Kë ushanan hunaqkunachö Jehoväman markäkushun

“Imëyaqpis Jehoväman markäkuyë [yärakuyay].” (ISA. 26:4.)

1. ¿Imachötaq hukläya kayan Jehoväta sirveqkuna y Jehoväta mana sirveqkuna?

KANAN witsan nunakunaqa manam pimampis markäkuyannatsu, itsachi ulipashqa o llullapasha kayaptin o tukï mana allikunata rurayashqa kayaptin. Pero ¡Jehoväta sirveqkunaqa alläpa hukläyam kantsik! Diosnintsik yachatsimashqam alleq musyantsik kë mundoman y ‘kë mundochö mandakoq nunakunaman’ markäkï upa kë kanqanta (Sal. 146:3). Tsëpa rantinqa, Jehová kuyamanqantsikta y llapan parlanqankunata cumplimunanta musyarmi, kawënintsikta makinchö haqirintsik (Rom. 3:4; 8:38, 39).

2. ¿Imanötaq Josué rikätsikurqan Jehová llapan awnikunqanta cumpleq kanqampita?

² Atska watakunanam pasashqa Jehová llapan awnikunqankunata cumpleq kanqanta Josué willakunqan. Wanukunampaqna këkarmi, marka mayinkunata kënö nirqan: “Qamkunaqa llapan shonqïkikunawan y almëkikunawanmi alli musyayanki, Jehová Dios qamkunapaq allikunata parlanqan llapan cumplikanqanta, y manam ni hukllëllapis mana cumplikashpaqa quedashqatsu. Y manam ni ima parlanqampis pishintsu” (Jos. 23:14).

3. ¿Imatataq Diospa shutin kikimpita rikätsikun?

³ Jehoväqa imëpis awnikunqanta cumplin  sirveqninkunata kuyarninmi. Pero masqa shutinrëkurmi tsëtaqa ruran (Éxo. 3:14; 1 Sam. 12:22). Huk reqishqa Bibliapa qallananchömi kë shutipaq kënö nin: Tsë shutinchöqa këkan “alli awnikïkunam. Diosqa imëkamanmi tikran, y imëka wananqantsikkunatam qomantsik [...]. Huk awnikïmi, [...] huk revelacionmi, huk yarpätsikïmi y huk conträtom. Kë shuti ninqantaqa manam Diosqa imëpis haqinqatsu, y manam imëpis penqakunqatsu” (The Emphasized Bible, de J. B. Rotherham).

4. a) ¿Ima nimantsiktaq Isaías 26:4? b) ¿Imatataq kë yachatsikïchö yachakushun?

⁴ Kanan noqantsik kënö tapukurishun: “¿Alleqnaku Jehoväta reqï, pëman markäkunäpaq? Jehová imëkatapis ruraq kanqanman markäkurku, ¿imëka problëmachöpis tsarakü?”. Isaías 26:4 textom kënö nimantsik: “Imëyaqpis Jehoväman markäkuyë, Jähchömi, Jehovächömi këkan imëpis mana ushakaq Qaqa”. Pero musyanqantsiknöpis, kananqa mananam unë tiempokunachönönatsu milagrokunawan nunakunata yanapan. Tsënö karpis, Jehoväqa imëpis ‘mana ushakaq Qaqam’, tsëmi pëman imëyaqpis shuyakïkänantsik. ¿Imanötaq kuyakoq teytantsik yanapamantsik? Kë kimanwanmi: tentacionkunachö alli tsarakunapaq kallpata qomarnintsik, nunakuna chikimashqa yanapamarnintsik, y imëka yarparëkunachö tsarakunapaq kallpata qomarnintsik. Kë kimanta yachakurnin, yarpäshun Jehoväman más markäkunapaq imakunata ruranapaq kaqtapis.

Tentacionkunata pasar markäkushun Diosnintsikman

5. ¿Imëtaq más sasa kanman Jehoväman markäkunantsik?

