikätsikuyarqan ima tiempochöpis kawayanqanta musyayanqanta? (21 kaq päginachö këkaq dibüjota rikäri.)

¹¹ Los testigos de Jehová, proclamadores del Reino de Dios nishqan libro ninqannömi, 1900 witsampita “Russell y yanapaqninkuna creiyaq cosecha witsanchö kawëkäyanqanta, y Diospita nunakuna wiyakuyänan tiempo chämunqantana”. ¿Imatataq rurayarqan? Cosecha witsanchö kawëkäyanqanta musyarirqa manam pëkunawan nunakuna ëllukäyänanllapaqtsu invitayarqan. Tsëtaqa cürakunallam unëpita patsa rurëkäyashqa. Pero ciëlopaq kaq cristiänokunaqa tukïnöpam yachatsikur qallëkuyarqan. Tsëpaqqa alläpa yanapakurqan qepa yarqamoq mäquinakunam.

¹² Tsë wallkaqlla cristiänokunaqa Diospita yachatsikuyaq tratädokunawan, follëtokunawan, revistakunawan y librokunawanmi. Hina discursokunata y ichiklla mensäjekunatapis qellqayaqmi atska waranqa periödicokunachö yarqunampaq. Hinamampis tsë nacionchö y huk nacionkunachö radiopa wiyayänampaqpis parlayaqmi, hina rikänalla kaq pelïculakuna kanqan witsanmi, rikäna kaq y wiyana kaq pelïculakunata horqarayämurqan. ¿Nunakunata yanapayashqatsuraq tsë llapanta rurayanqanwan? Kananqa qanchis millonpitapis masnam Diospa invitacionninta chaskiyashqa, y pëkunanam ‘Dioswan amishtayänampaq’ wakin nunakunata invitëkäyan. Diospa markan tsënö miranampaqqa, ciëlota ëwaqpaq kaq cristiänokunam tukïta pasëkarnimpis yachatsikuyashqa.

13. ¿Dios ima munanqantataq ruranantsik?

¹³ “¡Keymi key alli tyempu!” nishpa Pablu  ninqanqa kananyaqpis rasunllam. Jehová kuyakïninchö pëwan amishtanapaq yachatsimanqantsiktam alläpa agradecikuntsik. Tsëmi makintsikta bolsikakurkur shäkunantsikpa rantinqa, wiyakunantsik Pablu kënö nimanqantsikta: “Ama mana caqpaq churayëtsu tse alli queninta Teyta Dios musyätsiyäshunqequita” (2 Cor. 6:1). Jehoväqa alläpa kuyakoq këninchömi, Jesuspa shutinchö nunakunawan amishtëta munan, tsëmi ‘tse willaquita pitapis metapis willapänantsic’ (2 Cor. 5:19).

14. ¿Imataq atska nacionkunachö pasakïkan?

¹⁴ Casi llapan nunakunam Satanaspa makinchö karnin Jehoväpa kuyakïninta paqwë reqiyantsu, y Kamaqnimpita rakikashqa kawayan (2 Cor. 4:3, 4; 1 Juan 5:19). Pero kë mundochö chikinakï y hipakï más miranqanta rikar, y Diospa contran nunakuna churakäyanqampita kë llapan pasëkanqanta musyarirmi, wakinkunaqa Diospita wiyakur qallëkuyan. Y Diospita mana wiyakuyanqan nacionkunachöpis, atskaq nunakunam Jehoväpita yachakïkäyan, y pëwan amishtayänampaqmi kawëninkunata altsëkäyan. ¿Imëpitapis masku nunakuna ‘Dioswan amishtayänampaq’ yachatsikïkantsik?

15. ¿Imapitataq noqantsikqa yachatsikuntsik?

