Llakikïchö y tentacionkunachö tsarämaqnintsik yanapakï

“Santu Espirituta chasquirirmi, poderyoq ticrariyanqui.” (HECH. 1:8.)

1, 2. ¿Ima yanapakïtataq Jesus qateqninkunata awnirqan, y imanirtaq wanayarqan?

JESUSQA musyarqanmi qateqninkuna llapan mandanqanta kikinkunallapitaqa rurëta mana puëdeyanqanta. Rurayänampaq kaq alläpa hatun kaptin, chikeqninkuna atskaq kayaptin y kikinkunalla rurëta mana puëdeyaptinmi, Diosnintsik yanapanantaraq wanayarqan. Tsëmi Jesus ciëlota manaraq ëwakurnin kënö nirqan: “Santu Espirituta chasquirirmi, poderyoq ticrariyanqui. Tsenam noqa rurashqäcunata willacurnin, puriyanqui Jerusalencho, Judeacho, Samaria marcacunacho; y jinantin munduyaqmi chäratsiyanqui” (Hech. 1:8).

² Tsënö Jesus ninqanqa cumplikarqan 33 wata Pentecostés fiestachömi, tsëpinmi Jesuspa qateqninkuna santo espïrituta chaskiyarqan, tsëmi hinantin Jerusalenchö Diospita yachatsikuyarqan. ¡Manam pipis micharqantsu! (Hech. 4:20.) Tsëpita patsëmi “asta que patsapa usheninyaq” Diosta sirveqkunaqa, alläpa wanantsik kallpan yanapëkamänata (Mat. 28:20).

3. a) ¿Imachötaq poderpita hukläya santo espíritu? b) ¿Imanötaq Jehová qomanqantsik poder yanapamantsik?

³ Jesus qateqninkunata awninqanta yarpärishun, pëmi nirqan: “Santu Espirituta chasquirirmi, poderyoq ticrariyanqui”. Manam espíritu, poder kanqantaqa pensashwantsu. Santo espïrituqa Diospa munëninta rurëkaq kallpam. Pero poderpaqqa, huk diccionariom nin “imëkatapis ruranampaq y kamanampaq” kallpa kanqanta (Diccionario Estudio Salamanca-Octaedro). Kë poderqa nunachö o imachö karpis hasta wananqan hörayaqmi churaraq cuenta këkan. Santo espïritutaqa igualatsishwan baterïata carguëkaq electricidadtawanmi, y podertanam baterïachö winarëkaq electricidadtawan. Jehová santo espïrituwan poderta qomanqantsikqa yanapamantsik Jehovällata servinapaq, awnikunqantsikta cumplinapaq, y imëka mana allikunachö tsarakunapaqmi (lei Miqueas 3:8 * y Colosenses 1:29).

4. ¿Imataraq kë yachatsikïchö rikäshun, y imarëkurtaq yachakunantsik?

⁴ ¿Imanötaq santo espïrituwan poderta chaskinqantsikta rikätsikuntsik? Santo espïritupa yanapakïninwan, ¿imanötaq imatapis parlashwan y rurashwan? Cristiänokuna Diosnintsikta alli servita munashqapis, Satanasrëkur, mundochö nunakunarëkur y kikintsik hutsata ruraq kanqantsikrëkurmi, imëka mana allikunata pasantsik. Alläpa precïsom kë llapanta vencinantsik, tsëta rurarllam Jehová Diosllapaq kashun, imëpis yachatsikïkäshun y Jehová Diosnintsikwampis amigo këkäshun. Rikärishun santo espíritu tentacionkunachö, utinëchö y llakinëchö imanö yanapamanqantsikta.

Tentacionkunachö alli tsarakunapaq poder

5. ¿Imanötaq Diosman mañakunqantsik yanapamashwan?

⁵ Jesusmi qateqninkuna kënö mañakuyänampaq yachatsirqan: “Diablu ishquitsiyämeta munaptin ama jaqiralläyamëtsu; antis  yanapecalläyämë jutsaman mana ishquilläyänäpaq” (Mat. 6:13). Sirveqninkuna Jehoväta kënö mañakuyaptinqa, pëqa yanapëkunqam. Huk kutichömi Jesus kënö nirqan: “Sielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa” (Luc. 11:13). ¡Imanö kushikïpaqmi alli kaqta ruranapaq Diosnintsik atska poderta awnimanqantsikqa! Pero këqa manam tentacionkunapitam librayäshunki ninantsu (1 Cor. 10:13). Tsëpa rantinqa, ima tentación kaptimpis tsë höram llapan shonquntsikwan Diosnintsikman mañakunantsik (Mat. 26:42).

6. ¿Imatataq Jesus rurarqan Satanaspa tentacionninman mana ishkinampaq?