⁵ Itsa Jehoväman markäkï más fäcil kanman wanushqakuna kawariyänanman o llapan awnikunqankunata cumplimunanman pensashqa. Pero itsa más sasa o aja kanman alli kaqta ruranapaq mandamanqantsikkunata wiyakï. Pë nimanqantsikkunata wiyakïqa alläpa allim, y kushishqa kawanapaqmi yanapamantsik. Rey Salomonmi kënö nimantsik: “Llapan shonqïkiwan Jehoväman markäkï [yärakuy], y kikikipa yachënikillamanqa ama markäkïtsu. Llapan kawënikichö pë munanqanta rurë, tsëqa llapan rurënikitam altsaramunqa” (Pro. 3:5, 6). Rikanqantsiknömi, këchöqa ‘kawëpaq’ y ‘rurëpaq’ parlan. Awmi, manam parlakïnintsikllawantsu Diosman markäkunqantsikta rikätsikuntsik, sinöqa ruranqantsikkunawampis rikätsikuntsikmi. Kanan rikärishun, mä imanöshi Jehoväman markäkushwan tentacionkunata pasarnin.

6. ¿Imatataq rurashwan mana alli pensënintsikkunata haqinapaq?

⁶ Imëka mana allitapis rurarintsik mana allita pensarmi, tsëmi imëka pensanqantsikpis allilla kanampaq sinchikunantsik (lei Romanos 8:5 y Efesios 2:3). ¿Imanötaq churapakashwan mana alli pensëkunata peqantsikpita horqanapaq? Rikärishun pitsqa rurëkunata: 1. Diostam mañakunantsik yanapamänapaq (Mat. 6:9, 13). 2. Yarpänantsikmi Jehoväta wiyakurnin alli kawakuyanqan nunakunapaq y Jehoväta mana wiyakurnin mana alli kawakuyanqan  nunakunapaq Biblia parlanqankunata * (1 Cor. 10:8-11). 3. Pensanantsikmi hutsata rurëkushqa kuyashqa kastantsikkuna y kikintsikpis llakikunantsikpaq kaqta. 4. Yarpänantsikmi huk sirveqnin hutsata rurariptin Jehová llakikunanta (lei Salmo 78:40, 41 *). 5. Hina yarpänantsikmi nunakuna rikämashqa o mana rikämashqapis hutsata mana rurashqa y allikunallata rurashqa Jehová alläpa kushikunanta (Sal. 15:1, 2; Pro. 27:11). Këkunata rurarqa, Jehoväman más markäkunqantsiktam rikätsikushun.

Nunakuna chikimashqa Diosnintsikman markäkushun

7. ¿Imakunapataq Jeremías pasarqan, y imanötaq höraqa sientekurqan?

⁷ Wakin cristiano mayintsikkunaqa, nunakuna wiyëta mana munayanqan markakunachömi yachatsikuyan. Tsënö markachömi Jeremïaspis, Juda ushakänan witsan yachatsikurqan. Cada hunaqmi markäkïninta rikätsikunan karqan Diospa castïgonta willakurnin. Y huk kutinam, secretarion Baruc quejakurqan rurëkanqankuna alläpa sasa kanqanta (Jer. 45:2, 3). ¿Y Jeremïasqa qelanäkurirqantsuraq? Huk kutim alläpa yarpachakur kënö nirqan: “¡Yurinä hunaq imapaqraq kallarqan! [...] Kë alläpa trabäjota y llakikïta rikänäpaq, y penqakïchö kawënï ushakärinampaq, ¿imapaqraq mamalläpa pachampita yarqamurqä?” (Jer. 20:14, 15, 18).

8, 9. Jeremías 17:7, 8 y Salmo 1:1-3 ninqannö, ¿imatataq rurashwan yachatsikur sïguinapaq?

⁸ Tsënö karpis, kë profëtaqa manam Jehoväta servita haqirqantsu. Jehovämanmi imëpis markäkoq. Tsëmi Jeremías 17:7, 8 kënö ninqan cumplikaqta rikarqan: “Jehoväman markäkoq yachaq nunaqa, bendecishqam kanqa, markäkïnin Jehová kaptin. Y yaku kuchunman plantashqa montinömi kanqa, sipin [matsun] yaku kaqmampa ëwaptin; y yurankuna alläpa atska kaptinmi, achachë chämunqanta rikanqatsu. Y tamya mana kanqan witsanqa manam yakumpita tsakinqatsu, ni wayurnimpis ushanqatsu”.

