¿Pikunaraq kawayan espïritukuna kayänanchö?

Euröpachömi, huk iglesiachö këkaq virgenpa imägenninman huk warmi huk rosariota resan. Africachönam, huk nunawan warmin alläpa kuyashqa kastan pamparanqanman ginebra licorta hichayäpun. Amëricachönam huk joven, angel de la guardanwan parlëta munar, ayunar mikuntsu y tsëllaman paqwë yarparäkun. Y Asiachönam, huk sacerdote unë awilukunapa espïritunkunapaq tukï color papelpita imëka rurashqakunata kayapun.

KË LLAPAN nunakunaqa creiyan, espïritukuna kanqanta, kawënintsikchö allita o mana allita ruramënintsikta puëdeyanqanta y pëkunawan parlëta puëdenqantsikta. Këkunaman nunakuna paqwë creiyaptimpis, espïritukuna kawayanqanchö pikuna kayanqantaqa manam llapantsu igual pensayan.

Këman yarpärishun, musulmankunaqa niyan ciëlochö hukllëlla Dios Alá * kanqantam. Y cristiänotukoq religionchö nunakunanam creiyan, Dios Padre, Dios Hijo y Dios Santo Espíritu, kiman huk Dioslla kayanqanta. Hindú religionchönam huk waranqapitapis más dioskunata y diosakunata adorayan. Hinamampis, wakin nunakunanäqa montikunachö, rumikunachö, mayukunachö y animalkunachö espïritukuna kayanqantam creiyan. Mëtsika nunakunam novëlakunachö, cïnekunachö y televisionkunachö rikarnin creiyan angelkunaman, demoniokunaman, mantsakätsikoq hupëkunaman y wanushqakunawan parlëman.

Pero nunakunaqa, manam espïritukuna kayänan sitiochö pikuna këkäyanqanllapaqtsu tukïta pensayan, hina pëkunawan imanö parlayänampaqwampis tukïtam pensayan. Pero espïritukunawan parlëta munar tukïta rurëqa manam llapantsu alli, ni llapantsu yanapakun. ¿Imanir? Tsëta más käyirinapaq o mayarinapä, telëfonopa qayakïtawan igualaratsishun. Manam pitapis gustantsu mana kaq nümeroman telëfonopa qayakïqa. Hina pipis mana contestamänantsik telëfonoman qayakïpis manam ni imapaq välintsu. Itsa pipis contestamarnintsikqa mana reqinqantsik mana alli nunapis kanman. Tsaq tsënöllam pasanman espïritukunawan parlëta munashqapis.

Tsëpenqa, ¿pikunaraq kawayan espïritukuna kayanqanchö? ¿Pëkunawan parlëta puedeshwantsuraq? ¿Imanöllapapis yaskimäshuntsuraq? Kë revistachömi rikanki, kë llapan tapukïkunata Biblia contestanqanta. Y piraq musyan, itsa mana musyanqëkita yachakurinki.

[Päginapa ura kuchunchö willakï]