⁶ Diablu tentaptinmi Jesusqa Biblia ninqanwan contestarqan. Tsënöqa contestarqan Biblia ninqanta alleq musyarmi. Rikärishun imanö ninqantapis: “Diospa palabranmi queno escribirëcan”, “Diospa palabranmi jina queno escribirëcan”, “¡Quepeq yarqï, diablu! Diospa palabranmi escribirëcan: ‘Diosllatam adoranequi y sirwinequi’”. Jehoväta y Palabran Bibliata kuyarmi munarqantsu munapëpaq tentacionkunata Satanás churaptimpis (Mat. 4:1-10). Tukïläya tentacionninman Jesus mana ishkiptinmi Satanás ëwakurqan.

7. ¿Imanötaq Biblia ninqan yanapamantsik tentacionkunaman mana ishkinapaq?

⁷ Satanaspa tentacionninman Jesus mana ishkinampaq Biblia ninqannö contestëkaptinqa, ¿manaku tsënö noqantsikpis rurashwan? Satanaspa toqllanman mana ishkinapaq y witikunapaqqa, puntataqa alläpa precïsom Jehová ninqampita yachakunantsik y ninqannölla ruranantsik. Atskaq nunakunam tsëta rurayashqa Bibliata estudiarirnin y tsëchö Jehoväpa yachënin y rurëninkuna alläpa väleq kanqanta yachakurirnin. Awmi, “Diospa palabranqa cawatsicoq palabra carmi, allapa poderyoq. Y [...] yarpenintsicmanpis, shonquntsicmanpis charcun imano canqantsictapis musyatsimänantsicpaq” (Heb. 4:12). Hinamampis, Bibliata leirnin y yachakunqantsikman pensarninqa, más allim yachakushun rasumpa kaqta parlaq y imëpis cumpleq Dios kanqanta (Dan. 9:13). Bibliapa consëjonkuna alläpa alli kaptinmi, tiempota horqashwan pishipanqantsikchö imanöpis yanapamänapaq kaqta yachakunapaq.

8. ¿Imakunataq yanapamantsik santo espïrituta chaskinapaq?

⁸ Jesusqa manam Diospa Palabranta yachanqanllapitatsu tentacionkunachö tsarakurqan, sinöqa “Santu Espiritupa poderninwan” karmi (Luc. 4:1). Pënöllam noqantsikpis atska kallpayoq kashun Jehová Diosnintsikwan alli amigo karninqa. ¿Imanötaq Diosnintsikman witishwan? Bibliata estudiarnin, Diosman mañakurnin, congregacionman ëwarninmi, y këkuna ruranqantsikmi yanapamäshun santo espïrituta chaskinapaq (Sant. 4:7, 8). Atskaq cristiänokunam Jehoväpa kaqchö rurapakuyanqan alläpa alli kanqanta rikäyashqa. Jehoväpa kaqllaman yarparäyanqan pensëninkunata yanapanqantam willakuyan.

9, 10. a) Täranqëkipa, ¿ima tentacionkunamantaq nunakuna más ishkiyan? b) Utishqa këkashqa y tentacionkunapa pasashqa, ¿imanötaq Jehoväpa kaqman yarpachakï y mañakï yanapamashwan?

⁹ Yarpärishun ima tentacionkunapa pasanqantsikta. Casado karninqa, ¿pillatapis asipëta munarquntsikku? O soltero karninqa, ¿pillapis mana cristiano këkar mëtapis ëwanapaq invitamashqa, sasaraqku o ajaraqku manam ninapaq kashqa? Televisionta rikëkashqa o Internetchö këkashqa melanëpaq rurëkuna raslla yarqaramuptin, ¿rikaräkïtaku munarquntsik? Këkunaman mana ishkinapaqqa, alläpa precïsom puntallapitana mana allita ruramänata pensanantsik: ichikllapis pantarishqaqa, hutsa rurëmanmi ishkirishwan (Sant. 1:14, 15). Mana alliman ishkirir Jehoväta, markanta y familiantsikkunata llakitsinapaq kaqmanmi pensanantsik. Pero Jehová ninqanta wiyakushqaqa alläpa kushishqam kawakushun (lei Salmo 119:37 * y Proverbios 22:3 *). Kënö tentacionkunawan  topar o tinkurqa, mana ishkinapaqmi Diospa kallpanta mañakunantsik.

