Soltero kënikichö llapan puëdenqëkita rurë

“Tsaynö japallan cawayta puedigcagga tsaynö japallan cacutsun.” (MAT. 19:12, NTCN.)

1, 2. a) Pabluwan Jesusnöpis, ¿imanötaq wakin cristiänokuna rikäyashqa soltero këta? b) ¿Imanirtaq wakinkunapaqqa sasaraq o ajaraq soltero këta Diospa qarënintanö rikë?

RASUMPAM, casado kawakïqa Jehová Diospa huk shumaq qarënin (Pro. 19:14). Tsënö kaptimpis, atskaq soltero cristiänokunam kushishqa kawakuyan. 95 watayoq Harold shutiyoq cristiänoqa manam imëpis casakushqatsu, pëmi kënö nin: “Wayïman shayämunanta munar y yanaqiyoq këta munarpis, kushishqam hapallä kawakü. Soltero kanäpaq yurikushqa kar imachi”.

² Jesucristuwan apóstol Pabluqa, casado kënöllam soltero këpis Diospa qarënin niyarqan (lei Mateo 19:11, 12 * y 1 Corintios 7:7). Pero manam llapan soltërokunatsu kikinkuna munar soltero kayan. Wakinkunaqa manam munëninkunapaqnö majankuna tariyashqatsu. Wakinkunanam  atska watapa casado karpis majankunapita rakikäyashqa o majankuna wanukushqa. Tsënö këkaptinqa, ¿imanirtaq soltero këqa Diospa qarëninmi nishwan? Y, ¿imanötaq soltero kënintsikchö Jehoväpaq masta rurashwan?

Imawampis mana igualaq qarë

3. Wakin soltero cristiänokunaqa, ¿imatataq más rurëta puëdeyan?

³ Atskaqmi mana casado karqa, más tiempota tariyan Jehová Diospita yachatsikuyänampaq, amïgokunata rurayänampaq y Jehová Dioswan más kuyanakuyänampaqpis (1 Cor. 7:32-35). Tsënö kaptinmi, atskaq cristiänokuna huk tiempollapapis “japallan cawayta” churakäyan. Pero wakinnam soltero këtaqa munayashqatsu. Y casakïta mana puëdermi Jehová Diosta mañakuyashqa yanapëkunampaq, y alleq pensëkurmi cuentata qokuyashqa hapallankunalla kawëta puëdeyanqanta. Tsënam shonqunkunachö decidiyashqa soltërollana kawakïta (1 Cor. 7:37, 38).

4. ¿Imanirtaq imapis pishinqantanöqa rikäyanmantsu soltërokuna Jehoväta servirnin?

⁴ Soltërokunaqa alleqmi musyayan Jehová y markan precïsopaq churayänampaq y kuyayänampaqqa casädoraq mana kayänanta. Jehoväqa llapan sirveqninkunatam kuyan (Mat. 10:29-31). Pëpa kuyakïnimpitaqa manam imapis rakita puëdentsu (Rom. 8:38, 39). Tsëmi soltero kar o casado karpis, Jehoväta sirvenqantsikchö imapis pishimanqantsiktanöqa rikashwantsu.

5. ¿Imatataq wanantsik soltero këta alli provechanapaq?

⁵ Pero soltero këta wakin qarëkunatanöpis alleq provechanapaqqa, alliran sinchikunantsik. Awmi, soltero këta provechëta puëdenmi ollqu o warmi kar, joven o mayor karpis, o tsënö kanampaq kikin akrakushqa kar o imarëkur casakïta mana puëdeshqa karpis. Rikärishun apostolkunapa tiemponkunachö soltero cristiänokuna kayanqan imanö yanapamänatapis.

Joven kaq soltërokuna

6, 7. a) ¿Imanötaq yanapakuyarqan Felïpipa warmi wambrankuna? b) ¿Imanötaq Timoteu soltero këninta provecharqan, y ima bendicionkunatataq chaskirqan Jehoväta joven këninchö servinqampita?