¹⁵ Yachatsikurqa, Diosman entregakuptikiqa tukï hipakïnikikunam ushakanqa y más allim kawanki nishllapatsu nunakunata yachatsintsik. Tsënö yachatsikïllatam wakin nunakunaqa religionninkunachö ashiyan, y pastorninkunapis tsëllatam yachatsiyan (2 Tim. 4:3, 4). Noqantsikqa manam tsënöllatsu nunakunata yachatsintsik. Sinöqa, Cristu wanunqanrëkur Jehová hutsantsikkunata perdonamänapaq kaqtam yachatsikuntsik. Tsënöpam Diospita rakikashqatsu kawantsik, sinöqa pëwanmi amishtarintsik (Rom. 5:10; 8:32). Pero ichikllanam pishin amishtakïpaq ‘alli tyempu’ ushakärinampaq.

‘Espirituchow rawreykar’

16. ¿Imanirtaq Pabluqa mana mantsakushpa yachatsikurqan?

¹⁶ ¿Shonqupita patsëku rasun kaq religionpita yachatsikuntsik? Wakinkunaqa nuna mayinkunawan parlëtam mantsakuyan. Pero llapan shonquwan Diospita yachatsikïqa manam kikintsik imanöpis kanqantsikpitatsu. Pablum mana mantsakushpa yachatsikunapaq kënö nirqan: “Espirituchowqa rawreykar,  Señorta sirwi[yë]” (Rom. 12:11, QKW). Santo espïritum Pabluta yanaparqan kushishqa y mana mantsakushpa Diospita yachatsikunampaq. Pabluta Jesus akranqampita, hasta Römachö tukïta pasar carcelchö kanqanyaqqa pasarqan kima chunka watakunam, pero tsënö këkarpis pëqa kushi kushillam Jehoväta sirverqan. Tsëpaqqa santo espïrituntam imëpis Jehoväta mañakoq. Tsëchi kënö nirqan: “Imecapaqpis listum quecä, puedeq [...] [Jehová] callpanwan yanapamaptin” (Fili. 4:13). ¡Pablu ruranqanqa alläpam yanapamashwan!

17. ¿Imataq cristiänokunata yanapan ‘espirituchow rawreykar’ kayänampaq?

¹⁷ Griego idiömachö “rawreykar” neq palabraqa, “puwakïkaq” ninanmi (Bover-Cantera). Yakuman pensarishun. ¿Imatataq yaku wanan imëpis puwakïkänampaq? Nina mana upinantam wanan. Tsënöllam cristiänokunapis ‘espirituchow rawreykar’ këkäyänampaqqa, santo espïrituta imëpis wanayan. Pero ¿imanötaq santo espïritutaqa chaskishwan? Jehová nimanqantsikkunata llapanta rurarmi. Ama congregacionchö ni wayichöpis Jehová adorëta haqishuntsu, tsëpa rantinqa yachakunantsikmi hapallantsik y familiantsikkunawampis, hina manam Jehoväman mañakïta ni reunionkunaman ëwëtapis haqinantsiktsu. Këkunata rurashqam, espïrituqa “nina” cuenta “puwakïkaqta” katsimäshun (lei Hechos 4:20 y 18:25).

18. ¿Ima preciso rurëta ruranapaqtaq cristiänokuna sinchikushwan?

¹⁸ Cristiänokunaqa llapan shonquntsikwanmi Diosnintsikta servinantsik, y manam imapis ruranapaq kaqta haqitsimänata permitinantsiktsu. Y, ¿imataq tsë ruranapaq kaqqa? Jesus ruranqannö Jehová munanqanta rurëmi (Heb. 10:7). Jehoväqa munan llapan nunakuna pëwan amishtayänantam. Tsëmi Jesus y Pablu ruranqannö, noqantsikpis más preciso kaq rurëta puntaman churar kushishqa yachatsikunantsik.

¿Yarpankiku?

• ¿Imapaqtaq Pabluta y ciëlota ewaqpaq kaq cristiano mayinkunata Jehová mandarqan?

• ¿Imanötaq musyantsik ciëlopaq kaq y Patsapaq kaq “key alli tyempu[pita]” kanan witsan willakïkäyanqanta?

• ¿Imataq cristiänokunata yanapan “espirituchow rawreyka[yänampaq]”?

[Yachakunapaq kaqpa tapukïninkuna]

[19 kaq päginachö dibüju]

Pabluqa Jesus yuripunqan hunaqta manam imëpis qonqarqantsu