1 kaq yachatsikï

Nunakunatam kuyanëki, manam imëkayoq këtatsu

BIBLIAQA KËNÖMI NIN: “Qelle cuyepitam llapan mana alli rurecuna yurin” (1 Timoteu 6:10).

¿IMATAQ LLAKISHQA KËMAN CHÄTSIKUN? Propagandakunam creitsimantsik kapamanqantsikpitapis masta wananqantsikta. Imanö ëkanö trabajarpis, tsëraq yarqaramushqa kaqta, más hatun kaqta y allin kaqta rantinatam munayan. Tsëkunata tarinarëkurqa rasllam qellëta kuyar qallëkushwan. Tsënö kaptimpis, qellë kuyaqkunaqa imëkata tarirpis mana kushishqa kayanqantam Bibliaqa willamantsik. Hina rey Salomonpis kënömi nirqan: “Qellëllata kuyaq nunaqa, manam qellëta tarirpis kushishqatsu kanqa; hina imëkayoq këta kuyaqpis, manam kapunqanwan kushishqatsu kanqa” (Eclesiastés 5:10).

¿IMATAQ KUSHISHQA KANAPAQ YANAPAMÄSHUN? Jesus ruranqampita yachakunqantsikmi, pëqa nunakunatam kuyarqan y manam imëkayoq këtatsu. Tsëmi imëkantapis nunakunarëkur haqirqan y hasta pëkunarëkur wanurqampis (Juan 15:13). Kënömi nirqan: “Qaraquimi mas cushiqueqa chasquir cushiquipitapis” (Hechos 20:35). Tiempontsikta o imëka kapamanqantsikta nunakunata yanapanarëkur qoshqaqa, pëkunapis tsënölla rurëtam yachakuyanqa. Tsëmi “qoyey, i qoyäshunkim” nirqan Jesus (Lucas 6:38, QKW). Kapoqyoq këta kuyaq nunakunaqa, manam imëpis kushishqallaqa kawayantsu, antis llakikurlla y hiparllam kawakuyan (1 Timoteu 6:9, 10). Pero wakinkunata kuyashqa y pëkunapis kuyamashqaqa, ¡kushishqam kawakushun!

Tsëmi kënö tapukunantsik: “¿Wananqällawan kushishqa kawanapaq tirämantsuraq? ¿Imatapis mana wananqä kaqtaku katsï? ¿Rasumpaku wanä rantita munanqäkunata?”. Tiempontsikta y kallpantsikta alli utilizarqa: nuna mayintsiktam yanapashun y llapanta qomaqnintsik Diostam servikäshun (Mateo 6:24; Hechos 17:28).

[4 kaq päginachö dibüju]

“Qoyey, i qoyäshunkim”