⁶ Jehová Diospita yachatsikoq Felïpipam kapurqan chusku soltera shipashninkuna, y pëkunapis teytannömi yachatsikuyaq (Hech. 21:8, 9). Kë shipashkunaqa Joel 2:28, 29 textochö ninqannömi, shamoq tiempochö pasakunampaq kaqta willakuyaq santo espíritu yanapaptin, tsëqa Diospa huk qarëninmi karqan.

⁷ Hina Timoteupis soltero kënintaqa alleqmi provecharqan. Maman Eunice y abuëlan Loida yachatsiyaptinmi “wamra canq[an]pita patsa Diospa palabranta” reqirqan (2 Tim. 1:5; 3:14, 15). Y kimanmi cristiano tikrariyarqan, këqa itsa karqan 47 wata witsanchö täräyanqan Listra markaman Pablu watukakoq ëwanqanchö. Ishkë wata pasariptinnam, tsë markaman ishkë  kutipa watukakoq ëwanqanchö Timoteuqa 20 watayoqnöna karqan. Pero jövenllaraq kaptimpis y cristiänonö manaraq atska watakuna kaptimpis, Listra y Iconio markakunapita anciänokunaqa pëpaq allillatam parlayaq (Hech. 16:1, 2). Tsënam apóstol Pabluqa invitarqan wakin nacionkunapa cristiano mayinkunata watukaq ëwaptin yanaqänampaq (1 Tim. 1:18; 4:14). Manam musyantsiktsu Timoteu casakunqanta o manapis. Pero sï musyantsikmi Pablu invitaptin kushishqa ëwanqanta, y atska watapa congregacionkunata watukaqnö y misionëronö sirvenqanta (Fili. 2:20-22).

8. ¿Imataq yanaparqan Juan Marcos Jehoväpa kaqchö más rurëta munanampaq, y tsënö yanapakïta munanqampita imakunachötaq yanapakurqan?

⁸ Soltero këninkunata alli provechaqkunachömi Juan Marcospis këkan. Maman Maria, prïmon Bernabe y pëmi këkäyarqan Jerusalenchö punta congregación patsakaptin. Itsa kapoqyoq familiachi kayarqan, kikin markachömi wayinkuna karqan y huk sirveqnimpis kayäpurqanmi (Hech. 12:12, 13). Tsënö kaptimpis, Marcosqa alli kawakïta munar manam kikimpa munëninllatatsu asheq. Hina manam huk markallachötsu täkïta munarqan, tsëchö casakur imëkawan kushishqa kawakïta. Itsa apostolkunawan amigo karchi pëpis misionero këta munarqan, tsëchi Pabluwan Bernabëpa punta viäjenchö huk nacionkunata yanaqäyänampaq invitayaptin raslla awnirirqan (Hech. 13:5). Tsëpitanam Bernabëwan viajayarqan, y watakuna pasariptinnam Pëdrutapis yanaparqan Babilonia markachö (Hech. 15:39; 1 Ped. 5:13). Ëka watapa soltero kanqanta mana musyashqapis, Bibliaqa willakunmi wakinkunapaq y Jehová Diospaq más rurëta munanqanta.

9, 10. ¿Imanötaq soltero jövenkuna Jehoväpa kaqchö más yanapakuyanman? Willakaramï.

⁹ Kanampis atskaq jövenkunam, soltero këninkunata provecharnin Jehoväpa kaqchö masta rurayänampaq churapakäyashqa. Marcoswan Timoteunöpis musyayanmi mana casado karninqa, ‘Diosllatana llapan shonquncunawan sirwiyänampaq’ kaqta (1 Cor. 7:35). Rasumpëpam masta rurëta puëdeyan. Y imachöpis serviyänampaq akrayänampaqqa atskam kan: precursor këta, yachatsikoqkuna wanayanqan markakunaman ëwëta, huk idiömata yachakïta, Yachatsikuyänan Wayikunata sucursalkuna ruratsiptin yanapakïta, Escuela de Entrenamiento Ministerial nishqanman o Betelman ëwëtapis puëdeyanmi. Joven, manaraq casakushqa karninqa, ¿tsëkunachö yanapakunëkipaq sinchikïkankiku?