⁹ ‘Yaku kuchunman plantashqa montinömi’ Jeremïasqa ‘wayurnin usharqantsu’. Mana alli nunakuna burlakuyanqanta cäsonampa rantinmi, kawatsikoq yakuta qokoq Jehoväman más markäkurqan, y llapan ninqankunata shonqupita patsë cäsokurqan (lei Salmo 1:1-3 *; Jer. 20:9). Kënö ruranqampitaqa yachakunantsikmi, y masraqmi yachakuyänan mana wiyakoq markakunachö yachatsikoqkunanäqa. Tsënö markachö tärarqa, ¡imëpis Jehoväman markäkushun! Pëmi yanapamäshun ‘pitapis metapis willapänapaq’ (Heb. 13:15).

10. ¿Ima bendicionkunatataq Jehová qomarquntsik, y imakunatataq tapukunantsik?

¹⁰ Kë ushanan tiempokunachö alli tsarakunapaqmi Jehová tukï yanapakïta qomantsik. Tsë yanapakïchömi këkan Biblia, y tukï idiömamanmi traducïkäyämun. Hina ‘mäkoq, mäkoq,  cumplidu’ sirveqwanmi mikïnintsik tiemponchö qomantsik (Mat. 24:45). Hinamampis, cristiano mayintsikkunatam Jehová qomarquntsik, pëkunawanmi kushishqa pasarintsik reunionkunachö y asamblëakunachö. ¿Kë llapanta alliku provechëkantsik? Tsënö rurarqa, “shonqunkunachö alli kayanqampitam kushishqa cantayanqa”. Pero mana wiyakoq kaqkunapaqqa, Bibliachö kënömi nin: “Pero qamkunaqa shonqïkikuna nanaptinmi qayarikachar waqayanki, y alläpa llakikurmi iktsuyanqëkiyaq waqayanki” (Isa. 65:13, 14).

Imëka yarparëkunata pasarnin Diosnintsikman markäkushun

11, 12. Kanan witsan imëkapis pasakïkaptinqa, ¿imanötaq más alli kaqta rurashwan?

¹¹ Profecïakuna willakunqannömi, kanan tiempo nunakunaqa imëka problëmallachö kawakuyan (Mat. 24:6-8; Apo. 12:12). Apäkï yaku wayintsikman huntaptinqa, rasmi huk seguro o más alton kaq sitioman yarqurintsik. Tsë cuentam, imëka problëmatapis rikarnin atska millón nunakuna tsapäkïninkuna ashiyan segürotanö rikäyanqanchö, cienciachö, atska qellëta manejaq nunakunapa yanapakïninchö, polïticachö, y religionchö. Y këkunaqa manam rasumpëpa tsapäkïtsu kayan (Jer. 17:5, 6). Pero Diospa sirveqninkunapaqa rasumpëpa tsapäkïninkunam kan, tsëqa: ‘Imëpis mana ushakaq Qaqam’ (Isa. 26:4). Tsëmi salmistapis kënö nirqan: “[Jehovämi] qaqä, salvamaqnï y pakäkunä sitio” (lei Salmo 62:6-9 *). Pero ¿imataraq rurashwan kë hatun Qaqachö tsapäkïnintsik ashinapaq?