¹⁰ Jesus tentacionkunaman mana ishkinqanqa, mastapis yachatsimantsikmi. Diospa Tsurin chusku chunka hunaq desiertochö mana imatapis mikurnin këkaptinmi, Satanás tentëta munarqan. Itsachi Diabluqa tentanampaq alli tiempotanö rikarqan (Luc. 4:13). Kanampis tsënöllam noqantsikta tentamënintsikta munan: ishkinapaq más alli tiempotam ashin y mana tsarakoqtanö rikëkamarnintsikqa tukïtam ruramantsik. Tsëmi alläpa preciso Jehoväpa kaqchö alli sinchi kanantsik. Utinë o pishipay y llakinë chämuptinqa, alläpa precïsom Jehoväta tsapëkamänantsikpaq y espïritunta qoykamänantsikpaq mañakunantsik (2 Cor. 12:8-10).

Utishqa këta y llakinëta vencinapaq poder

11, 12. a) ¿Imanirtaq kanan witsan nunakuna llakishqalla kawakuyan? b) ¿Imataq yanapamäshun llakishqalla mana kawakunapaq?

¹¹ Hutsasapa kashqam höraqa shonquntsikman llakinë chäramun, y kë witsan kawakïchönäqa imëpis mana pasakunqankunam pasakun, tsëmi más llakinätsimantsik (2 Tim. 3:1-5). Armagedón hunaq këllachöna kaptinmi qellë tinkunnatsu, llakishqallana kawakuntsik y tukïkunata hipantsik. Rasuntachi wakinkunanäqa familiankunata imanöpapis mantenita puëdeyannatsu. Tukï yarpachakïkuna kaptinmi, pasëpa utishqallana kawakuyan. Tsënö qam kawakïkaptikeqa, ¿imaraq yanapashunkiman tsë llapanchö alleq tsarakunëkipaq?

¹² Santo espíritu yanapamänantsikpaq Jesus awnimanqantsikta yarpë (lei Juan 14:16, 17). Kë kallpaqa imëkapitapis más poderyoqmi. Tsëwanmi Jehoväqa ‘mas atsca’ kallpata qomantsik, y tukï hipakïchö alli tsarakunapaq yanapamantsik (Efe. 3:20). Apóstol Pablum nirqan ‘espiriturëkur Teyta Diospa poderninta’ chaskinqantsikta, tsëmi ‘ima ecata’ pasëkarnimpis tsarakuntsik (2 Cor. 4:7, 8). Jehoväqa manam kë witsankunachö tentacionkuna ushakärinantatsu awnimantsik, pero tentacionkunachö alli tsarakunapaq santo espïritunta qomänapaqqa awnimantsikmi (Fili. 4:13).

13. a) Tukïläya problëmakunachö tsarakunampaq, ¿imanötaq Stephanie kallpata tarishqa? b) ¿Pillatapis reqinkiku tsënö problëmakuna pasashqata?

¹³ Rikärishun 19 watayoq precursora regular Stephanie shutiyoq pasanqanta. 12 watayoqlla këkaptinmi derrame nishqan qeshya tsaririrqan, y peqanchömi tumorta taririyarqan. Tsëpita patsëmi ishkë kutina operayashqa, radioterapia nishqanta chaskishqa, y derrämeqa ishkë kuti maspis tsarishqam, tsëmi kananqa allinatsu rikan y izquierda kaq lado cuerpon ichikllana kuyun. Stephanieqa reunionkunaman  y yachatsikoq ëwananrëkurmi imëkanöpis kallpata horqan. Tsënö këkarpis, Jehová imanö yanapëkanqantaqa mäkunmi. Revistantsikkunachö wakin cristiänokuna imanöpis pasayanqankunata leinqanmi yanapan. Cristiano mayinkunaqa tarjëtakunata mandaparnin, reunionkuna manaraq qallaptin y ushariptin shumaq parlaparninmi kushitsiyan. Y Diospita yachakïta munaqkunam wayinman yachatsinampaq ëwayan. Kë llapampitam Stephanieqa Jehoväwan haqanö sientekun, y Salmo 41:3 kuyanqan texto pëchö cumplikanqantam rikan.

14. Nitipakashqa sientekurqa, ¿imatataq rurashwantsu?

¹⁴ Utishqa o nitipakashqa këkarninqa, höraqa pensarishwanmi wallka tiempollana Bibliata hapallantsik y familiantsikwan estudiar, Diospita yachatsikïman yarqur y reunionkunaman ëwar más alli sientekunapaq kaqta. Pero tsë rurëqa pasëpa mana allim kanman. ¿Imanir? Jehoväpa kaqchö más rurapakïlla santo espïrituta chaskinapaq yanapamashqa, tsëllam imëpis kushitsimantsik y kallpata qomantsik (lei Mateo 11:28, 29). ¿Manaku höraqa reunionkunaman utishqa chantsik, pero ushariptinqa más kallpayoq sientekuntsik? Awmi, ¡Jehoväpa kaqchö ruranapaqmi yapë kallpantsik yuririn!