¹⁰ Tsënömi Mark nishqan cristiano rurarqan, jövenyëkarmi precursor këman charqan, tsëpitanam Escuela de Entrenamiento Ministerial nishqanman ëwarqan y tsëchö yachakunqanwanmi atska nacionkunachö yanapakushqa. Jehová Diosta llapan tiemponwan ishkë chunka pitsqa watapana servishqa karmi, kënö nin: “Congregacionchöqa llapantam yanapëta tïrä, pëkunawanmi yachatsikoq yarqö, wayinkunatam watukaq ëwä, wayïman mikoq shayämunampaqmi invitä y wayichö llapäkuna juntakärir shumaq pasariyänäpaqpis invitakümi. ¡Imanö kushishqam sientekurqö!”. Mark ninqanchömi rikantsik, wakinkunata yanaparnin atska kushikïta tarina kanqanta, tsëtaqa rurayan Jehoväta llapan tiemponkunawan sirveqkunallam (Hech. 20:35). Joven, munëniki ima kaptimpis, ima rurëta yachaptikipis, Jehoväpa kaqchö ruranëkipaqqa atskam kan (1 Cor. 15:58).

11. Raslla mana casakoqkunaqa, ¿ima allitataq rurayan?

¹¹ Itsa wakin jövenkunanöpis, imëllapis casakïta munanki. Pero yarpë: imëkam kan rasllaqa mana casakunëkipaq. Apóstol Pablum nin: sïkush “casacunan edaninchona canqa, [...] casacuyätsun”, pero tsë edadman manaraq chashqa karqa, majayoq kayänampaqmi löcoyäkuyan, tsëmi casakunëkipaq edadman chänëkitaraq Pablu consejashunki (1 Cor. 7:36). Puntataqa kikikitaran reqikunëki, y alleqran musyanëki piwampis casakunëkipaq kaqta, tsëpaqqa atska tiempotaran wananki. Ama qonqëtsu, casakuyanqan hora awninakuyanqanqa alläpa sagradom y wanuyaptinran këqa ushakan (Ecl. 5:2-5).

 Joven këninkunata majannaq pasashqakuna

12. a) ¿Viudayärirnin imata ruranampaqtaq Ana churapakarqan? b) ¿Ima bendiciontataq Ana chaskirqan?

¹² Lucas librochömi willakun Ana shutiyoq warmi qanchis watallaraq casada këkaptin qowan wanukunqanta. Bibliaqa manam willakuntsu wambrayoq kanqanta o yapë casakïta munanqanta, pero willakunmi 84 watayoq këkarpis viudallaraq këkanqanta. Hina willakunmi viuda këninta provecharnin Jehoväwan alli këninta más sinchiyätsinqanta. Awmi, templotam mana faltashpa ëwaq y “paqaspa junaqpa ayunar, Diosman mañacur[mi] cacoq” (Luc. 2:36, 37). Rikanqantsiknömi, pëpa kawëninchöqa Jehová Diospaq rurë más preciso karqan. Pero tsëpaqqa allim sinchikurqan, y tsënö ruranqampitam Jesusta llullullaraq këkaptin rikarqan, y willakurqanmi kë llullu hatunyarkur Diospa Akrashqanman tikrarir salvacionta apamunampaq kaqta (Luc. 2:38).

13. a) ¿Imanötaq musyantsik Dorcas alli trabajaq kanqanta? b) ¿Ima bendiciontataq alli kënimpita Dorcas chaskirqan?

¹³ Dorcas o Tabïta shutiyoq cristiänaqa lamar kuchunchö Jope nishqan markachömi täraq, kë markaqa Jerusalenpita huk lädonchömi këkarqan. Pëpaq Biblia parlarninqa hapallampaqmi parlan, qowan kanqantaqa manam nintsu. Dorcas warmiqa “allapa allicunata ruraq, y wactsacunatapis puedenqanpam yanapaq”. Viudakunapaq y waktsa kaqkunapaqmi röpankuna rurapoq, tsëmi llapankuna alläpa kuyayaq. Pero huk kutim pasëpa qeshyarnin wanukïkurqan, tsëmi congregacionchö llapankuna apóstol Pëdruta qayatsiyarqan y rogayarqan kë kuyashqa cristiänata kawaritsimunampaq. Kawarimunqan noticiataqa Jope markachö llapankunam musyariyarqan, y atskaqmi cristiano këman chäyarqan (Hech. 9:36-42). Itsachi kë mushoq cristiänokunatapis Dorcasqa alläpa alli këninwan yanaparqanraq.