¹² Jehovämanqa markäkuntsik Palabran ninqanta wiyakurmi, nunakuna tukïta niyaptimpis (Sal. 73:23, 24). Diosta mana sirveq nunakuna niyanqanta qateq nunakunaqa, itsachi kënö niyan: “Huk kutillam kawantsik, tsëmi imëka munanqantsikta rurakunantsik”. “Alläpa precïsom profesionyoq kë.” “Más alliqa atska qellëta gananqantsikmi.” “Këta o wakta rantirqa más kushishqam kawakunki.” “Llapan Patsata viajar reqi.” Pero Dios yachatsikunqanta kuyaqkunaqa, këchö ninqantam wiyakuyan: “Canan cay munduchö tucuyläya imaycata provechashgacunapis mana ayrajarnin [löcoyashpa] ni imata provechagnölla cawacuyätsun. Cay munduga llapan imaycanwan jancat ushacänanpagnam caycan” (1 Cor. 7:31, NTCN). Hina Jesus ninqantam wiyakuyan, tsëmi puntaman churayan Diospaq rurëninkunata, y ciëlochö imëkayoq kayänampaqmi trabajayan (Mat. 6:19, 20).

13. 1 Juan 2:15-17 ninqanman yarparar, ¿imakunataraq tapukushwan?

¹³ Tapukurishun: “¿Jehoväman markäkunqätaku rikätsikö ruranqäkunawan, y ‘que mundopa’ imëkankunata imanöpis rikanqäwan?” (1 Juan 2:15-17). “¿Masqa yarparä Diospaq ruranäpaq kaqmanku o imëkayoq këpaqku?” (Fili. 3:8.) “¿Alli ‘nawiyoq’ këtaku tïrä?” (Mat. 6:22.) Pero këchöqa manam qela kanapaqtsu Diosnintsik nikämantsik, familiantsikta manteninapaq kaptinnäqa trabajanantsikmi (1 Tim. 5:8). Pero Diosqa imëpis pëman markäkunatam munan, y manam Satanaspa mundonman markäkunatatsu (Heb. 13:5).

14-16. ¿Ima bendicionkunatataq wakin cristiänokuna chaskiyashqa alli ‘nawiyoq’ kayanqampita, y Diospa kaqta puntaman churayanqampita?

¹⁴ Pishillaraq kima wambrayoq Richardman y Ruthman yarpärishun. Richardmi kënö nin: “Shonqümi niman Jehoväpa kaqta más ruranäpaq. Tukï kapamanqanwan kushishqa këkarpis, cuentatam qokurqa Diospaq ichikllata rurëkanqäta. Täräyanqä markachö qellë tarinan alläpa sasa këkaptimpis, Diosman mañakurir y gastökunata rikärirmi, Ruthwan churapakäyarqä trabäjöchö mandamaqnïta semänachö chusku hunaqllana trabajëta munanqäta ninäpaq. Y tsëpita huk killallatam yapë tsënö trabajanäpaq awnirayämarqan”. ¿Imanötaq kanan sientekun Richard?

 ¹⁵ Pëmi nin: “Pägö más wallkallana kaptimpis, kananqa watachö pitsqa chunka hunaqkunam kapaman familiäwan junto kanäpaq y wambräkunata yachatsinäpaq. Hina kananqa más hörakunam willapäkö, estudiökunapis punta kapamanqampita kima kuti masmi kapaman, hinamampis congregacionchö más yanapakunäpaqmi tiempö kan. Y wambräkunawan más tiempo kaptïmi, Ruthqa precursora auxiliar kashqa pasaq killakunachö. Kananqa, puëdenqäyaq tsënö sïguinäpaqmi churapakarqö”.

¹⁶ Hina llapan tiemponkunawan Diospita yachatsikuyänanrëkurmi, huk shipash wambrayoq Roy y Petïna cristiänokuna wallka tiempolla trabajayänampaq churapakäyashqa. Roymi kënö nin: “Semänachö kima hunaqmi trabajä y warmïnam ishkë hunaq. Hinamampis huk hatun wayipitam ichik wayillamanna ëwakuyarqö, tsë cuidananqa más fäcil-llanam. Ishkan wambräkuna manaraq kaptinmi precursor kayarqä, tsëmi yapë precursor kayänäpaq imëpis yarparëkäyarqä. Y wambräkuna winariyaptinnam, precursor këman kutiriyarqä. Bendicionkuna chaskiyanqäwanqa manam kë mundochö ima öropis igualantsu”.

“Juclaya shonquta” Diosnintsik qomänata haqishun

17. ¿Imanötaq yanapashurqunki Diospa Palabran mana allikunata pasanqëki hora?