15. a) ¿Mana sinchikushllapam tsarakuyanki nimantsiktsuraq Jehová? Biblia ninqanwan imanir tsënö ninqëkita willakaramï. b) ¿Imatataq Jehová Dios awnimantsik, y imatataq tapukuntsik?

¹⁵ Kë ninanqa, manam Jesuspa qateqnin këqa fäcilmi ninantsu. Alliran sinchikunantsik Jesus ninqannö ruranapaqqa (Mat. 16:24-26; Luc. 13:24). Pero rurëta mana puëdeshqaqa, Jehovämi espïritunwan kallpata qomäshun. Profeta Isaïasmi kënö nirqan: “Jehoväta asheqkunaqa, kallpata tariyanqam. Äguilanöraqmi volar pallarikäyanqa. Cörrirpis manam pishipäyanqatsu, purirpis manam utiyanqatsu” (Isa. 40:29-31). Tsënö këkaptinqa, ¿imanirtaq wakinkunaqa Jehová Diospaq rurëqa alläpam utitsikun niyan?

16. ¿Imakunatataq rurashwan alläpa rurëkunawan mana nitipakashqa kanapaq?

¹⁶ Bibliaqa llapan cristiänokunatam nin más preciso kaqkunata puntaman churayänampaq (Fili. 1:10). Cristiänokunapa kawakïnintaqa Pablu igualatsirqan karupita cörreqtawanmi, y kënömi consejarqan: “Imanomi corir llallinacoq nunacunapis imapis mana atajäyänanpaq jinella coriyan; tse cuenta [...], mana qelanashpa Dios munanqanno cawaquita tïrashun” (Heb. 12:1). Këchöqa Pablu rikätsikïkan imapis mana precisaq rurëkunata haqinapaqmi. Itsa rurëwan nitipakashqana këkar maskunata ruranapaq churapakëkantsik, tsëqa alläpa utishqata y yarpachakïyoqtam katsimäshun. Tsënö kaptinqa kënömi tapukunantsik: “¿Trabäjochö ëka tiempotaq trabajä? ¿Watachö ëka kutitaq mëllatapis yarqö? ¿Ëka tiempotaq pukllakü y huk rurëkunachö kakü?”. Alli juicioyoq kanqantsik, y llapanta rurëta mana puëdenqantsikta yarpëmi, yanapamäshun puëdenqantsikpita más rurëta mana awnikunapaq.

17. ¿Imanirtaq wakin cristiänokuna qelanäkuriyan, y Jehová ima ninqantaq yanapanman?

¹⁷ Itsa wakin cristiänokunaqa utinashqa këkäyan kë mana alli nunakunapa ushakënin chämunanta shuyararnin (Pro. 13:12). ¿Imataq yanapanman? Habacuc 2:3 ninqanmi: “Kë revelación shamoq tiempopaqraq kaptimpis, chämunqam, manam ulikuntsu. Tardeyämuptimpis mäkoq mäkoq rikachakurllana këkë; rasumpam chämunqa. Manam tardetsu chämunqa”. Rikanqantsiknöpis, Jehoväpa piñakïnin hunaqqa chämunqa kikin disponishqan hunaqchömi.

18. a) ¿Jehová ima awnimanqantsiktaq kallpata qomantsik? b) ¿Imatataq qateqnin kaq yachatsikïchö rikäshun?

¹⁸ Awmi, Jehoväta sirveqkunaqa alläpam munëkuntsik utinë y llakikï hunaqkuna  ushakärir, ‘joven kë kallpantsikman’ kutirita (Job 33:25). Kanampis Jehoväpa kaqchö rurapakushqaqa, santo espïritunmi atska kallpayoq kanapaq yanapamäshun (2 Cor. 4:16; Efe. 3:16). Imëpis mana ushakaq bendicionkuna chaskinapaq kaqta utishqa kanqantsik qochiramänata ama haqishuntsu. Mushoq mundo chäramuptinqa, utinë, tentacionkuna y llakikïpis ushakärinqam. Qateqnin kaq yachatsikïchömi rikäshun nunakuna chikimashqa, tukïta nimashqa y imakunatapis pasashqa santo espíritu imanö yanapamanqantsikta.

[Päginapa ura kuchunchö willakïkuna]

Yachakunqantsikta yarpärishun

• ¿Imanötaq Bibliata leinqantsik kallpata qomantsik?

• ¿Imanötaq yanapamantsik mañakï y yachakunqantsikman yarparë?

• ¿Imakunatataq rurashwan alläpa nitipakashqa mana kanapaq?

[Yachakunapaq kaqpa tapukïninkuna]

[26 kaq päginachö dibüju]

Reunionkunaqa sinchi kanapaqmi yanapamantsik