14. ¿Imanirtaq wakin soltërokunaqa Jehoväpa más lädonchö sientekuyan?

¹⁴ Kanan tiempopis atskaq edadyoqna cristiänokunam Änanö y Dorcasnöpis casädotsu kayan. Wakinkunaqa, manam pëkunapaqnö majankuna tariyashqatsu, wakinkunaman rakikäyashqa o viuda tikrayashqa. Pïninkunapis mana kaptinmi, Jehoväman más markäkïta yachakuyashqa (Pro. 16:3). Silvia shutiyoq cristiänam, kima chunka puwaq watapitapis masna Betelchö trabajan, y soltera kënintaqa huk bendiciontanömi rikan, pëmi kënö nin. “Höraqa noqalla sinchi kanqäpita utirïmi, tsëmi tapukü: ¿Y noqataqa pitaq shumaq parlapämar yanapaman? nishpa. Imanö sientekunqätapis Jehová más alli musyanqanta musyëmi yanapaman pëpa más lädonchö kanäpaq. Hinapis mana pensanqä höram shumaq parlapämar yanaparayäman”. Pënö noqantsikpis Jehoväpa yanapakïninta ashishqaqa, pëqa imëkachöpis kuyakïwanmi yanapëkamäshun.

15. ¿Imanötaq mana casakushqa cristiänokuna wakinkunawan amigo këta tïrayanman y yanapayanman?

¹⁵ Hinamampis mana casakushqa kaqkunaqa masmi amïgonkuna rurëta puëdeyan (lei 2 Corintios 6:11-13). Jolene shutiyoq cristiänam kima chunka chusku watana Jehoväta llapan tiemponwan sirveq kënö nin: “Manam edadnï kaqkunallawantsu amigo rurëta tïrä, sinöqa llapankunawanmi. Soltërokunaqa masmi Jehoväpaq rurëta puëdentsik, familiantsikpaq, cristiano mayintsikpaq y wakin nunakunapaqpis. Más watakuna pasanqanmannömi más kushishqa sientekü hapallä kanqäpita”. Awmi, edadyashqakuna, qeshyaqkuna, majannaq teytakuna, jövenkuna y congregacionchö wakin kaqkunapis, alläpam agradecikuyan soltërokuna kënö yanapakuyanqampita. Rasumpam, wakinkunata shumaq kuyëpa rikarmi más kushishqa sientekuntsik. Tsëmi tapukushun: “¿Noqapis wakinkunawan más amigo këtaku tïrä y yanapäku?”.

Imëyaqpis soltërolla

16. a) ¿Imanirtaq Jesus casakurqantsu? b) ¿Imanötaq Pablu soltero këninta provecharqan?

¹⁶ Jesusqa manam imëpis casakurqantsu. Pëqa Jehová mandanqanta ushananyaq ruranampaqmi churapukarqan. Hinapis më tsëpam ëwaq, patsa waranqampita hasta ampinqanyaqmi  trabajaq, y tsëpitanam nunakunata salvanampaq wanurqan. Soltero karmi tsë llapantaqa rurarqan. Yarpärishun Pabluman, pëqa karu markakunapam ëwarqan y tukï mana allikunatam pasarqan Jehová Diospita yachatsikunqanchö (2 Cor. 11:23-27). Solterom karqan —itsa huk tiempochö casakushqa karpis— apostolnö cargonta chaskirirqa, hapallanlla kawanampaqmi churapukarqan (1 Cor. 7:7; 9:5). Jesuswan Pabluqa wakin cristiänokunatam consejayarqan puëderninqa hapallankunalla kayänampaq, tsënöpa Diospaq masta rurayänampaq. Pero manam mëqampis cristiano këchö alli yanapakuyänampaqqa, soltërollam kayänan nishpatsu mandakuyarqan (1 Tim. 4:1-3).