¹⁷ Manam musyantsiktsu warë warantin ima pasanantapis, porque “llapankunatam imapis pasan mana musyayanqan tiempochö” (Ecle. 9:11). Tsënö kaptimpis, manam llakikunantsiktsu Diosta mana sirveq nunakunanöqa (Mat. 6:34). Tsëpa rantinqa, Pablu kënö ninqantam wiyakunantsik: “Ama imapaqpis yarpachäkayëtsu, antis imanö ecano carpis, Diosnintsikman ‘Gracias’ nicur mañaquicuyë. Tsëno mañacuyaptiquim, Jesucristurecur Teyta Diosqa alläpa espantëpaq juclaya shonquta, y yarpëta qoyashunqui shumaq cawacuyänequipaq” (Fili. 4:6, 7).

18, 19. ¿Imanötaq Diosnintsik yanapamantsik?

¹⁸ Atskaq cristiänokunam Jehoväpa yanapakïninwan mana alläpa yarpachakushpa tsarakuyashqa tukïta pasayanqan hora. Huk cristiänam kënö willakun: “Operakunäpaq shuyëkaptïmi, doctorqa atska kuti mantsakätsimëta munarqan, tsënöpa yawarta churakunäpaq. Cämaranqäman yëkaramurllanam kënö parlar qallëkoq: ‘¡Yawarta churakïta mana munëqa, upakunallapaqmi!’. Tsëmi tsë höra y huk hörakunapis Jehoväman shonqöllachö mañakurirqä, y pëmi mana mantsakänäpaq yanapamarqan. Manana kallpä këkaptin y hemoglobïnäpis ichikllana këkaptinmi, ruminö tsarakurqä, y yawarta imanir mana chaskinqäpitam alli willakurqä”.

¹⁹ Höraqa Jehová yanapamantsik cristiano mayintsikwan o mäkoq mäkoq cumplido sirveq publicacionkuna ruramunqanwanmi. Itsa pitapis kënö neqta wiyarquntsik: “Këpitam musyarita munëkarqä. Noqalläpaq qellqashqanömi këqa”. Imëkapa pasashqapis Jehoväman markäkushqaqa, pëqa kuyakïnintam rikätsimäshun. ‘Üshankuna’ y shutimpa reqishqa markanmi kantsik (Sal. 100:3; Juan 10:16; Hech. 15:14, 17).

20. ¿Imanirtaq Jehoväpa sirveqninkunaqa kushishqa këkäyanqa Satanaspa mundon ushakanqan höra?

²⁰ “Jehoväpa piñakïnin hunaqchöqa”, Satanaspa mundonman llapan markäkoqkunaqa ushakäyanqam. Manam öronkuna, ni qellëninkuna ni ima väleqninkunapis sirvenqatsu (Sof. 1:18; Pro. 11:4). Imëkapitapis tsapämaqnintsikqa kanqa Diosnintsikllam, pëqa “imëpis mana ushakaq Qaqam” (Isa. 26:4). Tsëmi rikätsikunantsik Jehoväman markäkunqantsikta, nimanqantsikkunata wiyakurnin, chikimashqa o mana wiyamashqapis yachatsikurnin y imëka yarparënintsikkunata pëpa makinchö haqirnin. Tsënö ruraq kaqqa, “mana mantsakushpam kawanqa y manam ima desgracia pasanantapis mantsanqatsu” (Pro. 1:33).

[Päginapa ura kuchunchö willakïkuna]

¿Yarpankiku?

Willakaramï Jehoväman markäkunqantsikta imanö rikätsikunatapis

• tentacionchö këkar

• yachatsikunqantsikpita chikimashqa

• imëka yarparënintsikkuna kaptimpis

[Yachakunapaq kaqpa tapukïninkuna]

[15 kaq päginachö dibüju]

Diosnintsik nimanqantsikta wiyakurninqa kushishqam kawakushun

[16 kaq päginachö dibüju]

Jehoväqa “imëpis mana ushakaq Qaqam”