17. a) ¿Imatataq wakin cristiänokuna rurayashqa Pabluta y Jesusta qatirnin? b) ¿Imanötaq Jehová alläpa kushikunqanta musyantsik munëninkunata haqirïkur pëta serviyanqampita?

¹⁷ Kanan witsankunapis kayanmi Jehoväta llapan tiemponkunawan serviyänampaq mana casakïta decidishqakuna. Qepa pärrafokunachö Harold cristiänopaq parlanqantsikmi, Betel wayichö yanapakun pitsqa chunka hoqta watapitapis masna. Pëmi kënö nin: “Chunka watana Betelchö yanapakïkarmi rikarqa atskaq casädokuna Betelpita ëwakoqta, wakinmi qeshyarnin y wakinnam edäyashqa teytakunata cuidayänampaq. Noqapaqa manam pitapis cuidanäpaq karqantsu, teytäkunaqa wanukushqanam kayarqan, pero alläpam kuyëkoq kä Betelchö yanapakïta, tsëmi casakunärëkurqa Betelta haqita munarqätsu”. Tsënöllam hina atska tiempopa precursora këchö yanapakushqa Margaret cristiänapis kënö nin: “Atska kutichömi casakïta puëdeman karqan, pero manam casakurqätsu. Tsëmi pipa majan mana karnin ni huk puchallachö mana tärarnin, libre karqä Jehoväpa kaqchö yanapakunäpaq, y más kushishqam karqö”. Awmi, Jehoväqa manam imëpis qonqantsu munëninkunata haqirïkur pëta serviyanqantaqa (lei Isaías 56:4, 5 *).

Llapan puëdenqëkimannö rurë

18. ¿Imanötaq animashwan y yanapashwan soltero cristiänokunata?

¹⁸ Mana casakushqa cristiänokuna Jehoväpaq atskata rurëkäyanqampitaqa alläpam kushikuntsik. Imanö kayanqampita y congregacionta yanapayanqampitam alläpa kushikuntsik. Llapantsikmi pëkunata rikätsishwan rasumpëpa ‘wauqincuna, panincuna, tëtancuna, mamancuna, wamrancuna’ kanqantsikta. Tsënöpam imëpis hapallankunaqa sientekuyanqatsu (lei Marcos 10:28-30).

19. ¿Imanötaq soltero këta alli provechashwan?

¹⁹ Itsa munanqëkirëkur o imarëkurpis mana casakushqa kaptikiqa, munayä punta cristiänokunapa y kanan cristiänokunapa kawëninkuna yanapëkushunëkitam, mana casado këkarpis kushishqam Jehoväta servita puëdenki. Qarëkunaman yapë yarpärishun. Wakin qarëkunataqa kushishqam shuyarantsik y wakinkunanam mana shuyanqantsik hora chäramun. Wakinkunataqa tsë höram kuyantsik, y wakinkunatanam tiempowanraq kuyar qallëkuntsik. Llapampis imanö rikanqantsikpitam. Tsënöllam soltero kawakïwampis pasakun. ¿Imataraq qam rurankiman soltero këta provechanëkipaq? Jehoväman más witï, pëpa kaqchö más rurapakï y llapankunawan amigo këta tïrë y yanapë. Casado kawakïnöllam, soltero kawakï qarëpis alläpa kushikïpaq Dios rikanqannö rikashqaqa y provechëta yachashqaqa.

[Päginapa ura kuchunchö willakïkuna]

¿Yarpankiku?

• ¿Imanirtaq soltero kawakïpaq Diospa qarëninmi nintsik?

• Joven këchö soltero këpaq, ¿imanirtaq huk bendicionmi nishwan?

• Jehoväpaq y wakin cristiänokunapaq, ¿imakuna rurëtataq puëdeyan majannaq cristiänokuna?

[Yachakunapaq kaqpa tapukïninkuna]

[20 kaq päginachö dibüjukuna]

¿Llapan puëdenqëkimannöku Diosta servïkanki?